8 ວິທີ ຫາລາຍໄດ້ເພີ່ມຊ່ວງ “ໂຄວິດ-19”

     ການ​ແຜ່​ລະບາດ​ຂອງ​ເຊື້ອ​ໄວຣັສ “​ໂຄ​ວິດ-19” ​ໄດ້​ສົ່ງ​ຜົນ​ກະທົບ​ຕໍ່​ເສດຖະກິ​ດຢ່າງ​ໃຫຍ່​ຫລວງ, ພໍ່ຄ້າ​ແມ່​ຄ້າ​ຕ່າງ​ຂາຍ​ເຄື່ອງ​ບໍ່​ຄ່ອຍ​ໄດ້ ​ເພາະ​ປະຊາຊົນ​ບໍ່​ຄ່ອຍ​ຢາກ​ອອກ​ຈາກ​ເຮືອນ ​ເພາະ​ຢ້ານ​ຕິດ​ເຊື້ອ​ໄວຣັສ ທີ່​ສຳຄັນ​ພະນັກງານ​​ເອກະ​ຊົນ​ຫລາຍໆ​ແຫ່ງ​ຖືກ​ຫລຸດ​ເງິນ​ເດືອນ ຫລື ​ໃຫ້​ສະໝັກ​ໃຈ​ລາ​ພັກ ​ເຮັດ​ໃຫ້​ມີ​ລາຍ​ໄດ້​ບໍ່​ພຽງພໍ.

      ​ແຕ່​ຮູ້ ຫລື ບໍ່​ວ່າ ​ໃນ​ຍາມ​ວິ​ກິດ​ຍ່ອມ​ມີ​ໂອກາດ​ຢູ່​ສະ​ເໝີ, ມື້ນີ້ ພວກ​ເຮົາ​ຈະ​ນຳ​ສະ​ເໜີ​ອາຊີບ ຫລື ວິທີ​ການ​ສ້າງ​ລາຍ​ໄດ້​ເພີ່ມ​ໃນ​ຊ່ວງ​ວິ​ກິດ “​ໂຄ​ວິດ-19” ​ໃຫ້​ຄົນ​ທີ່​ຢາກ​ຫາ​ລາຍ​ໄດ້​ເພີ່ມ​ໃນ​ຊ່ວງ​ທີ່​ພັກ​ວຽກ​ຢູ່​ເຮືອນ.

  1. ຫຍິບ​ຜ້າ​ອັດ​ປາກ :

      ໄລຍະ​​ແຜ່​ລະບາດ​ຂອງ​ເຊື້ອ​ໄວຣັສ​ໂຄ​ວິດ-19 ​ເຊື່ອ​ວ່າ​ຜ້າ​ອັດ​ປາກ​ຂາດຕະຫລາດ​ແນ່ນອນ ​ເພາະ​ຄົນ​ແຫ່​ຊື້ມາ​ກັກ​ຕຸ​ນ​ເພື່ອ​ປ້ອງ​ກັນ​ໂຄ​ວິດ-19 ​ເຖິງ​ວ່າ​ຜ້າ​ອັດ​ປາກ​ຈະ​ຂາດຕະຫລາດ ​ແຕ່​ໜ່ວຍ​ງານ​ດ້ານ​ສາທາລະນະ​ສຸກ​ໃຫ້​ຄົນ​ທີ່​ບໍ່​ໄດ້​ປ່ວຍ​ໃຊ້​ຜ້າ​ອັດ​ປາກ​ແທນ​ໄດ້ ​ເຊິ່ງອາດ​ພໍ​ຈະ​ຊ່ວຍ​ປ້ອງ​ກັນ​ເຊື້ອ​ໂຣກ​ໄດ້​ລະດັບ​ໜຶ່ງ. ນີ້​ຈຶ່ງ​ເປັນ​ຊ່ອງ​ທາງ​ສ້າງ​ເງິນ​ສຳລັບ​ຄົນ​ທີ່​ມີ​ຝີ​ມື​ໃນ​ການ​ຫຍິບ, ມັກ​ປະດິດ​ຄິດ​ແຕ່ງ ຈະ​ໄດ້​ຜະລິດ​ຜ້າ​ອັດ​ປາກ​ອອກ​ມາ​ວາງ​ຂາຍ ​ເຊິ່ງຖ້າ​ຜະລິດ​ໄດ້​ຄຸນ​ນະພາ​ບ ​ແລະ ລາຄາ​ບໍ່​ແພງ​ເກີນ​ໄປ ຂາຍ​ອອກ​ລາຍ​ລວຍທັນທີ.

2. ຂາຍ​ເຄື່ອງ​ອອນ​ລາຍ

     ​ເຊັ່ນ: ຂາຍ​ຜ້າ​ອັດ​ປາກ, ຂາຍ​ອາຫານ, ສິນຄ້າ​ກ່ຽວ​ກັບສຸຂະພາບ ​ແລະ ອື່ນໆ ບໍ່​ຕ້ອງ​ລົງທຶນ​ຫລາຍ​ແຕ່​ສ້າງ​ກຳ​ໄລ​ດີ ​ເພາະ​ຢ້ານ​ຕິດ​ໂຣກ​ໂຄ​ວິດ-19 ບໍ່​ກ້າ​ອອກ​ໄປ​ຊື້​ເຄື່ອງ​ຕາມ​ຫ້າງ​ຮ້ານ ຫລື ຕະຫລາດ​ທີ່​ມີ​ຄົນ​ໜ​າ​ແໜ້ນ ຍິ່ງ​ເຮັດ​ໃຫ້ການ​ຂາຍ​ເຄື່ອງ​ອອນ​ລາຍ​ໄດ້​ຮັບ​ຄວາມ​ນິຍົມ.

3. ຮັບ-ສົ່ງ​ເອກະສານ

     ອາຊີບ​ສົ່ງ​ເຄື່ອງ-​ເອກະສານ ສ້າງ​ລາຍ​ໄດ້​ດີ​ໃນ​​ໄລ​ຍະ​ໂຄ​ວິດ-19 ​ເພາະ​ຫ້ອງການຕ່າງ​ຍັງ​ຕ້ອງ​ຕິດ​ຕໍ່​ຮັບ-ສົ່ງ​ເອກະສານ​ລະຫວ່າງ​ກັນ ​ແຕ່​ແທນ​ທີ່​ຈະ​ໃຫ້​ພະນັກງານ​ໃນ​ບໍລິສັດ​ຕົນ​ເອງ​ອອກ​ໄປ​ສົ່ງ ​ແລ້ວ​ສ່ຽງ​ຕິດ​ເຊື້ອ​ໂຣກກັບ​ມາ ຫລາຍ​ບໍລິສັດ​ຈຶ່ງ​ເລືອກ​ໃຊ້​ບໍລິການ​ຄົນ​ຮັບ-ສົ່ງ​ເຄື່ອງ ​ແລະ ​ເອກະສານ ບວກ​ກັບ​ໄລຍະ​ນີ້​ຍອດ​ຂາຍຂອງ​ຮ້ານ​ຄ້າ​ອອນ​ລາຍ​ຕ່າງໆ​ດີ ມີ​ພັດສະດຸ​ຕ້ອງ​ສົ່ງ​ຫລາຍ​ຂຶ້ນ ບໍລິສັດ​ຂົນ​ສົ່ງ​ຈຶ່ງ​ຕ້ອງການ​ຄົນ​ເພີ່ມ​ຂຶ້ນ​ເພື່ອ​ສົ່ງ​ເຄື່ອງ​ໃຫ້​​ໄວ​ຂຶ້ນ, ​ໃຜ​ທີ່​ກຳລັງ​ຊອກ​ຫາ​ໂອກາດ​ສ້າງ​ລາຍ​ໄດ້​ເພີ່ມ ລອງ​ສະໝັກ​ວຽກ​ນີ້​ເບິ່ງ.

4. ສົ່ງ​ອາຫານ​ເດ​ລິ​ເວີຣີ

     ກຳລັງ​ໄດ້​ຮັບ​ຄວາມ​ນິຍົມ​ຫລາຍ​ສຳລັບ​ເດ​ລິ​ເວີຣີ ຮັບ​ສົ່ງ​ອາຫານ, ຜ່ານ​ມາ​ຄົນ​ສ່ວນ​ຫລາຍ​ໃຊ້​ບໍລິການ​ສັ່ງ​ອາຫານ​ເດ​ລິ​ເວີຣີຢູ່​ແລ້ວ ພໍ​ມາ​ພົບ​ການ​ແຜ່​ລະບາດ​ຂອງ​ໄວຣັສ​ໂຄ​ວິດ-19 ຍິ່ງ​ບໍ່​ຢາກ​ອອກ​ໄປ​ທາງ​ນອກ​ໂດຍ​ບໍ່​ຈຳ​ເປັນ ​​ໂດຍ​ສະ​ເພາະ​​ໄປ​ນັ່ງ​ກິນ​ເຂົ້າຢູ່​ຮ້ານ ຈຶ່ງ​ເຮັດ​ໃຫ້​ຍອດ​ສັ່ງ​ອາຫານ​ອອນ​ລາຍ​ເພີ່ມ​ສູງ​ຂຶ້ນ​ຫລາຍ​ເທົ່າ ​ເຊິ່ງຖ້າ​ສະຖານະ​ການ​ບໍ່​ດີ​ຂຶ້ນ ວຽກ​ສົ່ງ​ອາຫານ​ເດ​ລິ​ເວີຣີຍັງ​ເຕີ​ບ​ໃຫຍ່​ໄດ້​ອີກ ວຽກ​ນີ້​ຈຶ່ງ​ໜ້າ​ສົນ​ໃຈ​ສຳລັບ​ຄົນ​ທີ່​ມີ​ເວລາ​ຫວ່າງ.

5. ຮັບ​ເຮັດ​ອາຫານ​ກ່ອງ​ຂາຍ

     ຫລາ​ຍຄົນ​ພະຍາຍາມ​ຫລີກ​ເວັ້ນການ​ເຂົ້າ​ໄປ​ໃນ​ບ່ອນ​ທີ່​ມີ​ຄົນ​ໜ​າ​ແໜ້ນ​ເຊັ່ນ: ຕະຫລາດ, ຮ້ານ​ອາຫານ, ຫ້າງ​ສັບພະ​ສິນຄ້າ ຫລື ບາງ​ຄົນ​ຫາ​ກໍ​ກັບ​ຈາກ​ຕ່າງປະ​ເທດ​ເລີຍ​ຕ້ອງ​ກັກ​ຕົນ​ເອງ 14 ວັນ ​ເພື່ອ​ຄວາມ​ປອດ​ໄພ ຈຶ່ງ​ສັ່ງ​ອາຫານ​ທາງ​ອອນ​ລາຍ ​ເຊິ່ງຖ້າ​ເຮົາ​ຮັບ​ເຮັດ​ເຂົ້າກ່ອງຈັດ​ສົ່ງ​ເດ​ລິ​ເວີຣີ​ໄດ້ ກໍ​ເປັນ​ຊ່ອງ​ທາງ​ຫາ​ລາຍ​ໄດ້​ທີ່​ໜ້າ​ສົນ​ໃຈ ຫລື ຖ້າ​ຮ້ານ​ໃດ​ຂາຍ​ອາຫານ​ຢູ່​ແລ້ວ ​ແຕ່​ຍັງ​ບໍ່​ເຄີຍ​ເຮັດ​ແບບ​ອອນ​ລາຍ ​ເປັນ​ການ​ສ້າງ​ລາຍ​ໄດ້​ອີກ​ທາງ​ໜຶ່ງ.

6. ຜະລິດ​ລາຍການ​ອອນ​ລາຍ

     ປົກກະຕິ​ແລ້ວຄົນ​ມັກ​ເບິ່ງ Youtube ​ເປັນ​ປະຈຳ ຍິ່ງ​ໄລຍະ​ການ​ແຜ່​ລະບາດ​ຂອງ​ໄວຣັສ​ໂຄ​ວິດ-19 ຄົນ​ສ່ວນ​ຫລາຍ​ຢາກ​ຢູ່​ແຕ່​ເຮືອນ​ຫລາຍ​ຂຶ້ນ ອາຊີບ​ນີ້​ກໍ​ມີ​ໂອກາດ​ນຳ​ສະ​ເໜີ​ວີ​ດີ​ໂອ​​ເຮັດ​ຫຍັງ​ກໍ​ໄດ້​ທີ່​ຕົນ​ເອງ​ມັກ ຫລື ​ໂຄສະນາ​ສິນຄ້າ, ຂາຍ​ເຄື່ອງ​ຕ່າງໆ ​ແລະ ອື່ນໆ ທ່ານ​ອາດ​ເປັນ​ຢູທຸບ​ເບີ​ທີ່​ມີ​ຄົນ​ຕິດຕາມ​ຈຳນວນ​ຫລາຍ​ໃນ​ພາຍຫລັງ​ກໍ​ໄດ້ ຫລື ຂາຍ​ສິນຄ້າ​ໄດ້​ເປັນ​ຈຳນວນ​ຫລາຍ.

7. ສອນ​​ເພີ່ມອອນ​ລາຍ

      ການ​ຮຽນ​​ເພີ່ມ​ທາງ​ນອກ​ອາດ​ເປັນ​ການ​ລວມກຸ່ມ​ທີ່​ສາມາດ​ຮັບ​ເຊື້ອ​ໄວຣັສ​ໄດ້​ງ່າຍ ຈຶ່ງ​ເຮັດ​ໃຫ້​ພໍ່​ແມ່​ຜູ້​ປົກຄອງ​ອາດ​ບໍ່​ສະບາຍ​ໃຈ ຖ້າ​ລູກ​ຫລານ​ຕ້ອງ​ອອກ​ໄປ​ຮຽນ​ເພີ່ມ​ຕາມ​ສະຖານ​ທີ່​ທາງ​ນອກ ​ເພາະ​ມີ​ຄວາມ​ສ່ຽງ​ຕໍ່​ການ​ຕິດ​ໂຣກ​ໂຄ​ວິດ-19 ຖ້າ​ທ່ານ​ມີ​ຄວາມ​ຮູ້​ສາມາດ​ສອນ​ເພີ່ມ​ທາງ​ອອນ​ລາຍ​ໄດ້ ອາດ​​ເປີດ​ສອນ​ອອນ​ລາຍ​ເປັນ​ຂອງ​ຕົນ​ເອງ​ໄດ້.

8. ຮັບຈ້າງ​​ເຮັດອະນາ​ໄມ

     ​ໄລຍະ​ການ​ແຜ່​ລະບາດ​ຂອງ​ໄວຣັສ​ໂຄ​ວິດ-19 ​ເລື່ອງ​ຄວາມ​ສະອາດ​ເປັນ​ເລື່ອງ​ສຳຄັນ​ຫລາຍ ສຳລັບ​ຫ້ອງການ, ຮ້ານ​ຄ້າ, ຮ້ານ​ອາຫານ ​ແລະ ສະຖານ​ທີ່​ຕ່າງໆ ​ເພາະ​ຖ້າ​ລູກ​ຄ້າ​ຢ້ານ​ໂຄ​ວິດ-19 ຈົນ​ບໍ່​ກ້າ​ຊື້​ເຄື່ອງ ບໍ່​ກ້າ​ອອກ​ຈາກ​ເຮືອນ ທຸລະ​ກິດ​ອາດ​ຢູ່​ບໍ່​ລອດ. ດັ່ງນັ້ນ ​ໃຜ​ທີ່​ມີ​ຄວາມ​ສາມາດ​ໃນ​ດ້ານ​ນີ້​ສາມາດ​ຫາ​ລາຍ​ໄດ້​ເສີມ​ຈາກ​ການ​ເຮັດອະນາ​ໄມ​ຕາມ​ສະຖານ​ທີ່​ຕ່າງໆ​ໄດ້.

error: Alert: Content is protected !!