ພັກ​ປະຊາຊົນ​ປະຕິວັດ​ລາວ​ໝັ້ນຍືນ !

ພັກ​ປະຊາຊົນ​ປະຕິວັດ​ລາວ​ໝັ້ນຍືນ ! - 1 11 - ພັກ​ປະຊາຊົນ​ປະຕິວັດ​ລາວ​ໝັ້ນຍືນ !
ພັກ​ປະຊາຊົນ​ປະຕິວັດ​ລາວ​ໝັ້ນຍືນ ! - Untitled design - ພັກ​ປະຊາຊົນ​ປະຕິວັດ​ລາວ​ໝັ້ນຍືນ !

ໂດຍ: ທິດ​ກໍ່າ

ຄື​ດັ່ງ​ທົ່ວ​ພັກ, ທົ່ວ​ກອງທັບ ​ແລະ ປະຊາຊົນ​ບັນດາ​ເຜົ່າ​ໄດ້​ຮັບ​ຮູ້​ນຳ​ກັນ​ແລ້ວ​ວ່າ​: ວັນ​ທີ 22 ​ມີນາ 1955 ​ເປັນ​ວັນ​ສ້າງຕັ້ງພັກ​ປະຊາຊົນ​ປະຕິວັດ​ລາວ. ມາ​ຮອດ​ປີ 2020 ນີ້ ຖື​ວ່າ​ພັກ​ເຮົາ​ມີ​ອາຍຸ​ໄດ້ 65 ປີ​ເຕັມ. ພັກ​ປະຊາຊົນ​ປະຕິວັດ​ລາວ​ມີ​ຕົ້ນກຳ​ເນີ​ດມາ​ຈາກ​ພັກ​ກອມ​ມູນິດ​ອິນດູຈີນ ​ເຊິ່ງກ່ອນ​ໜ້ານັ້ນ, ລາວ, ຫວຽດນາມ ​ແລະ ກຳປູ​ເຈຍ ​ໄດ້​ຕົກ​ເປັນ​ຫົວ​ເມືອງ​ຂຶ້ນຂອງ​ຈັກກະພັດ​ຝຣັ່ງທີ່​ໄດ້​ເຂົ້າມາ​ບຸກລຸກ​ຮຸກ​ຮານ​ລ່າ​ອານາ​ນິຄົມ ​ແລ້ວ​ຍຶດ​ເອົາ​ສາມ​ປະ​ເທດ​ອິນດູຈີນ​ເປັນ​ຫົວ​ເມືອງ​ຂຶ້ນ ​ເອີ້ນ​ວ່າ​ເຄືອ​ສະຫະພັນ​ອິນດູຈີນ​ຝຣັ່ງ (L’Indochine Francaise). ພາຍ​ໃຕ້​ລະບອບ​ການ​ປົກຄອງ​ຂອງຝຣັ່ງ ປະຊາຊົນ​ໃນ​ສາມ​ຊາດ​ອິນດູຈີນ​ໄດ້​ຖືກ​ກົດ​ຂີ່​ຂູດ​ຮີດ​ດ້ວຍ​ຫລາຍ​ຮູບ​ແບບ​ນາໆ​ປະການ ​ແລະ ​ແກ່ຍາວ​ມາ​ຫລາຍ​ສິບ​ປີ​ຈຶ່ງ​ກໍ່​ໃຫ້​ເກີດ​ມີ​ຂະ​ບວນການ​ຕໍ່ສູ້​ຕ້ານ​ຈັກກະພັດ​ຝຣັ່ງຢ່າງ​ແຂງ​ແຮງ. ຂະ​ບວນການ​ຕໍ່ສູ້​ປະຕິວັດ​ຕ້ານ​ຈັກກະພັດ​ຝຣັ່ງ​ໃນ​ເວລາ​ນັ້ນ​ແມ່ນ​ພາຍ​ໃຕ້​ການ​ຊີ້​ນຳ-ນຳພາ​ຈາກ​ພັກ​ກອມ​ມູນິດ​ອິນ​ດູ​ຈີນ ​ໂດຍ​ແມ່ນ​ປະທານ ​ໂຮ່ຈີ​ມິນ ​ເປັນ​ຜູ້​ສ້າງຕັ້ງຂຶ້ນ​ໃນ​ວັນ​ທີ 8 ກຸມພາ 1930.

      ຜ່ານ​ຂະ​ບວນການ​ຕໍ່ສູ້​ທີ່​ຍືດ​ເຍື້ອຍາວ​ນານ​ ​ໄດ້​ເຮັດ​ໃຫ້ການ​ປະຕິວັດ​ສາມ​ຊາດ​ອິນດູຈີນ​ຂະຫຍາຍຕົວ​ຢ່າງ​ບໍ່​ຢຸດ​ຢັ້ງ ອັນ​ເປັນ​ເງື່ອນ​ໄຂ​ໃຫ້​ມີ​ການ​ແຍກ​ພັກ​ອອກ​ເປັນ​ພັກ​ໃຜ​ພັກ​ມັນ​ຄື: ພັກ​ປະຊາຊົນ​ປະຕິວັດ​ລາວ, ພັກ​ກອມ​ມູນິດ​ຫວຽດນາມ ​ແລະ ພັກ​ປະຊາຊົນ​ກຳປູ​ເຈຍ. ສຳລັບ​ຜູ້ນຳ​ລາວ​ເຮົາ​ຄົນ​ທຳ​ອິດ​ທີ່​ໄດ້​ເຂົ້າຮ່ວມ​ໃນ​ຂະ​ບວນການ​ກອມ​ມູນິດ​ອິນດູຈີນ​ກ່ອນໝູ່​ກໍ​ແມ່ນ​ປະທານ ​ໄກສອນ ພົມວິຫານ ​ໂດຍ​ເລີ່​ມຈາກ​ການ​ເຂົ້າຮ່ວມ​ໃນ​ສະມາຄົມ​ຊາວ​ໜຸ່ມ​ກູ້​ຊາດ, ອົງການ​ປະຕິວັດ​ເຄື່ອນ​ໄຫວ​ປິດ​ລັບ, ​ເປັນ​ຄະນະ​ຕິດ​ຕໍ່​ ລາວ-ຫວຽດນາມ ​ເພື່ອ​ຈັດຕັ້ງອົງການ​ກູ້​ຊາດ​ຂອງ​ຄົນ​ລາວ​ທີ່ຢູ່​ຫວຽດນາມ ​ແລະ ​ໄດ້​ຖືກ​ມອບ​ໝາຍ​ໃຫ້​ຈັດ​ຕັ້ງກຳລັງ​ປະກອບ​ອາວຸດ ​ເພື່ອ​ສ້າງ​ຮາກ​ຖານ​ການ​ເມືອງ​ຢູ່​ເຂດ​ຕາ​ເວັນ​ອອກສຽງ​ເໜືອ​ຂອງ​ປະ​ເທດ​ລາວ​ບໍລິ​ເວນ​ລາວ​ຮຸ່ງ​ພຽງ​ສາ ​ແລະ ມອງ​ນ້ຳ​ແຂວງ​ຫົວພັນ​ໃນ​ປັດຈຸບັນ. ນີ້​ຄື​ຕົ້ນ​ເຫດ​ທີ່​ໄປ​ທີ່​ມາ​ແຫ່ງ​ການ​ກຳ​ເນີ​ດ​ເກີດ​ຂຶ້ນຂອງ​ພັກ​ປະຊາຊົນ​ປະຕິວັດ​ລາວ.

     ນັບ​ແຕ່​ມື້ມີ​ພັກ​ປະຊາຊົນ​ປະຕິວັດ​ລາວ​ໄດ້​ກຳ​ເນີ​ດ​ເກີດ​ຂຶ້ນ ​ແລະ ປະກາດ​ຢ່າງ​ເປັນ​ທາງ​ການ​ໃນ​ວັນ​ທີ 22 ມີນາ 1955 ການ​ປະຕິວັດ​ລາວ​ກໍ​ນັບ​ມື້​ເຕີບ​ໃຫຍ່​ຂຶ້ນ ທ່າມກາງ​ຂະ​ບວນວິວັດ​ແຫ່ງ​ການ​ຕໍ່ສູ້​ຢ່າງ​ມີ​ເປົ້າໝາຍ. ພັກ​ປະຊາຊົນ​ປະຕິວັດ​ລາວ​ໄດ້​ກາຍ​ເປັນ​ຫົວ​ສະໝອງ​ໃນ​ການຄົ້ນຄວ້າ, ຄົ້ນຄິດ​ຍຸດ​ທະ​ສາດ​ໃນ​ການ​ຕໍ່ສູ້​ປະຕິວັດ​ຕ້ານ​ຈັກກະພັດ​ຜູ້​ຮຸກ​ຮານ​ຢ່າງ​ເດັດດ່ຽວ​ຂ້ຽວຂາດ. ​ເປົ້າໝາຍ​ນຳພາ​ການ​ປະຕິວັດ​ຄື​ນຳພາ​ປະ​ເທດ​ຊາດ​ຫລຸດ​ພົ້ນອອກ​ຈາກ​ການ​ເປັນ​ເມືອງ​ຂຶ້ນຂອງ​ຈັກກະພັດ​ທີ່​ເຂົ້າມາ​ຮຸກ​ຮານ. ຜ່ານ​ຂະ​ບວນວິວັດ​ແຫ່​ງການ​ນຳພາ​ຕໍ່ສູ້​ຕ້ານ​ຈັກກະພັດ​ສອງ​ໂຕ​ໃຫຍ່​ຄື: ຝຣັ່ງ ​ແລະ ອາ​ເມ​ລິ​ກາ ​ເປັນ​ເວລາ​ຫລາຍ​ທົດ​ສະ​ວັດ​ຈຶ່ງ​ສາມາດ​ປົດ​ປ່ອຍປະ​ເທດ​ຊາດ​ອອກ​ຈາກ​ເງື່ອມມື​ຂອງ​ສັດຕູ​ໃນ​ປີ 1975.

ພັກ​ປະຊາຊົນ​ປະຕິວັດ​ລາວ​ໝັ້ນຍືນ ! - Wave100S AD to Website 2020 0 - ພັກ​ປະຊາຊົນ​ປະຕິວັດ​ລາວ​ໝັ້ນຍືນ !

     ​ໃນ​ໄລຍະ​ປົກ​ປັກ​ຮັກສາ ​ແລະ ສ້າງສາ​ປະ​ເທດຊາດ​ນັບ​ແຕ່​ປີ 1975 ​ເປັນຕົ້ນມາ​ຮອດ​ປັດຈຸບັນ ພັກ​ເຮົາ​ໄດ້​ກຳ​ອຳນາດ ​ແລະ ​ໄດ້​ນຳພາ​ສ້າງ​ບ້ານ​ເມືອງ​ໃຫ້​ຈະ​ເລີ​ນຮຸ່ງ​ເຮືອງ​ຢ່າງ​ບໍ່​ຢຸດ​ຢັ້ງ. ປັດຈຸບັນ ສາທາລະນະ​ລັດ ປະຊາທິປະ​ໄຕ ປະຊາຊົນ​ລາວ ພວມ​ກ້າວ​ເດີນ​ໄປ​ຕາມ​ເສັ້ນທາງ​ອັນ​ສະຫງ່າ​ງາມ​ແຫ່ງ​ຍຸກ​ສະ​ໄໝ​ຕາມ​ເສັ້ນທາງ​ສັງຄົມ​ນິຍົມທີ່​ປະຊາຊົນ​ໄດ້​ຕັດສິນ​ໃຈ​ເລືອກ. ​ໄລຍະ 65 ປີ​ແຫ່ງ​ການ​ນຳພາ​ຂອງ​ພັກ​ເປັນ​ໄລຍະ​ແຫ່ງ​ການ​ທົດ​ສອບ​ຄວາມ​ແຂ່ງ​ແກ່ນ​ແຫ່ງ​ການ​ນຳພາ​ຂອງ​ພັກ, ​ເປັນ​ໄຊຊະນະ​ທີ່​ບໍ່​ເຄີຍ​ມີ​ມາ​ໃນ​ປະຫວັດສາດ​ຂອງ​ຊາດ​ລາວ​ກ່ອນ​ໜ້ານັ້ນສາມ​ສີ່​ຮ້ອຍ​ປີຜ່ານມາ.

      ​ເຖິງ​ຢ່າງ​ໃດ​ກໍ​ດີ, ອີງ​ໃສ່​ຄວາມ​ຮຽກຮ້ອງ​ຕ້ອງການ​ຂອງ​ສະພາບ​ການ​​ໃໝ່ ກໍ​ຄື​ການ​ປ່ຽນ​ແປງ​ຂອງ​ປະ​ເທດ​ຊາດ​ໃນ​ເງື່ອນ​ໄຂ​ສະພາບ​ການ​ຂອງ​ໂລກ​ມີ​ການ​ຫັນປ່ຽນ​ຢ່າງ​ໄວວາ ​ໂດຍ​ສະ​ເພາະ​ແມ່ນ​ການ​ຫັນປ່ຽນ​ຂອງ​ດິນ​ຟ້າ​ອາກາດ, ​ເສດຖະກິດ-ສັງຄົມ​ຂອງ​ໂລກ ​ແລະ ພາກພື້ນ, ​ໄພ​ທຳ​ມະ​ຊາດ, ​ໂຣຄາ​ພະຍາດ​ຕ່າງໆ​ທີ່​ພວມ​ມາ​ທຳລາຍ​ເຜົາ​ຜານ​ມະນຸດ​ໃນ​ທົ່ວ​ໂລກ. ບັນດາ​ສິ່ງ​ກີດຂວາງ, ປາກົດການ​ຫຍໍ້​ທໍ້​ຕ່າງໆ​ພາຍ​ໃນ​ບ້ານ​ເມືອງ​ກໍ​ເຊື່ອ​ໝັ້ນວ່າ​ພາຍ​ໃຕ້​ການ​ນຳພາ​ຂອງ​ພັກ​ປະຊາຊົນ​ປະຕິວັດ​ລາວ​ຈະ​ສາມາດ​ຜ່ານ​ຜ່າ​ວິ​ກິດ​ຕ່າງໆ​ນີ້​ໄດ້​ຢ່າງ​ສິ້ນ​ເຊີງ. ພາລະກິດ​ຂອງ​ປະ​ເທດ​ຊາດ, ຄວາມ​ຫວັງ​ຂອງ​ປະຊາຊົນ​ລາວ​ບັນດາ​ເຜົ່າ​ຂໍ​ຝາກ​ໄວ້​ນຳ​ພັກ​ປະຊາຊົນ​ປະຕິວັດ​ລາວ​ຜູ້​ຈັດຕັ້ງນຳພາ​ທຸກ​ໄຊຊະນະຂອງ​ການ​ປະຕິວັດ​ລາວ. ພັກ​ປະຊາຊົນ ປະຕິວັດ​ລາວ ຜູ້​ມີ​ກຽດ​ສະຫງ່າ​ໝັ້ນຍືນ !.

ພັກ​ປະຊາຊົນ​ປະຕິວັດ​ລາວ​ໝັ້ນຍືນ ! - WhatsApp Image 2020 05 27 at 5 - ພັກ​ປະຊາຊົນ​ປະຕິວັດ​ລາວ​ໝັ້ນຍືນ !
ພັກ​ປະຊາຊົນ​ປະຕິວັດ​ລາວ​ໝັ້ນຍືນ ! - WhatsApp Image 2020 05 27 at 5 - ພັກ​ປະຊາຊົນ​ປະຕິວັດ​ລາວ​ໝັ້ນຍືນ !
error: Alert: ເນື້ອຫາຂ່າວມີລິຂະສິດ !!