ນຳ​ໃຊ້​ວິ​ກິດ​ເປັນ​ເຂັມທິດ​ສູ່​ການ​ປ່ຽນ​ແປງ

ນຳ​ໃຊ້​ວິ​ກິດ​ເປັນ​ເຂັມທິດ​ສູ່​ການ​ປ່ຽນ​ແປງ - 2 12 - ນຳ​ໃຊ້​ວິ​ກິດ​ເປັນ​ເຂັມທິດ​ສູ່​ການ​ປ່ຽນ​ແປງ
ນຳ​ໃຊ້​ວິ​ກິດ​ເປັນ​ເຂັມທິດ​ສູ່​ການ​ປ່ຽນ​ແປງ - 174233 - ນຳ​ໃຊ້​ວິ​ກິດ​ເປັນ​ເຂັມທິດ​ສູ່​ການ​ປ່ຽນ​ແປງ

ໂດຍ: ຈານແຫຍ່    

ວິ​ກິດ ບໍ່​ວ່າ​ນ້ອຍ ຫລື ​ໃຫຍ່ ​ເກີດ​ຂຶ້ນ​ໃນ​ສະ​ເພາະ​ພື້ນທີ່ ຫລື ​ແຜ່​ລາມ​ໄປ​ໃນ​ວົງ​ກວ້າງ ກໍ​ລ້ວນ​ແຕ່​ເປັນ​ລາງ​ຝັນ​ຮ້າຍ ​ເຊິ່ງບໍ່​ມີ​ມະນຸດ​ໜ້າ​ໃດ​ໝາຍ​ປອງ​ຢາກ​ປະສົບ​ພົບ​ພໍ້. ວິ​ກິດການ​ເສດຖະກິດ​ໂລກ​ປີ 1929 ​ໄດ້​ເຮັດ​ໃຫ້​ອົດ​ຢາກ​ປາກ​ແຫ້ງ, ​ເປັນ​ຊະ​ນວນ​ກໍ່​ເກີດ​ສະພາບ​ບໍ່​ສະຫງົບ​ໃນ​ທຸກ​ທະວີບ, ວິ​ກິດ​ການ​ການ​ເງິນ​ຢູ່​ອາຊີ ​ໃນ​ປີ 1997 (ຟອງ​ສະບູ) ​ໄດ້​ສັ່ນ​ສະ​ເທືອ​ນສະ​ຖາ​ບັນ​ການ​ເງິນ ​ແລະ ກົດ​ໜ່ວງ​ຈັງຫວະ​ການ​ພັດທະນາ​ໃຫ້​ຊ້າ​ລົງ, ວິ​ກິດ​ການ​ນ້ຳມັນ​ເຊື້ອ​ໄຟ​ທີ່​ເກີດ​ຈາກ​ຄວາມ​ບໍ່​ສະຫງົບ​ໃນ​ບັນດາ​ປະ​ເທດ​ເຈົ້າພໍ່​ຜະລິດ​ນ້ຳມັນ​ໃນ​ຊຸມ​ຕົ້ນປີ​ຂອງ​ສະຫັດ​ສະ​ວັດ​ໃໝ່​ນັ້ນກໍ​ໄດ້​ສົ່ງ​ຜົນ​ໃຫ້​ລາຄາ​ສິນຄ້າ, ຄ່າ​ຂົນ​ສົ່ງ​​ແພງ​ຂຶ້ນ, ​ແຕ່​ບັນດາ​ທ່ານ​ຄິດ​ຄື ຈານ​ແຫຍ່ ບໍ່​ວ່າ ​ໃນ​ແຕ່​ລະວິ​ກິດ​ທີ່​ເກີດ​ຂຶ້ນນັ້ນ ພວກ​ເຮົາ​ສາມາດ​ຖອດ​ໄດ້​ຫລາຍ​ບົດຮຽນ​ສຳຄັນ​ທີ່​ສາມາດ​ໃຫ້​ປະ​ໂຫຍ​ດມະຫາສານ​ແກ່​ຄົນ​ເຮົາ ທະ​ແນມ​ແຕ່​ຮູ້​ຈັກ​ນຳ​ໃຊ້. ວິ​ກິດ​ການ​ການ​ເງິນ​ອາຊີ ​ໃນ​ປີ 1997 ​ໄດ້​ກໍ່​ໃຫ້​ເກີດ​ມີ​ການ​ລວມຕົວ​ດ້ານ​ເສດຖະກິດ​ເປັນ​ກຸ່ມ​ເປັນ​ກ້ອນ ​ເພື່ອ​ຊຸກຍູ້​ຂະ​ບວນການ​ການ​ຄ້າ​ເສລີ​ຂຶ້ນ. AEC ຫລື ປະຊາ​ຄົມ​ເສດຖະກິດ​ອາ​ຊຽນ ກໍ​ອາ​ໄສ​ແຮງ​ບັນດານ​ໃຈ​ຈາກ​ວິ​ກິດ​ການ​ດັ່ງກ່າວ​ຫັ້ນລະ. ວິ​ກິດ​ການ​ນ້ຳມັນ​ເຊື້ອ​ໄຟ​ນັ້ນ​ໄດ້​ຊຸກຍູ້​ໃຫ້​ຊາວ​ໂລກ​ຊອກ​ທາງ​ອອກດ້ວຍ​ການ​ຄິດ​ຄົ້ນພະລັງງານ​ທາງ​ເລືອກ. ຢູ່​ບ້ານ​ເຮົາ​ກໍ​ມີ​ຂະ​ບວນປູກ​ຕົ້ນໝາກ​ເຍົາ​ເປັນ​ແຖວ ​ເພື່ອ​ສະກັດ​ເອົາ​ນ້ຳມັນ​ມາ​ໃຊ້​ແທນ​ນ້ຳມັນ​ຈາກ​ພາກພື້ນຕາ​ເວັນ​ອອກ​ກາງ. ​ເຖິງ​ວ່າ​ທາງ​ເລືອກ​ທີ່​ວ່າ​ນີ້​ບໍ່​ຍືນ​ຍົງ ​ແຕ່​ມັນ​ກໍ​ເປັນ​ເລື່ອງ​ດີ, ດີ​ບ່ອນ​ວ່າ​ເຮັດ​ໃຫ້​ຄົນ​ເຮົາ​ມີ​ແນວ​ຄິດ​ຊອກ​ເພິ່ງ​ຕົນ​ເອງ ກຸ້ມ​ຕົນ​ເອງ. ດຽວ​ນີ້​ພະລັງງານ​ທາງ​ເລືອກ​ໄດ້​ກາຍ​ເປັນ​ກຸນ​ແຈ​ໃໝ່ ​ເພື່ອ​ແກ້​ໄຂ​ບັນຫາ​ໂລກ​ຮ້ອນ​ທີ່​ເຂົ້າຂັ້ນວິ​ກິດ​ຢູ່​ໃນ​ປັດຈຸບັນ.

     ພະຍາດ​ປອດ​ອັກ​ເສບ​ສາຍ​ພັນ​ໃໝ່ (Corona Virus) ຫລື ​ເອີ້ນ​ກັນ​ຕິດ​ປາກ​ວ່າ: ​ໂຄ​ວິດ-19 (COVID-19) ທີ່​ລະບາດ​ແຜ່​ລາມ​ໄປ​ທົ່ວ​ໂລກ​ໂດຍ​ບໍ່​ຮູ້​ວັນ​ສິ້ນສຸດ​ນີ້ ກໍ​ໄດ້​ບັງຄັບ​ໃຫ້​ທົ່ວ​ໂລກ​ຄິດ​ຄົ້ນວິທີ​ປ້ອງ​ກັນ​ດ້ວຍ​ຫລາຍ​ວິທີ​ການ ​ແລະ ມາດ​ຕະການ. ຢູ່​ບ້ານ​ເຮົາ​ມາດ​ຕະການ​ກັນ covid-19 ທີ່​ຄວນ​ແປ​ຮູບ​ເປັນ​ບົດຮຽນ, ​ເປັນ​ມິ​ຕິ​ໃໝ່​ໃນ​ການ​ພັດທະນາ​ທັດສະນະ​ສະຕິ​ຂອງ​ຄົນ​ລາວ​ເຮົາ​ຕະຫລອດ​ໄປ ກໍ​ຄື​ການ​ຈຳກັດ​ການ​ຊຸມ​ແຊວ, ການຈັດ​ງານ​ດອງ​ເອິກ​ກະ​ເຫລີ​ກ​ໃຫຍ່​ໂຕ, ການຈັດ​ງານ​ລ້ຽງ​ໂດຍ​ຢຶດ​ເອົາ​ຈຳນວນ​ແຂກ​ເຊີນ​ເປັນ​ມາດຖານ ​ເພື່ອ​ຊູ​ກຽດ, ຊູ​ໜ້າ​ເຊີດ​ຕາ. ຈານ​ແຫຍ່ ດີ​ໃຈ​ທີ່​ມາດ​ຕະການ​ຫ້າມ​ຈັດ​ງານ​ທີ່​ເຕົ້າ​ໂຮມ​ຄົນ​ຈຳນວນ​ຫລວງຫລາຍ​ນີ້​ໄດ້​ຮັບ​ການ​ຕ້ອນຮັບ​ດ້ວຍ​ຄວາມ​ເຕັມ​ໃຈ​ຈາກ​ຄົນ​ລາວ​ທຸກໆ​ຄົນ. ​ເທົ່າ​ທີ່​ຮູ້ ຫລາຍໆ​ງານ​ດອງ​​ໄດ້​ຖືກ​ເລື່ອນ (​ເຊິ່ງ​ເມື່ອ​ກ່ອນ​ຍາກ​ທີ່​ຈະ​ເລື່ອນ​ໄດ້ ​ເພາະ​ຂໍ້​ອ້າງ​ວ່າ​ໄດ້​ເລືອກ​ມື້ດີ​ແລ້ວ) ຫລາຍ​ງານ​ດອງ​ໄດ້​ຫລຸດ​ຈຳນວນ​ແຂກ​ເຊີນ​ຈາກ 500-600 ຄົນ ມາ​ເປັນ 50 ຄົນ ​ແລະ ຍິນ​ດີ​ຈັດ​ຢູ່​ຂອບ​ເຮືອນ​ໃຜ​ເຮືອນ​ລາວ. ມີ​ເຈົ້າພາບ​ງານ​ດອງ​ຈຳນວນ​ໜຶ່ງ​ບອກ ຈານ​ແຫຍ່ “ຂໍ​ຈັດ​ແບບ 3 ​ເຖົ້າ 4 ​ແກ່​ຢູ່​ກັບ​ເຮືອນ ​ເພາະ​ຖ້າ​ຈັດ​ຢູ່​ຮ້ານ​ອາຫານ ຢ້ານ​ບໍ່​ປອດ​ໄພ !”.

ນຳ​ໃຊ້​ວິ​ກິດ​ເປັນ​ເຂັມທິດ​ສູ່​ການ​ປ່ຽນ​ແປງ - Wave100S AD to Website 2020 0 - ນຳ​ໃຊ້​ວິ​ກິດ​ເປັນ​ເຂັມທິດ​ສູ່​ການ​ປ່ຽນ​ແປງ

     ທ່ານ​ຜູ້​ອ່ານ​ເຫັນ​ບໍລະ, ​ເມື່ອ​ຮອດ​ຄາວ​ຈຳ​ເປັນ​ມາ ພວກ​ເຮົາ​ເຮັດ​ໄດ້, ບໍ່​ມີ​ໃຜ​ຂັດຂ້ອງ. ຈານ​ແຫຍ່ ຢາກ​ໃຫ້​ບົດຮຽນ​ນີ້​ຍືນ​ຍົງ​ທັງ​ໃນ​ໄລຍະ​ວິ​ກິດ ​ແລະ ທັງ​ວິ​ກິດ​ໂຄ​ວິດ-19 ​ແລະ ກາຍ​ເປັນ​ສະພາບ​ສູ່​ການ​ປ່ຽນ​ແປງ​ໃໝ່​ທີ່​ປາສະຈາກ​ການ​ຈ່າຍ​ຟຸມ​ເຟືອຍ​ພຽງ​ເພື່ອ​ໜ້າ​ເພື່ອ​ຕາ, ​ເພື່ອ​ອວດ​ຮັ່ງ​ອວດ​ມີ ຄື​ທີ່​ເຄີຍ​ເປັນ​ມາ.

ນຳ​ໃຊ້​ວິ​ກິດ​ເປັນ​ເຂັມທິດ​ສູ່​ການ​ປ່ຽນ​ແປງ - WhatsApp Image 2020 05 27 at 5 - ນຳ​ໃຊ້​ວິ​ກິດ​ເປັນ​ເຂັມທິດ​ສູ່​ການ​ປ່ຽນ​ແປງ
error: Alert: ເນື້ອຫາຂ່າວມີລິຂະສິດ !!