ຕັ້ງໜ້າ​ເສີມ​ຂະຫຍາຍ​ມູນ​ເຊື້ອຂອງ​ພັກ

ຕັ້ງໜ້າ​ເສີມ​ຂະຫຍາຍ​ມູນ​ເຊື້ອຂອງ​ພັກ - 1 13 - ຕັ້ງໜ້າ​ເສີມ​ຂະຫຍາຍ​ມູນ​ເຊື້ອຂອງ​ພັກ
ຕັ້ງໜ້າ​ເສີມ​ຂະຫຍາຍ​ມູນ​ເຊື້ອຂອງ​ພັກ - AGL banner - ຕັ້ງໜ້າ​ເສີມ​ຂະຫຍາຍ​ມູນ​ເຊື້ອຂອງ​ພັກ

ໂດຍ: ທິດ​ກໍ່າ

ວັນ​ສ້າງຕັ້ງພັກ​ປະຊາຊົນ​ປະຕິວັດ​ລາວ ຄົບຮອບ 65 ປີ (22/3/1955-22/3/2020) ຫາ​ກໍ​ຜ່ານ​ພົ້ນ​ໄປ​ບໍ່ພໍ​ເທົ່າ​ໃດ​ວັນ. ຕໍ່​ວັນ​ປະຫວັດສາດ​ດັ່ງກ່າວ, ທົ່ວ​ພັກ, ທົ່ວ​ກອງທັບ ​ແລະ ປວງ​ຊົນ​ລາວ​ທັງ​ຊາດ​ຕ່າງ​ກໍ​ມີ​ຄວາມ​ຍິນ​ດີ, ປິ​ຕິ​ຊົມ​ຊື່ນ​ທີ່​ເຫັນ​ວ່າ​ພັກ​ເຮົາ​ໄດ້​ມີ​ຄຸນງາມຄວາມດີ​ຕໍ່​ປະ​ເທດ​ຊາດ​ບ້ານ​ເມືອງ ນັບ​ແຕ່​ມື້ກຳ​ເນີ​ດຈົນ​ມາ​ຮອດ​ປັດຈຸບັນ. ​ເວົ້າ​ໄດ້​ວ່າ ​ໃນ​ພາລະກິດ​ແຫ່ງ​ການ​ນຳພາ​ຂອງ​ພັກ​ເຮົາ​ໄດ້​ຜ່ານ​ພົ້ນ​ໄປ​ສອງ​ຍຸກ​ສອງ​ສະ​ໄໝ​ ​ເປັນຕົ້ນຍຸກ​ທີ​ໜຶ່ງ​ແມ່ນ​ຍຸກ​ສົງຄາມ​ເອີ້ນ​ວ່າ​ຍຸກ​ເຮັດ​ການ​ຕໍ່ສູ້​ປະຕິວັດ​ຕ້ານ​ການ​ຮຸກ​ຮານ​ຂອງ​ຈັກກະພັດ​ຕ່າງ​ດ້າວທີ່​ເຂົ້າມາ​ຮຸກ​ຮານ. ​ເປົ້າໝາຍ​ຂອງ​ການ​ປະຕິວັດ​ກໍ​ເພື່ອ​ປົດ​ປ່ອຍປະ​ເທດ​ຊາດ​ອອກ​ຈາກ​ການ​ເປັນ​ຫົວ​ເມືອງ​ຂຶ້ນຂອງ​ຕ່າງ​ຊາດ ຄື​ຈັກກະພັດ​ຝຣັ່ງ ​ແລະ ອາ​ເມ​ລິ​ກາ​ຈົນ​ຮອດ​ປີ 1975 ຈຶ່ງ​ສາມາດ​ປົດ​ປ່ອຍປະ​ເທດ​ຊາດ​ໄດ້​ຢ່າງ​ສົມບູນ. ສ່ວນວ່າ​ຍຸກ​ທີ​ສອງ​ນັ້ນ​ແມ່ນ​ນັບ​ແຕ່​ປີ 1975 ​ເປັນຕົ້ນມາ​ຮອດ​ປັດຈຸບັນ​ເອີ້ນ​ວ່າ​ຍຸກ​ສ້າງສາ ​ແລະ ພັດທະນາ​ປະ​ເທດ​ຊາດ.

      ​ໃນ​ຍຸກ​ສົງຄາມ​ນັ້ນ, ພັກ​ເຮົາ​ໄດ້​ນຳພາ​ຕໍ່ສູ້​ຢ່າງ​ລະ​ອິດ​ລະ​ອ້ຽວ, ​ເດັດດ່ຽວ​ຂ້ຽວຂາດ ​ແລະ ​ເຮັດ​ທຸກ​ສິ່ງ​ທຸກ​ຢ່າງ​ເພື່ອ​ເປັນ​ແກນ​ນຳ​ໃນ​ພາລະກິດ​ຕໍ່ສູ້​ປະຕິວັດ, ​ເປັນ​ບ່ອນ​ອີງ ​ແລະ ​ເສົາຄ້ຳອັນ​ແໜ້ນ​ແກ່ນ​ໃຫ້​ຂະ​ບວນການ​ຕໍ່ສູ້​ກັບ​ສັດຕູ​ຂອງ​ຊາດ. ອັນ​ສຳຄັນ​ກວ່າ​ໝູ່​ໝົດ​ແມ່ນ​ເປັນ​ຜູ້​ວາງ​ແນວທາງ, ວາງ​ເປົ້າໝາຍ​ຍຸດ​ທະ​ສາດ​ໃນ​ການ​ຕໍ່ສູ້​ປະຕິວັດ​ຢ່າງຮອບດ້ານ. ຕະຫລອດ​ໄລຍະ 30 ກວ່າ​ປີ​ໝາກຜົນ​ທີ່​ໄດ້​ຮັບ​ໃນ​ການ​ຕໍ່ສູ້​ປະຕິວັດ​ນັ້ນ ກໍ​ຄື​ສາມາດ​ປົດ​ປ່ອຍປະ​ເທດ​ຊາດ, ລຶບລ້າງ​ລະບອບ​ສັກ​ດີ​ນາ, ສ້າງຕັ້ງລະບອບ​ໃໝ່​ສັງຄົມ​ນິຍົມ​ສະຖາປະນາ​ປະ​ເທດລາວ​ເປັນ​ສາທາລະນະ​ລັດ ປະຊາທິປະ​ໄຕ ປະຊາຊົນ​ລາວ ຢ່າງ​ສະຫງ່າ​ຜ່າ​ເຜີຍ.

     ​ໃນ​ຍຸກ​ບ້ານ​ເມືອງ​ເລັ່ງລັດ​ສ້າງສາ​ພັດທະນາ, ພັກ​ເຮົາ​ກໍ​ໄດ້​ວາງ​ແນວທາງ​ທີ່​ສອດຄ່ອງ​ກັບ​ຍຸກ​ສະ​ໄໝ​ແຕ່ລະ​ໄລຍະ ​ເປັນຕົ້ນ​ເລີ່​ມຈາກ​ການ​ປົກ​ປັກ​ຮັກສາ​ປະ​ເທດ​ຊາດ​ໄປ​ຄຽງ​ຄູ່​ກັບ​ການ​ຮຳບາດ​ແຜ​ສົງຄາມ, ຫັນ​ເສດຖະກິດ​ທຳ​ມະ​ຊາດ​ໄປ​ສູ່​ເສດຖະກິດ​ສິນຄ້າ​ພາຍ​ໃຕ້​ຮູບ​ການ​ທຶນ​ນິຍົມ​ແຫ່ງ​ລັດ​ກ້າວ​ສູ່​ແນວທາງ​ເສດຖະກິດ​ໃໝ່ທີ່​ມີ​ຫລາຍ​ຮູບ​ການ​ກຳມະສິດ, ຫລາຍ​ຮູບ​ການຈັດຕັ້ງ, ຫລາຍ​ລະດັບ​ເຕັກນິກ ​ແລະ ຫລາຍ​ຂະໜາດ​ທີ່​ແຕກ​ຕ່າງ​ກັນ. ຜ່ານ​ຂະ​ບວນວິວັດ​ດັ່ງກ່າວ​ໄດ້​ເຮັດ​ໃຫ້​ສາທາລະນະລັດ ປະຊາທິປະ​ໄຕ ປະຊາຊົນ​ລາວ ຂອງ​ພວກ​ເຮົາ​ມີ​ການ​ພັດທະນາ ​ແລະ ຈະ​ເລີ​ນຮຸ່ງ​ເຮືອງ​ກ້າວ​ກະ​ໂດດ​ຂັ້ນບຸກທະລຸ​ໄປ​ໜ້າ​ຢ່າງ​ບໍ່​ຢຸດ​ຢັ້ງ.

ຕັ້ງໜ້າ​ເສີມ​ຂະຫຍາຍ​ມູນ​ເຊື້ອຂອງ​ພັກ - Wave100S AD to Website 2020 0 - ຕັ້ງໜ້າ​ເສີມ​ຂະຫຍາຍ​ມູນ​ເຊື້ອຂອງ​ພັກ

      ຕະຫລອດ​ໄລຍະ 45 ປີ​ແຫ່ງ​ການ​ປົກ​ປັກ​ຮັກສາ ​ແລະ ສ້າງສາ​ປະ​ເທດ​ຊາດ​ເຫັນ​ວ່າ​ເສດຖະກິດ​ຂອງ​ຊາດ​ໄດ້​ຂະຫຍາຍຕົວ​ຢ່າງ​ຕໍ່​ເນື່ອງ, ລະບົບ​ການ​ເມືອງ​ມີ​ສະຖຽນ​ລະ​ພາບ​ໜັກ​ແໜ້ນ​ໝັ້ນຄົງ, ປະ​ເທດ​ຊາດ​ມີ​ຄວາມ​ສະຫງົບ​ປອດ​ໄພ​ໂດຍ​ພື້ນຖານ, ສັງຄົມ-ວັດທະນະທຳ​ໄດ້​ຮັບ​ການ​ປັບປຸງ ​ແລະ ກໍ່ສ້າງ​ໃຫ້​ຈະ​ເລີ​ນຮຸ່ງ​ເຮືອງ ​ແລະ ກ້າວ​ໄປ​ໜ້າ​ເລື້ອຍໆ. ຈາກ​ຕົວ​ເລກ​ການ​ຂະຫຍາຍຕົວ​ທາງ​ດ້ານ​ເສດຖະກິດ​ໃນ​ຊ່ວງ 5 ປີ ຫລື 10 ປີຜ່ານມາ ອັດຕາ​ສະ​ເລ່ຍ​ແຕ່ 5-6% ຕໍ່​ປີ. ການ​ລົງທຶນ​ພາຍ​ໃນ ​ແລະ ຕ່າງປະ​ເທດ​ກໍ​ນັບ​ມື້​ເພີ່ມ​ຂຶ້ນ, ບັນດາ​ໂຄງການ​ໃຫຍ່ໆ ​ເປັນຕົ້ນ​ເຂດ​ເສດຖະກິດ​ພິ​ເສດ, ​ເສດຖະກິດ​ສະ​ເພາະ, ​ໂຄງການ​ສ້າງ​ເຂື່ອນ​ພະລັງ​ນ້ຳ​ເລັ່ງລັດ​ພັດທະນາ ​ແລະ ​ໄດ້​ສຳ​ເລັດ​ໄປ​ແລ້ວ​ຫລາຍ​ສິບ​ແຫ່ງ, ບັນດາ​ພື້ນຖານ​ໂຄງ​ລ່າງ​ຖະໜົນ​ຫົນທາງ, ຕຶກ​ອາຄານ​ຫ້າງ​ຮ້ານ, ​ໂຮງຮຽນ, ​ໂຮງໝໍ​ກໍ​ພວມ​ເລັ່ງລັດ​ພັດທະນາ​ໃຫ້​ທັນ​ຍຸກ​ທັນ​ສະ​ໄໝ, ລະບົບ​ການ​ສຶກສາ-ສາ​ທາ​ກໍ​ນັບ​ມື້ມີການ​ພັດທະນາ​ນັບ​ແຕ່​ຂັ້ນທ້ອງ​ຖິ່ນ​ຮາກ​ຖານ​ຂຶ້ນຮອດ​ຂັ້ນສູນ​ກາງ. ອີກ​ບໍ່​ນານ​ເກີນ​ລໍ​ກໍ​ຈະ​ໄດ້​ພ້ອມ​ກັນ​ສະ​ເຫລີ​ມສະຫລອງ​ຜົນສຳ​ເລັດ​ການ​ກໍ່ສ້າງ​ເສັ້ນທາງ​ລົດ​ໄຟ​ຄວາມ​ໄວ​ສູງ ລາວ-ຈີນ ​ແລະ ຈະ​ເປີດ​ນຳ​ໃຊ້​ຢ່າງ​ເປັນ​ທາງ​ການ​ໃນ​ໂອກາດ​ວັນຊາດ​ທີ 2 ທັນວາ 2021.

     ​ເວົ້າ​ໄດ້​ວ່າ, ມາ​ຮອດ​ຍຸກ​ນີ້​ຖານະ​ບົດບາດ​ຂອງ​ປະ​ເທດ​ຊາດ​ບ້ານ​ເມືອງ​ເຮົາ​ໄດ້​ກ້າວ​ຂຶ້ນສູ່​ເວທີ​ພາກພື້ນ ​ແລະ ສາກົນ​ຢ່າງ​ກວ້າງຂວາງ ຖ້າ​ທຽບ​ໃສ່​ຍຸກ​ເກົ່າ​ໃນ​ລະບອບ​ລາຊາທິປະ​ໄຕ​ປົກຄອງ​ບ້ານ​ເມືອງ. ປັດຈຸບັນ​ລາວ​ເຮົາ​ມີ​ສາຍ​ພົວພັນ​ການ​ທູດ​ກັບ 140 ກວ່າ​ປະ​ເທດ. ນອກຈາກ​ນັ້ນ ກໍ​ໄດ້​ເຂົ້າຮ່ວມ​ເປັນ​ພາຄີ​ຂອງ​ອົງການ​ຈັດຕັ້ງສາກົນ​ທີ່​ກ້າວໜ້າ ​ແລະ ພັດທະນາ​ໃນ​ພາກພື້ນ ​ແລະ ​ໃນ​ໂລກ ​ເປັນຕົ້ນກຸ່ມ​ອາ​ຊຽນ, ອົງການ​ການ​ຄ້າ​ໂລກ, ອົງການ​ສິດທິ​ມະນຸດ​ອື່ນໆ. ຈາກ​ການ​ພົວພັນ​ທີ່​ກວ້າງຂວາງ​ຕາມ​ນະ​ໂຍບາຍ​ຍຸດ​ທະ​ສາດ​ຂອງ​ພັກ​ຈຶ່ງ​ໄດ້​ຮັບ​ການ​ຮ່ວມ​ມື​ຊ່ວຍ​ເຫລືອ, ສະໜັບສະໜູນຈາກ​ເພື່ອນ​ມິດ ​ແລະ ສາກົນ​ເປັນ​ຢ່າງ​ດີ. ຕົວຢ່າງ​ໃນ​ໄລຍະ​ທີ່ທີ່​ທົ່ວ​ໂລກ​ພວມ​ເກີດວິ​ກິດ​ຕ້ານ​ພະຍາດ​ໂຄ​ວິດ-19 ກໍ​ໄດ້​ມີ​ເພື່ອນ​ມິດ ​ແລະ ອົງການ​ຈັດຕັ້ງສາກົນ​ຍື່ນ​ມື​ເຂົ້າມາ​ຊ່ວຍ​ເຫລືອ ສປປ ລາວ​ເຮົາ ​ເປັນຕົ້ນອົງການ​ອະນາ​ໄມ​ໂລກ, ສປ ຈີນ ​ແລະ ສະຫະລັດ​ອາ​ເມ​ລິ​ກາ​ໄດ້​ໃຫ້​ທຶນຮອນ​ຫລາຍ​ຮ້ອຍ​ລ້ານ​ໂດ​ລາ ​ເພື່ອ​ຕ້ານ​ກັບ​ພະຍາດ​ດັ່ງກ່າວ​ທີ່​ພວມ​ລະບາດ​ແຜ່​ລາມ​ໄປ​ທົ່ວ​ໂລກ.

      ທຸກ​ສິ່ງ​ຢ່າງ​ທີ່​ໄດ້​ກ່າວ​ມາ​ຂ້າງ​​ເທິງ​ນີ້ ​ແມ່ນ​ໝາກຜົນ​ແຫ່ງ​ການ​ຊີ້​ນຳ-ນຳພາ​ຂອງ​ພັກ​ເຮົາ, ປະ​ເທດ​ຊາດ​ກ້າວໜ້າ​ຢູ່​ເຢັນ​ເປັນ​ສຸກ, ປະຊາຊົນ​ມີ​ກິນ​ມີ​ຢູ່​ກໍ​ຍ້ອນ​ການ​ນຳພາ​ຂອງ​ພັກ, ພັກ​ປະຊາຊົນ​ປະຕິວັດ​ລາວ​ໄດ້​ມີ​ບຸນຄຸນຕໍ່​ປະ​ເທດ​ຊາດ​ບ້ານ​ເມືອງ​ຢ່າງ​ຫລວງຫລາຍ. ​ເພາະສະນັ້ນ ພວກ​ເຮົາ​ທັງ​ໝົດ​ພາຍ​ໃນ​ຊາດ​ຕ້ອງຕັ້ງໜ້າ​ເສີມ​ຂະຫຍາຍ​ມູນ​ເຊື້ອດັ່ງກ່າວ​ໃຫ້​ມີ​ຄວາມ​ຍືນ​ຍົງ​ຄົງ​ຕົວ​ຕະຫລອດ​ໄປ.

ຕັ້ງໜ້າ​ເສີມ​ຂະຫຍາຍ​ມູນ​ເຊື້ອຂອງ​ພັກ - lattana 1 - ຕັ້ງໜ້າ​ເສີມ​ຂະຫຍາຍ​ມູນ​ເຊື້ອຂອງ​ພັກ
error: Alert: Content is protected !!