ລັດຈະຜ່ອນຜັນແນວໃດໃຫ້ບັນດາຫົວໜ່ວຍທຸລະກິດຍາມໂຄວິດ-19 ລະບາດຄືແນວນີ້ ?

ໂດຍ: ລູກເມືອງພວນ

ໃນຂະນະທີ່ເຊື້ອໄວຣັດໂຄໂຣນາ ຫຼື ໂຄວິດ-19 ກຳລັງລະບາດໄປທົ່ວໂລກ ແລະ ລາວເຮົາກໍເຊັ່ນດຽວກັນ ໄດ້ສົ່ງຜົນກະທົບຕໍ່ຊີວິດ,ເສດຖະກິດ ແລະ ການດຳລົງຊີວິດຂອງປະຊາຊົນເຮົາຢ່າງໜັກໜ່ວງ, ຫຼາຍກິດຈະການ, ຫຼາຍໂຄງການໃຫຍ່ນ້ອຍຖືກປິດລົງ ແລະ ເລີກຈ້າງແຮງງານ.

ໃນເມື່ອບັນດາຫົວໜ່ວຍທຸລະກິດ   ມີຄວາມຫຍຸ້ງຍາກທາງດ້ານເສດຖະກິດ, ກິດຈະການດຳເນີນບໍ່ໄດ້ ຄືແນວນີ້ ກໍມີຄວາມລຳບາກຫຼາຍໃນການເຮັດພັນທະຕໍ່ລັດຖະບານ ແລະ ສັງຄົມ,ເປັນຕົ້ນແມ່ນການເສຍພາສີ, ອາກອນ, ດອກເບ້ຍທະນາຄານ,ສິນເຊື່ອ, ຄ່າປະກັນສັງຄົມ, ຄ່ານໍ້າ, ຄ່າໄຟ, ຄ່າເຊົ່າທີ່ພັກອາໄສ ແລະ ຄ່າຈ້າງແຮງງານຕ່າງໆ…

ຕາມບົດຮຽນຂອງຫຼາຍປະເທດ, ໃນໄລຍະທີ່ບັນດາຫົວໜ່ວຍທຸລະກິດຕ່າງໆ ມີຄວາມຫຍຸ້ງຍາກໃນການດຳເນີທຸລະກິດຂອງຕົນຄືແນວນັ້ນ, ລັດຖະບານໄດ້ມີມາດຕະການຜ່ອນຜັນການເຮັດພັນທະໜ້າທີ່ຂອງບັນດາຫົວໜ່ວຍທຸລະກິດຕໍ່ລັດ ຕໍ່ສັງຄົມລົງ ດ້ວຍອັດຕາເໝາະສົມຂອງແຕ່ລະຫົວໜ່ວຍທຸລະກິດ.

ຕົວຢ່າງ ສສຫວຽດນາມ ເພິ່ນໄດ້ຫຼຸດຜ່ອນພັນທະຕ່າງໆໃຫ້ບັນດາຫົວໜ່ວຍທຸລະກິດໂດຍສະເລ່ຍ ແຕ່ 4-6% ຂອງພັນທະທີ່ຈະຕ້ອງໄດ້ຈ່າຍທັງໝົດ; ປະກັນສັງຄົມໄທ ຈະຊ່ວຍເຫລືອຜູ້ເຮັດປະກັນ ໃນຊ່ວງໂຄວິດ- 19 ທີ່ຕ້ອງວ່າງງານ ຈາກກິດຈະການປິດຊົ່ວຄາວ ຫລື ຖືກສັ່ງຢຸດວຽກ ໂດຍທາງປະກັນສັງຄົມຈະຈ່າຍເງິນອຸດຫນຸນ ໃຫ້ຜູ້ຖືກວ່າງງານ 50% ແລະ ຈະລຸດອັດຕາເງິນສົມທົບໃຫ້ແກ່ນາຍຈ້າງ, ລູກຈ້າງ ເຫລືອ 4% ເປັນເວລາ 6 ເດືອນ, ຝຣັ່ງ ຫລຸດຄ່າເຊົ່າ, ນຳ້, ໄຟ ແລະອື່ນ, ໄທ ຈ່າຍເງິນເດືອນໃຫ້ແກ່ຜູ້ຖືກພັກງານ 50% ຂອງເງິນເດືອນ ເປັນເວລາ 6 ເດືອນ, ອັງກິດ ຈ່າຍເງິນໃຫ້ແກ່ແຮງງານຜູ້ກະທົບ 2.500 ປອນ, ອາເມລິກາ ຈ່າຍ 1 ພັນໂດລາສະຫະລັດ ທັງນີ້ກໍເພື່ອໃຫ້ບັນດາຫົວໜ່ວຍທຸລະກິດສາມາດຍືນຍົງ ແລະ ດຳເນີນກິດຈະການຕໍ່ໄປໄດ້.

ຖ້າລັດຖະບານຫາກບໍ່ມີນະໂຍບາຍຜ່ອນຜັນດັ່ງກ່າວ, ບັນດາຫົວໜ່ວຍທຸລະກິດເຫຼົ່ານັ້ນຫາກຫຼົ້ມຈົມ ຫຼື ຖືກຍົກເລີກໄປ ຍິ່ງຈະມີຜົນສະທ້ອນຍາວນານເຖິງການເກັບລາຍຮັບຂອງລັດຖະບານໃນອະນາຄົດອີກດ້ວຍ. ດັ່ງນັ້ນ ທາງທີ່ດີທີ່ສຸດ ເພື່ອຄຶງໄວ້ໃຫ້ຫົວໜ່ວຍທຸລະກິດໄດ້ດຳເນີນກິດຈະການຂອງຕົນເປັນປົກກະຕິ ລັດຖະບານຄວນມີນະໂຍບາຍໃນການຜ່ອນຜັນ ໃຫ້ບັນດາຫົວໜ່ວຍທູລະກິດຕ່າງໆເລົ່ານັ້ນໃນຍາມວິກິດນີ້ຈິ່ງຈະເປັນການຊຸກຍູ້ສົ່ງເສີມໃຫ້ທຸລະກິດພາຍໃນເຕີບໃຫຍ່ເຂັ້ມແຂງໄດ້.

error: Alert: Content is protected !!