20 ຄອບຄົວ ຊາຊົນບ້ານດາກຍົກເມືອງຊານໄຊ ທີ່ປະສົບອັກຄີໄພ ໄດ້ຮັບການຊ່ວຍເຫຼືອ ເບື້ອງຕົ້ນແລ້ວ
March 26, 2020 - 4:32 PM
ໃນວັນທີ 26 ມີນານີ້, ທ່ານ ເລັດ ໄຊຍະພອນ ເຈົ້າແຂວງອັດຕະປື ພ້ອມດ້ວຍອໍານາດການປົກຄອງເມືອງຊານໄຊ ໄດ້ນໍາເອົາເຄື່ອງຊ່ວຍເຫຼືອບັນເທົາທຸກເບື້ອງຕົ້ນ ລວມມີມູນຄ່າ 87 ລ້ານກີບ ແລະເງີນສົດ 20 ລ້ານກີບ ໄປມອບໃຫ້ 20 ຄອບຄົວທີ່ປະສົບອັກຄີໄພຢູ່ບ້ານ ດາກຍົກ ເມືອງຊານໄຊ ໃນວັນທີ 22 ມີນາຜ່ານມາ,ເຊິ່ງມີ 20 ຫຼັງຄາເຮືອນຖືກໄຟໄໝເສຍຫາຍສົ່ງຜົນໃຫ້ປະຊາຊົນ 125 ຄົນຂາດທີ່ຢູ່ອາໃສ. ຕາມການປະເມີນເບື້ອງຕົ້ນໄຟ້ໄໝ່ດັ່ງກ່າວຈະມີມູນຄ່າເສຍຫາຍປະມານ 200 ກວ່າລ້ານກີບ .
ໃນໂອກາດດັ່ງກ່າວ ເຈົ້າເມືອງຊານໄຊ ໄດ້ຕາງຫນ້າໃຫ້ອຳນາດການປົກຄອງເມືອງ ແລະ ປະຊາຊົນໄດ້ກ່າວສະແດງຄວາມຂອບໃຈ ມາຍັງອຳນາດການປົກຄອງແຂວງ ທີ່ມີຄວາມເປັນຫວ່ງເປັນໃຍ ນໍາເອົາເຄື່ອງຊ່ວຍເຫຼືອມາມອບໃຫ້ປະຊາຊົນໃນຄັ້ງນີ້ ຊຶ່ງຈະເປັນການປະກອບສ່ວນສຳຄັນໃຫ້ແກ່ການຟື້ນຟູຊີວິດການເປັນຢູ່ຂອງປະຊາຊົນໄດ້ກັບຄືນສູ່ສະພາບປົກກະຕິໂດຍໄວ. ຂ່າວໃຫ້ຮູ້ຕື່ມອີກວ່າໃນວັນດຽວກັນ ຄອບຄົວທ່ານ ພົງໄຊ ປະທານບໍ່ຄຳວັງຕັດ ກໍ່ໄດ້ນໍາເອົາເຄື່ອງອຸປະໂພກ ບໍລິໂພກ ຈຳນວນຫນຶ່ງມາມອບໃຫ້ ຄອບຄົວຜູ້ປະສົບໄພເຊັ່ນກັນ.
