“ສິງກະໂປ” ຫລຸດຄາດຄະເນ GDP ປີ 2020 ອີກເທື່ອໜຶ່ງ

     ມີລາຍງານວ່າ ກະຊວງການຄ້າ ແລະ ອຸດສາຫະກຳສິງກະໂປ (MTI) ປະກາດຫລຸດຄາດຄະເນການຂະຫຍາຍຕົວຂອງລວມຍອດຜະລິດຕະພັນພາຍໃຈ ຫລື GDP ປີ 2020 ລົງສູ່ລະດັບ -4,0% ເຖິງ -1,0% ເຊິ່ງເປັນຄັ້ງທີສອງນັບແຕ່ເດືອນກຸມພາປີນີ້ທີ່ລັດຖະບານສິງກະໂປປະກາດຫລຸດການຄາດຄະເນຕົວເລກ GDP.

     ກ່ອນໜ້ານີ້ ໃນວັນທີ 17 ກຸມພາຜ່ານມາ ກະຊວງດັ່ງກ່າວໄດ້ຫລຸດຄາດຄະເນການຂະຫຍາຍຕົວຂອງ GDP ລົງສູ່ລະດັບ -0,5% ເຖິງ 1,5% ຈາກຕົວເລກຄາດຄະເນເກົ່າ 0,5% ເຖິງ 2,5% ເນື່ອງຈາກຜົນກະທົບຂອງໄວຣັສໂຄໂຣນາສາຍພັນໃໝ່ (ໂຄວິດ-19) ທີ່ແຜ່ລະບາດໃນປັດຈຸບັນ.

      ສ່ວນອີກປັດໄຈທີ່ເຮັດໃຫ້ກະຊວງດັ່ງກ່າວຕັດສິນໃຈປັບຕົວເລກຄາດຄະເນ GDP ເປັນຄັ້ງທີສອງນັ້ນ ມາຈາກການທີ່ເສດຖະກິດໃນໄຕມາດທຳອິດປີນີ້ຂະຫຍາຍຕົວອ່ອນແອກວ່າທີ່ເຄີຍຄາດຄະເນໄວ້.

     ເຖິງຢ່າງໃດກໍຕາມ, ສຳລັບຕົວເລກປະເມີນຫລ້າສຸດນັ້ນ ເສດຖະກິດໃນໄຕມາດທຳອິດຂອງສິງກະໂປ ຫລຸດລົງ 2,2% ເມື່ອທຽບໃສ່ແຕ່ລະປີ ສວນທາງກັບໄຕມາດກ່ອນໜ້າທີ່ມີການຂະຫຍາຍຕົວ 1% ແລະ ຖ້າທຽບເປັນລາຍໄຕມາດ ເສດຖະກິດໄຕມາດທຳອິດຫລຸດລົງ 10,6% ເຊິ່ງຮ້າຍແຮງກວ່າເມື່ອທຽບໃສ່ໄຕມາດກ່ອນໜ້າທີ່ມີການຂະຫຍາຍຕົວ 0,6%.

error: Alert: Content is protected !!