ນາຍົກລັດຖະມົນຕີລາວ-ຍີ່ປຸ່ນພົບປະສຸດຍອດທີ່ໂຕກຽວ

- advert banner 728 90 728x90 - ນາຍົກລັດຖະມົນຕີລາວ-ຍີ່ປຸ່ນພົບປະສຸດຍອດທີ່ໂຕກຽວ

ໃນໂອກາດເດີນທາງເຂົ້າຮ່ວມກອງປະຊຸມສາກົນກ່ຽວກັບອະນາຄົດຂອງອາຊີ (Future of Asia) ຄັ້ງທີ 23 ແຕ່ວັນທີ 5-6 ມິຖຸນາ 2017 ທີ່ຍີ່ປຸ່ນ. ໃນວັນທີ 5 ມິຖຸນາ, ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ໄດ້ຂຶ້ນກ່າວຄຳປາໄສຕໍ່ກອງປະຊຸມດັ່ງກ່າວ, ຊຶ່ງໄດ້ຮັບຄວາມສົນໃຈຈາກຜູ້ເຂົ້າຮ່ວມກອງປະຊຸມເປັນຢ່າງຍິ່ງ. ຕໍ່ມາວັນທີ 7 ມິຖຸນາ, ທ່ານນາຍົກລັດຖະມົນຕີໄດ້ທຳການຢ້ຽມຢາມຍີ່ປຸ່ນຢ່າງເປັນທາງການ, ຊຶ່ງພິທີຕ້ອນຮັບໄດ້ຈັດຂຶ້ນທີ່ເຮືອນຮັບຮອງລັດຖະບານຍີ່ປຸ່ນຢ່າງສົມກຽດ.

ໃນການພົບປະສອງຝ່າຍທີ່ເຕັມໄປດ້ວຍບັນຍາກາດອົບອຸ່ນ ແລະ ເຂົ້າອົກເຂົ້າໃຈຊຶ່ງກັນ ແລະ ກັນ, ໂດຍສອງຝ່າຍໄດ້ຕີລາຄາສູງ ຕໍ່ການເປັນຄູ່ຮ່ວມມືຍຸດທະສາດລະຫວ່າງສອງປະເທດທີ່ນັບມື້ນັບຂະຫຍາຍຕົວຂຶ້ນຢ່າງບໍ່ຢຸດຢັ້ງ, ຊຶ່ງເຫັນໄດ້ຈາກຫຼາຍຂົງເຂດຂອງການຮ່ວມມືປະສົບຜົນສຳເລັດດີ. ສອງປະເທດໄດ້ມີການແລກປ່ຽນການຢ້ຽມຢາມຊຶ່ງກັນ ແລະ ກັນຢ່າງເປັນປົກກະຕິ ລະຫວ່າງການນໍາຂັ້ນສູງກໍຄືລະດັບຕ່າງໆ. ຕົວເລກທາງດ້ານການຄ້າ, ການລົງທຶນ ແລະ ການທ່ອງທ່ຽວຂອງຍີ່ປຸ່ນຢູ່ລາວມີຈໍານວນເພີ່ມຂຶ້ນຢ່າງຕໍ່ເນື່ອງ. ປັດຈຸບັນ, ການລົງທຶນຂອງຍີ່ປຸ່ນຈັດຢູ່ໃນອັນດັບ 7 ຂອງການລົງທຶນຕ່າງປະເທດໃນລາວລວມມີ 102 ໂຄງການ, ມີມູນຄ່າທັງໝົດປະມານ 438 ລ້ານໂດລາສະຫະລັດ ແລະ ມູນຄ່າການຄ້າສອງຝ່າຍໃນປີ 2016 ມີປະມານ 231 ລ້ານໂດລາສະຫະລັດ, ໃນນັ້ນລາວນໍາເຂົ້າ 116 ລ້ານໂດລາສະຫະລັດ ແລະ ສົ່ງອອກ 115 ລ້ານໂດລາສະຫະລັດ, ຈັດເປັນອັນດັບ 4 ຮອງຈາກໄທ, ຈີນ ແລະ ຫວຽດນາມ. ພ້ອມນັ້ນສອງຝ່າຍ ໄດ້ຕີລາຄາສູງຕໍ່ການຈັດຕັ້ງປະຕິບັດແຜນຮ່ວມມືການພັດທະນາລະຫວ່າງ ສປປ ລາວ ແລະ ຍີ່ປຸ່ນ ເພື່ອພັດທະນາປະເທດລາວແບບຍືນຍົງຄຽງຄູ່ກັບແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 8 (2016-2020) ຂອງລາວ. ສອງຝ່າຍມີຄວາມຍິນດີຈະສືບຕໍ່ປຶກສາຫາລື ແລະ ຊຸກຍູ້ການຮ່ວມມືດ້ານເສດຖະກິດ, ການຄ້າ, ການລົງທຶນ, ການສຶກສາ ແລະ ວັດທະນະທໍາ ລວມທັງດ້ານຕ່າງໆທີ່ຢູ່ພາຍໃຕ້ຂອບຄູ່ຮ່ວມມືຍຸດທະສາດນໍາກັນ. ພ້ອມກັນນັ້ນ, ສອງຝ່າຍຍັງໄດ້ຫາລືກັນກ່ຽວກັບຄວາມເປັນໄປໄດ້ໃນການເປີດສາຍການບິນໂດຍກົງໂຕກຽວ-ວຽງຈັນ ເພື່ອສົ່ງເສີມການໄປມາຫາສູ່ກັນລະຫວ່າງປະຊາຊົນສອງປະເທດໃຫ້ຫລາຍຂຶ້ນ. ນອກຈາກນັ້ນ, ສອງຝ່າຍໄດ້ແລກປ່ຽນຄຳເຫັນຕໍ່ສະພາບການພາກພື້ນ ແລະ ສາກົນທີ່ສອງຝ່າຍມີຄວາມສົນໃຈຮ່ວມກັນເພື່ອປະກອບສ່ວນເຮັດໃຫ້ມີສັນຕິພາບ, ສະຖຽນລະພາບ, ຄວາມໝັ້ນຄົງ ແລະ ຄວາມຈະເລີນຮຸ່ງເຮືອງຂອງພາກພື້ນ.

- 1 1 - ນາຍົກລັດຖະມົນຕີລາວ-ຍີ່ປຸ່ນພົບປະສຸດຍອດທີ່ໂຕກຽວ
- Tiger Head 728x90 - ນາຍົກລັດຖະມົນຕີລາວ-ຍີ່ປຸ່ນພົບປະສຸດຍອດທີ່ໂຕກຽວ

ໃນໂອກາດດັ່ງກ່າວ, ພະນະທ່ານນາຍົກ ທອງລຸນ ສີສຸລິດ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ສະແດງຄວາມຊົມເຊີຍຕໍ່ຜົນສຳເລັດຂອງກອງປະຊຸມສາກົນ ກ່ຽວກັບ ອະນາຄົດຂອງອາຊີຄັ້ງນີ້, ພ້ອມທັງຕີລາຄາສູງ ແລະ ສະແດງຄວາມຂອບໃຈ ຕໍ່ການຊ່ວຍເຫຼືອຂອງລັດຖະບານຍີ່ປຸ່ນ ໃນດ້ານຕ່າງໆເຊັ່ນ: ການຊ່ວຍເຫຼືອທາງການເພື່ອການພັດທະນາ (ODA) ທີ່ເປັນອັນດັບ 1 ຂອງປະເທດທີ່ໃຫ້ການຊ່ວຍເຫຼືອແກ່ ສປປ ລາວ, ເຊິ່ງໃນປີ 2016 ໄດ້ມີ 5 ໂຄງການລວມມູນຄ່າທັງໝົດ 13,854 ຕື້ເຢນ (ປະມານ 122 ລ້ານໂດລາສະຫະລັດ) ແລະ ໃນ 6 ເດືອນຕົ້ນປີ 2017 ກໍມີການລົງນາມເອກະສານແລກປ່ຽນ 2 ໂຄງການ ລວມມູນຄ່າ 367 ລ້ານເຢນ (ປະມານ 3,7 ລ້ານໂດລາສະຫະລັດ); ການອະນຸມັດໂຄງການຮ່ວມມືດ້ານວິຊາການ ໃນສົກປີ 2015-2016 ມີ 11 ໂຄງການ, ເຊິ່ງບັນດາໂຄງການເຫຼົ່ານັ້ນ ຈະຈັດຕັ້ງປະຕິບັດ ໃນສົກປີ 2017-2018; ການອະນຸມັດທຶນການສຶກສາໄລຍະຍາວ ລະດັບປະລິນຍາໂທ ແລະ ປະລິນຍາເອກ ເພື່ອສ້າງຂີດຄວາມສາມາດໃຫ້ ສປປ ລາວ ໃນການປັບປຸງວຽກງານບູລະນະຮັກສາທາງຫຼວງແຫ່ງຊາດຂອງລາວ; ໂຄງການຊ່ວຍເຫຼືອທາງດ້ານການຄຸ້ມຄອງເສດຖະກິດມະຫາພາກ ໂດຍສະເພາະການຄຸ້ມຄອງ ແລະ ເກັບລາຍຮັບເຂົ້າງົບປະມານ; ໂຄງການສ້າງຂີດຄວາມສາມາດໃຫ້ແກ່ການນຳຂັ້ນສູງ ຂອງ ສປປ ລາວ; ໂຄງການຂະຫຍາຍສະໜາມບິນສາກົນວັດໄຕ; ການສົ່ງອາສາສະໝັກຍີ່ປຸ່ນມາຊ່ວຍ ສປປ ລາວ, ເຊິ່ງນັບແຕ່ປີ 1965 ມາເຖິງປັດຈຸບັນມີອາສາສະໝັກ ຫຼາຍກວ່າ 800 ຄົນ ແລະ ຊ່ຽວຊານຫຼາຍກວ່າ 4.500 ຄົນ ແລະ ການໃຫ້ທຶນຊ່ວຍເຫຼືອລ້າແກ່ ສປປ ລາວ ເຂົ້າໃນໂຄງການເລັ່ງລັດວຽກງານເກັບກູ້ລະເບີດ ເພື່ອສະໜັບສະໜູນໃຫ້ແກ່ວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກ ໄລຍະ 2 ເປັນຈໍານວນເງິນ 7,03 ລ້ານໂດລາສະຫະລັດ. ໃນຂະນະດຽວກັນ, ພະນະທ່ານນາຍົກ ທອງລຸນ ສີສຸລິດ ຍັງໄດ້ສະແດງຄວາມຂອບໃຈຕໍ່ລັດຖະບານຍີ່ປຸ່ນ ທີ່ເຫັນດີສືບຕໍ່ສຶກສາຄວາມເປັນໄປໄດ້ໃນການກໍ່ສ້າງເສັ້ນທາງດ່ວນວຽງຈັນ-ຮ່າໂນຍ, ເຊິ່ງເປັນໂຄງການບຸລິມະສິດທີ່ນອນຢູ່ໃນແຜນຍຸດທະສາດການພັດທະນາ ຂອງທັງສອງປະເທດລາວ-ຫວຽດນາມ. ການຊ່ວຍເຫຼືອທັງໝົດນັ້ນໄດ້ປະກອບສ່ວນອັນສໍາຄັນເຂົ້າໃນການພັດທະນາເສດຖະກິດ-ສັງຄົມຂອງ ສປປ ລາວ ແລະ ສອດຄ່ອງກັບຄວາມຈໍາເປັນ ໃນການປັບປຸງການດຳລົງຊີວິດຂອງປະຊາຊົນລາວໃຫ້ດີຂຶ້ນ ເພື່ອຫຼຸດຜ່ອນຄວາມທຸກຍາກກໍຄືຫຼຸດຄວາມແຕກໂຕນດ້ານການພັດທະນາຂອງ ສປປ ລາວ ກັບປະເທດອື່ນໃນພາກພື້ນ ເພື່ອໃຫ້ຫຍັບໃກ້ເຂົ້າຫາກັນ.

error: Content is protected !!