ເມສາພາເສົ້າ

ເມສາພາເສົ້າ - 1 15 - ເມສາພາເສົ້າ
ເມສາພາເສົ້າ - Untitled design - ເມສາພາເສົ້າ

ໂດຍ: ບັນຫາຈານແຫຍ່

ທຸກໆປີພໍເດືອນເມສາກຽມຢ່ວງເຂົ້າມາແທນເດືອນມີນາ, ຈານແຫຍ່ ກໍຮູ້ສຶກພະຫວາຄິດເຖິງເຫດການທີ່ເກີດຂຶ້ນເມື່ອ 39 ປີຜ່ານມາ ຢູ່ຕ່າງແດນ. ມັນເປັນເຫດການທີ່ເຮັດໃຫ້ ຈານແຫຍ່ ຍິ້ມຝືດ, ທັງຢາກຫົວຢາກໄຫ້ ທັງເຫງົາທັງຕື່ນເຕັ້ນ.

    ຈຳແມ່ນຢຳວ່າເປັນຫົວລະດູບານໃໝ່ທີ່ເມືອວາໂຣແຍສ ສະຫະພາບໂຊວຽດ (ຕອນນັ້ນຍັງບໍ່ມີຄຳວ່າ: “ອະດີດ” ຢູ່ດ້ານໜ້າຂອງຊື່ປະເທດນີ້) ຢູ່ທຸກຫົນທຸກແຫ່ງຈະແນມເຫັນໃບໄມ້ເລີ່ມຈໍ່ຈູມ. ຢູ່ເມືອງນີ້, ລະດູບານໃໝ່ອ່າວມາຊ້າ ບໍ່ຄືຢູ່ເມືອງກຽບ ນະຄອນຫລວງຂອງປະເທດຢູເຄຼນໃນປັດຈຸບັນ ບ່ອນທີ່ ຈານແຫຍ່ ໄດ້ຮຽນກຽມພາສາເປັນເວລາ 1 ປີ. ຢູ່ທີ່ນັ້ນອາກາດອົບອຸ່ນກວ່າເມືອງວາໂຣແຍສ.

     ເມື່ອໃບໄມ້ເລີ່ມປົ່ງ, ນັກສຶກສາຕ່າງປະເທດທີ່ຮ່ວມສົກສຶກສາປີ 1981 ກໍຮູ້ໂລດວ່າ: ປີ້ຍົນໄດ້ເລີ່ມປົ່ງແລ້ວ ແລະ ຍັງອີກພຽງ 3 ເດືອນກວ່າໆກໍຈະຕ້ອງໄດ້ບິນກັບຄືນປະເທດ ພາຍຫລັງໄດ້ສູ້ຝົນທົນຫິມະມາເປັນເວລາ 6 ປີເຕັມໆ. ສຳລັບ ຈານແຫຍ່ ນັ້ນ ຄວາມດີໃຈມັນໄດ້ເລີ່ມຂຶ້ນຈົນຖ້ວມຫົວ ເພາະຕະຫລອດ 6 ປີ ບໍ່ເຄີຍໄດ້ກັບມາຢາມບ້ານເກີດເມືອງນອນຈັກເທື່ອ.

     ປະປົນຢູ່ກັບຄວາມດີໃຈໃນຜົນສຳເລັດຂອງການສຶກສາທີ່ພວມຈະຈຸຈອດຮອດຝັ່ງໃນອີກບໍ່ດົນ, ຈານແຫຍ່ ກໍຄ້ອຍໃຈທີ່ຈະໄດ້ຈາກລາເພື່ອນຊາວໂຊຫວຽດ ແລະ ຊາວຕ່າງປະເທດທີ່ເຄີຍຮຽນຮ່ວມຫ້ອງ ພິເສດແມ່ນເຫລົ່າອາຈານທີ່ສິດສອນຖອດຖອນບົດຮຽນໃຫ້ ຈານແຫຍ່ ໝົດໄສ້ໝົດພຸງ.

     ເພື່ອສະແດງຄວາມຮູ້ບຸນຄຸນ, ຄວາມຮັກແພງຕໍ່ເພື່ອນໆ ແລະ ຄູອາຈານແຕ່ເນີ້ນໆໄວ້ (ເພາະຖ້າຈໍ້ໂພດຈະເຮັດຫຍັງນຳບໍ່ທັນ) ຈານແຫຍ່ ກໍເລີຍຂຶ້ນແຜນຈັດງານວັນເກີດຕົນເອງຂຶ້ນ ທັງໆທີ່ງານປະເພດນີ້ຕົນເອງບໍ່ເຄີຍຄິດຈັດຈັກເທື່ອ ເພາະບໍ່ຖືເປັນເລື່ອງສຳຄັນ. ແຕ່ກໍຕ້ອງຈັດເພື່ອເປັນສາກບັງໜ້າຊື່ໆ.

ເມສາພາເສົ້າ - Wave100S AD to Website 2020 0 - ເມສາພາເສົ້າ

     ໃນມື້ວັນເກີດ, ຈານແຫຍ່ ແລະ ເພື່ອນຄົນລາວຮ່ວມຫໍພັກພາກັນຄົວອາຫານຈານເດັດ ເພື່ອຕ້ອນຮັບຄູອາຈານ ແລະ ເພື່ອນໆຈຳນວນເກືອບ 20 ຄົນ ທີ່ມີຊື່ຈະຖືກເຊີນມາຮ່ວມງານເຊັ່ນ: ປາມຶກຍັດໄສ້, ຈືນປາຊາບະ, ຊາລາເປົ໋າເຮັດເອງ, ເຂົ້າຈີ່ດຳ-ເຂົ້າຈີ່ຂາວ, ເຄັກ, ເຂົ້າຂົ້ວ ແລະ ອາຫານປະເພດຂົບຄ້ຽວ ຂາດບໍ່ໄດ້ກໍແມ່ນເຫລົ້າໂວດກາ, ວິໂນ (ວາຍ), ຊຳປາຍສະໂກຍແຢ (ຊຳປາຍ) ແລະ ປີໂວ (ເບຍ). ສະຖານທີ່ຈັດງານແມ່ນຢູ່ມຸມໜຶ່ງຂອງຫ້ອງອາຫານລວມປະຈຳຫໍພັກ.

     ເວລາ 7 ໂມງແລງຂອງຄໍ່າຄືນນັ້ນ, ຈານແຫຍ່ ແລະ ເພື່ອນຄົນລາວອີກ 2 ຄົນພາກັນຢືນລໍຖ້າຮັບແຂກຢູ່ປາກປະຕູຫ້ອງອາຫານ. 20 ນາທີຜ່ານມາໄປ ຍັງບໍ່ທັນເຫັນໜ້າແຂກເຊີນ. 30 ນາທີ -​1 ຊົ່ວໂມງຜ່ານໄປ ກໍຍັງມິດຈີ່ລີ່, ຮອດ 9 ໂມງກໍຍັງບໍ່ເຫັນເງົາແຂກຈັກຄົນ. ຈິດໃຈຈານແຫຍ່ເລີ່ມຫົດຫູຕໍ່ເຫດການທີ່ບໍ່ຄາດຝັນ “ຫລືວ່າບັດເຊີນບໍ່ຮອດພວກເພິ່ນບໍ ?… ເປັນໄປບໍ່ໄດ້ ເຮົາໄດ້ສົ່ງຮອດມືພວກເພິ່ນດ້ວຍຕົນເອງແທ້ໆ”. ຈານແຫຍ່ ຖາມ-ຕອບຕົນເອງໃນໃຈ ສຸດທ້າຍງານວັນເກີດຄັ້ງທຳອິດໃນຊີວິດຂອງ ຈານແຫຍ່ ກໍກາຍເປັນໝັນ.

     ພໍຮອດເຊົ້າມື້ໃໝ່ ຈານແຫຍ່ ກໍຍື້ມືໄປຈີກວັນທີໃນປະຕິທິນອອກ (ປະຕິທິນຊະນິດມີວັນທີຂອງແຕ່ລະວັນ) ຈຶ່ງສະເດືອກຮູ້ວ່າ ວັນທີທີ່ຕົນພວມຈີກອອກນັ້ນເປັນວັນທີ 1 ເດືອນເມສາ 1981. ວ່າກັນວ່າມັນເປັນວັນທີ່ທຸກຄົນສາມາດຕົວະກັນໄດ້ຢ່າງສະບາຍ ໂດຍບໍ່ມີໃຜຈັບຜິດ. ແຕ່ການຕົກເປັນເຫຍື່ອຂອງວັນອຸບປະໂຫຍກນີ້ບໍ່ເຮັດໃຫ້ ຈານແຫຍ່ ສະບາຍໃຈຈັກເມັດ. ສຳລັບເຫຍື່ອທີ່ເສຍຫາຍກວ່ານີ້ຈະຮູ້ສຶກແນວໃດນໍ ?.

ເມສາພາເສົ້າ - WhatsApp Image 2020 05 27 at 5 - ເມສາພາເສົ້າ
ເມສາພາເສົ້າ - WhatsApp Image 2020 05 27 at 5 - ເມສາພາເສົ້າ
error: Alert: ເນື້ອຫາຂ່າວມີລິຂະສິດ !!