ໜີ​ໂຄວິດ-19 ຢ່າ​ນຳ​ເອົາ​ເຊື້ອ​ມາ​ຕິດ​ຕໍ່​ໃສ່​ກັນ

ໜີ​ໂຄວິດ-19 ຢ່າ​ນຳ​ເອົາ​ເຊື້ອ​ມາ​ຕິດ​ຕໍ່​ໃສ່​ກັນ - temp 2 - ໜີ​ໂຄວິດ-19 ຢ່າ​ນຳ​ເອົາ​ເຊື້ອ​ມາ​ຕິດ​ຕໍ່​ໃສ່​ກັນ
ໜີ​ໂຄວິດ-19 ຢ່າ​ນຳ​ເອົາ​ເຊື້ອ​ມາ​ຕິດ​ຕໍ່​ໃສ່​ກັນ - Untitled design - ໜີ​ໂຄວິດ-19 ຢ່າ​ນຳ​ເອົາ​ເຊື້ອ​ມາ​ຕິດ​ຕໍ່​ໃສ່​ກັນ

ໂດຍ: ທິດກໍ່າ

     ນັບ​ແຕ່​ເກີດ​ມີ​ເຊື້ອ​ໄວ​ຣັ​ສ​ສາຍ​ພັນ​ໃໝ່ ເອີ້ນ​ວ່າ: ໂຄ​ໂຣ​ນາ ຫລື ໂຄວິດ-19 ໄດ້​ລະ​ບາດ​ລາມ​ພະ​ລາມ​ຈົວ​ໄປ​ທົ່ວ​ໂລກ ໄດ້​ສ້າງ​ຄວາມ​ວິ​ຕົກ​ກັງ​ວົນ ແລະ ໜ້າ​ຢ້ານ​ກົວ​ຢ່າງ​ໃຫຍ່​ຫລວງ​ແກ່​ຊາວ​ໂລກ. ນອກ​ຈາກນັ້ນ ຢູ່​ໃນ​ຫລາຍ​ປະ​ເທດ​ກໍ​ມີ​ຜູ້​ເຈັບ​ຜູ້​ເປັນ, ຜູ້​ຕາຍ​ຜູ້​ຍັງ, ຜູ້​ກຳ​ລັງ​ຕິດ​ເຊື້ອ ທັງ​ມີ​ຜູ້​ທີ່​ປິ່ນ​ປົວ​ອາ​ການ​ຫາຍ​ດີ​ ໂຊກ​ເຂົ້າ​ຂ້າງ​ແດ່ກໍ​ມີ​ຊີ​ວິດ​ຢູ່​ລອດ. ຜູ້​ປິ່ນ​ປົວ​ບໍ່​ທັນ​ເກີດ​ອາ​ການ​ກຳ​ເລີບ​ຂຶ້ນ​ກໍ​ຕາຍ​ໄປ​ໃນ​ທີ່​ສຸດ. ອັນ​ສຳ​ຄັນ​ທີ່​ເຮັດ​ໃຫ້​ຊາວ​ໂລກ​ຢ້ານ​ກົວ​ທີ່​ສຸດ ຄື​ຍັງ​ບໍ່​ທັນ​ມີ​ຢາ​ມະ​ໂຫ​ສົດ​ຂະ​ໜານ​ໃດ​ມາ​ປິ່ນ​ປົວ ແລະ ປາບ​ປາມ​ເຊື້ອ​ໄວ​ຣັ​ສ​ຊະ​ນິດນີ້​ໃຫ້​ຫາຍຂາດ​ໄດ້​ໂດຍ​ສິ້ນ​ເຊີງ. ຫລ້າ​ສຸດ​ມາ​ຮອດ​ວັນ​ທີ 24 ມີ​ນາ 2020 ໄດ້​ມີ​ຄົນ​ຕິດ​ເຊື້ອ​ໃນ​ທົ່ວ​ໂລກ​ໄປ​ແລ້ວ 378.842 ຄົນ, ເສຍ​ຊີ​ວິດ 16.510 ຄົນ, ໄດ້​ຮັບ​ການ​ປິ່ນ​ປົວ​ໃຫ້​ຫາຍ​ດີ 102.064 ຄົນ, ສ່ວນ​ທີ່​ເຫລືອ​ຍັງ​ບໍ່​ຮູ້​ວ່າ​ຊະ​ຕາ​ກຳ​ຂອງ​ຊີ​ວິດ​ຈະ​ຕາຍ ຫລື ຍັງ. ນີ້​ຄື​ຊະ​ຕາ​ກຳ​ຂອງ​ຊາວ​ໂລກ​ທີ່​ພາ​ກັນ​ຮັບ​ເຄາະ​ຮ້າຍ​ຍ້ອນ​ໂລກ​ລະ​ບາດ​ທີ່​ລ່າ​ສັງ​ຫານມວນ​ມະ​ນຸດ​ໃນ​ແຕ່​ລະ​ວັນ ແລະ ຍັງ​ບໍ່​ຮູ້​ວ່າ​ອີກ​ຈັກ​ວັນ​ຈັກ​ເດືອນ​ໂລກ​ລະ​ບາດ​ທີ່​ຕາມ​ລ່າ​ຂ້າ​ຄົນ​ຊະ​ນິດນີ້​ຈະ​ຖືກ​ປາບ​ປາມ​ໃຫ້​ຮາບ​ກ້ຽງ​ສິ້ນ​ຊາກ​ຈາກ​ໂລກ​ໃບ​ນີ້.

     ສຳ​ລັບ​ປະ​ເທດ​ລາວ​ເຮົາ ໃນ​ເບື້ອງ​ຕົ້ນ​ກໍ​ວ່າ​ຈະ​ປອດ​ໄພ ຈົນ​ມາ​ຮອດ​ວັນ​ທີ 24 ມີ​ນາ​ຜ່ານ​ມາ ຈຶ່ງ​ໄດ້​ກວດ​ພົບ 2 ຄົນ​ ເປັນ​ຍິງ​ໜຶ່ງ​ຊາຍ​ໜຶ່ງ​ຢູ່​ໃນ​ນະ​ຄອນ​ຫລວງວຽງ​ຈັນ​ເຮົາ​ນີ້​ເອງ. ສ່ວນ​ສາ​ເຫດ​ທີ່​ພາ​ໃຫ້​ຕິດ​ເຊື້ອນີ້​ ທິດກ່ຳ ຈະ​ບໍ່​ຂໍ​ເອີ່ຍ ເພາະ​ແນວ​ໃດ​ກໍ​ຖື​ວ່າ​ໄດ້​ຕິດ​ເຊື້ອ​ໄປ​ແລ້ວ ແລະ ທາງ​ຄະ​ນະ​ສະ​ເພາະ​ກິດ​ລະ​ດັບ​ຊາດ​ພວກ​ເພິ່ນ​ກໍ​ໄດ້​ຖະ​ແຫລງ​ເປັນ​ຂ່າວ​ຢ່າງ​ເປັນ​ທາງ​ການ​ອອກ​ໄປ​ແລ້ວ.

     ແນວ​ໃດ​ກໍ​ຕາມ, ໃນ​ເບື້ອງ​ຕົ້ນ​ໃຜ​ກໍ​ເປັນ​ຫ່ວງ​ເປັນ​ໄຍ​ນຳ​ແຮງ​ງານ​ທີ່​ໄດ້​ກັບ​ຄືນ​ມາ​ແຕ່​ປະ​ເທດ​ໄທ ເພາະ​ມີ​ຄົນ​ຈຳ​ນວນ​ຫລວງ​ຫລາຍ​ພາຍ​ມາກ​ເປັນ​ໝື່ນ​ເປັນ​ແສນ​ໃນ​ທົ່ວ​ປະ​ເທດ. ໃນ​ເວ​ລາ​ໄປ​ນັ້ນ​ກໍ​ຖື​ວ່າ​ໄປ​ໃຜ​ໄປ​ມັນ​ເປັນ​ທຳ​ມະ​ດາ​ຢ່າງ​ຫລາຍ​ສຸດ​ກໍ​ພາບ​ສອງ​ພາບ​ສາມ​ ຫລື ໝູ່​ສີ່​ໝູ່​ຫ້າ, ແຕ່​ເວ​ລາ​ໜີ​ປົບ​ໂຄວິດ-19 ກັບ​ມາ​ພ້ອມ​ດຽວ​ກັນ​ກໍ​ອັ່ງ​ອໍ​ເປັນ​ໝື່ນ​ເປັນ​ແສນ​ຢູ່​ດ່ານ. ເຫັນ​ວ່າ​ຢູ່​ໃນ 4 ດ່ານ​ສາ​ກົນ​ເຂົ້າ-ອອກ​ຊ່ວງ​ສອງ​ສາມມື້​ໂຫ່​ມາ​ພາບ​ດຽວ​ກັນ​ແຕ່​ວັນ​ທີ 20 ຫາ 24 ອັ່ງ​ອໍ​ຈົນ​ແໜ້ນ ຍ້ອນ​ວ່າ​ໃຜ​ກໍ​ໜີ​ຕາຍ​ຢ້ານ​ໂຄວິດ​ທີ່​ໄດ້​ເກີດ​ຂຶ້ນ​ຢູ່​ປະ​ເທດ​ໄທ. ອີກ​ປະ​ການ​ໜຶ່ງ ກໍ​ຍ້ອນ​ວ່າ​ໃນ​ຊ່ວງວັນ​ທີ 13 ຫາ ວັນ​ທີ 16 ເດືອນ​ເມ​ສາ​ທີ່​ຈະ​ມາ​ເຖິງນີ້ ພັດ​ແມ່ນ​ບຸນ​ປີ​ໃໝ່​ລາວ ຖ້າ​ຄິດ​ໄລ່​ເຕັມໆ​ທັງ​ວັນ​ພັກ​ເສົາ​ທິດ​ກໍ​ເປັນ​ອັນ​ວ່າ​ອາ​ທິດ​ໜຶ່ງ​ຖ້ວນໆ, ແຕ່​ວ່າ​ປີນີ້ ພັດ​ໂຊບໍ່​ອຳ​ນວຍ, ບໍ່​ເປັນ​ຈັ່ງ​ບຸນ ຖືກ​ເຊື້ອ​ໄວ​ຣັ​ສ​ໂຄວິດ-19 ມາ​ອາ​ລະ​ວາດ​ກໍ​ເລີຍບໍ່​ມີ​ໂອ​ກາດ​ໄດ້​ມ່ວນ, ຊ້ຳ​ບໍ່​ໜຳ ບັນ​ດາ​ແຮງ​ງານ​ລາວ​ທີ່​ເດີນ​ທາງ​ມາ​ແຕ່​ຕ່າງ​ປະ​ເທດ​ຈຳ​ຕ້ອງ​ໄດ້​ຖືກ​ກັກ​ກັນ​ເກັບ​ໂຕ​ຢູ່​ໃນ​ສູນ​ເປັນ​ເວ​ລາ 14 ວັນ ຈົນ​ຮັບ​ປະ​ກັນ​ວ່າ​ປອດ​ເຊື້ອ​ພະ​ຍາດ​ແລ້ວ​ຈຶ່ງ​ໃຫ້​ກັບ​ບ້ານ​ກັບ​ເຮືອນ​ຂອງ​ຕົນ.

ໜີ​ໂຄວິດ-19 ຢ່າ​ນຳ​ເອົາ​ເຊື້ອ​ມາ​ຕິດ​ຕໍ່​ໃສ່​ກັນ - Wave100S AD to Website 2020 0 - ໜີ​ໂຄວິດ-19 ຢ່າ​ນຳ​ເອົາ​ເຊື້ອ​ມາ​ຕິດ​ຕໍ່​ໃສ່​ກັນ

     ເຖິງ​ຢ່າງ​ໃດ​ກໍ​ດີ, ຜ່ານ​ການກວດ​ກາ​ດ່ານ​ຂາ​ອອກ​ຈາກ​ປະ​ເທດ​ໄທ ແລະ ດ່ານ​ຂາ​ເຂົ້າ​ປະ​ເທດ​ລາວ​ໃນ 4 ແຫ່ງ​ແມ່ນ​ຍັງ​ບໍ່​ທັນ​ມີ​ຜູ້​ໃດ​ຕິດ​ເຊື້ອ​ໂຄວິດ-19 ມາ​ແຕ່​ໄທ. ປັດ​ຈຸ​ບັນມາ​ຮອດ​ວັນ​ທີ 23 ມີ​ນາ ຕາມ​ແຫລ່ງ​ຂ່າວ​ວ່າ​ຢູ່​ໄທ​ໄດ້​ມີ​ຜູ້​ຕິດ​ເຊື້ອ​ໄປ​ແລ້ວ 700 ກວ່າ​ຄົນ, ສ່ວນ​ມຽນ​ມາ​ມາ​ຮອດ​ວັນ​ທີ 24 ມີ​ນາ ຫາ​ກໍ​ກວດ​ພົບຜູ້​ຕິດ​ເຊື້ອ 2 ຄົນ​ເທົ່າ​ກັບ​ລາວ ແລະ ຂັ້ນ​ຕໍ່​ໄປ​ກໍ​ບໍ່​ທັນ​ຮູ້​ວ່າ​ສອງ​ປະ​ເທດ​ຈະ​ເພີ່ມ​ຂຶ້ນ ຫລື ຢູ່​ເກົ່າ. ສະ​ຫລຸບ​ແລ້ວ, ມາ​ຮອດ​ປັດ​ຈຸ​ບັນ ໃນ​ບັນ​ດາ​ປະ​ເທດ​ອາ​ຊຽນ​ເຮົາ​ໄດ້​ມີ​ຜູ້​ຕິດ​ເຊື້ອ​ໂຄວິດ-19 ໄປ​ແລ້ວ​ທຸກ​ປະ​ເທດ, ຕ່າງ​ແຕ່​ວ່າ​ຜູ້​ໜ້ອຍ​ຜູ້​ຫລາຍ, ມີ​ຜູ້​ຕາຍ​ຜູ້​ຍັງ.

     ດັ່ງ​ທີ່​ຮູ້​ນຳ​ກັນ​ແລ້ວ​ວ່າ: ເຊື້ອ​ໄວ​ຣັ​ສ​ສາຍ​ພັນ​ໃໝ່​ໂຄ​ໂຣ​ນາ ຫລື ໂຄວິດ-19 ເປັນ​ກາ​ລະ​ໂລກ​ຊະ​ນິດ​ໃໝ່​ທີ່​ອັນ​ຕະ​ລາຍ ຖ້າ​ມັນ​ໄດ້​ເຂົ້າ​ໄປ​ໃນ​ຕົວ​ຂອງ​ຄົນ​ເຮົາ​ແມ່ນ​ມີ​ຄວາມ​ສ່ຽງ​ສູງ​ຕໍ່​ຊີ​ວິດ​ອິນ​ຊີ ເພາະ​ເຊື້ອ​ພະ​ຍາດ​ທີ່​ວ່ານີ້​ໄດ້​ເຂົ້າ​ໄປ​ທຳ​ລາຍ​ປອດ​ຂອງ​ຄົນ​ເຮົາ​ພາຍ​ໃນ​ໜຶ່ງ​ອາ​ທິດ​ຈຶ່ງ​ມີ​ອາ​ການ ແລະ ສາ​ມາດ​ຕິດ​ແປດ​ກັນ​ໄດ້​ໄວ​ທີ່​ສຸດ.

     ເມື່ອ​ຕັ້ງ​ໂຈດ​ກັນ​ວ່າ: ພວກ​ເຮົາ​ຈະ​ຫລີກ​ເວັ້ນ​ໄດ້​ແນວ​ໃດ ? ຂໍ້​ປະ​ຕິ​ບັດ​ກໍ​ຄື ຕ້ອງ​ກັກ​ກັນ​ຕົນ​ເອງບໍ່​ໃຫ້​ໄປ​ທົ່ວ​ທີບ ໂດຍ​ສະ​ເພາະ​ແມ່ນ​ບ່ອນ​ຊຸມ​ຊົນ​ຄົນ​ຫລາຍ, ໝັ່ນ​ລ້າງ​ມື​ດ້ວຍນ້ຳ​ຢາ, ຮັກ​ສາ​ສຸ​ຂະ​ພາບ, ໝັ່ນ​ອອກ​ກຳ​ລັງ​ກາຍ​ເປັນ​ປົກ​ກະ​ຕິ ອັນ​ສຳ​ຄັນ​ກ່ອນ​ອື່ນ​ໝົດ​ແມ່ນ​ປະ​ຕິ​ບັດ​ຕາມ​ຄຳ​ແນະ​ນຳ​ຈາກ​ແພດ​ໝໍ ແລະ ມະ​ຕິ​ຄຳ​ສັ່ງ​ຂອງ​ຄະ​ນະ​ສະ​ເພາະ​ກິດ​ລະ​ດັບ​ຊາດ ແລະ ຟັງ​ການ​ແນະ​ນຳ​-ຊີ້​ນຳ​ຈາກ​ພັກ ແລະ ລັດ​ຖະ​ບານ​ເຮົາ​ໃຫ້​ເຄັ່ງ​ຂັດ. ຖ້າ​ເຫັນ​ວ່າ​ຕົນ​ເອງ​ມີ​ອາ​ການ​ສົງ​ໄສ​ໃຫ້​ຂ້ຽວ​ໄປ​ຫາ​ແພດ​ໝໍ ເພື່ອບໍ່​ໃຫ້​ສວາຍ​ເກີນ​ແກ້. ຮຽກ​ຮ້ອງ​ຂໍ​ໃຫ້​ລູກ​ຫລານ​ທຸກ​ຄົນ​ທີ່​ກັບ​ມາ​ແຕ່​ປະ​ເທດ​ໄທ​ຈົ່ງ​ພ້ອມ​ກັນ​ປະ​ຕິ​ບັດ​ຕາມ​ການ​ແນະ​ນຳ​ຂອງ​ແພດ​ໝໍ ແລະ ການ​ຈັດ​ຕັ້ງ​ທຸກ​ຂັ້ນ​ໃຫ້​ເຄັ່ງ​ຂັດ ເພາະ​ຢ້ານ​ເຊື້ອ​ພະ​ຍາດ​ໂຄວິດ-19 ຈະ​ມາ​ຕິດ​ຕໍ່​ໃສ່​ກັນ​ແບບ​ລາມ​ພະ​ລາມ​ຈົວ.

ໜີ​ໂຄວິດ-19 ຢ່າ​ນຳ​ເອົາ​ເຊື້ອ​ມາ​ຕິດ​ຕໍ່​ໃສ່​ກັນ - WhatsApp Image 2020 05 27 at 5 - ໜີ​ໂຄວິດ-19 ຢ່າ​ນຳ​ເອົາ​ເຊື້ອ​ມາ​ຕິດ​ຕໍ່​ໃສ່​ກັນ
ໜີ​ໂຄວິດ-19 ຢ່າ​ນຳ​ເອົາ​ເຊື້ອ​ມາ​ຕິດ​ຕໍ່​ໃສ່​ກັນ - WhatsApp Image 2020 05 27 at 5 - ໜີ​ໂຄວິດ-19 ຢ່າ​ນຳ​ເອົາ​ເຊື້ອ​ມາ​ຕິດ​ຕໍ່​ໃສ່​ກັນ
error: Alert: ເນື້ອຫາຂ່າວມີລິຂະສິດ !!