ຍາມຊາດມີໄພຕ້ອງຮ່ວມໃຈກັນຕໍ່ສູ້

ຍາມຊາດມີໄພຕ້ອງຮ່ວມໃຈກັນຕໍ່ສູ້ - frame 01 - ຍາມຊາດມີໄພຕ້ອງຮ່ວມໃຈກັນຕໍ່ສູ້
ຍາມຊາດມີໄພຕ້ອງຮ່ວມໃຈກັນຕໍ່ສູ້ - Untitled design - ຍາມຊາດມີໄພຕ້ອງຮ່ວມໃຈກັນຕໍ່ສູ້

ໂດຍ: ທິດກໍ່າ

ຖ້າເຮົາປຽບທຽບໃສ່ການຕໍ່ສູ້ຕ້ານໂຣກລະບາດໂຄວິດ-19 ມັນກໍເໝືອນກັນກັບການຕໍ່ສູ້ ຫລື ຕ້ານສົງຄາມຊະນິດໜຶ່ງ ເອີ້ນວ່າ: ການຕ້ານສົງຄາມຊີວະພາບ. ພາຍຫລັງເກີດມີໂຣກລະບາດຊະນິດນີ້ຂຶ້ນມາ ນັບແຕ່ທ້າຍເດືອນທັນວາ 2019 ເປັນຕົ້ນມາ ຍັງບໍ່ທັນມີນັກວິທະຍາສາດການແພດຄົນໃດຢັ້ງຢືນວ່າ ມັນເກີດມາຈາກສັດ, ຈາກຄົນ ຫລື ທຳມະຊາດຢ່າງຮ້ອຍເປີເຊັນ. ພຽງແຕ່ເປັນການວິເຄາະຕາມທັດສະນະໃນເຊີງວິທະຍາສາດການແພດບາງຄົນກໍວ່າ ມາຈາກໂຕເຈຍເປັນຕົ້ນເຫດ, ແຕ່ບາງຄົນກໍຖິ້ມຮ້າຍໃສ່ປະເທດນັ້ນ, ປະເທດນີ້ເປັນຜູ້ກໍ່ຂຶ້ນ ເພື່ອຈຸດປະສົງທຳລາຍເປົ້າໝາຍຂອງຝ່າຍກົງກັນຂ້າມໂດຍສະເພາະ, ແຕ່ມັນພັດກາຍເປັນບັນຫາແຜ່ລາມໄປທົ່ວໂລກ. ນອກຈາກນັ້ນ ບາງຄົນກໍວ່າບັນຫາໂຣກລະບາດໂຄວິດ-19 ນີ້ ມັນເກີດຂຶ້ນຕາມກົດເກນພາວະວິໄສ ຄືຫ້າສິບປີໃດ ຫລື ຮ້ອຍປີໃດມັນເກີດໂຣກໄພໄຂ້ເຈັບຄັ້ງໜຶ່ງ ເຊິ່ງໃນສະໄໝບູຮານພໍ່ແມ່ເຖົ້າແກ່ເຮົາເຄີຍເອີ້ນກັນວ່າ: ຮ່າເຂົ້າບ້ານ ຫລືວ່າ ຮ່າກິນຄົນ.

     ແນວໃດກໍຕາມ, ສິ່ງທີ່ມັນເກີດມັນກໍເກີດຂຶ້ນແລ້ວ ຫລື ສິ່ງທີ່ມັນເປັນກໍເປັນໄປແລ້ວ, ອັນສຳຄັນທີ່ສຸດມີແຕ່ວ່າພວກເຮົາຕ້ອງເປັນເຈົ້າການຕ້ານ ແລະ ຕໍ່ສູ້ຢ່າງດຸເດືອດ ແລະ ສຸດຂັ້ນສຸດຂີດຈົນກວ່າຈະໄດ້ຮັບໄຊຊະນະຢ່າງສິ້ນເຊີງ. ຖ້າຈະປຽບທຽບໃສ່ຢ່າງໜຶ່ງອີກມັນກໍປຽບເໝືອນກັບຍຸກປະເທດຊາດບ້ານເມືອງເຮົາຕົກຢູ່ໃນໄພສົງຄາມຮຸກຮານກ່ອນໜ້ານັ້ນຫ້າຫົກສິບປີຫລັງຜ່ານມາ ຈົນວ່າສາມາດປົດປ່ອຍປະເທດຊາດໄດ້ຢ່າງສົມບູນແບບ. ເພາະສະນັ້ນ ໃນສະພາບປັດຈຸບັນໃນເງື່ອນໄຂໂຣກລະບາດໂຄວິດ-19 ພວມແຜ່ລາມໄປທົ່ວໂລກ ພວກເຮົາກໍຕ້ອງໄດ້ຮ່ວມແຮງຮ່ວມໃຈກັນຕໍ່ສູ້ຕອບຕ້ານ, ຕອບໂຕ້ ແລະ ປາບປາມພະຍາດນີ້ໃຫ້ໝົດໄປ. ບັນດາປະເທດທີ່ໜັກໜ່ວງກວ່າໝູ່ຢູ່ແຖວເອີຣົບກໍມີອິຕາລີ, ສະເປນ, ຝຣັ່ງ, ອັງກິດ, ອາເມລິກາ ແລະ ປະເທດອື່ນໆ. ສະເພາະໃນບັນດາປະເທດອາຊຽນເຮົາກໍພວມລະບາດໃນທຸກປະເທດແລ້ວ. ສ່ວນລາວເຮົາມາຮອດເວລານີ້ກໍສາມາດກວດພົບຜູ້ຕິດເຊື້ອຈຳນວນ 8 ຄົນແລ້ວ ເຫັນວ່າສະຖິຕິນັບຈາກໜຶ່ງຄົນຂຶ້ນມາເປັນສອງສາມສີ່ຫ້າຫົກເຈັດແປດ. ສະແດງວ່າມັນນັບມື້ກຳເລີບຂຶ້ນເປັນໄລຍະ, ໃນຕໍ່ໜ້າຊ້າ ຫລື ໄວອາດຈະເພີ່ມຂຶ້ນ ຫລື ຫລຸດລົງມັນກໍແມ່ນຂຶ້ນກັບເງື່ອນໄຂຕົວຈິງ ໂດຍສະເພາະຂຶ້ນກັບພວກເຮົາທີ່ຈະຮ່ວມແຮງຮ່ວມໃຈຕໍ່ສູ້ຈົນເຖິງກົກເຖິງຮາກ.

     ສຳລັບຮູບການ ແລະ ວິທີການຕໍ່ສູ້ກັບພະຍາດໂຄວິດ-19 ນັ້ນ, ພວກເຮົາບໍ່ໄດ້ໃຊ້ປືນໃຊ້ຜາຍິງກັນຄືສະໄໝສົງຄາມ ເພາະວ່າສັດຕູໂຄວິດ-19 ມັນບໍ່ເຫັນເປັນຕົນເປັນໂຕຍ່າງມາຄືຄົນ ແລະ ບໍ່ສາມາດເບິ່ງເຫັນດ້ວຍຕາເປົ່າອີກ. ສະນັ້ນ ໃນວິທີການ ແລະ ຮູບການຕໍ່ສູ້ພຽງແຕ່ພວກເຮົາຕ້ອງເປັນເຈົ້າກັບດັກຢູ່ເຮືອນ, ຫ້າມອອກໄປນອກເດັດຂາດຖ້າບໍ່ຈຳເປັນໃນຊ່ວງໄລຍະທີ່ທາງການເພິ່ນຫ້າມ ຫລື ຖ້າມີຄວາມຈຳເປັນອອກໄປນອກເຮືອນແມ່ນໃຫ້ໃຊ້ຜ້າປິດປາກ, ຫ້າມໄປບ່ອນຊຸມຊົນຄົນແອອັດ ໂດຍສະເພາະແມ່ນຈຸດ ຫລື ສະຖານທີ່ມີຄວາມສ່ຽງ. ນອກຈາກນັ້ນ ກໍໃຫ້ໝັ່ນລ້າງມືດ້ວຍນ້ຳຢາຂ້າເຊື້ອຫລາຍໆຄັ້ງຕໍ່ມື້. ສ່ວນຜູ້ໃດມີອາການຮູ້ສຶກຕົວຮ້ອນເປັນໄຂ້, ໄອ, ເຈັບຄໍຕາມອາການທີ່ແພດໝໍເພິ່ນແຈ້ງບົ່ງມະຕິ ຫລື ສົງໄສກໍໃຫ້ຂ້ຽວໄປຫາແພດໝໍເພື່ອໃຫ້ເພິ່ນກວດ ຫລື ເຊັກສຸຂະພາບໃຫ້ທັນເວລາ, ບໍ່ດັ່ງນັ້ນກໍຈະສວາຍເກີນແກ້.

ຍາມຊາດມີໄພຕ້ອງຮ່ວມໃຈກັນຕໍ່ສູ້ - Wave100S AD to Website 2020 0 - ຍາມຊາດມີໄພຕ້ອງຮ່ວມໃຈກັນຕໍ່ສູ້

     ສະເພາະພາກສ່ວນແຮງງານທີ່ກັບມາຈາກປະເທດໄທ ຫລື ປະເທດທີ່ມີຄວາມສ່ຽງຕ້ອງພາກັນອົດທົນກັກກັນຕົນເອງໃຫ້ໄດ້ຈຳນວນ 14 ມື້ຕາມຫລັກການຕິດຕາມຂອງແພດ, ຫ້າມຂັດຂືນດື້ດຶງຝ່າຝືນຈົ່ມວ່າບໍ່ພໍໃຈຂອງບາງກຸ່ມບາງຄົນດັ່ງທີ່ເຫັນໃນແຫລ່ງສື່, ໃຫ້ເຂົ້າໃຈວ່າຊີວິດຂອງຕົນເອງ, ພໍ່ແມ່ຍາດຕິພີ່ນ້ອງ ແລະ ສັງຄົມທີ່ຢູ່ຮ່ວມກັນບົນຜືນແຜ່ນດິນຂອງຊາດບ້ານເມືອງເປັນສິ່ງປະເສີດ ແລະ ສຳຄັນກວ່າຊັບສິນພາຍນອກ. ຖ້າຜູ້ໃດບໍ່ປະຕິບັດຕາມກົດຂໍໃຫ້ເຈົ້າໜ້າທີ່ໃຊ້ມາດຕະການຢ່າງສຽຂາດ.

     ບັນຫາທຸກສິ່ງທຸກຢ່າງທີ່ກ່າວມາຂ້າງເທິງນີ້, ທາງພັກ ແລະ ລັດຖະບານເຮົາ ກໍຄືຄະນະສະເພາະກິດແຫ່ງຊາດ ຕະຫລອດຮອດແພດໝໍເພິ່ນໄດ້ແນະນຳຕັກເຕືອນກໍຂໍໃຫ້ພາກັນປະຕິບັດກົດຢ່າງເຂັ້ມງວດຄົບຖ້ວນ ແລະ ທຸກຄົນຕ້ອງມີພັນທະຕໍ່ຕ້ານ ແລະ ສູ້ຕາຍຕໍ່ຄວາມຫາຍຍະນະທີ່ພວມເຂົ້າມາທຳລາຍຊີວິດອິນຊີຂອງຄົນໃນຊາດ.

ຍາມຊາດມີໄພຕ້ອງຮ່ວມໃຈກັນຕໍ່ສູ້ - WhatsApp Image 2020 05 27 at 5 - ຍາມຊາດມີໄພຕ້ອງຮ່ວມໃຈກັນຕໍ່ສູ້
ຍາມຊາດມີໄພຕ້ອງຮ່ວມໃຈກັນຕໍ່ສູ້ - WhatsApp Image 2020 05 27 at 5 - ຍາມຊາດມີໄພຕ້ອງຮ່ວມໃຈກັນຕໍ່ສູ້
error: Alert: ເນື້ອຫາຂ່າວມີລິຂະສິດ !!