ເດັດດ່ຽວປະຕິບັດວາລະສຸກເສີນຕ້ານໂຄວິດ-19

ເດັດດ່ຽວປະຕິບັດວາລະສຸກເສີນຕ້ານໂຄວິດ-19 - AGL banner - ເດັດດ່ຽວປະຕິບັດວາລະສຸກເສີນຕ້ານໂຄວິດ-19
ກົດເພື່ອຟັງຂ່າວ
ກົດເພື່ອຟັງຂ່າວ

ໂດຍ: ທິດກໍ່າ

ໃນວັນທີ 29 ມີນາ 2020 ທີ່ຜ່ານມາ, ທ່ານນາຍົກລັດຖະມົນຕີ ທອງລຸນ ສີສຸລິດ ໄດ້ອອກຄຳສັ່ງເລກທີ 06/ນຍ, ລົງວັນທີ 29 ມີນາ 2020 ວ່າດ້ວຍການເພີ່ມທະວີມາດຕະການສະກັດກັ້ນ, ກັນການລະບາດ, ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດໂຄວິດ-19 (COVID-19). ຕໍ່ຈຸດປະສົງເປົ້າໝາຍອັນໃຫຍ່ຫລວງດັ່ງກ່າວແມ່ນໃຫ້ທຸກຄົນປະຕິບັດຢ່າງເຂັ້ມງວດກວດຂັ້ນ ແລະ ເດັດຂາດກໍມີເຖິງ 18 ຂໍ້ດ້ວຍກັນ. ກ່ຽວກັບເນື້ອໃນຈິດໃຈກວມລວມຂອງຄຳສັ່ງສະບັບນີ້ແມ່ນໃຫ້ພາກັນປິດບ້ານ, ປິດເມືອງ, ປິດແຂວງໃນທົ່ວປະເທດ ໂດຍຫ້າມຄົນໃນອອກ ຄົນນອກເຂົ້າ. ພະນັກງາ, ທະຫານ, ຕຳຫລວດ ແລະ ປະຊາຊົນບັນດາເຜົ່າ ຕະຫລອດເຖິງຊາວຕ່າງປະເທດທີ່ອາໄສຢູ່ລາວບໍ່ໃຫ້ອອກນອກບ້ານຢ່າງເດັດຂາດ ນັບແຕ່ວັນທີ 1 ຫາວັນທີ 11 ເມສາ 2020. ຈາກນັ້ນ ກໍມີການພັກຕໍ່ໃສ່ບຸນປີໃໝ່ລາວ ນັບແຕ່ວັນທີ 12 ເມສາ ຫາວັນທີ 19 ເມສາ ຈຶ່ງຖືວ່າພົ້ນວາລະສຸກເສີນແຫ່ງຊາດເພື່ອຕ້ານໂຣກລະບາດໂຄວິດ-19 ທີ່ພວມມາລຸກລາມເຜົາຜານຊີວິດອິນຊີຂອງມວນມະນຸດໃນທົ່ວໂລກ ກໍຄືຄົນລາວເຮົາໃນສະພາບປັດຈຸບັນ.

     ສ່ວນກໍລະນີພິເສດທີ່ໃຫ້ຍົກເວັ້ນເຂົ້າ-ອອກເຄື່ອນໄຫວໄປມາໄດ້ນັ້ນກໍແມ່ນພະນັກງານ, ທະຫານ, ຕຳຫລວດ, ທີ່ປົກປ້ອງຄວາມສະຫງົບສຸກ ແລະ ຄວາມປອດໄພທາງສັງຄົມ, ບັນດາແພດໝໍທີ່ມີໜ້າທີ່ປິ່ນປົວຄົນເຈັບ, ຕະຫລາດ, ບັນດາຫ້າງຮ້ານບໍລິການຂາຍສິນຄ້າ, ການເຈັບເປັນເອັນອຸ່ນ ແລະ ການລົ້ມການຕາຍອື່ນໆ. ນອກຈາກນັ້ນ ກໍຮຽກຮ້ອງມອບໝາຍຢ່າງເດັດຂາດໃຫ້ສຳນັກງານອົງການຈົ່ງຈັດຕັ້ງສິດປະຈຳການ ເພື່ອຕິດຕາມເຝົ້າລະວັງແກ້ວຽກປະຈຳສຸກເສີນໃນກົມກອງ ກໍຄືຂອບເຂດຄວາມຮັບຜິດຊອບຂອງແຕ່ລະຂະແໜງການໃຫ້ມີຄວາມປອດໄພສູງສຸດໃນທຸກດ້ານ.

      ແນວໃດກໍຕາມ, ເມື່ອຮອດເວລາກຳນົດວາລະສຸກເສີນແຫ່ງຊາດນີ້ແລ້ວ, ຖ້າມີສະພາບການປ່ຽນແປງແນວໃດ ທາງລັດຖະບານຈະແຈ້ງໃຫ້ຊາບຕາມທີ່ຫລັງ. ກໍຂໍໃຫ້ພີ່ນ້ອງຮ່ວມຊາດ ນັບທັງຊາວຕ່າງປະເທດທີ່ປະຕິບັດໜ້າທີ່ ຫລື ທຳມາຫາກິນຢູ່ປະເທດລາວຈົ່ງໄດ້ໃຫ້ການຮ່ວມມືເປັນຈິດໜຶ່ງໃຈດຽວກັນປະຕິບັດຢ່າງເດັດຂາດ ແລະ ເຂັ້ມງວດ. ເປົ້າໝາຍອັນສູງສຸດຂອງພັກ ແລະ ລັດຖະບານເຮົາໃນການຕ້ານ ແລະ ສະກັດກັ້ນໂຣກລະບາດຄັ້ງນີ້ແມ່ນໃຫ້ມີການເສຍຫາຍໜ້ອຍທີ່ສຸດສຳລັບປະເທດລາວເຮົາ.

ເດັດດ່ຽວປະຕິບັດວາລະສຸກເສີນຕ້ານໂຄວິດ-19 - Wave100S AD to Website 2020 0 - ເດັດດ່ຽວປະຕິບັດວາລະສຸກເສີນຕ້ານໂຄວິດ-19

     ກໍດັ່ງທຸກຄົນໄດ້ຮັບຮູ້ນຳກັນແລ້ວວ່າ: ເຊື້ອພະຍາດໂຄວິດ-19 ໄດ້ສັງຫານຊີວິດອິນຊີຂອງມວນມະນຸດໃນທົ່ວໂລກຫລາຍພັນຫລາຍໝື່ນຄົນແລ້ວ. ຈາກສະຖິຕິຫລ້າສຸດມາຮອດປັດຈຸບັນໄດ້ມີຄົນໃນທົ່ວໂລກຕິດເຊື້ອພະຍາດໂຄວິດ-19 ເຖິງ 723.328 ຄົນ ໃນນີ້ໄດ້ປິ່ນປົວໃຫ້ຫາຍດີ 151.991 ຄົນ ແລະ ເສຍຊີວິດເຖິງ 2 ໝື່ນກວ່າຄົນ ໃນນີ້ປະເທດທີ່ມີຜູ້ຕິດເຊື້ອຫລາຍກວ່າໝູ່ແມ່ນສະຫະລັດອາເມລິກາ 143.025 ຄົນ, ຮອງລົງມາແມ່ນອິຕາລີ 79.689 ຄົນ, ຈີນ 82.152 ຄົນ, ແອັສປາຍ 80.110 ຄົນ, ເຢຍລະມັນ 62.435 ຄົນ, ຝຣັ່ງ 40.723 ຄົນ, ອີຣານ 38.309 ຄົນ, ອັງກິດ 19.748 ຄົນ, ສະວິດ 14.829 ຄົນ, ສ.ເກົາຫລີ 9.661 ຄົນ ເຫລືອນັ້ນແມ່ນຢັ່ງຢາຍໄປໃນແຕ່ລະປະເທດໃນທົ່ວໂລກບ່ອນຫລາຍບ່ອນໜ້ອຍ.

     ສຳລັບ ສປປ ລາວເຮົາ ມາຮອດວັນທີ 30 ມີນາ 2020 ໄດ້ກວດພົບຜູ້ຕິດເຊື້ອໄປແລ້ວ 9 ຄົນ, ຜູ້ທີ່ສົງໄສໄດ້ຮັບການວິເຄາະກວດກາ 364 ລາຍ. ປັດຈຸບັນຜູ້ທີ່ຕິດເຊື້ອ ທາງແພດໝໍພວມເອົາໃຈໃສ່ປິ່ນປົວໃຫ້ຫາຍດີ ແລະ ຍັງບໍ່ທັນມີໃຜເສຍຊີວິດຍ້ອນ. ເພາະສະນັ້ນ ດ້ວຍຄວາມເປັນຫ່ວງເປັນໄຍຂອງພັກ ແລະ ລັດຖະບານ ມາຮອດວັນທີ 29 ມີນາ 2020, ທ່ານນາຍົກລັດຖະມົນຕີ ແຫ່ງ ສປປ ລາວເຮົາ ຈຶ່ງໄດ້ອອກຄຳສັ່ງສຸກເສີນໃຫ້ເປັນວາລະແຫ່ງຊາດຂັ້ນສູງສຸດ ເພື່ອຕອບຕ້ານ ແລະ ຕອບໂຕ້ເຊື້ອພະຍາດໂຄວິດ-19 ທີ່ພວມລະບາດຂ້າຄົນໃນທົ່ວໂລກ. ປີ 2020 ຖືເປັນປີຊາວໂລກຮັບເຄາະຢ່າງໃຫຍ່ຫລວງທີ່ບໍ່ເຄີຍມີມາໃນປະຫວັດສາດຂອງຊາວໂລກ ກໍຄືຊາວລາວເຮົາ. ໃນອະນາຄົດຕໍ່ໜ້າ ກໍຄືຍາວນານ ຍັງບໍ່ຮູ້ວ່າຈະມີໄພພິບັດອັນໃດມາທຳລາຍເຜົາຜານຊີວິດອິນຊີມະນຸດເຮົາໃນໂລກ. ຈຶ່ງຂໍໃຫ້ຊາວລາວເຮົາທຸກຄົນຈົ່ງມີສະຕິ, ມີປັນຍາ, ແກ້ໄຂບັນຫາໃຫ້ຖືກຕ້ອງ ທັງຫາວິທີຫລີກເວັ້ນແຕ່ຫົວທີ ເພາະໂລກຂອງເຮົາມັນບໍ່ຄືເກົ່າອີກແລ້ວ. ອັນສຳຄັນທີ່ສຸດແມ່ນຕ້ອງປະຕິບັດຄຳສັ່ງ ແລະ ການຊີ້ນຳຂອງພັກ ແລະ ລັດຖະບານເຮົາແຕ່ລະໄລຍະ. ເມືອງລາວເປັນເມືອງພຸດ, ຄົນລາວເປັນຄົນມີຈິດໃຈເອື້ອເຟື້ອເພື່ອແຜ່, ເວົ້າງ່າຍຢູ່ສະບາຍ. ຈົ່ງຮ່ວມໃຈກັນຕ້ານໂຄວິດ-19 ໃຫ້ຫາຍຈາກເມືອງລາວ ແລ້ວພາກັນຢູ່ຊຸ່ມກິນເຢັນຕະຫລອດໄປ ວ່ານາ !.

ເດັດດ່ຽວປະຕິບັດວາລະສຸກເສີນຕ້ານໂຄວິດ-19 - WhatsApp Image 2020 05 27 at 5 - ເດັດດ່ຽວປະຕິບັດວາລະສຸກເສີນຕ້ານໂຄວິດ-19
ເດັດດ່ຽວປະຕິບັດວາລະສຸກເສີນຕ້ານໂຄວິດ-19 - WhatsApp Image 2020 05 27 at 5 - ເດັດດ່ຽວປະຕິບັດວາລະສຸກເສີນຕ້ານໂຄວິດ-19
ເດັດດ່ຽວປະຕິບັດວາລະສຸກເສີນຕ້ານໂຄວິດ-19 - WhatsApp Image 2020 05 27 at 5 - ເດັດດ່ຽວປະຕິບັດວາລະສຸກເສີນຕ້ານໂຄວິດ-19
ເດັດດ່ຽວປະຕິບັດວາລະສຸກເສີນຕ້ານໂຄວິດ-19 - WhatsApp Image 2020 05 27 at 5 - ເດັດດ່ຽວປະຕິບັດວາລະສຸກເສີນຕ້ານໂຄວິດ-19
error: Alert: Content is protected !!