ຍີ່ປຸ່ນແຈກຟຣີຢາ “ອາວິແກນ” ປິ່ນປົວໂຄວິດ-19 ໃຫ້ທົ່ວໂລກ
ລັດຖະບານຍີ່ປຸ່ນສະເໜີແຈກຢາອາວິແກນ ໂດຍບໍ່ຄິດເງິນແກ່ທຸກປະເທດທີ່ສົນໃຈຕ້ອງການນຳຢານີ້ໄປປິ່ນປົວຜູ້ປ່ວຍໂຄວິດ-19. ຂະນະທີ່ຢາຊະນິດນີ້ໃຫ້ຜົນດີໃນການທົດລອງປິ່ນປົວ ແລະ ເປັນທີ່ຕ້ອງການຂອງ 30 ປະເທດທົ່ວໂລກ.
ທ່ານ ໂຢຊິຮິເດະ ສຸກະ ເລຂາທິການໃຫຍ່ປະຈຳຄະນະລັດຖະບານ ກ່າວວ່າ: ປັດຈຸບັນມີປະມານ 30 ປະເທດທີ່ຂໍຢາອາວິແກນຜ່ານຊ່ອງທາງການທູດ ແລະ ລັດຖະບານຍີ່ປຸ່ນກຳລັງຈັດສົ່ງຢາຊະນິດນີ້ໃຫ້ແກ່ປະເທດຕ່າງໆໂດຍບໍ່ຄິດຄ່າໃຊ້ຈ່າຍ.
ໃນວັນທີ 20 ມີນາ, ທາງການອິນໂດເນເຊຍ ໄດ້ຂໍຢາອາວິແກນໃນປະລິມານ 2 ລ້ານໂດສ ຈາກທາງການຍີ່ປຸ່ນ ແລະ ມີແຜນຈະທົດສອບທາງຄລີນິກທັນທີທີ່ໄດ້ຮັບຢານີ້ຈາກຍີ່ປຸ່ນ.
ຫລ້າສຸດ ຈຳນວນຜູ້ຕິດເຊື້ອໄວຣັສໂຄໂຣນາສາຍພັນໃໝ່ຢູ່ອິນໂດເນເຊຍເພີ່ມເປັນ 1.986 ຄົນ ແລະ ມີຜູ້ເສຍຊີວິດຈາກໂຄວິດ-19 ຈຳນວນ 181 ຄົນ ສູງກວ່າ ສ.ເກົາຫລີ ແລະ ເປັນຮອງແຕ່ຈີນສຳລັບພາກພື້ນອາຊີ.
ບໍລິສັດຟູຈິຟີມ ໂທຢາມະ ເຄມິຄັລ ເຊິ່ງເປັນບໍລິສັດລູກຂອງຟູຈິຟີມ ເລີ່ມການທົດລອງທາງຄລີນິກ ເພື່ອທົດສອບປະສິດທິພາບຂອງຢາອາວິແກນໃນວັນທີ 1 ເມສາ ໃນການປິ່ນປົວຜູ້ປ່ວຍທີ່ຕິດເຊື້ອໂຄໂຣນາໄວຣັສສາຍພັນໃໝ່ 2019 ຫລັງຈາກມີລາຍງານຈາກທາງການຈີນວ່າຢາຊະນິດນີ້ໃຫ້ຜົນການປິ່ນປົວເປັນທີ່ໜ້າພໍໃຈ.
ສູນພັດທະນາເຕັກໂນໂລຊີຊີວະພາບແຫ່ງຊາດຈີນ ຖະແຫລງໃນວັນທີ 19 ມີນາວ່າ: ຢາຊະນິດນີ້ມີຄວາມປອດໄພສູງ ແລະ ມີປະສິດທິພາບໃນການປິ່ນປົວຜູ້ປ່ວຍ ໂດຍຜູ້ປ່ວຍຜົນກວດເປັນລົບຫລັງໄດ້ຮັບຢາດັ່ງກ່າວສະເລ່ຍ 4 ວັນ ນັບແຕ່ທີ່ມີຜົນກວດເຊື້ອເປັນບວກ ທຽບໃສ່ຄ່າສະເລ່ຍ 11 ວັນ ຂອງຜູ້ທີ່ບໍ່ໄດ້ຮັບການປິ່ນປົວດ້ວຍຢາດັ່ງກ່າວ.
ໂຄສົກຂອງຟູຈິຟີມ ທ່ານ ໂທຢາມະ ເຄມິຄັລ ເປີດເຜີຍວ່າ: ບໍລິສັດຈະມີການທົດສອບຢາກັບຜູ້ປ່ວຍ 100 ຄົນ ຈົນຮອດທ້າຍເດືອນມິຖຸນາ ຫລັງຈາກນັ້ນຈະເກັບ ແລະ ວິເຄາະຂໍ້ມູນ ກ່ອນຈະຍື່ນຂໍອະນຸມັດໃນພາຍຫລັງ.
