ແຮງງານລາວໄປເຮັດວຽກຢູ່ໄທໃຜໄດ້ປະໂຫຍດ

ແຮງງານລາວໄປເຮັດວຽກຢູ່ໄທໃຜໄດ້ປະໂຫຍດ - AGL banner - ແຮງງານລາວໄປເຮັດວຽກຢູ່ໄທໃຜໄດ້ປະໂຫຍດ
ກົດເພື່ອຟັງຂ່າວ
ກົດເພື່ອຟັງຂ່າວ

ທິດກໍ່າ:

    ການລະເບີດເຊື້ອໄວຣັສສາຍພັນໃໝ່ໂຄໂຣນາ ຫລື ອັນທີ່ເອີ້ນວ່າ: ໂຄວິດ-19 ໄດ້ເຮັດໃຫ້ຄົນລາວທີ່ໄປທຳງານຢູ່ປະເທດໄທພາກັນໂຫ່ແຕກຝູງໜີຜ່າຍມາລາວ ອັນເປັນບ້ານເມືອງນອນຂອງຕົນຫລາຍແສນຄົນໃນທົ່ວປະເທດ. ເທົ່າທີ່ໄດ້ຕິດຕາມແຫລ່ງຂ່າວຄາວຈຳນວນທີ່ໄປຫລາຍກວ່າໝູ່ແມ່ນຄົນຢູ່ແຂວງສະຫວັນນະເຂດ, ຮອງລົງມາກໍແມ່ນແຂວງຈຳປາສັກ, ສາລະວັນ, ຄຳມ່ວນ ແລະ ບັນດາແຂວງອື່ນໆໃນທົ່ວປະເທດ. ໃນການອອກໄປທຳງານຢູ່ໄທ ບາງຄົນກໍໃຊ້ເວລາດົນນານເປັນປີສອງປີ, ບາງຄົນກໍເປັນສາມສີ່ຫ້າປີ ຫລື ສິບປີ ເວົ້າໄດ້ວ່າເກືອບລືມບ້ານເກີດເມືອງນອນຂອງຕົນ ເອົາຊີວິດສູ້ຊົນຕາຍດາບໜ້າ, ຊ້ຳບໍ່ໜຳ ບາງລາຍບໍ່ວ່າຍິງ ຫລື ຊາຍມັກຮັກກັນກໍຕັດສິນໃຈສ້າງຄອບຄົວເປັນຝັ່ງເປັນຝາ, ອູ້ມລູກຜູກໝາກກັບມາບ້ານເປັນພຶງເປັນແພປານປາລູກຄອກ. ໃນສາຍສຳພັນສ້າງຄອບຄົວເປັນຜົວເມຍກັນນັ້ນ, ບາງຄົນກໍໄດ້ເອົາກັບຄົນໄທ, ບາງລາຍກໍຄົນລາວດ້ວຍກັນສຸດແລ້ວແຕ່ປັດໄຈ ແລະ ເງື່ອນໄຂເພື່ອເອົາຊີວິດສູ້ຢູ່ລອດໃນຖານະໄປຫາເງິນຫາຄຳມາຄ້ຳຈູນຕົນເອງ ແລະ ຄອບຄົວທາງບ້ານ.

     ຂໍເວົ້າຄວາມຈິງ ຄົນລາວເຮົາ ໂດຍສະເພາະແມ່ນຊາວໜຸ່ມຍິງຊາຍພາກັນນິຍົມໄປທຳງານຢູ່ໄທຕັ້ງຫລາຍອີ່ຫລີ. ຈາກປາກົດການຕົວຈິງທີ່ເຮົາໄດ້ເຫັນກັບຕາແມ່ນໃນຊ່ວງປະເທດໄທເກີດມີໂຣກລະບາດເຊື້ອໄວຣັສສາຍພັນໃໝ່ໂຄວິດ-19 ຄົນລາວທັງຫລາຍກໍພາກັນໜີແຕກຜ່າຍກັບຄືນມາບ້ານເກີດເມືອງນອນຂອງຕົນເປັນໝື່ນເປັນແສນ. ໃນຈຳນວນຄົນລາວທີ່ພາກັນໄປອອກແຮງງານຢູ່ໄທສ່ວນຫລາຍກໍແມ່ນຖືກຕ້ອງຕາມກົດໝາຍ, ມີຈຳນວນໜຶ່ງກໍລັກໄປລັກມາ ຈົນວ່າໃນປັດຈຸບັນມີຈຳນວນໜຶ່ງບໍ່ຍອມກັບບ້ານຍ້ອນເງື່ອນໄຂສະພາບແວດລ້ອມພໍຢູ່ພໍໄປ. ຍິ່ງໄປກວ່ານັ້ນ ມີບາງລາຍເອົາຜົວ, ເອົາເມຍຄົນໄທບໍ່ມີໂອກາດໄດ້ກັບມາບ້ານເກີດຫລາຍປີກໍເລີຍກາຍເປັນຄົນໄທໂດຍປະລິຍາຍ. ນີ້ຄືການເຄື່ອນຍ້າຍຂອງຄົນຊົນຊາດໜຶ່ງໄປຫາຊາດໜຶ່ງໃນຍຸກສະໝອງໄຫລ.

     ເມື່ອຕັ້ງໂຈດກັນວ່າ: ການໄປອອກແຮງງານຢູ່ໄທແມ່ນໃຜໄດ້ປະໂຫຍດຫລາຍກວ່າກັນ?  ຄຳຕອບໂຈດກໍຄືຕ່າງຝ່າຍກໍຕ່າງໄດ້ປະໂຫຍດ ບໍ່ວ່າລາວ ແລະ ໄທ. ໃນນີ້ກໍມີຜູ້ໄດ້ຫລາຍໄດ້ໜ້ອຍ ແລະ ເສຍປຽບໄດ້ປຽບທີ່ແຕກຕ່າງກັນໄປ ເປັນຕົ້ນເບື້ອງຜູ້ອອກແຮງງານກໍໄດ້ເງິນໄດ້ຄຳຝາກມາໃຫ້ພໍ່ແມ່ຊ່ວຍປຸກເຮືອນປຸກຊານ, ຊື້ວັດຖຸສິ່ງຂອງຕ່າງໆ, ຊື້ລົດຊື້ລາງ, ລົດໄຖ, ລົດຈັກໃຫ້ພໍ່ແມ່ຂີ່ ຫລື ມີທຶນມີຮອນໄດ້ຄ້າຂາຍງາຍມືຫາລ້ຽງຊີບໃນຄອບຄົວ. ສ່ວນວ່າເບື້ອງລັດນັ້ນກໍແນ່ນອນສິ່ງທີ່ປະຕິເສດບໍ່ໄດ້ ກໍຄືຄ່າພັນທະອາກອນ ໂດຍສະເພາະແມ່ນຄ່າບໍລິການເອກະສານເຂົ້າ-ອອກ, ຄ່າທຳນຽມຕ່າງໆໃນສິ່ງທີ່ຈຳເປັນອື່ນໆ ແລະ ອີກປະການໜຶ່ງກໍສ້າງເງື່ອນໄຂໃຫ້ພົນລະເມືອງຂອງຕົນມີວຽກເຮັດງານທຳ, ມີລາຍໄດ້ຄ້ຳຈູນຄອບຄົວຊ່ວຍກັນແບກຫາບໃນຖານະຄອບຄົວຍັງທຸກຍາກຂາດເຂີນ.

     ສ່ວນວ່າທາງເບື້ອງປະເທດເພື່ອນບ້ານນັ້ນ ກໍໄດ້ກຳລັງແຮງໃນການສ້າງສາພັດທະນາປະເທດຊາດ, ມີກຳລັງການຜະລິດເພື່ອເຮັດໃຫ້ປະເທດຊາດຮັ່ງມີເຂັ້ມແຂງຍິ່ງຂຶ້ນໄປເລື້ອຍໆ. ເມື່ອຖືກຖາມວ່າແຮງງານລາວທີ່ໄປເຮັດວຽກຢູ່ໄທເຂົາເຮັດໃນສາຂາອາຊີບໃດແດ່ ? ຄຳຕອບກໍຄືສັບມະປິຫຸບພຶກ, ບາງກຸ່ມ, ບາງລາຍກໍຢູ່ຕາມໂຮງຈັກໂຮງງານໃນຂະແໜງການຕ່າງໆ, ບາງລາຍກໍແບກເປົານ້ຳກ້ອນ, ບາງຄົນກໍເປັນຄົນສວນ, ແມ່ບ້ານ, ບາງຄົນກໍເປັນແມ່ຄົວ, ຜູ້ແຂງແຮງສິງາມໆແດ່ກໍຂາຍອາຫານ, ຂາຍເຄື່ອງຍ່ອຍຕາມຕະຫລາດ ຫລືວ່າ ຊຸບເປີມາເກັດ. ກ່ຽວກັບການດຳລົງຊີວິດການຢູ່ການກິນບ່ອນໃດຜູ້ຈ້າງງານໃຈດີແນ່ກໍໄດ້ກິນອີ່ມ, ນຸ່ງອຸ່ນ, ການໄປການມາກໍສະດວກສະບາຍ. ແຕ່ມີບາງບ່ອນຜູ້ຈ້າງງານຂີ້ຖີ່, ມັກຂົ່ມເຫັງເຕັງເຕັກກໍບໍ່ມີໂອກາດໄດ້ອອກນອກບ້ານ ຖືກກັກຂັງປານນັກໂທດຄືດັ່ງເຫັນຂ່າວຊ່າລືກັນຜ່ານມາ. ສ່ວນວ່າແມ່ນໃຜເສຍປຽບໄດ້ປຽບນັ້ນກໍຂໍໃຫ້ທຸກຄົນຟັງໃນຫູ ດູໃນຕາ ລັກຄະນາໃນໃຈຈຶ່ງຈະຮູ້ເອົາເອງ.

ແຮງງານລາວໄປເຮັດວຽກຢູ່ໄທໃຜໄດ້ປະໂຫຍດ - Wave100S AD to Website 2020 0 - ແຮງງານລາວໄປເຮັດວຽກຢູ່ໄທໃຜໄດ້ປະໂຫຍດ

      ຈາກປະຫວັດສາດຊຳເຮື້ອສະໄໝເປັນຫົວເມືອງຂຶ້ນ ນັບແຕ່ຣາຊະການທີໜຶ່ງໃນຊຸມປີ 1700 ຈົນມາຮອດປັດຈຸບັນ ຄົນໄທບາງກຸ່ມກໍວ່າລາວໂງ່, ລາວຂີ້ຂ້າຕາຂາວ, ລາວເປັນຂີ້ຂ້າໄທ, ລາວໄອ້ຄວາຍກາຍເປັນນິໃສຂອງພວກຕະກຸນໄທໃຫຍ່ ໂດຍສະເພາະແມ່ນຄົນກຸງເທບມັກດູຖູກລາວວຽງຈັນ, ລາວອີສານ, ລາວລ້ານນາລາວລ້ານຊ້າງ. ດັ່ງວັນທີ 21 ມີນາຜ່ານມາ ທ້າວ ຈັດ ທີມະ ໂຄສົກຊ່ອງວັນ ໄດ້ວິເຄາະດ່າລາວໃນທາງກົງ ແລະ ທາງອ້ອມວ່າລາວລ້າຫລັງ, ບໍ່ທັນສະໄໝຄືຢູ່ໄທ, ຂະໜາດໂຮງໝໍກໍບໍ່ມີຮອດເຄື່ອງກວດໂຄວິດ-19, ບັນດາໂຮງໝໍຢູ່ຕົວເມືອງໃຫຍ່ໆກໍບໍ່ທໍ່ໂຮງໝໍຊຸມຊົນບ້ານເຂົາ ວ່າຊັ້ນ. ນອກຈາກນັ້ນ ກໍຍັງມີນັກສິນລະປະ, ນັກດົນຕີ, ນັກທ່ອງທ່ຽວມາເມືອງລາວກໍມັກເວົ້າສຽດສີວ່າລາວໂງ່, ລາວດ້ອຍພັດທະນາລ້າຫລັງສັບມະປິແຕ່ເຂົາຊິເວົ້າ.

    ຍົກບັນຫານີ້ຂຶ້ນມາກໍເພື່ອຢາກໃຫ້ເຮົາຄິດໃນອະນາຄົດຈະແກ້ກັນແນວໃດ. ບັນຫາຄົນລາວຫລຸຫລັ່ງທັ່ງເທໄປອອກແຮງງານຢູ່ໄທເກືອບວ່າເປັນປະເພນີທີ່ກືນບໍ່ເຂົ້າຄາຍບໍ່ອອກ, ຜູ້ໄປດີມັນກໍດີ, ຜູ້ໄປທາງຊົ່ວມັນກໍຕ່າວໂຈມຕີປະເທດຊາດບ້ານເມືອງ, ໝໍ້ແກງແລງງາຍຕົນເອງ, ໂຈມຕີພັກ ແລະ ລັດຖະບານເຮົາ, ຊ້ຳບໍ່ໜຳ ເວລາກັບມາບ້ານ ການຈັດຕັ້ງອຳນາດການປົກຄອງຕ້ອນຮັບຂັບສູ່ໃຫ້ພາກັນໄປກັກກັນຢູ່ສູນ 14 ວັນ ເພື່ອປ້ອງກັນໂຣກລະບາດ, ຢ້ານເອົາພະຍາດມາໃສ່ພໍ່ແມ່, ຍາດຕິພີ່ນ້ອງຕາຍມັນກໍຂັດຂືນບໍ່ຍອມ, ຖຽງເຈົ້າໜ້າທີ່. ນີ້ລະຄືຄົນທີ່ຖືກສ້ຽມສອນຈາກສັງຄົມທີ່ໄຮ້ປັນຍາ, ໄຮ້ສິນທຳປະຈຳໃຈ, ເກີດແນວຄິດອວດອ້າງໂອຫັງ ຍ້ອນເຫັນກົງຈັກເປັນດອກບົວ, ຂີ້ໝິ່ນໝໍ້ຕິດໜ້າຜາກເຜີ່ເວີ້ແຕ່ພັດແຍງແວ່ນບໍ່ເຫັນ.

ແຮງງານລາວໄປເຮັດວຽກຢູ່ໄທໃຜໄດ້ປະໂຫຍດ - lattana 1 - ແຮງງານລາວໄປເຮັດວຽກຢູ່ໄທໃຜໄດ້ປະໂຫຍດ
error: Alert: Content is protected !!