ອາຊຽນ ແລະ ການຮັບມືກັບພະຍາດລະບາດໂຄວິດ-19

- 66 - ອາຊຽນ ແລະ ການຮັບມືກັບພະຍາດລະບາດໂຄວິດ-19
- Untitled design - ອາຊຽນ ແລະ ການຮັບມືກັບພະຍາດລະບາດໂຄວິດ-19

ໃນປະຈຸບັນສິ່ງທີ່ທຸກຄົນກໍາລັງສົນທະນາ ແລະ ມີຄວາມກັງວົນຫຼາຍທີ່ສຸດ ກໍ່ຄົງຈະແມ່ນກ່ຽວກັບພະຍາດປອດອັກເສບຈາກເຊື້ອຈຸລະໂລກສາຍພັນໃໝ່ ໂຄໂຣນາ ໄວຣັດ ຫຼື ເອີ້ນວ່າ ພະຍາດລະບາດໂຄວິດ-19. ນັບແຕ່ພະຍາດລະບາດດັ່ງກ່າວໄດ້ເກີດຂຶ້້ນໃນເດືອນ ທັນວາ 2019 ທີ່ຜ່ານມາ, ມາຮອດວັນທີ 7 ເມສາ 2020, ອີງຕາມອົງການອະນາໄມໂລກ, ໄດ້ມີຜູ້ຕິດເຊື້ອທັງໝົດ 1.214.466 ກໍລະນີ ແລະ ໃນນີ້ມີຈໍານວນຜູ້ເສຍຊີວິດທັງໝົດ 67.767 ຄົນ ເຊິ່ງປະເທດທີ່ມີຜູ້ເສຍຊີວິດຫຼາຍທີ່ສຸດ ແມ່ນ ອີຕາລີ ແລະ ປະເທດທີ່ມີຜູ້ຕິດເຊື້ອຫຼາຍກ່ວາໝູ່ແມ່ນ ສະຫະລັດອາເມລິກາ. ຕາມການຄາດຄະເນຂອງສະຫະປະຊາຊາດ ພະຍາດລະບາດໂຄວິດ-19 ຈະສົ່ງຜົນກະທົບຕໍ່ກັບເສດຖະກິດໂລກ ໃນປີ 2020 ນີ້ເປັນມູນຄ່າເສຍຫາຍປະມານ 1.000 ຕື້ໂດລາສະຫະລັດ ເຊິ່ງເປັນຜົນກະທົບຫນັກທີ່ສຸດ ຖ້າທຽບໃສ່ເຫດການອື່ນໆທີ່ຜ່ານມາ.

ແນ່ນອນແລ້ວ ອາຊຽນ ກໍ່ບໍ່ສາມາດຫຼີກລ້ຽງໄດ້ຈາກຜົນກະທົບຂອງພະຍາດລະບາດໂຄວິດ-19 ແລະ ມັນໄດ້ສົ່ງຜົນກະທົບຕໍ່ທັງສາມເສົາຄໍ້າຂອງປະຊາຄົມອາຊຽນ ແລະ ເສົາຄໍ້າທີ່ໄດ້ຮັບຜົນກະທົບຫຼາຍທີ່ສຸດກໍ່ຄົງຈະແມ່ນເສົາຄໍ້າເສດຖະກິດ. ເພື່ອຮັບມືກັບພະຍາດລະບາດດັ່ງກ່າວ, ອາຊຽນກໍ່ມີຄວາມພະຍາຍາມ ແລະ ເອົາໃຈໃສ່ໃນການປຶກສາຫາລືເພື່ອຫາຊ່ອງທາງໃນການແກ້ໄຂບັນຫາ. ໃນຂອບເສົາຄໍ້າການເມືອງ-ຄວາມໝັ້ນຄົງອາຊຽນ, ບັນດາລັດຖະມົນຕີປ້ອງກັນປະເທດອາຊຽນ ໄດ້ຮັບຮອງເອົາ ຖະແຫຼງການຮ່ວມວ່າດ້ວຍ “ການຮ່ວມມືປ້ອງກັນຊາດເພື່ອຕ້ານພະຍາດລະບາດ” ໃນກອງປະຊຸມລັດຖະມົນຕີປ້ອງກັນປະເທດອາຊຽນ-ວົງແຄບ ທີ່ ຮ່າໂນ້ຍ, ສສ ຫວຽດນາມ ໃນເດືອນ ກຸມພາ 2020 ທີ່ຜ່ານມາ. ຖະແຫຼງການຮ່ວມດັ່ງກ່າວ ໄດ້ເນັ້ນເຖິງການເສີມຂະຫຍາຍການຮ່ວມມືທັງແບບສອງຝ່າຍ ແລະ ຫຼາຍຝ່າຍໃນການແລກປ່ຽນຂໍ້ມູນຂ່າວສານ ແລະ ການປະຕິບັດທີ່ດີທີ່ສຸດ ໂດຍຜ່ານການຝຶກຊ້ອມ ແລະ ບັນດາກົນໄກການຮ່ວມມືທີ່ມີຢູ່ ເຊັ່ນ: ສູນແພດທະຫານອາຊຽນ ແລະ ເຄືອຂ່າຍຜູ້ຊ່ຽວຊານປ້ອງກັນຊາດ ດ້ານເຄມີ, ຊີວະພາບ ແລະ ກໍາມັນຕະພາບລັງສີ ອາຊຽນ. ສູນແພດທະຫານອາຊຽນເຊິ່ງຕັ້ງຢູ່ ບາງກອກ, ປະເທດໄທ, ກໍ່ໄດ້ຈັດກອງປະຊຸມຜ່ານໂທລະພາບ ເພື່ອຕິດຕາມ ແລະ ອັບເດດຂໍ້ມູນ ໃຫ້ທັນກັບສະພາບຕົວຈິງຢ່າງເປັນປົກກະຕິ. ນອກຈາກນີ້, ອາຊຽນຍັງໄດ້ຈັດກອງປະຊຸມກັບບັນດາປະເທດຄູ່ຮ່ວມເຈລະຈາ ເພື່ອເສີມຂະຫຍາຍການຮ່ວມມືແບບສອງຝ່າຍ ໃນການຕ້ານພະຍາດລະບາດໂຄວິດ-19 ໂດຍສະເພາະແມ່ນ ສປ. ຈີນ, ສະຫະລັດອາເມລິກາ ແລະ ສ. ເກົາຫຼີ (ອີງຕາມຂໍ້ມູນຈາກ https://asean.org/).

ໃນລະດັບປະເທດ, ບັນດາປະເທດສະມາຊິກອາຊຽນກໍ່ມີມາດຕະການໃນການຮັບມືກັບພະຍາດດັ່ງກ່າວ ເປັນຕົ້ນແມ່ນ: ການປິດປະເທດ, ການໃຫ້ປະຊາຊົນກັກຕົວເອງຢູ່ບ້ານ, ການຈຳກັດ ແລະ ຄວບຄຸມການຄົມມະນາຄົມຂົນສົ່ງ, ການຫ້າມການຈັດຕັ້ງ ແລະ ການຊຸມນຸມ ທີ່ມີຄົນເຂົ້າຮ່ວມເປັນຈຳນວນຫຼາຍ, ການເຜີຍແຜ່ໂຄສະນາຂໍ້ມູນກ່ຽວກັບພະຍາດ, ການເຝົ້າລະວັງ ແລະ ອື່ນໆ.

ມາຮອດປະຈຸບັນ ອົງການອະນາໄມໂລກ ໄດ້ແຈ້ງໃຫ້ຮູ້ວ່າ ຍັງບໍ່ທັນມີຢາຮັກສາພະຍາດລະບາດໂຄວິດ-19 ເທື່ອ ແລະ ຫຼາຍໆສະຖາບັນຄົ້ນຄ້ວາທາງການແພດຂອງຫຼາຍປະເທດທົ່ວໂລກ ກໍາລັງຄົ້ນຄ້ວາວິໄຈຢາປິ່ນປົວ ແລະ ວັກແຊັງປ້ອງກັນ ຢ່າງຮີບດ່ວນ. ສະນັ້ນ, ຍັງບໍ່ສາມາດກໍານົດໄດ້ວ່າ ການແຜ່ລະບາດຂອງພະຍາດນີ້ຍັງຈະສືບຕໍ່ອີກດົນປານໃດ ແລະ ມັນຈະສົ່ງຜົນກະທົບຕໍ່ການດໍາລົງຊີວິດຂອງພວກເຮົາອີກຫຼາຍໜ້ອຍປານໃດ. ແຕ່ສິ່ງໜຶ່ງ ທີ່ສະແດງໃຫ້ເຫັນ ຈາກສະຖານະການສຸກເສີນຄັ້ງນີ້ ແມ່ນການເພີ່ມທະວີຄວາມສາມັກຄີ ແລະ ການຮ່ວມມືລະຫວ່າງບັນດາປະເທດ ແລະ ບັນດາອົງການຈັດຕັ້ງສາກົນ ເພື່ອຮ່ວມກັນຮັບມື ແລະ ຫຼຸດຜ່ອນຜົນກະທົບ ທີ່ເກີດຂຶ້ນຈາກພະຍາດລະບາດດັ່ງກ່າວ.

- Wave100S AD to Website 2020 0 - ອາຊຽນ ແລະ ການຮັບມືກັບພະຍາດລະບາດໂຄວິດ-19

ສໍາລັບພວກເຮົາເດ ສາມາດຊ່ວຍຫຍັງໄດ້ແດ່? ແນ່ນອນແລ້ວ ທຸກຄົນສາມາດມີສ່ວນຮ່ວມ ແລະ ປະກອບສ່ວນໄດ້ ໂດຍປະຕິບັດຕາມແຈ້ງການຂອງລັດຖະບານ, ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດ ໂຄວິດ-19 ກໍ່ຄື ກະຊວງປ້ອງກັນປະເທດ ແຫ່ງ ສປປ ລາວ ທີ່ໄດ້ວາງອອກຢ່າງເຂັ້ມງວດ ໃນການຢຸດຕິການແຜ່ກະຈາຍເຊື້ອພະຍາດດັ່ງກ່າວ ເພື່ອເຮັດໃຫ້ສັງຄົມພວກເຮົາ ແລະ ທຸກໆຄົນສາມາດດໍາລົງຊີວິດດ້ວຍຄວາມປອດໄພ ປາສະຈາກພະຍາດລະບາດໂຄວິດ-19.

- WhatsApp Image 2020 05 27 at 5 - ອາຊຽນ ແລະ ການຮັບມືກັບພະຍາດລະບາດໂຄວິດ-19
- WhatsApp Image 2020 05 27 at 5 - ອາຊຽນ ແລະ ການຮັບມືກັບພະຍາດລະບາດໂຄວິດ-19
  • 1095 Posts
  • 0 Comments
iLike/LPN/20
error: Alert: ເນື້ອຫາຂ່າວມີລິຂະສິດ !!