ເດັດດ່ຽວຕ້ານສົງຄາມຈາກໂຣກລະບາດໂຄວິດ-19

- frame 01 - ເດັດດ່ຽວຕ້ານສົງຄາມຈາກໂຣກລະບາດໂຄວິດ-19
- Untitled design - ເດັດດ່ຽວຕ້ານສົງຄາມຈາກໂຣກລະບາດໂຄວິດ-19

ໂດຍ: ທິດກໍ່າ

ທ່ານນາຍົກລັດຖະມົນຕີ ທອງລຸນ ສີສຸລິດ ໄດ້ກ່າວວ່າ: “ໂຄວິດ-19 ທີ່ພວກເຮົາຜະເຊີນຢູ່ຄືສັດຕູທີ່ຮ້າຍກາດ ຄືເພັດຊະຄາດທີ່ໄຮ້ສຽງ, ພວກເຮົາພາຍໃນຊາດຕ້ອງຮ່ວມຮຽງ, ຂໍພຽງເຮົາສາມັກຄີ ສົງຄາມນີ້ຕ້ອງຜ່ານແນ່ນອນ” ປະໂຫຍກຄຳເວົ້າຂອງທ່ານນາຍົກລັດຖະມົນຕີສຸດທີ່ມີຄວາມໝາຍໜັກແໜ້ນ ເຊິ່ງພວກເຮົາພ້ອມກັນປະຕິບັດຢ່າງຈິງຈັງ ແລະ ຕ້ອງບຸກທະລຸໃຫ້ໄດ້.

     ກໍດັ່ງທົ່ວພັກ, ທົ່ວກອງທັບ ແລະ ປະຊາຊົນບັນດາເຜົ່າຮັບຮູ້ນຳກັນແລ້ວວ່າ: ນັບແຕ່ທ້າຍປີ 2019 ເປັນຕົ້ນມາຮອດປັດຈຸບັນ, ການລະບາດຂອງເຊື້ອພະຍາດສາຍພັນໃໝ່ໂຄໂຣນາ ຫລື ໂຄວິດ-19 ໄດ້ແຜ່ລາມໄປທົ່ວໂລກ. ປັດຈຸບັນມີ 100 ກວ່າປະເທດທີ່ປະສົບບັນຫາຢ່າງໜັກໜ່ວງຈົນກາຍເປັນວິກິດໃຫຍ່ຂອງໂລກໃນຍຸກນີ້ໄປແລ້ວ. ບັນດາປະເທດທີ່ມີການແຜ່ລະບາດໜັກໃນປັດຈຸບັນ ກໍຄືສະຫະລັດອາເມລິກາ, ອິຕາລີ, ສະເປນ, ເຢຍລະມັນ, ຝຣັ່ງ. ສະເພາະຢູ່ອາຊຽນເຮົາກໍມີໄທມີຜູ້ຕິດເຊື້ອໄປແລ້ວ 2.169 ຄົນ, ຫວຽດນາມ 240 ຄົນ, ກຳປູເຈຍ 114 ຄົນ, ມຽນມາ 21 ຄົນ ແລະ ລາວເຮົາແມ່ນ 12 ຄົນໄປແລ້ວ. ໃນຈຳນວນທີ່ໄດ້ກ່າວມານີ້ໄດ້ມີຜູ້ປິ່ນປົວດີ, ມີຜູ້ຕາຍຜູ້ຍັງຕາມຍະຖາກຳ ແລະ ສະພາບຄວາມເປັນຈິງ. ສະເພາະຢູ່ລາວເຮົາໃນຈຳນວນ 12 ຄົນແມ່ນຍັງບໍ່ທັນມີຜູ້ໃດເສຍຊີວິດ. ກໍຂໍໃຫ້ທຸກຄົນໄດ້ພົ້ນຈາກເຄາະຮ້າຍຄັ້ງນີ້ດ້ວຍເຖີດ.

      ສຳລັບເຊື້ອພະຍາດໂຄວິດ-19 ທີ່ວ່ານີ້, ມາຮອດປັດຈຸບັນມີແຫລ່ງຂ່າວວ່າຫາກໍມີຢາຕ້ານ ແລະ ປິ່ນປົວທີ່ນັກວິທະຍາສາດການແພດຈີນ ແລະ ຍີ່ປຸ່ນໄດ້ຄົ້ນຄວ້າຮ່ວມກັນ ແລະ ຍັງມີປະເທດອື່ນໆກໍພວມເລັ່ງລັດຄົ້ນຄວ້າທົດລອງຢ່າງເຄັ່ງຮ້ອນ. ເພາະສະນັ້ນ ຈຶ່ງເປັນບັນຫາຫຍຸ້ງຍາກໃນການປິ່ນປົວໃຫ້ຫາຍຂາດໂດຍໄວ. ໃນການປິ່ນປົວຈຶ່ງມີຄວາມສ່ຽງສູງໃນການເສຍຊີວິດຕໍ່ຜູ້ທີ່ຕິດເຊື້ອພະຍາດດັ່ງກ່າວ ໂດຍສະເພາະແມ່ນຜູ້ທີ່ມີອາຍຸສູງ ແລະ ເດັກນ້ອຍ. ສິ່ງທີ່ຢ້ານກົວທີ່ສຸດ ພະຍາດຊະນິດນີ້ມີການແຜ່ເຊື້ອໄວ ແລະ ຕິດແປດຄົນໄດ້ງ່າຍ.

     ແນວໃດກໍຕາມ, ເຖິງວ່າພະຍາດໂຄວິດ-19 ຈະມີການຕິດແປດ ແລະ ແຜ່ເຊື້ອໄດ້ໄວ ແຕ່ພວກເຮົາກໍສາມາດຫລີກລ່ຽງດ້ວຍວິທີການຕ່າງໆຕາມຫລັກການທີ່ແພດໝໍໄດ້ແນະນຳ ເປັນຕົ້ນຫ້າມເຂົ້າໄປໃກ້ບຸກຄົນ ແລະ ກຸ່ມຄົນທີ່ມີຄວາມສ່ຽງ, ພະຍາມຍາມແຍກດ່ຽວເພື່ອຈຳກັດການແຜ່ລະບາດ, ອອກກຳລັງກາຍເພື່ອສ້າງຄວາມຕ້ານທານ, ດື່ມນ້ຳຮ້ອນ, ນ້ຳອຸ່ນເປັນປະຈຳ, ອະນາໄມຕົນໂຕເລື້ອຍໆ ອັນສຳຄັນທີ່ສຸດຄືໝັ່ນລ້າງມື ແລະ ຂ້າເຊື້ອດ້ວຍເຈວລ້າງມື, ພັກຜ່ອນໃຫ້ເຕັມທີ່ເພື່ອມີພະລັງວັງຊາຕໍ່ສູ້ກັບພະຍາດ ແລະ ວິທີການອື່ນໆຕາມຫລັກການແນະນຳ ແລະ ປິ່ນປົວຂອງແພດໝໍ.

- Wave100S AD to Website 2020 0 - ເດັດດ່ຽວຕ້ານສົງຄາມຈາກໂຣກລະບາດໂຄວິດ-19

     ສຳລັບ ສປປ ລາວເຮົາ ຊ່ວງນີ້ແມ່ນພວມຢູ່ໃນເງື່ອນໄຂປິດປະເທດ, ທັງປິດບ້ານ, ປິດເມືອງ, ປິດແຂວງໃນບໍ່ອອກ-ນອກບໍ່ເຂົ້າຈົນກວ່າຮອດວັນທີ 19 ເມສາ 2020. ຈາກນັ້ນ ຖ້າມີການປ່ຽນແປງ ຄະນະສະເພາະກິດ ກໍຄືລັດຖະບານຈະແຈ້ງໃຫ້ຊາບຕາມພາຍຫລັງ. ຊ່ວງນີ້ຍັງຖືວ່າເປັນວາລະຂອງຊາດທີ່ພວກເຮົາຈະຕ້ອງເດັດຂາດ ແລະ ເຂັ້ມງວດຮ່ວມມືກັນຢ່າງຈິງຈັງ. ຖ້າຜູ້ໃດລະເຫລີງ, ລະເມີດ ຫລື ຝ່າຝືນບໍ່ປະຕິບັດຕາມການແຈ້ງການຂອງລັດຖະບານ ແລະ ເຈົ້າໜ້າທີ່ກໍຈະຖືກໃຊ້ມາດຕະການດຳເນີນຄະດີຕາມກົດໝາຍບ້ານເມືອງ.

      ຫົກເຈັດສິບປີກ່ອນໜ້ານັ້ນ, ພວກເຮົາເຄີຍຕໍ່ສູ້ກັບສັດຕູທີ່ເປັນຕົນເປັນໂຕເຊັ່ນ: ຈັກກະພັດເຂົ້າມາຮຸກຮານບ້ານເມືອງເຫັນໂຕຍ່າງເຂົ້າມາໂຢ້ງ, ຍົນຊະນິດຕ່າງໆມາຖິ້ມລະເບີດໃສ່ພວກເຮົາໄດ້ຍິນສຽງ, ຮ່າລະເບີດກະສູນ, ບົມບີນ້ອຍໃຫຍ່ ພວກເຮົາຍັງມີບ່ອນຫລົບຫລີກລີ້ຊ້ອນເຂົ້າຖ້ຳເຂົ້າຮູ, ມີຮ້ອຍຄັ້ງພັນຄັ້ງພວກເຮົາໄດ້ຕໍ່ສູ້ປະຈັນບານແບບໜ້າຕໍ່ໜ້າຈົນວ່າໄດ້ຮັບໄຊຊະນະ ສາມາດປົດປ່ອຍປະເທດຊາດໄດ້ຢ່າງສົມບູນ.

      ແຕ່ສັດຕູໂຄວິດ-19 ມັນແມ່ນມັດຈຸລາດໄຮ້ສຽງ, ບໍ່ເຫັນຕົນເຫັນໂຕຍ່າງມາຄືຄົນ ແລະ ສັດ, ມັນດັກສະກັດລັກລອບທຽມມານຳຄົນ ແລະ ອາກາດ. ນີ້ລະເຂົາເອີ້ນວ່າ ສັດຕູຍຸກໃໝ່ໄຮ້ທຽມທານ, ເປັນສັດຕູທາງຊີວະພາບ ຖ້າຜູ້ໃດມີຫູແກ້ວຕາທິບຈຶ່ງເຫັນ. ສະໄໝພໍ່ແມ່ເຖົ້າແກ່ບູຮານເຮົາພາກັນເອີ້ນວ່າ: ຮ່າກິນຄົນ.

     ເຖິງຢ່າງໃດກໍດີ, ມາເຖິງຍຸກນີ້ພວກເຮົາເຫັນຫລາຍອັນຫລາຍຢ່າງຢູ່ໃນພື້ນພິພົບແຜ່ນນີ້. ຕໍ່ໄປຍັງບໍ່ຮູ້ວ່າຈະມີພະຍາດ, ໂຣກລະບາດ ແລະ ໄພພິບັດອັນໃດມາທຳລາຍເຜົາຜານຊີວິດອິນຊີຂອງມວນມະນຸດອີກ. ກໍຂໍໃຫ້ທຸກຄົນມີສະຕິ, ມີສິນທຳ, ມີປັນຍາ, ມີສຳປະຊັນຍະ ແລະ ເຊື່ືອຟັງຄຳແນະນຳຂອງຈັດຕັ້ງຂັ້ນເທິງ ກໍຄືພັກ ແລະ ລັດຖະບານເຮົາດ້ວຍຄວາມຈົງຮັກພັກດີ ແລະ ເຂັ້ມງວດ.

- WhatsApp Image 2020 05 27 at 5 - ເດັດດ່ຽວຕ້ານສົງຄາມຈາກໂຣກລະບາດໂຄວິດ-19
- WhatsApp Image 2020 05 27 at 5 - ເດັດດ່ຽວຕ້ານສົງຄາມຈາກໂຣກລະບາດໂຄວິດ-19
error: Alert: ເນື້ອຫາຂ່າວມີລິຂະສິດ !!