ເດັດດ່ຽວຜ່ານຜ່າຕີເອົາຊະນະບັ້ນຮົບຕ້ານໂຄວິດ-19

- New frame - ເດັດດ່ຽວຜ່ານຜ່າຕີເອົາຊະນະບັ້ນຮົບຕ້ານໂຄວິດ-19
- Untitled design - ເດັດດ່ຽວຜ່ານຜ່າຕີເອົາຊະນະບັ້ນຮົບຕ້ານໂຄວິດ-19

ໂດຍ: ທິດກໍ່າ

ນັບແຕ່ມີໂຣກລະບາດເຊື້ອພະຍາດສາຍພັນໃໝ່ໂຄໂຣນາ ຫລື ໂຄວິດ-19 ໄດ້ເລີ່ມປາກົດຕົວ ແລະ ແຜ່ລະບາດໄປໃນທົ່ວໂລກ, ພັກ ແລະ ລັດຖະບານເຮົາກໍບໍ່ໄດ້ນິ້ງນອນໃຈຮີບຫາວິທີຕ້ານ ແລະ ປ້ອງກັນສະກັດກັ້ນແຕ່ຫົວທີຢ່າງຮັດກຸມ ແລະ ໃຊ້ມາດຕະການທີ່ສອດຄ່ອງເໝາະສົມກັບເຫດການ ແລະ ສະພາບການຕົວຈິງຂອງປະເທດເຮົາ ເປັນຕົ້ນໄດ້ຈັດຕັ້ງຄະນະສະເພາະກິດ, ມີແຜນການປ້ອງກັນລະດັບຊາດ, ກະກຽມບຸກຄະລາກອນແພດໝໍ, ສະຖານທີ່ປິ່ນປົວ ຕະຫລອດທຶນຮອນ ແລະ ວັດຖຸອຸປະກອນທີ່ຈຳເປັນໃນການຮັບມື ແລະ ຕອບຕ້ານ, ຕອບໂຕ້ໃຫ້ທັນເວລາ.

     ໄປຄຽງຄູ່ກັນນັ້ນ, ລັດຖະບານເຮົາຍັງໄດ້ອອກຄຳສັ່ງຢ່າງເດັດຂາດ ທັງອອກແຈ້ງການຫລາຍສະບັບ ເພື່ອໃຫ້ບັນດາຂະແໜງການ, ກົມກອງ ແລະ ທ້ອງຖິ່ນພ້ອມກັນເປັນປຶກແຜ່ນແໜ້ນໜາໃນການປະຕິບັດ ເພື່ອຕ້ານ ແລະ ສະກັດກັ້ນການແຜ່ລະບາດຂອງພະຍາດດັ່ງກ່າວໂດຍທັນທີ. ໃນບັນດາຄຳສັ່ງ ແລະ ແຈ້ງການຂອງພັກ ແລະ ລັດຖະບານສະບັບສຳຄັນທີ່ສຸດແມ່ນຄຳສັ່ງຂອງນາຍົກລັດຖະມົນຕີ ທອງລຸນ ສີສຸລິດ ສະບັບເລກທີ 06 ລົງວັນທີ 29 ມີນາ 2020 ວ່າດ້ວຍການເພີ່ມທະວີມາດຕະການສະກັດກັ້ນ, ກັນການລະບາດ, ຄວບຄຸມ ແລະ ກຽມຄວາມພ້ອມຮອບດ້ານເພື່ອຕ້ານໂຄວິດ-19 (COVID9). ແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ ສະບັບເລກທີ 397/ຫສນຍ, ລົງວັນທີ 19 ມີນາ 2020 ວ່າດ້ວຍທິດຊີ້ນຳກ່ຽວກັບການສະເຫລີມສະຫລອງບຸນປີໃໝ່ລາວ ປະຈຳປີ 2563. ມາຮອດວັນທີ 6 ເມສາ 2020 ທາງຄະນະເລຂາທິການສູນກາງພັກກໍໄດ້ອອກຄຳສັ່ງເລກທີ 07/ຄລສພ ວ່າດ້ວຍການເພີ່ມທະວີນຳພາຊີ້ນຳຕໍ່ການປ້ອງກັນສະກັດກັ້ນ ແລະ ແກ້ໄຂການລະບາດຂອງເຊື້ອພະຍາດຈຸລະໂຣກອັກເສບປອດສາຍພັນໃໝ່ (ໂຄວິດ-19) ໄປເຖິງຄະນະພັກກະຊວງ, ອົງການ, ຄະນະພັກແຂວງ ແລະ ນະຄອນຫລວງວຽງຈັນ ຈົ່ງພ້ອມກັນເດັດດ່ຽວນຳພາຊີ້ນຳບັ້ນຮົບຕ້ານພະຍາດໂຄວິດຄັ້ງນີ້ໃຫ້ໄດ້ຮັບຜົນດີ ແລະ ເປັນໄປຕາມຄຳສັ່ງຂອງຄະນະເລຂາທິການສູນກາງພັກ.

     ແນວໃດກໍຕາມ, ຜ່ານການຈັດຕັ້ງປະຕິບັດບັນດາຄຳສັ່ງ ແລະ ແຈ້ງການ, ທິດຊີ້ນຳຕ່າງໆຂອງພັກ ແລະ ລັດຖະບານ ຜົນໄດ້ຮັບກໍຄືຈຳນວນຜູ້ທີ່ຕິດເຊື້ອແມ່ນມີໜ້ອຍທີ່ສຸດເມື່ອສົມທຽບໃສ່ພາກພື້ນ ແລະ ບາງປະເທດໃນແຖບເອີຣົບ ແລະ ອາຊີ ມາຮອດວັນທີ 9 ເມສາ 2020 ລາວເຮົາໄດ້ກວດເຫັນຜູ້ຕິດເຊື້ອໂຄວິດ-19 ພຽງ 16 ຄົນເທົ່ານັ້ນ ແລະ ຍັງບໍ່ທັນມີຜູ້ໃດເສຍຊີວິດ, ຖືວ່າຍັງຢູ່ໃນລະດັບຕໍ່າທີ່ສຸດຂອງໂລກ ແລະ ພາກພື້ນ. ອີກປະການໜຶ່ງ ໃນບັນດາຈຳນວນຄົນທີ່ຕິດເຊື້ອນີ້ເຮົາເຫັນວ່າສ່ວນຫລາຍແມ່ນມາຈາກປະເທດທີ່ມີຄວາມສ່ຽງສູງ. ໝາຍວ່າຕິດຈາກບ່ອນອື່ນເຂົ້າມາລາວ ແລະ ມີຈຳນວນໜຶ່ງກໍຕິດຈາກກໍລະນີຜູ້ທີ່ຕິດມາກ່ອນແລ້ວເມື່ອມີການສຳຜັດໃກ້ຊິດກັນກໍເລີຍເປັນເຫດໃຫ້ມີການຕິດຕໍ່ກັນແບບຕ່ອງໂສ້ຈາກຄົນໜຶ່ງຕໍ່ໃສ່ອີກຄົນໜຶ່ງລວມພະລາມຈົວ.

- Wave100S AD to Website 2020 0 - ເດັດດ່ຽວຜ່ານຜ່າຕີເອົາຊະນະບັ້ນຮົບຕ້ານໂຄວິດ-19

     ແນວໃດກໍດີ ເພື່ອເຮັດໃຫ້ບັ້ນຮົບຕ້ານການລະບາດຂອງພະຍາດຊະນິດນີ້ເປັນໄປຕາມຄຳສັ່ງ ແລະ ແຈ້ງການສະບັບຕ່າງໆຂອງພັກ ແລະ ລັດຖະບານໄດ້ວາງອອກ, ປວງຊົນລາວທັງຊາດຕ້ອງໄດ້ພ້ອມກັນເປັນເຈົ້າການປະຕິບັດໃຫ້ໄດ້ຮັບຜົນສູງສຸດໃຫ້ກາຍເປັນໄຊຊະນະອັນໃຫຍ່ຫລວງຂອງຊາດ ແລະ ປະຊາຊົນໃນພາລະກິດຕໍ່ສູ້ກັບສັດຕູທີ່ຮ້າຍກາດ, ເປັນເພັດຊະຄາດທີ່ໄຮ້ສຽງໃນຍຸກທີ່ໂລກພວມປະສົບບັນຫາວິກິດທີ່ບໍ່ມີໃຜເພິ່ງປາດຖະໜາ.

     ຂໍຊົມເຊີຍໃນວິໄສທັດຂອງພັກ ແລະ ລັດຖະບານທີ່ອ່ານສະພາບການຕົງເປົ້າໄວ້ລ່ວງໜ້າ, ສາມາດແກ້ໄຂວິກິດຄັ້ງນີ້ໄດ້ຢ່າງແມ້ນຢຳ ແລະ ທັນເວລາ. ຂໍຊົມເຊີຍເປັນຢ່າງຍິ່ງຄະນະສະເພາະກິດຂັ້ນຕ່າງໆ ນັບແຕ່ສູນກາງລົງຮອດທ້ອງຖິ່ນ, ອຳນາດການປົກຄອງທຸກຂັ້ນ, ພະນັກງານ, ທະຫານ, ຕຳຫລວດ, ທີມງານກູ້ໄພທຸກເຂດແຂວງ ຕະຫລອດເຖິງນັກຮົບເສື້ອຂາວໄດ້ພ້ອມກັນຕັດສິນໃຈສູງອຸທິດແຮງຂອງຕົນເພື່ອຊາດ ແລະ ເພື່ອປະຊາຊົນ. ການຕໍ່ສູ້ກັບສັດຕູໃນຍຸກນີ້ ພວກເຮົາບໍ່ມີປືນມີຜາຄືສະໄໝກ່ອນ, ແຕ່ພວກເຮົາກໍໃຊ້ວັດຖຸອຸປະກອນ, ວິຊາການ, ວິຊາສະເພາະ, ແນວຄິດປັນຍາເປັນອາວຸດອັນສັກສິດ ເພື່ອກູ້ເອົາຊີວິດຂອງຜູ້ເຈັບເປັນໃຫ້ຫລຸດພົ້ນອອກຈາກຄວາມຕາຍຍ້ອນໂຄວິດ-19. ແນ່ນອນ ຖ້າປວງຊົນໃນຊາດຮ່ວມແຮງຮ່ວມໃຈກັນຢູ່ອ້ອມຂ້າງພັກ ແລະ ລັດຖະບານ, ທັງປະຕິບັດທຸກມະຕິຄຳສັ່ງໄຊຊະນະໃນການຕໍ່ສູ້ຕ້ານສັດຕູໂຄວິດ-19 ຕ້ອງໄດ້ຮັບໄຊຊະນະຢ່າງແນ່ນອນ.

- WhatsApp Image 2020 05 27 at 5 - ເດັດດ່ຽວຜ່ານຜ່າຕີເອົາຊະນະບັ້ນຮົບຕ້ານໂຄວິດ-19
- WhatsApp Image 2020 05 27 at 5 - ເດັດດ່ຽວຜ່ານຜ່າຕີເອົາຊະນະບັ້ນຮົບຕ້ານໂຄວິດ-19
error: Alert: ເນື້ອຫາຂ່າວມີລິຂະສິດ !!