ລາວຈະຕັ້ງໜ້າປະຕິບັດພັນທະສັນຍາສາກົນເພື່ອບັນລຸເປົ້າໝາຍພັດທະນາປະເທດ

- 20170605 FOA Laos PM article main image - ລາວຈະຕັ້ງໜ້າປະຕິບັດພັນທະສັນຍາສາກົນເພື່ອບັນລຸເປົ້າໝາຍພັດທະນາປະເທດ
- Untitled design - ລາວຈະຕັ້ງໜ້າປະຕິບັດພັນທະສັນຍາສາກົນເພື່ອບັນລຸເປົ້າໝາຍພັດທະນາປະເທດ

ໃນໂອກາດເຂົ້າຮ່ວມກອງປະຊຸມສາກົນກ່ຽວກັບອານາຄົດຂອງອາຊີຄັ້ງທີ 23 ທີ່ໂຕກຽວປະເທດຍີປຸ່ນເມື່ອບໍ່ດົນມານີ້, ທ່ານນາຍົກລັດຖະມົນຕີ ທອງລຸນ ສີສຸລິດ ໄດ້ຂຶ້ນກ່າວບົດປາໄສໃນຫົວຂໍ້ “ໄລຍະຂ້າມຜ່ານຂອງຍຸກໂລກາພິວັດ, ອາຊີຈະກ້າວເດີນໄປແນວໃດ” ວ່າ: ປັດຈຸບັນ, ພວກເຮົາກ້າວສູ່ໄລຍະສໍາຄັນຂອງຍຸກສະໄໝໂລກາພິວັດ, ເຊິ່ງເປັນໄລຍະຂ້າມຜ່ານທີ່ມີທັງກາລະໂອກາດ ແລະ ສິ່ງທ້າທາຍ, ແຕ່ສິ່ງທີ່ແນ່ນອນ ແລະ ພວກເຮົາສໍາພັດໄດ້ນັ້ນຄື: ໂລກາພິວັດເປັນກາລະໂອກາດ ແລະ ເງື່ອນໄຂຫລາຍຢ່າງທີ່ສາມາດເຮັດໃຫ້ໂລກເຮົາເຊື່ອມໂຍງເຂົ້າກັນບົນພື້ນຖານຕ່າງຝ່າຍຕ່າງມີຜົນປະໂຫຍດ, ເປັນວິວັດທະນາການແຫ່ງການຊ່ວຍເຫລືອເກື້ອກູນກັນ. ໃນໄລຍະຂ້າມຜ່ານໄປສູ່ການເປັນໂລກາພິວັດທີ່ແທ້ຈິງນັ້ນ, ໂລກຂອງພວກເຮົາໄດ້ມີຫລາຍອົງການຈັດຕັ້ງ, ກົນໄກການຮ່ວມມືສາກົນຕ່າງໆທີ່ວົງຄະນະຍາດສາກົນໄດ້ສ້າງຕັ້ງຂຶ້ນເພື່ອການຮ່ວມມື ແລະ ເຊື່ອມຈອດກັນ, ຂະນະດຽວກັນໃນຍຸກໂລກາພິວັດ ແລະ ເຊື່ອມໂຍງນີ້ອາຊີພວກເຮົາຕ້ອງໄດ້ຮ່ວມແຮງຮ່ວມໃຈກັນຄື: (1) ຕ້ອງເພີ່ມທະວີຄວາມພະຍາຍາມໃນການຮັບປະກັນສັນຕິພາບ ແລະ ຄວາມໝັ້ນຄົງດ້ວຍການແກ້ໄຂບັນຫາຂໍ້ຂັດແຍ່ງຕ່າງໆໂດຍສັນຕິວິທີ, ຫລີກລ້ຽງການໃຊ້ກໍາລັງ ຫລື ການນາບຂູ່ດ້ວຍກໍາລັງທຸກຮູບແບບ, ສົງຄາມມີແຕ່ຈະນໍາຄວາມຫາຍານະມາສູ່ພາກພື້ນ ແລະ ບັນດາປະເທດຕ່າງໆ ວິທີທີ່ດີສຸດໃນການຮັບປະກັນສະຖຽນລະພາບ ແລະ ສັນຕິພາບ ກໍແມ່ນການສ້າງຄວາມເຊື່ອໝັ້ນ ແລະ ຄວາມເຂົ້າໃຈເຊິ່ງກັນ ແລະ ກັນ, ຫລີກລ້ຽງຄວາມລະແວງສົງໃສກັນ, ໃຊ້ວິທີອົດກັ້ນ ແລະ ແກ້ໄຂບັນຫາທີ່ເກີດຂຶ້ນດ້ວຍການເຈລະຈາຢ່າງສັນຕິວິທີ, ເຄົາລົບຄວາມເປັນເອກະລາດແຫ່ງຊາດອໍານາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງກັນ ແລະ ກັນ. (2) ເພີ່ມທະວີການຊ່ວຍເຫລືອເຊິ່ງກັນ ແລະ ກັນດ້ານການພັດທະນາ, ພະຍາຍາມຮັດແຄບຄວາມແຕກໂຕນກັນຂອງການພັດທະນາຂົງເຂດ, ໃຫ້ທຸກປະເທດເຫັນຜົນໄດ້ຂອງຂະບວນຂອງໂລກາພິວັດ ແລະ ຜົນໄດ້ຂອງການເຊື່ອມໂຍງ, ເຊື່ອມຈອດທີ່ເປັນປະໂຫຍດໃຫ້ແກ່ແຕ່ລະເທດ ດ້ວຍການເຂົ້າຮ່ວມຢ່າງຕັ້ງໜ້າ, ຄວາມກະຕືລືລົ້ນ ແລະ ຄວາມຮັບພິຊອບສູງຢ່າງພ້ອມພຽງກັນ,ໂດຍບໍ່ຖີ້ມປະຜູ້ໃດ, ປະເທດໃດໄວ້ເບື້ອງຫລັງ ແລະ (3) ອາຊີຂອງພວກເຮົານັ້ນຄວນຫັນເອົາຄວາມແຕກຕ່າງ ແລະ ຄວາມຫລາກຫລາຍໃຫ້ກາຍເປັນກໍາລັງແຮງແຫ່ງການຮ່ວມມືແກ່ການພັດທະນາ, ອາຊີສາມາດເປັນປະຊາຄົມແຫ່ງການຮຽນຮູ້, ແບ່ງປັນ, ຊ່ວຍເຫລືອກັນໄດ້ ເພື່ອກ້າວສູ່ການເປັນໂລກາພິວັດ, ເຊື່ອມໂຍງທີ່ມີຜົນສໍາເລັດໄດ້ຢ່າງສະຫງ່າງາມ, ບໍ່ຄວນເຫັນຄວາມຫລາກຫລາຍເປັນອຸປະສັກ, ແຕ່ເອົາມາເປັນໂອກາດສ້າງເປັນກໍາລັງແຮງໃຫ້ອາຊີເພື່ອເຊື່ອມໂຍງກັບໂລກໄດ້ດີຂຶ້ນໃນຂະບວນການວິວັດຂອງໂລກາພິວັດ.

ສປປ ລາວ ເປັນປະເທດທີ່ໄດ້ຮັບເຄາະຮ້າຍຈາກສົງຄາມທໍາລາຍແກ່ຍາວເປັນເວລາຫລາຍທົດສະວັດ, ຍິ່ງເຫັນຄວາມໂຫດຮ້າຍຂອງສົງຄາມເທົ່າໃດ ປະຊາຊົນລາວຍິ່ງເຫັນຄວາມສໍາຄັນສູງຕໍ່ສັນຕິພາບເທົ່ານັ້ນ, ຕະຫລອດ 42 ປີທີ່ປະຊາຊົນລາວມີຊີວິດ ແລະ ທໍາມາຫາກິນໃນດິນແດນແຫ່ງສັນຕິພາບ, ມີສະຖຽນລະພາບນັ້ນຮັບຮູ້ດີວ່າມີສັນຕິພາບເທົ່ານັ້ນຈຶ່ງມີເງື່ອນໄຂພັດທະນາເສດຖະກິດ-ສັງຄົມຂອງປະເທດ ແລະ ຜົນສໍາເລັດຂອງ ສປປ ລາວໃນໄລຍະຜ່ານມານັ້ນແມ່ນຜົນຂອງການຮ່ວມແຮງ, ຮ່ວມໃຈຂອງປະຊາຊົນບັນດາເຜົ່າ, ການຮ່ວມມື, ການຊ່ວຍເຫລືອ, ສະໜັບສະໜູນຈາກບັນດາປະເທດເພື່ອນມິດ ແລະ ສາກົນ.

ທ່ານນາຍົກລັດຖະມົນຕີ ທອງລຸນ ສີສຸລິດ ກ່າວວ່າ: ໃນຍຸກໂລກາພິວັດ ແລະ ການເຊື່ອມໂຍງນີ້, ສປປ ລາວ ຈະປະກອບສ່ວນຢ່າງຕັ້ງໜ້າເຂົ້າໃນຂະບວນການຮັກສາສັນຕິພາບ, ເສີມສ້າງມິດຕະພາບ, ເປີດກວ້າງປະເທດອອກສູ່ໂລກພາຍນອກ ແລະ ຍີນດີຮັບເອົາການສະໜັບສະໜູນ, ຊ່ວຍເຫລືອ, ການລົງທຶນຈາກສາກົນ, ຈະຕັ້ງໜ້າປະຕິບັດພັນທະຂອງຕົນໃນການເປັນສະມາຊິກທີ່ດີຂອງອົງການຈັດຕັ້ງສາກົນ ແລະ ພາກພື້ນ. ລັດຖະບານລາວຈະຕັ້ງໜ້າປະຕິບັດວິໄສທັດ 2030, ຍຸດທະສາດ 2025 ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີແຕ່ 2016-2020 ໄປຕາມທິດພັດທະນາສີຂຽວ ແລະ ຍືນຍົງ. ສປປ ລາວໄດ້ຫັນເອົາ 17 ເປົ້າໝາຍການພັດທະນາແບບຍືນຍົງຂອງສະຫະປະຊາຊາດເຂົ້າເປັນແຜນງານລະດັບຊາດຂອງຕົນຢ່າງຕັ້ງໜ້າ, ພ້ອມກັນນັ້ນ ສປປ ລາວ ກໍໄດ້ຮັບຮອງເອົາເປົ້າໝາຍທີ 18 ຄື: ຊີວິດທີ່ປອດໄພຈາກລະເບີດບໍ່ທັນແຕກ ເພີ່ມເຂົ້າເປັນເປົ້າໝາຍການພັດທະນາແບບຍືນຍົງຂອງປະເທດ. ສປປ ລາວ ຈະສ້າງສະພາບແວດລ້ອມພາຍໃນ ແລະ ສາກົນທີ່ໝັ້ນທ່ຽງ ເພື່ອສໍາເລັດເປົ້າໝາຍແຫ່ງການພັດທະນາຂອງຕົນ.

- Wave100S AD to Website 2020 0 - ລາວຈະຕັ້ງໜ້າປະຕິບັດພັນທະສັນຍາສາກົນເພື່ອບັນລຸເປົ້າໝາຍພັດທະນາປະເທດ
- WhatsApp Image 2020 05 27 at 5 - ລາວຈະຕັ້ງໜ້າປະຕິບັດພັນທະສັນຍາສາກົນເພື່ອບັນລຸເປົ້າໝາຍພັດທະນາປະເທດ
- WhatsApp Image 2020 05 27 at 5 - ລາວຈະຕັ້ງໜ້າປະຕິບັດພັນທະສັນຍາສາກົນເພື່ອບັນລຸເປົ້າໝາຍພັດທະນາປະເທດ
error: Alert: ເນື້ອຫາຂ່າວມີລິຂະສິດ !!