ລາວເພີ່ມທະວີມາດຕະການຄວບຄຸມ ໂຄວິດ-19

- 912 2 - ລາວເພີ່ມທະວີມາດຕະການຄວບຄຸມ ໂຄວິດ-19
- Untitled design - ລາວເພີ່ມທະວີມາດຕະການຄວບຄຸມ ໂຄວິດ-19

ໃນວັນທີ 13 ເມສານີ້ ຄະນະສະເພາະກິດຕ້ານ ແລະ ສະກັດກັ້ນການລະບາດຂອງພະຍາດ COVID-19 ໄດ້ຈັດກອງປະຊຸມປຶກສາຫາລື ກ່ຽວກັບ ສະພາບການລະບາດ ແລະ ຜົນສຳເລັດໃນເບື້ອງຕົ້ນກ່ຽວກັບການປະຕິບັດມາດຕະການປ້ອງກັນ ແລະ ຄວບຄຸມ ພະຍາດດັ່ງກ່າວຂຶ້ນທີ່ນະຄອນຫລວງວຽງຈັນ ໂດຍການເປັນປະທານຂອງທ່ານ ສົມດີ ດວງດີ ຮອງນາຍຍົກລັດຖະມົນຕີ ປະທານຄະນະສະເພາະກິດດັ່ງກ່າວ.
ຮອງລັດຖະມົນຕີກະຊວງສາທາລະນະສຸກ, ຜູ້ປະຈຳການຄະນະສະເພາະກິດ ໄດ້ລາຍງານວ່າ: ມາຮອດວັນທີ 13 ເມສານີ້ ມີການກວດວິເຄາະກໍລະນີສົງໄສທັງໝົດ 1.186 ຕົວຢ່າງ, ໃນນັ້ນ 19 ກໍລະນີຖືກຢັ້ງຢືນຕິດເຊື້ອ COVID-19 ແລະ ຍັງສືບຕໍ່ຕິດຕາມກໍລະນີສຳຜັດໃກ້ຊິດກັບຄົນເຈັບທັງໝົດ 79 ຄົນຄື:ຢູ່ ນະຄອນຫລວງວຽງຈັນມີ 49 ຄົນ, ແຂວງໄຊສົມບູນ 25 ຄົນ, ຫລວງພະບາງ ແລະ ຄໍາມ່ວນແຂວງລະ 2 ຄົນ, ແຂວງວຽງຈັນ 1 ຄົນ. ນັບແຕ່ວັນທີ 20 ມີນາເປັນຕົ້ນມາໄດ້ມີແຮງງານລາວຈຳນວນຫລວງຫລາຍເດີນທາງກັບຈາກປະເທດໄທ ເຂົ້າມາຜ່ານຈຸດຊາຍແດນຕ່າງໆ ມີທັງໝົດ 113.404 ຄົນ, ຖືກຈຳກັດໂຕຢູ່ສູນ 68.534 ຄົນ ແລະ 44.870 ຄົນຈໍາກັດໂຕຢູ່ເຮືອນຂອງຕົນໂດຍຄອບຄົວຢັ້ງຢືນ ແລະ ມາຮອດປັດຈຸບັນມີ 22.716 ຄົນໄດ້ສຳເລັດການຈຳກັດໂຕຄົບຕາມກຳນົດ 14 ວັນ ແລະ ຍັງສືບຕໍ່ຈໍາກັດໂຕຢູ່ສູນ ແລະ ເຮືອນມີ 90.688 ຄົນ.
ສ່ວນຄົນເຈັບທີ່ໄດ້ຮັບການປີ່ນປົວນັ້ນແມ່ນ ຢູ່ໂຮງໝໍມິດຕະພາບ 16 ຄົນ(1 ຄົນເປັນຊ່ຽວຊານຕ່າງ ປະເທດປະຈຳຢູ່ບໍລິສັດ ພູເບ້ຍ ມາຍນິງ) ໃນນັ້ນ 15 ຄົນມີອາການເບົາບາງ, 10 ຄົນແມ່ນປິ່ນປົວຄົບກໍານົດແລ້ວ ແຕ່ຜົນກວດຍັງພົບເຊື້ອຢູ່ ຈຶ່ງໄດ້ສືບຕໍ່ປິ່ນປົວ ແລະ ຕິດຕາມອາການ . ສ່ວນຄົນເຈັບອີກ 3 ຄົນທີ່ນອນປິ່ນປົວຢູ່ໂຮງໝໍແຂວງຫລວງພະບາງເຖິງມີອາການເບົາບາງ ແຕ່ຜົນກວດຍັງພົບເຊື້ອ ແລະ ສືບຕໍ່ປິ່ນປົວ.
ທ່ານຮອງລັດຖະມົນຕີກະຊວງສາທາລະນາສຸກໃຫ້ຮູ້ຕື່ມວ່າ: ການປະຕິບັດຄຳສັ່ງເລກທີ 06/ນຍ ແມ່ນມີຫລາຍກະຊວງ, ອົງການຂັ້ນສູນກາງ ແລະ ອຳນາດການປົກຄອງທ້ອງຖິ່ນຕ່າງກໍໄດ້ເອົາໃຈໃສ່ຜັນຂະຫຍາຍ ແລະ ຊີ້ນຳການຈັດຕັ້ງປະຕິບັດ ໄດ້ດີພໍສົມຄວນ, ເປັນຕົ້ນແມ່ນການຜັດປ່ຽນກັນປະຈໍາການ, ການກັກໂຕຢູ່ເຮືອນ ຫລື ທີ່ຢູ່ອາໄສຂອງຕົນເອງ, ບໍ່ເດີນທາງໄປທ້ອງຖິ່ນອື່ນ, ບໍ່ຈັດກິດຈະກຳ ຫລື ໂຮມຊຸມນຸມທີ່ມີຜູ້ເຂົ້າຮ່ວມເກີນ 10 ຄົນ ແລະ ອື່ນໆ.
ຕໍ່ສະພາບດັ່ງກ່າວປະທານຄະນະສະເພາະກິດ, ໄດ້ເນັ້ນໃຫ້ທິມງານຂອງຕົນເພີ່ມທະວີຄວາມເອົາໃຈໃສ່ລົງຊີ້ນຳນຳພາ, ຂະບວນການຜັນຂະຫຍາຍຄຳສັ່ງຂອງທ່ານນາຍົກໃຫ້ມີປະສິດທິຜົນກ່ວາເກົ່າ ໂດຍສະເພາະການກັກກັນໂຕເອງຢູ່ບ້ານເຮືອນຂອງຕົນໃຫ້ມີຄວາມເຂັ້ມງວດ, ພ້ອມນັ້ນກໍໃຫ້ເອົາໃຈໃສ່ຊ່ວຍເຫລືອທ້ອງຖິ່ນກໍຄືຂະແຫນງການຕ່າງໆທີ່ຍັງຂາດເຂີນວັດຖຸອຸປະກອນປ້ອງກັນພະຍາດນີ້, ຕົ້ນຕໍກໍແມ່ນໂຮງຫມໍຕ່າງໆໃຫ້ມີພຽງພໍ, ພ້ອມກັບການປະຕິບັດນະໂຍບາຍຕ່າງໆຕໍ່ພະນັກງານແພດຫມໍຜູ້ເຮັດວຽກຕົວຈິງໃຫ້ທົ່ວເຖິງ ແລະ ວຽກງານສຳຄັນອື່ນໆໃນການຮັກສາຄວາມສະຫງົບປອດໄພຂອງສັງຄົມ ແລະ ການຮັບມືກັບຄວາມຫຍຸ້ງຍາກ ແລະ ສິ່ງທ້າທາຍຕ່າງໆທີ່ອາດຈະເກີດຂຶ້ນໃຫ້ທັນການ.

- Wave100S AD to Website 2020 0 - ລາວເພີ່ມທະວີມາດຕະການຄວບຄຸມ ໂຄວິດ-19
- WhatsApp Image 2020 05 27 at 5 - ລາວເພີ່ມທະວີມາດຕະການຄວບຄຸມ ໂຄວິດ-19
- WhatsApp Image 2020 05 27 at 5 - ລາວເພີ່ມທະວີມາດຕະການຄວບຄຸມ ໂຄວິດ-19
error: Alert: ເນື້ອຫາຂ່າວມີລິຂະສິດ !!