ຊົມເຊີຍນັກຮົບເສື້ອຂາວໃນພາລະກິດຕ້ານໂຄວິດ-19

- 888 - ຊົມເຊີຍນັກຮົບເສື້ອຂາວໃນພາລະກິດຕ້ານໂຄວິດ-19
- Untitled design - ຊົມເຊີຍນັກຮົບເສື້ອຂາວໃນພາລະກິດຕ້ານໂຄວິດ-19

ໂດຍ: ທິດກໍ່າ

ເວົ້າເຖິງພາລະກິດການຕໍ່ສູ້ຕ້ານການແຜ່ໂຣກລະບາດໂຄວິດ1-9 ມັນກໍແມ່ນພາລະກິດລວມອັນຍິ່ງໃຫຍ່ຂອງຊາດ ຍັງປະກອບໄປດ້ວຍຫລາຍພາກສ່ວນທີ່ຕ້ອງໄດ້ພ້ອມກັນເຮັດຢ່າງເປັນລະບົບຄົບຊຸດ ນັບແຕ່ຂັ້ນສູນກາງລົງຮອດທ້ອງຖິ່ນ ຕະຫລອດເຖິງບັນດາຂະແໜງການປິ່ນອ້ອມ ທັງປະຊາຊົນບັນດາເຜົ່າ ຈຶ່ງສາມາດຍາດໄດ້ຜົນງານ ແລະ ໄຊຊະນະມາໃຫ້ປະເທດຊາດໄດ້ຢ່າງເພິ່ງພໍໃຈ, ແຕ່ໃນຄໍລຳມື້ນີ້, ທິດກໍ່າ ຂໍຍົກເອົາສະເພາະແຕ່ພາລະກິດຂອງແພດໝໍ ຫລື ສາຍານາມອີກຢ່າງໜຶ່ງກໍຄື “ນັກຮົບເສື້ອຂາວ” ມາເວົ້າມາວ່າເຈຍລະໄນສູ່ກັນຟັງໃຫ້ເຫັນໄດ້ບົດບາດ, ຄວາມໝາຍ ແລະ ຄວາມສຳຄັນ ແລະ ນ້ຳໃຈເສຍສະຫລະຂອງແພດໝໍໃນຍາມປະເທດຊາດຂອງພວກເຮົາພວມເຮັດເສິກຕ້ານໂຄວິດ-19 ທີ່ພວມແຜ່ລະບາດໄປໃນທົ່ວໂລກ ກໍຄືຢູ່ລາວເຮົາໃນປັດຈຸບັນ.

     ຖ້າຈະຕັ້ງໂຈດຖາມກັນວ່າ: ເປັນຫຍັງ ຈຶ່ງຊົມເຊີຍແຕ່ແພດໝໍໃນໄລຍະຕ້ານໂຄວິດ-19 ທີ່ພວມລະບາດໃນໄລຍະນີ້ ? ຄຳຕອບກໍຄືຍ້ອນວ່າແພດໝໍສ່ຽງຕໍ່ຄວາມຕາຍ ໂດຍສະເພາະແມ່ນຜູ້ທີ່ປິ່ນປົວໂດຍກົງກັບຜູ້ຕິດເຊື້ອ, ຜູ້ຕິດເຊື້ອຈະເປັນ ຫລື ຕາຍກໍແມ່ນມອບກາຍຖວາຍຊີວິດໃຫ້ກັບນັກຮົບເສື້ອຂາວ. ແພດໝໍເປັນໃຈກາງໃນການປິ່ນປົວຜູ້ທີ່ຕິດເຊື້ອໂຄວິດໂດຍກົງ. ເວົ້າແຈ້ງຊີວິດອິນຊີຂອງຜູ້ຕິດໂຄວິດຈະຕາຍ ຫລື ຍັງແມ່ນແພດໝໍເປັນຜູ້ເບິ່ງແຍງ ແລະ ປິ່ນປົວຈົນຫາຍດີຈຶ່ງຖືວ່າລອດຊີວິດ. ນອກຈາກສິ່ງທີ່ໄດ້ກ່າວມານີ້ແລ້ວ, ແພດໝໍຜູ້ປິ່ນປົວຄົນເຈັບຍັງມີຄວາມສ່ຽງສູງຕໍ່ການຕິດເຊື້ອພະຍາດໂຄວິດ-19 ຫລື ບາງກໍລະນີເມື່ອປິ່ນປົວຄົນເຈັບຫາຍດີໄປແລ້ວ ຕົນເອງພັດຕິດເຊື້ອຕໍ່ຈົນເຖິງແກ່ຄວາມຕາຍໃນເວລາອັນບໍ່ສົມຄວນ. ດັ່ງເຮົາເຫັນແຫລ່ງຂ່າວຄາວຢູ່ຈີນ, ຢູ່ອິຕາລີ ແລະ ປະເທດອື່ນໆທີ່ມີຜູ້ຕິດເຊື້ອເປັນພັນເປັນໝື່ນ. ການປິ່ນປົວກໍບໍ່ໄດ້ຢູ່ບໍ່ໄດ້ເຊົາ ທັງອິດເມື່ອຍຫິວໂຫຍ ສຸດທ້າຍມາຕົນເອງໄດ້ເສຍສະຫລະຊີວິດ ເພື່ອປະເທດຊາດ ແລະ ປະຊາຊົນ. ນີ້ລະຄືພາລະກິດອັນຍິ່ງໃຫຍ່ຂອງນັກຮົບເສື້ອຂາວຍາມບ້ານເມືອງເກີດວິກິດໂຣກລະບາດໂຣຄາພະຍາດ.

      ສະເພາະຢູ່ປະເທດລາວເຮົາ ມາຮອດວັນທີ 12 ເມສາ 2020 ຫາກໍມີຜູ້ຕິດເຊື້ອພຽງ 19 ຄົນໃນທົ່ວປະເທດ. ສ່ວນຈາກວັນທີ 19 ເມສາ ເປັນຕົ້ນໄປ ກໍບໍ່ຮູ້ວ່າຈະມີຕື່ມອີກຈັກຄົນ ແລະ ໂຣກຈັງໄຮໂຄວິດ-19 ຍັງບໍ່ຮູ້ວ່າມັນຈະຢູ່ຍົງຄົງຕົວລ້າງຜ່ານມະນຸດຊາດໄປອີກຈັກວັນຈັກເດືອນ. ກໍຂໍວິ້ງວອນສິ່ງສັກສິດຈົ່ງໄດ້ມາຄຸ້ມຄອງປະເທດລາວ, ປະຊາຊົນລາວບັນດາເຜົ່າໃຫ້ພົ້ນວິກິດຄັ້ງນີ້ໂດຍໄວ. ຂໍໃຫ້ຜູ້ເຈັບເປັນຍ້ອນໂຄວິດ-19 ຈົ່ງຫາຍດີທຸກໆຄົນ ແລະ ຂໍໃຫ້ພາລະກິດຂອງນັກຮົບເສື້ອຂາວຈົ່ງປະສົບຜົນສຳເລັດ ແລະ ໄດ້ຮັບໄຊຊະນະໃນການຕ້ານສົງຄາມສູ້ກັບສັດຕູທີ່ໄຮ້ສຽງຄັ້ງນີ້ໄດ້ເປັນຢ່າງດີ.

     ແນວໃດກໍຕາມ, ເທົ່າທີ່ ທິດກໍ່າ ຄິດ ຖ້າຢາກໄດ້ໄຊຊະນະອັນໃຫຍ່ຫລວງຄັ້ງປະຫວັດສາດແຫ່ງຍຸກຕ້ານໂຄວິດ-19 ທີ່ພວມລະບາດ ທຸກຄົນຕ້ອງພ້ອມໃຈກັນເປັນເຈົ້າໃນການຮັກສາຊີວິດອິນຊີ, ປະຕິບັດຕາມຄຳສັ່ງເລກທີ 06/ນຍ ຂອງທ່ານນາຍົກລັດຖະມົນຕີ, ຄຳສັ່ງເລກທີ 07/ຄລສພ ຂອງຄະນະເລຂາທິການສູນກາງພັກ, ຄຳສັ່ງແນະນຳຂອງຄະນະສະເພາະກິດ ແລະ ຄຳສັ່ງອື່ນໆຂອງກົມກອງທ້ອງຖິ່ນແຕ່ລະຂັ້ນໃຫ້ມີຜົນສັກສິດ, ຢ່າພາກັນລະເມີດຢ່າງເດັດຂາດ. ຖ້າພວກເຮົາພ້ອມໃຈກັນປະຕິບັດທົ່ວພັກ, ທົ່ວກອງທັບ ແລະ ທັງປະຊາຊົນບັນດາເຜົ່າສິ່ງທີ່ໄດ້ມາກໍຄືໄຊຊະນະອັນໃຫຍ່ຫລວງຄັ້ງປະຫວັດສາດຂອງຊາດລາວ, ຄົນລາວໃນພາລະກິດຕໍ່ສູ້ຕ້ານໂຄວິດ-19 ຄັ້ງນີ້ອັນເປັນສົງຄາມຊີວະພາບລ້າງຜ່ານມະນຸດໃນຍຸກໂລກາພິວັດ.

- Wave100S AD to Website 2020 0 - ຊົມເຊີຍນັກຮົບເສື້ອຂາວໃນພາລະກິດຕ້ານໂຄວິດ-19

     ເຖິງຢ່າງໃດກໍດີ, ດ້ວຍຈຸດພິເສດທາງດ້ານພູມສັນຖານຂອງປະເທດ, ປະເພນີວັດທະນະທຳ, ພົນລະເມືອງ, ວິຖີຊີວິດຂອງປະຊາຊົນບັນດາເຜົ່າ ແລະ ພາຍໃຕ້ການນຳພາຂອງພັກ ແລະ ລັດຖະບານເຮົາໃນນະໂຍບາຍຍຸດທະສາດ, ຍຸດທະວິທີຕ່າງໆໃນການຕ້ານໂຣກລະບາດໂຄວິດ-19 ພວກເຮົາຕ້ອງໄດ້ຮັບໄຊຊະນະຢ່າງແນ່ນອນ. ພາລະກິດຂອງນັກຮົບເສື້ອຂາວຕ້ອງປະສົບຜົນສຳເລັດຕາມຄວາມຄາດຫວັງທີ່ປະຊາຊົນລາວໄດ້ມອບໝາຍໃຫ້. ຊົມເຊີຍນ້ຳໃຈເສຍສະຫລະນັກຮົບເສື້ອຂາວໃນພາລະກິດຕ້ານໂຄວິດ-19 ຢ່າງສຸດໃຈ.

- WhatsApp Image 2020 05 27 at 5 - ຊົມເຊີຍນັກຮົບເສື້ອຂາວໃນພາລະກິດຕ້ານໂຄວິດ-19
- WhatsApp Image 2020 05 27 at 5 - ຊົມເຊີຍນັກຮົບເສື້ອຂາວໃນພາລະກິດຕ້ານໂຄວິດ-19
error: Alert: ເນື້ອຫາຂ່າວມີລິຂະສິດ !!