ນາຍົກລັດຖະມົນຕີ ເຂົ້າຮ່ວມກອງປະຊຸມສຸດຍອດທາງໄກ ສະໄໝພິເສດ ຂອງຜູ້ນຳອາຊຽນ ແລະ ຜູ້ນຳອາຊຽນບວກສາມ ກ່ຽວກັບການລະບາດຂອງ ໂຄວິດ-19

- 92436 - ນາຍົກລັດຖະມົນຕີ ເຂົ້າຮ່ວມກອງປະຊຸມສຸດຍອດທາງໄກ ສະໄໝພິເສດ  ຂອງຜູ້ນຳອາຊຽນ ແລະ ຜູ້ນຳອາຊຽນບວກສາມ ກ່ຽວກັບການລະບາດຂອງ ໂຄວິດ-19
- Untitled design - ນາຍົກລັດຖະມົນຕີ ເຂົ້າຮ່ວມກອງປະຊຸມສຸດຍອດທາງໄກ ສະໄໝພິເສດ  ຂອງຜູ້ນຳອາຊຽນ ແລະ ຜູ້ນຳອາຊຽນບວກສາມ ກ່ຽວກັບການລະບາດຂອງ ໂຄວິດ-19

ໃນວັນທີ 14 ເມສາ 2020, ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ນຳພາຄະນະຜູ້ແທນລາວ ເຂົ້າຮ່ວມກອງປະຊຸມສຸດຍອດທາງໄກ (Video Conference) ສະໄໝພິເສດ ຂອງຜູ້ນໍາອາຊຽນ ແລະ ກອງປະຊຸມສຸດຍອດ ສະໄໝພິເສດ ຜູ້ນຳອາຊຽນບວກສາມ ກ່ຽວກັບ ການລະບາດຂອງພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ (ໂຄວິດ-19) ທີ່ຫ້ອງວ່າການສຳນັກງານນາຍົກລັດຖະມົນຕີ ນະຄອນຫລວງວຽງຈັນ.
ກອງປະຊຸມສຸດຍອດທາງໄກ ສະໄໝພິເສດຂອງຜູ້ນຳອາຊຽນ ໄດ້ດໍາເນີນໄປພາຍໃຕ້ການເປັນປະທານຂອງ ທ່ານ ຫງວຽນ ຊວັນ ຟຸກ ນາຍົກລັດຖະມົນຕີ ແຫ່ງ ສສ ຫວຽດນາມ, ໃນຖານະປະທານໝູນວຽນອາຊຽນ ປີ 2020, ເຊິ່ງໄດ້ຕີລາຄາສູງຕໍ່ຄວາມພະຍາຍາມ ແລະ ຄວາມສາມັກຄີເປັນປຶກແຜ່ນຂອງອາຊຽນ ໃນການສະກັດກັ້ນ, ເຝົ້າລະວັງ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19. ໃນກອງປະຊຸມຄັ້ງນີ້, ບັນດາຜູ້ນໍາໄດ້ແລກປ່ຽນຂໍ້ມູນ-ຂ່າວສານກ່ຽວກັບສະພາບການ ແລະ ມາດຕະການຂອງແຕ່ລະປະເທດສະມາຊິກ ກໍຄື ຂອງອາຊຽນໂດຍລວມ ເພື່ອພ້ອມກັນຮັບມື ແລະ ຕອບໂຕ້ຢ່າງທັນການການແຜ່ລະບາດຂອງພະຍາດດັ່ງກ່າວ. ພ້ອມນີ້, ຜູ້ນຳອາຊຽນຍັງໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ຜົນສຳເລັດຂອງກອງປະຊຸມສະພາປະສານງານອາຊຽນ ສະໄໝພິເສດ ທີ່ຈັດຂຶ້ນຢູ່ ສປປ ລາວ ເຮົາໃນເດືອນກຸມພາຜ່ານມາ, ກອງປະຊຸມທາງໄກ ສະພາປະສານງານອາຊຽນ ຄັ້ງທີ 25 ໃນວັນທີ 9 ເມສາ 2020 ແລະ ບັນດາກອງປະຊຸມຂະແໜງການກ່ຽວຂ້ອງກ່ຽວກັບ ພະຍາດໂຄວິດ-19 ແລະ ໄດ້ມອບໝາຍໃຫ້ບັນດາຂະແໜງການກ່ຽວຂ້ອງ ໄປຜັນຂະຫຍາຍຜົນສໍາເລັດຂອງບັນດາກອງປະຊຸມດັ່ງກ່າວໃຫ້ປະກົດເປັນຈິງ. ນອກຈາກນີ້, ບັນດາຜູ້ນໍາອາຊຽນ ຍັງໄດ້ເຫັນດີເປັນເອກະພາບໃນການສືບຕໍ່ຮ່ວມມືຢ່າງໃກ້ຊິດກັບບັນດາຄູ່ຮ່ວມເຈລະຈາ ກໍຄື ຄູ່ຮ່ວມມືພາຍນອກອາຊຽນ ແລະ ບັນດາອົງການຈັດຕັ້ງສາກົນ ໂດຍສະເພາະອົງການອະນາໄມໂລກ ໃນການຕໍ່ສູ້ກັບການລະບາດຂອງພະຍາດໂຄວິດ-19.
ໃນໂອກາດນີ້, ສປປ ລາວ ກໍໄດ້ສະແດງຄວາມຂອບໃຈຢ່າງຈິງໃຈ ມາຍັງບັນດາປະເທດອາຊຽນ ແລະ ປະເທດເພື່ອນມິດອື່ນໆ ລວມທັງບັນດາອົງການຈັດຕັ້ງສາກົນ ທີ່ໄດ້ໃຫ້ການຊ່ວຍເຫລືອດ້ານຊ່ຽວຊານ ກໍຄື ອຸປະກອນການແພດ ແລະ ຢາກັນພະຍາດຕ່າງໆ ໃຫ້ແກ່ ສປປ ລາວ ໃນການຮັບມື ແລະ ແກ້ໄຂການລະບາດຂອງພະຍາດໂຄວິດ-19.
ໃນຕອນບ່າຍຂອງວັນດຽວກັນ, ທ່ານ ທອງລຸນ ສີສຸລິດ ພ້ອມຄະນະ ໄດ້ສືບຕໍ່ເຂົ້າຮ່ວມກອງປະຊຸມສຸດຍອດ ສະໄຫມພິເສດຜູ້ນໍາອາຊຽນບວກສາມ (ສປ ຈີນ, ຍີ່ປຸ່ນ ແລະ ສ ເກົາຫລີ) ກ່ຽວກັບພະຍາດໂຄວິດ-19 ທີ່ຫ້ອງວ່າການສໍານັກງານນາຍົກລັດຖະມົນຕີ ພາຍໃຕ້ການເປັນປະທານຮ່ວມຂອງ ທ່ານ ຫງວຽນ ຊວນຟຸກ ແລະ ທ່ານ ມຸນ ແຈອິນ ປະທານາທິບໍດີ ສ ເກົາຫລີ ໃນນາມປະທານປະເທດບວກສາມ ໂດຍມີອຳນວຍການໃຫຍ່ອົງການອະນາໄມໂລກ ເຂົ້າຮ່ວມ.
ກອງປະຊຸມຄັ້ງນີ້ ໄດ້ຕີລາຄາສູງ ແລະ ຊົມເຊີຍຕໍ່ຄວາມພະຍາຍາມຂອງແຕ່ລະປະເທດສະມາຊິກ ກໍຄື ມາດຕະການລວມ ພາຍໃຕ້ຂອບການຮ່ວມມືອາຊຽນບວກສາມໃນການສະກັດກັ້ນ, ເຝົ້າລະວັງ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19. ໃນນີ້, ບັນດາຜູ້ນໍາ ໄດ້ແລກປ່ຽນຂໍ້ມູນ-ຂ່າວສານກ່ຽວກັບສະພາບການ ແລະ ບົດຮຽນທີ່ດີເພື່ອສະກັດກັ້ນ ແລະ ຮັບມືກັບພະຍາດໂຄວິດ-19 ແລະ ຢືນຢັນຈະສືບຕໍ່ເພີ່ມທະວີການຮ່ວມມືກັນໃນຕໍ່ໜ້າ.
ສໍາລັບ ສປປ ລາວ, ທ່ານນາຍົກລັດຖະມົນຕີ ທອງລຸນ ສີສຸລິດ ໄດ້ແລກປ່ຽນຂໍ້ມູນ-ຂ່າວສານກ່ຽວກັບສະພາບການ ແລະ ມາດຕະການໃນການສະກັດກັ້ນ, ເຝົ້າລະວັງ, ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕໍ່ສູ້ກັບການແຜ່ລະບາດພະຍາດໂຄວິດ-19 ເປັນຕົ້ນ ສະກັດກັ້ນການເຄື່ອນຍ້າຍຂອງພົນລະເມືອງດ້ວຍການໂຈະການເດີນທາງເຂົ້າ-ອອກປະເທດ ລວມທັງພົນລະເມືອງລາວ ແລະ ຕ່າງປະ ເທດ, ປິດສະຖາບັນການສຶກສາທຸກລະດັບ, ສະຖານບໍລິການທຸກປະເພດ, ຮຽກຮ້ອງໃຫ້ປະຊາຊົນຢູ່ເຮືອນ, ຫລີກລ່ຽງການຊຸມນຸມ ແລະ ທຸກກິດຈະກຳທີ່ມີການເຕົ້າໂຮມຈຳນວນຫລາຍ, ປະຕິບັດຢ່າງເຂັ້ມງວດຕໍ່ຂໍ້ສະເໜີແນະຂອງອົງການອະນາໄມໂລກ ແລະ ສຸມໃສ່ການໂຄສະນາເຜີຍແຜ່ ກ່ຽວກັບຄວາມອັນຕະລາຍ ແລະ ວິທີປ້ອງກັນຕົນເອງຈາກການຕິດເຊື້ອໂຄວິດ-19.
ສໍາລັບທິດທາງໃນຕໍ່ໜ້າ, ທ່ານນາຍົກລັດຖະມົນຕີ ທອງລຸນ ສີສຸລິດ ໄດ້ສະເໜີໃຫ້ກອງປະຊຸມເອົາໃຈໃສ່ຮ່ວມມືກັນໃນວຽກຄົ້ນຄວ້າ ແລະ ພັດທະນາການຜະລິດຢາປົວພະຍາດ ກໍຄື ຢາວັກແຊງຕ້ານໂຄວິດ-19, ການສ້າງຊັບພະຍາກອນມະນຸດດ້ານສາທາລະນະສຸກ ແລະ ການແກ້ໄຂຜົນກະທົບຕໍ່ເສດຖະກິດ ກໍຄື ຊີວິດການເປັນຢູ່ຂອງປະຊາຊົນ ແລະ ໃນໂອກາດນີ້, ທ່ານນາຍົກລັດຖະມົນຕີ ຍັງໄດ້ສະແດງຄວາມຂອບໃຈ ແລະ ຮູ້ບຸນຄຸນຕໍ່ບັນດາປະເທດເພື່ອນມິດ ແລະ ອົງການຈັດຕັ້ງສາກົນ ໂດຍສະເພາະປະເທດບວກສາມ ທີ່ໄດ້ສົ່ງຊ່ຽວຊານດ້ານການແພດ, ອຸປະກອນການແພດ ແລະ ຢາກັນພະຍາດຕ່າງໆ ໃຫ້ແກ່ ສປປ ລາວ ໃນການສະກັດກັ້ນ ແລະ ຮັບມືກັບພະຍາດໂຄວິດ-19.
ພິເສດ, ໃນໂອກາດກອງປະຊຸມສຸດຍອດທາງໄກ ສະໄໝພິເສດ ຂອງຜູ້ນຳອາຊຽນ ແລະ ກອງປະຊຸມສຸດຍອດສະໄໝພິເສດຜູ້ນຳອາຊຽນບວກສາມຄັ້ງນີ້ ແມ່ນໄດ້ຮັບຮອງເອົາຖະແຫລງການຮ່ວມ ວ່າດ້ວຍການລະບາດຂອງພະຍາດໂຄວິດ-19 ຂອງທັງສອງກອງປະຊຸມສຸດຍອດດັ່ງກ່າວ ແລະ ໄດ້ມອບໃຫ້ພາກສ່ວນກ່ຽວຂ້ອງນໍາໄປຜັນຂະຫຍາຍຕໍ່ໄປ.

- WhatsApp Image 2020 05 27 at 5 - ນາຍົກລັດຖະມົນຕີ ເຂົ້າຮ່ວມກອງປະຊຸມສຸດຍອດທາງໄກ ສະໄໝພິເສດ  ຂອງຜູ້ນຳອາຊຽນ ແລະ ຜູ້ນຳອາຊຽນບວກສາມ ກ່ຽວກັບການລະບາດຂອງ ໂຄວິດ-19
- WhatsApp Image 2020 05 27 at 5 - ນາຍົກລັດຖະມົນຕີ ເຂົ້າຮ່ວມກອງປະຊຸມສຸດຍອດທາງໄກ ສະໄໝພິເສດ  ຂອງຜູ້ນຳອາຊຽນ ແລະ ຜູ້ນຳອາຊຽນບວກສາມ ກ່ຽວກັບການລະບາດຂອງ ໂຄວິດ-19
- Wave100S AD to Website 2020 0 - ນາຍົກລັດຖະມົນຕີ ເຂົ້າຮ່ວມກອງປະຊຸມສຸດຍອດທາງໄກ ສະໄໝພິເສດ  ຂອງຜູ້ນຳອາຊຽນ ແລະ ຜູ້ນຳອາຊຽນບວກສາມ ກ່ຽວກັບການລະບາດຂອງ ໂຄວິດ-19
error: Alert: ເນື້ອຫາຂ່າວມີລິຂະສິດ !!