ປີໃໝ່ໃຫ້ທຸກຄົນສຸກໃຈໂພຍໄພໃຫ້ໜີຫ່າງໂຄວິດ-19

-        1 - ປີໃໝ່ໃຫ້ທຸກຄົນສຸກໃຈໂພຍໄພໃຫ້ໜີຫ່າງໂຄວິດ-19
- Untitled design - ປີໃໝ່ໃຫ້ທຸກຄົນສຸກໃຈໂພຍໄພໃຫ້ໜີຫ່າງໂຄວິດ-19

ໂດຍ: ທິດກໍ່າ

ປີເກົ່າ ພສ 2562 ໄດ້ຜ່ານພົ້ນໄປ, ປີໃໝ່ ພສ 2563 ໄດ້ໝູນວຽນມາບັນຈົບຄົບຮອບອີກວາລະໜຶ່ງ. ຈາກປີເກົ່າກ້າວສູ່ປີໃໝ່ໄດ້ເກີດມີຫລາຍສິ່ງຫລາຍຢ່າງ ແລະ ມີຫລາຍເຫດການທີ່ເກີດຂຶ້ນໃນໂລກ, ພາກພື້ນ ທັງຢູ່ລາວເຮົາ ເຊິ່ງບາງຢ່າງກໍມີຜົນກະທົບທັງອັນດີ, ອັນຮ້າຍ, ທັງບວກ, ທັງລົບ ແລະ ທັງອັນກ້າວໜ້າຫລ້າຫລັງ. ບັນດາປັດໄຈ, ປາກົດການ ແລະ ສິ່ງຕ່າງໆທີ່ເກີດຂຶ້ນນັ້ນ, ບາງຢ່າງກໍແມ່ນຈາກທຳມະຊາດ ແລະ ສິ່ງແວດລ້ອມ. ບາງຢ່າງກໍແມ່ນມະນຸດເອງເປັນຜູ້ສ້າງຂຶ້ນ. ຜົນຮ້າຍທີ່ເກີດຂຶ້ນຈາກທຳມະຊາດນັ້ນກໍໄດ້ແກ່ລົມພາຍຸ, ແຜ່ນດິນໄຫວ, ເກີດແລ້ງເກີດຖ້ວມ, ເກີດຮ້ອນເກີນໄປໜາວເກີນໄປ, ເກີດໂຣຄາພະຍາດຊະນິດຕ່າງໆມາທຳລາຍເຜົາຜານຊີວິດອິນຊີຂອງມວນມະນຸດ ເຊິ່ງປັດຈຸບັນໄພພິບັດຈາກໂຣຄາພະຍາດທີ່ມະນຸດທົ່ວໂລກພວມຜະເຊີນຢູ່ ກໍຄືການແຜ່ລະບາດຂອງເຊື້ອໄວຣັສສາຍພັນໃໝ່ໂຄໂຣນາ ຫລື ອັນທີ່ເອີ້ນວ່າ: ໂຄວິດ-19 ນັ້ນເອງ.

     ຕໍ່ການແຜ່ລະບາດຂອງເຊື້ອພະຍາດໂຄວິດ-19 ປະເທດລາວຂອງພວກເຮົາກໍມີຜົນກະທົບເໝືອນກັນ ເຊິ່ງມາຮອດວັນທີ 13 ເມສາ 2020 ໄດ້ມີຜູ້ຕິດເຊື້ອໄປແລ້ວ 19 ຄົນ. ປັດຈຸບັນພວມປິ່ນປົວຢູ່ໂຮງໝໍກໍຂໍໃຫ້ຫາຍດີດ້ວຍກັນທຸກຄົນ ແລະ ຂໍວິ້ວອນສິ່ງສັກສິດມາຄຸ້ມຄອງເບິ່ງແຍງ ແລະ ປົກປັກຮັກສາໃຫ້ຕະຫລອດປອດໄພໄຮ້ອັນຕະລາຍທັງປວງ. ສະເພາະສິ່ງດີໆທີ່ເກີດຂຶ້ນໃນປະເທດລາວເຮົາກໍມີຫລາຍອັນຫລາຍຢ່າງ ເຊິ່ງເປັນຜົນງານ ແລະ ໄຊຊະນະທີ່ປະຊາຊົນບັນດາເຜົ່າເຮົາຍາດມາໄດ້. ພາຍໃຕ້ການນຳພາຂອງພັກ ແລະ ລັດຖະບານໃໜຶ່ງປີຜ່ານມານີ້ ຜົນງານຊິ້ນໃຫຍ່ໆເດັ່ນໆ ກໍຄືການສ້າງສາພັດທະນາປະເທດຊາດໃຫ້ມີຄວາມຈະເລີນຮຸ່ງເຮືອງໄປເລື້ອຍໆເໝືອນດັ່ງປະເທດອື່ນທີ່ພວກເພິ່ນມີຄວາມສີວິໄລມາແລ້ວ. ຈາກຜົນການຈັດຕັ້ງປະຕິບັດມະຕິຄັ້ງທີ x ຂອງພັກ ແລະ ການຜັນຂະຫຍາຍແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII ຂອງລັດຖະບານໄດ້ເຮັດໃຫ້ ສປປ ລາວ ຂອງພວກເຮົາມີການພັດທະນາດີຂຶ້ນຫລາຍດ້ານ ເປັນຕົ້ນໂຄງການໃຫຍ່ ກໍຄືການສ້າງທາງລົດໄຟ ລາວ-ຈີນ, ໂຄງການສ້າງເຂດເສດຖະກິດພິເສດ, ເສດຖະກິດສະເພາະ, ໂຄງການສ້າງເຂື່ອນໄຟຟ້າ, ການສ້າງຖະໜົນຫົນທາງ, ສຳນັກງານອົງການ, ໂຮງຮຽນ, ໂຮງໝໍ, ໂຮງຈັກໂຮງງານ, ສະຖາປັດຕະຍະກຳອື່ນໆ ການສົ່ງເສີມເສດຖະກິດຂະໜາດນ້ອຍ-ຂະໜາດກາງ ແລະ ການສ້າງສາພັດທະນາໃນດ້ານອື່ນໆທີ່ເປັນແຫລ່ງເສດຖະກິດ-ສັງຄົມຂອງປະເທດກໍພວມເລັ່ງລັດພັດທະນາດຳເນີນໄປຕິກໆຕາມສະພາວະຄວາມເປັນຈິງຂອງປະເທດ.

     ຈາກຜົນການເຄື່ອນໄຫວຢ່າາງຕັ້ງໜ້າທີ່ໄດ້ກ່າວມາຂ້າງເທິງນັ້ນ, ສິ່ງທີ່ໄດ້ມາກໍຄືເສດຖະກິດຂອງປະເທດໄດ້ຂະຫຍາຍຕົວຢ່າງຕໍ່ເນື່ອງ. ຈາກການປະເມີນຜົນໃນປີຜ່ານມາ ອັດຕາການຂະຫຍາຍຕົວທາງດ້ານເສດຖະກິດສະເລ່ຍໄດ້ 6% ຕໍ່ປີ. ສ່ວນການຂະຫຍາຍຕົວທາງດ້ານສັງຄົມ-ວັດທະນະທຳນັ້ນກໍປະສົບຜົນສຳເລັດໃນຫລາຍດ້ານ. ອັນສຳຄັນທີ່ສຸດກໍແມ່ນການສົ່ງເສີມຮີດຄອງປະເພນີວັດທະນະທຳອັນດີງາມຂອງຊາດ. ມາຮອດປັດຈຸບັນນີ້ ລາວເຮົາໄດ້ມີແຫລ່ງມໍລະດົກຂອງໂລກໄປແລ້ວ 4 ແຫລ່ງຄື: ເມືອງຫລວງພະບາງ, ວັດພູຈຳປາສັກ, ສຽງແຄນລາວ ແລະ ໄຫຫີນຊຽງຂວາງ. ອີກບໍ່ນານເກີນລໍ ແລະ ບໍ່ພໍເທົ່າໃດປີ ໂຄງການສ້າງສາພັດທະນາຫລາຍອັນຫລາຍຢ່າງກໍຈະສຳເລັດໄປຕາມໆກັນເຊັ່ນ: ໂຄງການສ້າງທາງລົດໄຟຄວາມໄວສູງ ລາວ-ຈີນ ກໍຈະສຳເລັດໃນທ້າຍປີ 2021, ໂຄງການສ້າງເຂື່ອນໄຟຟ້າຈຳນວນ 70 ກວ່າແຫ່ງກໍຈະສຳເລັດ ແລະ ໂຄງການອື່ນໆກໍຈະສຳເລັດ ແລະ ມີການນຳໃຊ້ບໍລິການປະຊາຊົນໄດ້ຕາມຄວາມຫວັງຕັ້ງໃຈ.

- Wave100S AD to Website 2020 0 - ປີໃໝ່ໃຫ້ທຸກຄົນສຸກໃຈໂພຍໄພໃຫ້ໜີຫ່າງໂຄວິດ-19

     ຈາກປັດໄຈຕ່າງໆທີ່ໄດ້ກ່າວມາ ຈຶ່ງເຮັດໃຫ້ປະເທດຊາດບ້ານເມືອງຂອງພວກເຮົາມີຄວາມຈະເລີນຮຸ່ງເຮືອງໄປເລື້ອຍໆ. ດ້ານການເມືອງກໍນັບມື້ມີສະຖຽນລະພາບໝັ້ນຄົງ, ປະເທດຊາດມີຄວາມສະຫງົບໂດຍພື້ນຖານ ແລະ ມີສາຍພົວພັນກັບພາກພື້ນ ແລະ ສາກົນເຖິງ 140 ກວ່າປະເທດ.

     ເຖິງຢ່າງໃດກໍດີ, ໂອກາດປີໃໝ່ ພສ 2563 ໄດ້ມາຮອດຈອດເຖິງພວກເຮົາແລ້ວກໍຂໍໃຫ້ທຸກຄົນມີຄວາມສຸກກາຍສະບາຍໃຈໂພຍໄພທັງຫລາຍໃຫ້ໜີຫ່າງ. ອວຍພອນການນຳພັກ-ລັດຈົ່ງເຂັ້ມແຂງໝັ້ນຍືນນຳພາຊາດລາວຄົນລາວກ້າວສູ່ຍຸກໃໝ່. ປະຊາຊົນລາວບັນດາເຜົ່າທຸກທົ່ວໜ້າຂໍໃຫ້ຄວາມສຸກຄວາມຈະເລີນ. ສິ່ງໃດບໍດີຂໍໃຫ້ໜີໄປນຳປີເກົ່າ. ພະຍາດໂຄວິດ-19 ກໍຂໍໃຫ້ໜີໄກໄລ່ຫ່າງ, ປີໃໝ່ຂໍໃຫ້ມີແຕ່ໂຊກແຕ່ໄຊດ້ວຍອາຍຸ ວັນນະ ສຸຂະ ພາລະ ທຸກຄົນແດ່ກໍຂ້າເທີ້ນ ສາທຸ !.

- WhatsApp Image 2020 05 27 at 5 - ປີໃໝ່ໃຫ້ທຸກຄົນສຸກໃຈໂພຍໄພໃຫ້ໜີຫ່າງໂຄວິດ-19
- WhatsApp Image 2020 05 27 at 5 - ປີໃໝ່ໃຫ້ທຸກຄົນສຸກໃຈໂພຍໄພໃຫ້ໜີຫ່າງໂຄວິດ-19
error: Alert: ເນື້ອຫາຂ່າວມີລິຂະສິດ !!