ຮັກຊີວິດຈົ່ງພິຊິດຕົນເອງຢູ່ບ້ານຢູ່ເຮືອນ

- 2211 - ຮັກຊີວິດຈົ່ງພິຊິດຕົນເອງຢູ່ບ້ານຢູ່ເຮືອນ
- Untitled design - ຮັກຊີວິດຈົ່ງພິຊິດຕົນເອງຢູ່ບ້ານຢູ່ເຮືອນ

ໂດຍ: ທິດກໍ່າ

ສະພາບການແຜ່ລະບາດຂອງເຊື້ອໄວຣັສສາຍພັນໃໝ່ໂຄວິດ-19 ໄດ້ເຮັດໃຫ້ຊີວິດອິນຊີຂອງຊາວໂລກນັບພັນ, ນັບໝື່ນ ແລະ ນັບແສນລົ້ມຫາຍຕາຍຈາກກັນຢ່າງເກື່ອນກອງໃນຫລາຍປະເທດທົ່ວໂລກ. ມີບາງປະເທດໄດ້ມີຄົນເຈັບຄົນເປັນລົ້ນໂຮງໝໍ ແລະ ຫລາຍປະເທດກໍມີຄົນຕາຍຈົນວ່າບໍ່ມີຫີບບໍ່ມີໂລງສົບໃສ່ ຈຳເປັນຕ້ອງໄດ້ເອົາໄປຝັງໃນຂຸມຝັງສົບລວມໝູ່ເໝືອນດັ່ງສັດເດຍລະສານໄຮ້ວິນຍານບູດເນົ່າເປົ່າດາຍເດຍລະດາດປານສັດສາວາສິ່ງຕາຍພາກ.

ນີ້ຄືປາກົດການ ແລະ ເຫດການປະຫວັດສາດແຫ່ງຄວາມຫາຍະນະໃນຍຸກໂລກາພິວັດຂອງມວນມະນຸດໃນໂລກ. ຫລ້າສຸດນັບແຕ່ເກີດມີເຊື້ອພະຍາດໂຄວິດ-19 ແຜ່ລະບາດນັບແຕ່ທ້າຍປີ 2019 ມາຮອດວັນທີ 16 ເມສາ 2020 ໄດ້ມີຄົນໃນທົ່ວໂລກຕິດເຊື້ອພະຍາດໂຄວິດ-19 ເຖິງ 2.083.033 ຄົນ, ເສຍຊີວິດໄປແລ້ວ 134.603 ຄົນ ແລະ ປິ່ນປົວຫາຍດີ 510.171 ຄົນ, ສ່ວນທີ່ເຫລືອກໍຍັງຢູ່ໃນຄວາມສ່ຽງວ່າຈະຢູ່ລອດ ຫລື ເປັນການອາວະສານຂອງຊີວິດທີ່ເກີດມາເປັນມະນຸດໃນຊາດນີ້.

ບັນດາປະເທດທີ່ປະສົບບັນຫາໜັກໜ່ວງກວ່າໝູ່ກໍແມ່ນສະຫະລັດອາເມລິກາ, ຮອງລົງມາກໍມີອິຕາລີ, ແອັສປາຍ, ຝຣັ່ງ, ອັງກິດ ແລະ ປະເທດອື່ນໆຕາມໆກັນລົງມາ. ມາຮອດໄລຍະປັດຈຸບັນ ຍັງບໍ່ຮູ້ວ່າໂຣກລະບາດຈັງໄຮໂຄວິດ-19 ຈະຊິ້ນສະຫລາຍ ຫລື ໝົດໄປຈາກໂລກມະນຸດເຮົາໄປອີກຈັກວັນ, ຈັກເດືອນ ເພາະການແຜ່ລະບາດຂອງເຊື້ອພະຍາດນີ້ຍັງລ້າງຜານຊີວິດອິນຊີຂອງມວນມະນຸດໃນໂລກໄປຕິກໆ ຍັງບໍ່ມີທ່າທີຢຸດຢ່ອນ ແລະ ຫລຸດໜ້ອຍຖອຍລົງ.

ສຳລັບ ສປປ ລາວ ຂອງພວກເຮົາມາຮອດວັນທີ 17 ເມສາ 2020 ແມ່ນຍັງຢູ່ໃນອັນດັບເກົ່າຄືຈຳນວນຄົນທີ່ຕິດເຊື້ອມີ 19 ຄົນ ແລະ ປິ່ນປົວເຊົາອອກໂຮງໝໍໄປແລ້ວ 2 ຄົນ. ສ່ວນທີ່ເຫລືອແມ່ນຍັງປິ່ນປົວຢູ່ໂຮງໝໍ ແລະ ຕາມແຫລ່ງບອກວ່າທຸກຄົນມີອາການດີຂຶ້ນຄາດຈະໄດ້ອອກໂຮງໝໍໃນບໍ່ຊ້ານີ້.

- Wave100S AD to Website 2020 0 - ຮັກຊີວິດຈົ່ງພິຊິດຕົນເອງຢູ່ບ້ານຢູ່ເຮືອນ

ແນວໃດກໍຕາມ, ມາຮອດວັນທີ 15 ເມສາຜ່ານມາ, ທ່ານນາຍົກລັດຖະມົນຕີ ທອງລຸນ ສີສຸລິດ ກໍໄດ້ອອກມາຖະແຫລງຕໍ່ສັງຄົມວ່າ ຍັງສືບຕໍ່ວາລະແຫ່ງຊາດຕ້ານໂຄວິດ-19 ໄປຮອດວັນທີ 3 ພຶດສະພາ 2020 ເມື່ອເຫັນວ່າສະພາບເປັນປົກກະຕິແລ້ວລັດຖະບານຈະແຈ້ງໃຫ້ຊາບຕາມພາຍຫລັງ. ດັ່ງພວກເຮົາຮັບຮູ້ນຳກັນແລ້ວວ່າ ນັບແຕ່ມື້ເລີ່ມຕົ້ນຈົນມາຮອດປັດຈຸບັນ ການເຮັດເສິກຕ້ານສັດຕູໂຕໃຫຍ່ທີ່ໄຮ້ກິ່ນໄຮ້ໂຕໂຄວິດ-19 ພວກເຮົາໄດ້ຮັບໄຊຊະນະຢ່າງໃຫຍ່ຫລວງນັ້ນກໍຄືມີຄົນຕິດເຊື້ອພຽງ 19 ຄົນ, ປິ່ນປົວເຊົາຫາຍດີໄປແລ້ວ 2 ຄົນ. ສ່ວນທີ່ຍັງປິ່ນປົວນັ້ນສ່ວນຫລາຍກໍວ່າມີອາການດີຂຶ້ນ. ແຕ່ຖ້າເຮົາສົມທຽບໃສ່ຫລາຍປະເທດໃນໂລກແມ່ນຕາຍເປັນພັນເປັນໝື່ນ. ໄຊຊະນະທີ່ພວກເຮົາຍາດມາໄດ້ນີ້ມັນກໍເນື່ອງມາຈາກຫລາຍປັດໄຈ ເປັນຕົ້ນອັນທີໜຶ່ງແມ່ນມາຈາກສະພາບແວດລ້ອມພູມສັນຖານຂອງປະເທດເຮົາຂ້ອນຂ້າງອາກາດຮ້ອນ, ທຳມະຊາດ, ສິ່ງແວດລ້ອມຍັງສົດຊື່ນ, ພົນລະເມືອງລາວບໍ່ແໜ້ນໜາຍັດແຍ່, ພື້ນຖານການດຳລົງຊີວິດຍັງຢູ່ກັບທຳມະຊາດເປັນສ່ວນໃຫຍ່. ແຕ່ອັນທີ່ແນ່ແທ້ກໍແມ່ນພວກເຮົາພ້ອມກັນປະຕິບັດຄຳສັ່ງເລກທີ 06/ນຍ ຂອງທ່ານນາຍົກລັດຖະມົນຕີ ທອງລຸນ ສີສຸລິດ, ຄຳສັ່ງເລກທີ 07/ຄລພສ ຂອງຄະນະເລຂາທິການສູນກາງພັກ ຢ່າງເຂັ້ມງວດກວດຂັນ ແລະ ເດັດຂາດ. ນອກຈາກນັ້ນ ກໍມີຄຳສັ່ງແນະນຳຈາກຄະນະສະເພາະກິດ ແລະ ພາຍໃຕ້ການຮ່ວມໄມ້ຮ່ວມມືຂອງທຸກພາກສ່ວນ ນັບແຕ່ຂັ້ນສູນກາງລົງຮອດທ້ອງຖິ່ນ.

ຈາກຜົນສຳເລັດ ແລະ ໄຊຊະນະທີ່ໄດ້ກ່າວມານີ້, ຫລ້າສຸດທ່ານນາຍົກລັດຖະມົນຕີ ທອງລຸນ ສີສຸລິດ ກໍໄດ້ອອກມາຊົມເຊີຍ ແລະ ຂອບໃຈຕໍ່ສັງຄົມວ່າ: “ຂ້າພະເຈົ້າສະແດງຄວາມຊົມເຊີຍມາຍັງນ້ຳໃຈຄົນລາວທີ່ຊ່ວຍເຫລືອໃນຍາມວິກິດ, ຊົມເຊີຍຜູ້ທີ່ເອົາຜ້າປິດປາກໄປແຈກຢາຍ, ຂອບໃຈຜູ້ທີ່ເອົາໄຂ່ໄປແບ່ງປັນ, ຂອບໃຈເຈົ້າຂອງຫ້ອງແຖວທີ່ບໍ່ເກັບຄ່າພັກເຊົາ, ຂອບໃຈນ້ຳໃຈຮັບຜິດຊອບປະຕິບັດໜ້າທີ່ຂອງການນຳທຸກຂັ້ນ, ແພດໝໍ, ເຈົ້າໜ້າທີ່ທະຫານ, ຕຳຫລວດ, ກອງຫລອນບ້ານ, ຊົມເຊີຍປະຊາຊົນທີ່ຢູ່ເຮືອນ”.

ເຖິງຢ່າງໃດກໍດີ, ການຕໍ່ສູ້ກັບສັດຕູທີ່ຮ້າຍກາດໂຄວິດ-19 ພວກເຮົາຍັງຈະໄດ້ສືບຕໍ່ໄປຮອດວັນທີ 3 ພຶດສະພາ 2020 ຖືວ່າຍັງ 2 ອາທິດເຕັມໆ. ເມື່ອຮອດກຳນົດແລ້ວເຫດການບ້ານເມືອງເຂົ້າສູ່ພາວະປົກກະຕິ ທາງພັກ ແລະ ລັດຖະບານເຮົາຈະມີນະໂຍບາຍ ແລະ ຍຸດທະສາດອັນໃໝ່ມາແຈ້ງໃຫ້ທຸກຄົນຊາບໂດຍທົ່ວເຖິງກັນ ຈຶ່ງຂໍໃຫ້ທຸກຄົນອົດທົນ, ອຸ່ນອ່ຽນພ້ອມກັນປະຕິບັດຄຳສັ່ງຂອງທ່ານນາຍົກລັດຖະມົນຕີໃຫ້ເຂັ້ມງວດກວດຂັນ ແລະ ເດັດຂາດ. ອັນສຳຄັນທີ່ສຸດກໍແມ່ນຖ້າພວກເຮົາຮັກຊີວິດກໍຕ້ອງພິຊິດຕົນເອງຢູ່ບ້ານຢູ່ເຮືອນໃນຊ່ວງບ້ານເມືອງພວມວິກິດເກີດໂຣກລະບາດ, ຖ້າຝ່າຝືນຄວາມຫາຍະນະທຸກຢ່າງຈະຕາມມາຫາພວກເຮົາ.

- WhatsApp Image 2020 05 27 at 5 - ຮັກຊີວິດຈົ່ງພິຊິດຕົນເອງຢູ່ບ້ານຢູ່ເຮືອນ
- WhatsApp Image 2020 05 27 at 5 - ຮັກຊີວິດຈົ່ງພິຊິດຕົນເອງຢູ່ບ້ານຢູ່ເຮືອນ
error: Alert: ເນື້ອຫາຂ່າວມີລິຂະສິດ !!