ການປິ່ນປົວອາການຕິດເຊື້ອໄວຣັສໂຄໂຣນາ ຕ້ອງໃຊ້ເວລາດົນປານໃດ

- 190 - ການປິ່ນປົວອາການຕິດເຊື້ອໄວຣັສໂຄໂຣນາ ຕ້ອງໃຊ້ເວລາດົນປານໃດ
- Untitled design - ການປິ່ນປົວອາການຕິດເຊື້ອໄວຣັສໂຄໂຣນາ ຕ້ອງໃຊ້ເວລາດົນປານໃດ

ພວກເຮົາຫາກໍຮູ້ຈັກໄວຣັສໂຄໂຣນາເມື່ອທ້າຍປີຜ່ານມາ ແຕ່ເລີ່ມມີສັນຍານໃຫ້ເຫັນແລ້ວວ່າຜູ້ຕິດເຊື້ອບາງຄົນຕ້ອງໃຊ້ເວລາດົນນານກວ່າຈະປິ່ນປົວຫາຍດີ.

ຈະຫາຍດີໄວປານໃດຂຶ້ນຢູ່ກັບວ່າຕອນທຳອິດທ່ານຕິດເຊື້ອໜັກພຽງໃດ, ບາງຄົນໃຊ້ເວລາບໍ່ດົນ ແຕ່ສຳລັບຄົນອື່ນອາດກາຍເປັນບັນຫາຊຳເຮື້ອ ປັດໄຈສຳຄັນໄດ້ແກ່ ອາຍຸ, ເພດ ແລະ ພະຍາດປະຈຳຕົວອື່ນໆ.

ອາການເລັກໜ້ອຍ: ຄົນສ່ວນຫລາຍທີ່ຕິດເຊື້ອໂຄວິດ-19 ຈະມີອາການຫລັກໆໄດ້ແກ່ ໄອ ແລະ ເປັນໄຂ້ ແຕ່ອາດຈະຮູ້ສຶກປວດເມື່ອຍຮ່າງກາຍ, ເມື່ອຍ, ເຈັບຄໍ ແລະ ເຈັບຫົວ. ອາການເຫລົ່ານີ້ອາໄສການນອນພັກຜ່ອນ, ດື່ມນ້ຳຫລາຍໆ ແລະ ກິນຢາແກ້ປວດ. ຄົນທີ່ມີອາການພຽງເລັກໜ້ອຍອາດຈະກັບມາຫາຍດີໄດ້ຢ່າງວ່ອງໄວ, ໄຂ້ຄວນຈະເຊົາພາຍໃນໜຶ່ງອາທິດ ແຕ່ອາດຈະຍັງໄອຕໍ່. ອົງການອະນາໄມໂລກວິເຄາະຂໍ້ມູນຜູ້ຕິດເຊື້ອຈາກຈີນ ແລະ ໄດ້ສະຫລຸບຜົນວ່າ: ໂດຍສະເລ່ຍແລ້ວຕ້ອງໃຊ້ເວລາປະມານ 2 ອາທິດ ຈົນຄົນຕິດເຊື້ອຈະກັບມາຫາຍດີ.

ອາການໜັກ: ແຕ່ບາງຄົນອາການໜັກກວ່ານັ້ນ ໂດຍມັກຈະເກີດຂຶ້ນປະມານ 7-10 ວັນຫລັງຈາກຕິດເຊື້ອ ການປ່ຽນແປງໃນໄລຍະນີ້ອາດຈະກະທັນຫັນໄດ້ ເລີ່ມຫາຍໃຈລຳບາກ, ປອດມີອາການອັກເສບ ເກີດຈາກລະບົບພູມຄຸ້ມກັນຮ່າງກາຍພະຍາຍາມຈະສູ້ກັບໄວຣັສ ຈົນກາຍເປັນຕໍ່ສູ້ຫລາຍເກີນໄປສົ່ງຜົນໃຫ້ຮ່າງກາຍໄດ້ຮັບຄວາມເສຍຫາຍ. ຜູ້ຕິດເຊື້ອບາງຄົນຕ້ອງເຂົ້າໂຮງໝໍເພື່ອຮັບການຊ່ວຍເຫລືອເລື່ອງອົກຊີ.

ທ່ານ ໝໍ ຊາຣາ ຈາວິສ ບອກວ່າ: “ອາການຫາຍໃຈບໍ່ອີ່ມຕ້ອງໃຊ້ເວລາປິ່ນປົວພໍສົມຄວນ ເພາະຮ່າງກາຍພະຍາຍາມຟື້ນຟູສະພາບຈາກຮອຍບາດແຜນ ແລະ ອາການອັກເສບ”. ທ່ານບອກວ່າ: ອາດຕ້ອງໃຊ້ເວລາເຖິງ 8 ອາທິດກວ່າຈະກັບມາຫາຍດີ ແລະ ຜູ້ຕິດເຊື້ອຈະຍັງຮູ້ສຶກເມື່ອຍຢູ່.

ກໍລະນີຕ້ອງເຂົ້າຫ້ອງໄອຊີຢູ: ອົງການອະນາໄມໂລກປະເມີນວ່າ: 1 ໃນ 20 ຂອງຜູ້ຕິດເຊື້ອຕ້ອງເຂົ້າປິ່ນປົວໃນພະແນກຜູ້ປ່ວຍໜັກ ອາດຕ້ອງໃຊ້ຢາສະຫລົບ ແລະ ເຄື່ອງຊ່ວຍຫລາຍໃຈ. ຜູ້ຕິດເຊື້ອຫ້ອງຜູ້ປ່ວຍໜັກ ບໍ່ວ່າຈະປ່ວຍຈາກຫຍັງກໍຕາມ ຕ້ອງໃຊ້ເວລາດົນກວ່າຈະຫາຍດີໄດ້ ຕ້ອງຍ້າຍໄປພັກໃນຫ້ອງຜູ້ປ່ວຍທຳມະດາກ່ອນຈະກັບເຮືອນໄດ້.

ຜູ້ຊ່ຽວຊານບອກວ່າຕ້ອງໃຊ້ເວລາປະມານ 12-18 ເດືອນກວ່າຜູ້ຕິດເຊື້ອຈະກັບໄປໃຊ້ຊີວິດຢ່າງປົກກະຕິໄດ້. ການຕ້ອງນອນເທິງຕຽງໂຮງໝໍດົນໆ ເຮັດໃຫ້ຜູ້ຕິດເຊື້ອສູນເສຍກ້າມຊີ້ນ, ຄົນໄຂ້ຈະອ່ອນແອ ຕ້ອງໃຊ້ເວລາສ້າງກ້າມຊີ້ນ ບາງຄົນເຖິງຂັ້ນຕ້ອງເຮັດກາຍະພາບບຳບັດ ເພື່ອໃຫ້ກັບມາຍ່າງໄດ້ອີກ. ນອກຈາກນີ້ ສິ່ງທີ່ຮ່າງກາຍຕ້ອງຜະເຊີນໃນຫ້ອງຜູ້ປ່ວຍໜັກ ອາດຈະເຮັດໃຫ້ເກີດອາການເພີ້ ແລະ ອາການທາງຈິດໄດ້.

- Wave100S AD to Website 2020 0 - ການປິ່ນປົວອາການຕິດເຊື້ອໄວຣັສໂຄໂຣນາ ຕ້ອງໃຊ້ເວລາດົນປານໃດ

ສົ່ງຜົນຕໍ່ສຸຂະພາບໃນໄລຍະຍາວ ຫລື ບໍ່: ຕອນນີ້ພວກເຮົາຍັງບໍ່ມີຂໍ້ມູນກ່ຽວກັບໂຄວິດ-19 ໃນໄລຍະຍາວ, ແຕ່ພວກເຮົາສາມາດວິເຄາະຈາກອາການອື່ນໆໄດ້: ອາການຫາຍໃຈລຳບາກກະທັນຫັນເກີດກັບຄົນໄຂ້ທີ່ລະບົບພູມຄຸ້ມກັນເຮັດວຽກເກີນໄປຈົນສ້າງຄວາມເສຍຫາຍຕໍ່ປອດ ເຊິ່ງຜູ້ຊ່ຽວຊານບອກວ່າມີຂໍ້ມູນວ່າ: ເຖິງວ່າເວລາຈະຜ່ານໄປ 5 ປີ ຄົນໄຂ້ຈະຍັງໄດ້ຮັບຜົນກະທົບທັງທາງຮ່າງກາຍ ແລະ ຈິດໃຈ.

ດຣ. ເຈມ ກິລ ຈາກຄະນະແພດສາດ ມະຫາວິທະຍາໄລວໍຣິກ ບອກວ່າ: ຄົນໄຂ້ຕ້ອງໄດ້ຮັບການຊ່ວຍເຫລືອທາງສຸຂະພາບຈິດນຳອີກ. ນອກຈາກນີ້ ມີຄວາມເປັນໄປໄດ້ວ່າຜູ້ປ່ວຍທີ່ມີອາການພຽງເລັກໜ້ອຍອາດຈະມີບັນຫາສຸຂະພາບໃນໄລຍະຍາວເຊັ່ນຮູ້ສຶກເມື່ອຍ.

ມີຄົນປິ່ນປົວຫາຍແລ້ວຈັກຄົນ: ເປັນເລື່ອງຍາກທີ່ຈະຮູ້ຕົວເລກທີ່ແນ່ນອນຖືກຕ້ອງ. ຮອດວັນທີ 15 ເມສາ ຂໍ້ມູນຈາກມະຫາວິທະຍາໄລຈອນ ຮອບກິນ ລະບຸວ່າ: ມີຄົນ 5 ແສນຄົນທີ່ປິ່ນປົວຫາຍດີຈາກຜູ້ຕິດເຊື້ອທັງໝົດ 2 ລ້ານຄົນ, ແຕ່ລະປະເທດບັນທຶກຂໍ້ມູນຜູ້ຕິດເຊື້ອບໍ່ຄືກັນ ແລະ ບາງເທື່ອບໍ່ໄດ້ບັນທຶກຈຳນວນຜູ້ປ່ວຍທີ່ມີອາການເລັກໜ້ອຍ.

ສາມາດຕິດເຊື້ອໂຄວິດ-19 ອີກໄດ້ບໍ່: ມີການຄາດເດົາກັນໄປຕ່າງໆນາໆ ແຕ່ຫລັກຖານຍັງມີໜ້ອຍລະບຸວ່າ: ລະບົບພູມຄຸ້ມກັນຂອງຄົນທີ່ເຄີຍຕິດໄວຣັສແລ້ວຈະຢູ່ໄດ້ດົນເທົ່າໃດ ຖ້າຄົນໄຂ້ຫາຍຈາກໄວຣັສ ພວກເຂົາກໍອາດຈະສ້າງລະບົບພູມຄຸ້ມກັນຂຶ້ນມາໄດ້. ລາຍງານທີ່ບອກວ່າຄົນຕິດເຊື້ອເປັນຮອບທີສອງອາດເປັນເພາະການກວດເຊື້ອທີ່ຜິດພາດກໍເປັນໄດ້. ການສ້າງຄວາມເຂົ້າໃຈລະບົບພູມຄຸ້ມກັນເປັນເລື່ອງສຳຄັນຫລາຍ ຈະຊ່ວຍໃຫ້ພວກເຮົາເຂົ້າໃຈວ່າຄົນສາມາດຕິດເຊື້ອອີກໄດ້ ຫລື ບໍ່ ແລະ ວັກແຊງຈະມີປະສິດທິພາບພຽງໃດ.

- WhatsApp Image 2020 05 27 at 5 - ການປິ່ນປົວອາການຕິດເຊື້ອໄວຣັສໂຄໂຣນາ ຕ້ອງໃຊ້ເວລາດົນປານໃດ
- WhatsApp Image 2020 05 27 at 5 - ການປິ່ນປົວອາການຕິດເຊື້ອໄວຣັສໂຄໂຣນາ ຕ້ອງໃຊ້ເວລາດົນປານໃດ
error: Alert: ເນື້ອຫາຂ່າວມີລິຂະສິດ !!