4 ຢ່າ 2 ຢູ່ ຕ້ອງຄວບຄູ່ກັບສົງຄາມຕ້ານໂຄວິດ-19

4 ຢ່າ 2 ຢູ່ ຕ້ອງຄວບຄູ່ກັບສົງຄາມຕ້ານໂຄວິດ-19 - 33 7 - 4 ຢ່າ 2 ຢູ່ ຕ້ອງຄວບຄູ່ກັບສົງຄາມຕ້ານໂຄວິດ-19
4 ຢ່າ 2 ຢູ່ ຕ້ອງຄວບຄູ່ກັບສົງຄາມຕ້ານໂຄວິດ-19 - Untitled design - 4 ຢ່າ 2 ຢູ່ ຕ້ອງຄວບຄູ່ກັບສົງຄາມຕ້ານໂຄວິດ-19

ໂດຍ: ທິດກໍ່າ

ສຳລັບໃນຄໍລຳມື້ນີ້ ທິດກໍ່າ ຂໍເອົາຄຳຂວັນທີ່ເດັດໆເປັນຄະຕິ ແລະ ທັງເປັນການເຕືອນສະຕິໃຫ້ຄົນລາວທຸກຄົນຂອງທ່ານນາຍົກລັດຖະມົນຕີ ທອງລຸນ ສີສຸລິດ ມາເຈຍລະໄນສູ່ກັນຟັງ ເພາະປະໂຫຍກດັ່ງກ່າວພວມກິນໃຈຄົນທັງຫລາຍ ໂດຍສະເພາະແມ່ນຄົນລາວເຮົາ ເຊິ່ງພວມສອດຄ່ອງກັບຂະບວນການຕໍ່ສູ້ກັບສົງຄາມຕ້ານສັດຕູຕົວໃຫຍ່, ຕົວໃໝ່ທີ່ກຳລັງມາແຮງ ແລະ ພວມລ້າງຜານຊີວິດອິນຊີຂອງມວນມະນຸດໃນໂລກ ກໍຄືຢູ່ລາວເຮົາທັງມວນ. ຄະຕິເຕືອນສະຕິທີ່ວ່ານີ້ກໍຄື: “4 ຢ່າ 2 ຢູ່”.

ເວົ້າໄດ້ວ່າ ໃນພາລະກິດເຮັດສົງຄາມຕ້ານໂຄວິດ-19 ຢູ່ ສປປ ລາວ ພວກເຮົາໄດ້ຜ່ານພົ້ນມາໄລຍະທີໜຶ່ງແລ້ວ, ສ່ວນໄລຍະທີສອງກໍພວມກ້າວເຂົ້າແຫ່ງວາລະຕ້ານພະຍາດຈັງໄຮຢ່າງສຸດຂັ້ນສຸດຂີດ ເປັນຕົ້ນໄລຍະທີໜຶ່ງແມ່ນນັບແຕ່ວັນທີ 1 ຫາວັນທີ 19 ເມສາ 2020 ຖືວ່າໄດ້ຜ່ານພົ້ນໄປດ້ວຍຜົນສຳເລັດຢ່າງໃຫຍ່ຫລວງ. ຜົນສຳເລັດທີ່ວ່ານີ້ມີພຽງ 19 ຄົນຕິດເຊື້ອ, ສອງຄົນປິ່ນປົວດີອອກຈາກໂຮງໝໍໄປແລ້ວ. ສ່ວນອີກ 17 ຄົນ ທາງແພດໝໍກໍວ່າອີກບໍ່ດົນຈະໄດ້ອອກ ເພາະທຸກຄົນພຽງຢູ່ໃນຂັ້ນຕິດຕາມ ແລະ ໃຫ້ຢາຕາມອາການ. ສະແດງວ່າພົ້ນຈາກຂັ້ນອັນຕະລາຍໄປແລ້ວ.

ແນວໃດກໍຕາມ, ອີງໃສ່ສະພາບການແຜ່ລະບາດຂອງພະຍາດທີ່ອັນຕະລາຍໂຄວິດ-19 ຍັງກວມລວມໄປທົ່ວໂລກ ໂດຍສະເພາະໃນປະເທດອ້ອມຂ້າງ ເຊິ່ງຍັງມີຜູ້ຕິດເຊື້ອຢ່າງຫລວງຫລາຍ ມາຮອດປັດຈຸບັນຍັງຕ້ອງຫາວິທີຕ້ານ ແລະ ເຝົ້າລະວັງຢ່າງສຸດຂັ້ນສຸດຂີດນັ້ນ ພັກ ແລະ ລັດຖະບານເຮົາຈຶ່ງກຳນົດສືບຕໍ່ວາລະແຫ່ງຊາດຕ້ານໂຄວິດ-19 ຈາກວັນທີ 20 ເມສາ ໄປຮອດວັນທີ 3 ພຶດສະພາ 2020.

ເພື່ອສືບຕໍ່ບັ້ນຮົບຕ້ານໂຄວິດ-19 ໃຫ້ໄດ້ຮັບຜົນຢ່າງໃຫຍ່ຫລວງ ເຊິ່ງບໍ່ເຄີຍມີມາໃນປະຫວັດສາດຂອງຊາດ, ພັກ ແລະ ລັດຖະບານ ກໍຄືການນຳທຸກຂັ້ນ ແລະ ປະຊາຊົນບັນດາເຜົ່າໃນທົ່ວປະເທດຍິ່ງຕ້ອງພ້ອມກັນເອົາໃຈໃສ່ຍິ່ງກວ່າເວລາໃດໝົດ ເພື່ອຍາດເອົາໄຊຊະນະໃນບັ້ນສຸດທ້າຍກາຍເປັນພະລັງແຮງມະຫາສານ ອັນເປັນໄຊຊະນະໃຫຍ່ຫລວງລວມຍອດໃນທົ່ວປະເທດບໍ່ໃຫ້ເປັນຄືໄຟລາມເຟືອງ, ສ້ວຍຫາງຂີ້ໂກະ ຫລືວ່າ ເປັນຄືເຮືອລົ້ມບາດຈອດ. ເພາະສະນັ້ນ ທ່ານນາຍົກລັດຖະມົນຕີ ທອງລຸນ ສີສຸລິດ ຈຶ່ງໄດ້ມີຄຳຂວັນທີ່ເດັດອອກມາໃຫ້ພວກເຮົາພ້ອມພາກັນປະຕິບັດໃນຍາມປະເທດຊາດບ້ານເມືອງພວມເກີດວິກິດດັ່ງ 4 ຢ່າກັບ 2 ຢູ່ ທີ່ກ່າວມາຂ້າງເທິງ. ສຳລັບເນື້ອໃນລະອຽດຂອງ 4 ຢ່າກັບ 2 ຢູ່ນັ້ນກໍໄດ້ແກ່ “ຢ່າສວຍໂອກາດຍາມເມື່ອຊາດພົບວິກິດ, ຢ່າເສຍຈິດຍ້ອນຂ່າວອະກຸສົນ, ຢ່າສ້າງກະແສທີ່ບໍ່ມີຕົວຕົນ ແລະ ຢ່າເຮັດໃຫ້ຄົນແຕກສາມັກຄີ”. ສ່ວນ 2 ຢູ່ນັ້ນໄດ້ແກ່ “ຢູ່ເຮືອນເຮັດວຽກພັດທະນາ, ໝັ່ນຮັກສາອະນາໄມໃຫ້ໄດ້ດີ, ຢູ່ຫ່າງກັນດ້ວຍຄວາມມີສະຕິ” 4 ຢ່າ 2 ຢູ່ນີ້ຕ້ອງໃສ່ໃຈ ເພື່ອໃຫ້ບັ້ນຮົບໃນວາລະແຫ່ງຊາດຄັ້ງທີສອງເປັນໄປຕາມຄວາມຫວັງ ແລະ ໄຊຊະນະຄັ້ງປະຫວັດສາດທີ່ຍິ່ງໃຫຍ່ໃນການຕ້ານສົງຄາມກັບເຊື້ອພະຍາດໂຄວິດ-19 ຂອງປະຊາຊົນລາວໃນຍຸກໂກລາພິວັດພວກເຮົາຍິ່ງຕ້ອງເພີ່ມທະວີ, ເດັດດ່ຽວບຸກທະລຸຕາມຄຳຂວັນທີ່ທ່ານນາຍົກລັດຖະມົນຕີໄດ້ວາງອອກໃຫ້ໄດ້ຮັບຜົນສົມດັ່ງຄຳມຸ້ງມາດປາດຖະໜາຂອງຊາດລາວເຮົາ.

4 ຢ່າ 2 ຢູ່ ຕ້ອງຄວບຄູ່ກັບສົງຄາມຕ້ານໂຄວິດ-19 - Wave100S AD to Website 2020 0 - 4 ຢ່າ 2 ຢູ່ ຕ້ອງຄວບຄູ່ກັບສົງຄາມຕ້ານໂຄວິດ-19

ບັ້ນຮົບຕ້ານໂຄວິດ-19 ໄລຍະທີໜຶ່ງ ພວກເຮົາປອດຄົນຕິດເຊື້ອມາໄດ້ 7 ວັນແລ້ວ. ອີກຕໍ່ໄປຮອດວັນທີ 3 ພຶດສະພາ 2020 ກໍຄືໄລຍະຕໍ່ໆໄປ ຖ້າປະເທດລາວຂອງພວກເຮົາປອດຜູ້ຕິດເຊື້ອກໍຖືວ່າໄດ້ຮັບໄຊຊະນະຢ່າງໃຫຍ່ຫລວງໃນສົງຄາມຕ້ານສັດຕູທີ່ໄຮ້ຕົນໄຮ້ຕົວ ແລະ ໄຮ້ສຽງໃນຍຸກນີ້. ພາຍໃຕ້ການນຳພາຂອງພັກ ແລະ ລັດຖະບານໃນຍຸກປະຫວັດສາດໜ້າໃໝ່ ຊາດລາວຄົນລາວພວກເຮົາເຄີຍຜ່ານພົ້ນຈາກສົງຄາມຮຸກຮານລະຫວ່າງມະນຸດກັບມະນຸດ, ຜ່ານວິກິດການຈາກໄພພິບັດຈາກທຳມະຊາດ ແລະ ຜ່ານບັນດາວິກິດຕ່າງໆມາຢ່າງໂຊກໂຊນແລ້ວເກືອບນັບບໍ່ຖ້ວນ.

ຕະຫລອດໄລຍະ 40 ກວ່າປີແຫ່ງການສ້າງສາ ແລະ ພັດທະນາປະເທດຊາດ ສາທາລະນະລັດ ປະຊາທິປະໄຕ ປະຊາຊົນລາວ ຂອງພວກເຮົາ ໄດ້ມີຄວາມຈະເລີນຮຸ່ງເຮືອງ ແລະ ກ້າວເດີນໄປໃນທຸກດ້ານ. ປັດຈຸບັນ ປະເທດຊາດຂອງພວກເຮົາພວມເດນຕາມເສັ້ນທາງສັງຄົມນິຍົມ ເປັນຍຸກແຫ່ງການປ່ຽນແປງປະຫວັດແຫ່ງຍຸກສະໄໝ ເຊິ່ງໜຶ່ງໃນໄຊຊະນະທີ່ພວມຈະໄດ້ຮັບຄັ້ງປະຫວັດສາດອີກອັນໜຶ່ງ ກໍຄືສົງຄາມຕ້ານການແຜ່ລະບາດຂອງສັດຕູຕົວໃໝ່ ຄືເຊື້ອພະຍາດໂຄວິດ-19 ທີ່ເປັນຕົວອັນຕະລາຍຮ້າຍກາດສຳລັບມວນມະນຸດໃນທົ່ວໂລກ.

ເຖິງຢ່າງໃດກໍດີ, ເທົ່າທີ່ຜ່ານມາສິ່ງທີ່ໜ້າຊົມເຊີຍຍົກຍ້ອງຄົນລາວເຮົານັ້ນ ເມື່ອປະເທດຊາດເກີດວິກິດ ພວກເຮົາມີຄວາມສາມັກຄີ, ປຸ້ມລຸມຮັກແພງກັນ, ຊ່ວຍເຫລືອກັນ ແລະ ຟັງຄວາມຜູ້ນຳເພິ່ນເປັນການສັ່ງສອນແນະນຳ. ການກັກຕຸນສິນຄ້າ ຫລື ສວຍໂອກາດຍາມຊາດບ້ານເມືອງວິກິດນັ້ນເກືອບບວ່າບໍ່ມີເລີຍ. ດັ່ງທີ່ເຮົາເຫັນໃນໄລຍະປັດຈຸບັນ, ປະເທດຊາດພວມເຮັດສົງຄາມຕ້ານໂຄວິດ-19 ມີຫລາຍບໍລິສັດຫ້າງຮ້ານໄດ້ອຸປະຖຳຄ້ຳຊູຊ່ວຍເຫລືອເປັນເງິນ ແລະ ວັດຖຸຜູ້ມີຫລາຍແບ່ງປັນຫລາຍ, ຜູ້ມີໜ້ອຍກໍຕາມສັດທາ ນີ້ຄືສິ່ງຍອດຍິ່ງຂອງຄົນລາວ, ວັດທະນະທຳລາວ. ທ່ານນາຍົກລັດຖະມົນຕີ ທອງລຸນ ສີສຸລິດ ໄດ້ເວົ້າວ່າ: “ໃຜຫາກມີຈິດໃຈກຸສົນຊ່ວຍຄົນຍາມລຳບາກ ຍົກໃຫ້ເປັນຄົນຫາໄດ້ຍາກ ທຸກພາກສ່ວນຄວນເຊີດຊູ ບຸກຄົນໃດສວຍໂອກາດຍາມເມື່ອຊາດວິກິດອົດສູ ຄົນນັ້ນຄືສັດຕູ ພວກທ່ານຊອກຮູ້ແລ້ວຈົ່ງປາບປາມ”.

4 ຢ່າ 2 ຢູ່ ຕ້ອງຄວບຄູ່ກັບສົງຄາມຕ້ານໂຄວິດ-19 - WhatsApp Image 2020 05 27 at 5 - 4 ຢ່າ 2 ຢູ່ ຕ້ອງຄວບຄູ່ກັບສົງຄາມຕ້ານໂຄວິດ-19
4 ຢ່າ 2 ຢູ່ ຕ້ອງຄວບຄູ່ກັບສົງຄາມຕ້ານໂຄວິດ-19 - WhatsApp Image 2020 05 27 at 5 - 4 ຢ່າ 2 ຢູ່ ຕ້ອງຄວບຄູ່ກັບສົງຄາມຕ້ານໂຄວິດ-19
error: Alert: ເນື້ອຫາຂ່າວມີລິຂະສິດ !!