ຖອດບົດຮຽນ ‘5 ຈຸດອ່ອນ’ ຕົ້ນເຫດ ສິງກະໂປຄຸມໂຄວິດບໍ່ຢູ່

ຖອດບົດຮຽນ ‘5 ຈຸດອ່ອນ’ ຕົ້ນເຫດ ສິງກະໂປຄຸມໂຄວິດບໍ່ຢູ່ - 213 - ຖອດບົດຮຽນ ‘5 ຈຸດອ່ອນ’ ຕົ້ນເຫດ ສິງກະໂປຄຸມໂຄວິດບໍ່ຢູ່
ຖອດບົດຮຽນ ‘5 ຈຸດອ່ອນ’ ຕົ້ນເຫດ ສິງກະໂປຄຸມໂຄວິດບໍ່ຢູ່ - Untitled design - ຖອດບົດຮຽນ ‘5 ຈຸດອ່ອນ’ ຕົ້ນເຫດ ສິງກະໂປຄຸມໂຄວິດບໍ່ຢູ່

ສິງກະໂປ ໜຶ່ງໃນປະເທດທີ່ປະສົບຜົນສຳເລັດໄລຍະທຳອິດຂອງສົງຄາມສະກັດໂຄວິດ-19 ຫລັງຢຸດການລະບາດໄດ້ກວ່າ 3 ເດືອນ, ແຕ່ໃນ 2 ອາທິດຜ່ານມາ ຈຳນວນຜູ້ຕິດເຊື້ອເພີ່ມຂຶ້ນຢ່າງກ້າວກະໂດດເປັນກວ່າ 8.000 ຄົນ (ນັບຮອດວັນທີ 20 ເມສາ) ໂດຍມີຈຸດອ່ອນສຳຄັນ 5 ຈຸດ ເປັນບົດຮຽນສຳລັບປະເທດອື່ນໆ.

ຂະນະທີ່ ສິງກະໂປກາຍເປັນປະເທດທີ່ມີຈຳນວນຜູ້ຕິດເຊື້ອໂຄວິດ-19 ຫລາຍທີ່ສຸດໃນອາຊີຕາເວັນອອກສຽງໃຕ້ ຫລ້າສຸດກະຊວງສາທາລະນະສຸກສິງກະໂປ ຖະແຫລງສະຖານະການໂຄວິດ-19 ໃນຮອບ 24 ຊົ່ວໂມງໃນວັນທີ 20 ເມສາວ່າ: ພົບຜູ້ຕິດເຊື້ອທົ່ວປະເທດຢ່າງໜ້ອຍ 8.014 ຄົນ ຫລັງຢືນຢັນຜູ້ຕິດເຊື້ອໃໝ່ອີກ 1.426 ຄົນ ຖືເປັນສະຖິຕິແຕ່ລະວັນສູງສຸດຄັ້ງໃໝ່.

ທາງການສິງກະໂປ ລະບຸວ່າ: ຜູ້ຕິດເຊື້ອ “ເກືອບທັງໝົດ” ເປັນແຮງງານຕ່າງປະເທດທີ່ອາໄສຢູ່ຢ່າງແອອັດຕາມຫໍພັກ ທີ່ລັດຖະບານສິງກະໂປຂະຫຍາຍຂອບເຂດໃຫ້ເປັນພື້ນທີ່ຄວບຄຸມດ້ານສາທາລະນະສຸກເພີ່ມເປັນຢ່າງໜ້ອຍ 19 ແຫ່ງ ໂດຍຫໍພັກ “S11” ໃນເມືອງປັງໂກລ ທາງຕາເວັນອອກສຽງເໜືອຂອງປະເທດ ຄືສະຖນທີ່ທີ່ມີການແຜ່ລະບາດເປັນກຸ່ມຂະໜາດໃຫຍ່ທີ່ສຸດ ໂດຍພົບຜູ້ຕິດເຊື້ອແລ້ວຢ່າງໜ້ອຍ 1.508 ຄົນ.

ຂະນະທີ່ຜູ້ເສຍຊີວິດຈາກໂຄວິດ-19 ຢູ່ສິງກະໂປ ຍັງມີຢ່າງໜ້ອຍ 11 ຄົນ ມີຄົນຕ່າງປະເທດລວມຢູ່ນຳ. ຂະນະທີ່ຜູ້ໄດ້ຮັບການປິ່ນປົວຫາຍດີແລ້ວມີຢ່າງໜ້ອຍ 768 ຄົນ.

ປັດຈຸບັນ ສິງກະໂປຢູ່ພາຍໃຕ້ມາດຕະການຈຳກັດການເຄື່ອນໄຫວທາງສັງຄົມ “ເຊີກິດ ເບຣກເກີ” ເປັນເວລາ 1 ເດືອນ ນັບແຕ່ວັນທີ 7 ເມສາຜ່ານມາ ຈົນເຖິງວັນທີ 4 ພຶດສະພານີ້ ແລະ ຈາກສະຖານະການທີ່ບໍ່ຄ່ອຍດີຢູ່ສິງກະໂປ, ສຳນັກຂ່າວຕ່າງປະເທດ ລວມທັງ BBC  ແລະ ສເຕຣດທາມ ຈຶ່ງໄດ້ວິເຄາະ “5 ຈຸດອ່ອນສຳຄັນ” ທີ່ເຮັດໃຫ້ສິງກະໂປລົ້ມເຫລວໃນການຄວບຄຸມການລະບາດຂອງໂຄວິດ-19 ໄລຍະຫລັງ ເຖິງວ່າຢູ່ໃນໄລຍະລັອກດາວທົ່ວປະເທດ ແລະ ອາດຈະເປັນບົດຮຽນໃຫ້ປະເທດອື່ນໆ.

  1. ຫໍພັກແຮງງານຄົນຕ່າງປະເທດ

ສິງກະໂປມີພະນັກງານຄົນຕ່າງປະເທດ 1,4 ລ້ານຄົນ ທັງວິຊາຊີບຊັ້ນສູງ ແລະ ຜູ້ໃຊ້ແຮງງານ ໂດຍເປັນຄົນເຮັດວຽກກໍ່ສ້າງ 2,84 ແສນຄົນ ແລະ ເປັນແມ່ເຮືອນ 2,55 ແສນຄົນ. ແຮງງານຄົນຕ່າງປະເທດພັກຢູ່ຫໍພັກ ເຊິ່ງຢູ່ແບບແອອັດ ຜູ້ຕິດເຊື້ອກວ່າເຄິ່ງໜຶ່ງຂອງປະເທດເປັນກຸ່ມທີ່ພັກຢູ່ໃນຫໍພັກເຫລົ່ານີ້ ໂດຍຫໍພັກທີ່ພົບຜູ້ຕິດເຊື້ອຫລາຍທີ່ສຸດຄື S11 ມີຜູ້ຕິດເຊື້ອ 1.508 ຄົນ.

ກະຊວງຊັບພະຍາກອນມະນຸດ ແລະ ສຳນັກງານຄວບຄຸມອາຄານ ແລະ ກໍ່ສ້າງສິງກະໂປ ຖະແຫລງຮ່ວມກັນວັນທີ 20 ເມສາວ່າ: ໃຫ້ແຮງງານຕ່າງປະເທດທີ່ຖືໃບອະນຸຍາດເຮັດວຽກໃນຂະແໜງກໍ່ສ້າງ ແລະ ຜູ້ຖືໃບອະນຸຍາດ “S Pass” ສຳລັບແຮງງານທັກສະຝີມືປານກາງໃນຂະແໜງດຽວກັນ ກັກຕົວເປັນເວລາ 14 ວັນ ເພື່ອການເຝົ້າລະວັງດ້ານສາທາລະນະສຸກ.

  1. ຄົນບໍ່ສົນໃຈ Social Distancing

ກ່ອນໜ້ານີ້ ມີຊາວສິງກະໂປກັບມາຈາກຕ່າງປະເທດໃນໄລຍະຫລັງເປັນຈຳນວນຫລາຍ ລັດຖະບານຂໍການຮ່ວມມືໃຫ້ກຸ່ມນີ້ກັກຕົນເອງຢູ່ເຮືອນ ເປັນເວລາ 14 ວັນ (ປະເມີນວ່າອາດຈະມີຜູ້ຕິດເຊື້ອຫລຸດເຂົ້າມາຢ່າງໜ້ອຍ 500 ຄົນທີ່ກວດບໍ່ພົບຕອນທີ່ເຂົ້າປະເທດ).

ເຖິງຢ່າງໃດກໍຕາມ ລະຫວ່າງກັກຕົນເອງຢູ່ເຮືອນ ຄົນຈຳນວນໜຶ່ງບໍ່ໄດ້ເຂັ້ມງວດພຽງພໍ ມີການສຳຜັດໃກ້ຊິດກັບຄົນພາຍໃນເຮືອນ ເຮັດໃຫ້ແຜ່ຕໍ່ພາຍໃນເຮືອນ ຫລື ໃນຄອບຄົວ ແລ້ວກະຈາຍໄປໃຫ້ຄົນອື່ນຕໍ່ໄປອີກໃນເວລາຕໍ່ມາ. ຈາກນັ້ນ ລັດຖະບານຈຶ່ງຕ້ອງປັບນະໂຍບາຍໃຫ້ກັກຕົວໃນສະຖານທີ່ທີ່ລັດກຳນົດ ຫລື ຈັດໄວ້ໃຫ້.

ຂະນະດຽວກັນ ການບໍ່ປະຕິບັດຕາມມາດຕະການເວັ້ນໄລຍະຫ່າງທາງສັງຄົມ (social distancing) ແລະ ຢູ່ລວມກຸ່ມກັນ ຫລື ມີກິດຈະກຳຢ່າງໃກ້ຊິດ ອາດເຮັດໃຫ້ເກີດເຫດການ “Super spreader” ທີ່ນຳໄປສູ່ການຕິດເຊື້ອຈຳນວນຫລາຍເຊັ່ນ: ງານລ້ຽງອາຫານຄໍ່າໃນເມືອງຈູຣົງ ເຊິ່ງເຮັດໃຫ້ມີຜູ້ຕິດເຊື້ອຫລາຍກວ່າ 40 ຄົນໃນງານດຽວ.

ຖອດບົດຮຽນ ‘5 ຈຸດອ່ອນ’ ຕົ້ນເຫດ ສິງກະໂປຄຸມໂຄວິດບໍ່ຢູ່ - Wave100S AD to Website 2020 0 - ຖອດບົດຮຽນ ‘5 ຈຸດອ່ອນ’ ຕົ້ນເຫດ ສິງກະໂປຄຸມໂຄວິດບໍ່ຢູ່

ລັດຖະບານຕ້ອງແນະນຳໃຫ້ມີກິດຈະກຳທາງສັງຄົມສະເພາະກັບສະມາຊິກໃນຄອບຄົວທີ່ອາໄສຢູ່ໃນເຮືອນດຽວກັນເທົ່ານັ້ນ ລວມທັງຫລີກເວັ້ນກິດຈະກຳທາງສັງຄົມທັງໃນ ແລະ ນອກເຮືອນເຊັ່ນ: ຮັບປະທານອາຫານກັບຄົນທີ່ບໍ່ໄດ້ຢູ່ເຮືອນດຽວກັນ ຫລື ພົບປະໝູ່ເພື່ອນໃນບ່ອນສາທາລະນະ ແລະ ຄວນຢູ່ເຮືອນໃຫ້ຫລາຍທີ່ສຸດເພື່ອຫລຸດຄວາມສ່ຽງຂອງການຕິດເຊື້ອ.

ນອກຈາກນີ້ ຊາວສິງກະໂປບາງສ່ວນຍັງອອກຈາກເຮືອນໂດຍບໍ່ຈຳເປັນ ຫລື ບໍ່ໃສ່ຜ້າອັດປາກເມື່ອອອກໄປທາງນອກ ມີຄວາມສ່ຽງຫລາຍ ໂດຍສະເພາະຜູ້ຕິດເຊື້ອທີ່ບໍ່ມີອາການ ຫລື ມີອາການແຕ່ບໍ່ຮຸນແຮງ ເພາະສາມາດແຜ່ເຊື້ອໄປໃຫ້ຜູ້ອື່ນ.

ດ້ວຍເຫດນີ້ ລັດຖະບານສິງກະໂປຈຶ່ງຕ້ອງໃຊ້ເຈົ້າໜ້າທີ່ 3.000 ກວ່າຄົນມາເຝົ້າຕິດຕາມ ແລະ ກວດກາປະຊາຊົນໃຫ້ປະຕິບັດຕາມມາດຕະການ ມີການອອກຄຳເຕືອນຫລາຍກວ່າ 6.200 ຄັ້ງ ແລະ ປັບໄໝຫລາຍກວ່າ 1.000 ຄັ້ງ ນັບແຕ່ເລີ່ມປະກາດໃຊ້ມາດຕະການ.

  1. ເຮືອນພັກຜູ້ອາຍຸສູງ

ຜູ້ອາຍຸສູງມີຄວາມສ່ຽງສູງທີ່ຈະປ່ວຍໜັກ ໂດຍຜູ້ເສຍຊີວິດທັງ 10 ຄົນຢູ່ສິງກະໂປມີອາຍຸຫລາຍກວ່າ 60 ປີ. ເຮືອນພັກຜູ້ອາຍຸສູງ “ລີ ອາ ມຸຍ” (Lee Ah Mooi) ພົບຜູ້ຕິດເຊື້ອ 16 ຄົນ ແລະ ມີຜູ້ເສຍຊີວິດ 2 ຄົນ ທັງສອງເປັນຜູ້ຍິງອາຍຸ 86 ປີ.

  1. ສູນລ້ຽງເດັກ/ໂຮງຮຽນອະນຸບານ

ຂໍ້ມູນຂອງກະຊວງສາທາລະນະສຸກສິງກະໂປພົບວ່າ: ເດັກຈຳນວນຫລາຍເປັນພາຫະຂອງໂຣກທີ່ບໍ່ສະແດງອາການ ແລະ ອາດຕິດເຊື້ອຈາກ ຫລື ໄປສູ່ຜູ້ອາຍຸສູງໃນຄອບຄົວໂດຍບໍ່ຮູ້ຕົວ ມີຜູ້ຕິດເຊື້ອ 30 ຄົນທີ່ພົບຈາກສູນລ້ຽງເດັກຢ່າງໜ້ອຍ 2 ແຫ່ງ ແລະ ອີກ 10 ຄົນພົບຈາກສູນລ້ຽງເດັກຢ່າງໜ້ອຍ 10 ແຫ່ງ ໂດຍມີທັງເຈົ້າໜ້າທີ່, ເດັກນ້ອຍ ແລະ ສະມາຊິກໃນຄອບຄົວ ໂດຍໃນ 40 ຄົນທີ່ພົບເປັນເດັກນ້ອຍ 8 ຄົນ ແລະ ຜູ້ໃຫຍ່ 32 ຄົນ. ກຸ່ມທີ່ໃຫຍ່ທີ່ສຸດຄືສູນ “ສະປາກເກິລທ໊ອດ” (Sparkletots) ພົບຜູ້ຕິດເຊື້ອ 27 ຄົນ ໂດຍເປັນເດັກນ້ອຍ 4 ຄົນ ແລະ ເປັນຜູ້ໃຫຍ່ 23 ຄົນ. ນັບແຕ່ວັນທີ 8 ເມສາ 2020 ສູນລ້ຽງເດັກນ້ອຍໄດ້ໂຈະໃຫ້ບໍລິການ ເວັ້ນແຕ່ກໍລະນີຜູ້ປົກຄອງທີ່ມີຄວາມຈຳເປັນ ແລະ ບໍ່ສາມາດຫາວິທີເບິ່ງແຍງເດັກດ້ວຍວິທີອື່ນໄດ້.

  1. ສະຖານທີ່ເຮັດວຽກ

ເຖິງວ່າລັດຖະບານປະກາດໃຊ້ມາດຕະການລັອກດາວແລ້ວ ແຕ່ປະມານ 20% ຂອງພະນັກງານຢູ່ສິງກະໂປທີ່ເຮັດວຽກໃນທຸລະກິດທີ່ຈຳເປັນເຊັ່ນ: ບໍລິການສາທາລະນະສຸກ ແລະ ສັງຄົມ, ການຂົນສົ່ງ, ອາຫານ ແລະ ທະນາຄານ ແລະ ການເງິນ ຍັງຕ້ອງເຮັດວຽກຢ່າງຕໍ່ເນື່ອງ ບໍ່ໄດ້ເຮັດວຽກຈາກເຮືອນ ຫລື ພັກວຽກຊົ່ວຄາວຄືກັບທຸລະກິດສ່ວນຫລາຍ.

ຂະນະທີ່ລັດຖະບານພະຍາຍາມຈະຫລຸດຈຳນວນກິດຈະການທີ່ຖືວ່າຍັງມີຄວາມຈຳເປັນລົງໄປອີກ ເພື່ອໃຫ້ປະຊາຊົນສ່ວນຫລາຍຢູ່ເຮືອນ ເພື່ອຄວບຄຸມການແຜ່ກະຈາຍຂອງໂຄວິດ-19 ໄດ້ດີຍິ່ງຂຶ້ນ.

ສະຖານທີ່ເຮັດວຽກທີ່ໄດ້ຮັບອະນຸຍາດໃຫ້ເປີດກິດຈະການໄດ້ ຕ້ອງມີມາດຕະການເບິ່ງແຍງ ແລະ ລະມັດລະວັງຫລາຍເຊັ່ນ: ຕ້ອງໃຫ້ພະນັກງານໃສ່ຜ້າອັດປາກ, ຈັດໂຕະເຮັດວຽກໃຫ້ຫ່າງກັນຢ່າງໜ້ອຍ 1 ແມັດ ແລະ ຮັບປະທານອາຫານແຍກຈາກຜູ້ອື່ນ.

ຖອດບົດຮຽນ ‘5 ຈຸດອ່ອນ’ ຕົ້ນເຫດ ສິງກະໂປຄຸມໂຄວິດບໍ່ຢູ່ - WhatsApp Image 2020 05 27 at 5 - ຖອດບົດຮຽນ ‘5 ຈຸດອ່ອນ’ ຕົ້ນເຫດ ສິງກະໂປຄຸມໂຄວິດບໍ່ຢູ່
ຖອດບົດຮຽນ ‘5 ຈຸດອ່ອນ’ ຕົ້ນເຫດ ສິງກະໂປຄຸມໂຄວິດບໍ່ຢູ່ - WhatsApp Image 2020 05 27 at 5 - ຖອດບົດຮຽນ ‘5 ຈຸດອ່ອນ’ ຕົ້ນເຫດ ສິງກະໂປຄຸມໂຄວິດບໍ່ຢູ່
error: Alert: ເນື້ອຫາຂ່າວມີລິຂະສິດ !!