6 ວິທີຊ່ວຍຫລຸດພຸງສຳລັບທ່ານຊາຍ

ໄຂມັນສະສົມບໍລິເວນໜ້າທ້ອງ ແມ່ນສາເຫດຫລັກທີ່ເຮັດໃຫ້ເປັນພະຍາດຕຸ້ຍລົງພຸງ ແລະ ສ່ຽງຕໍ່ການເປັນພະຍາດຮ້າຍແຮງຕ່າງໆ ເຊັ່ນ : ພະຍາດເບົາຫວານ, ອັລໄຊເມີ, ຄວາມດັນເລືອດສູງ, ລະບົບຫາຍໃຈຕິດຂັດ ທັງຍັງເຮັດໃຫ້ເສຍບຸກຄະລິກກະພາບ ໝົດຄວາມໝັ້ນໃຈນຳອີກ ຈຶ່ງເປັນເລື່ອງທີ່ທ່ານຊາຍທັງຫລາຍບໍ່ຄວນຖືເບົາເດັດຂາດ, ແຕ່ບັນດາທ່ານຊາຍຈຳນວນບໍ່ໜ້ອຍເລີຍທີ່ຍັງທົນອຶດອັດຢູ່ກັບພຸງສວດໆ ຍ້ອນພະຍາຍາມເທົ່າໃດກໍບໍ່ສຳເລັດຈັກເທື່ອ ຈະປ່ອຍໄວ້ກໍຢ້ານໂລກໄພໄຂ້ເຈັບຖາມຫາ ມື້ນີ້ພວກເຮົາຈຶ່ງນຳເອົາ 6 ວິທີຊ່ວຍກຳຈັດໄຂມັນໜ້າທ້ອງຢ່າງມີປະສິດທິພາບ ມາໃຫ້ທຸກທ່ານໄດ້ລອງເອົາໄປປະຕິບັດກັນ ດັ່ງນີ້ :

1. ຄຳນວນສິ່ງທີ່ກິນເຂົ້າໄປ : ເລີ່ມຕົ້ນກ້າວທຳອິດໂດຍການເຮັດໃຫ້ປະລິມານກາລໍຣີທີ່ໄດ້ຮັບຈາກການກິນກັບການເຜົາຜານພະລັງງານດ້ວຍການອອກກຳລັງກາຍມີຄວາມດຸ່ນດ່ຽງກັນ, ລອງຄຳນວນອັດຕາການເຜົາຜານພະລັງງານ (BMR) ເບິ່ງວ່າທ່ານຕ້ອງການພະລັງງານໃນແຕ່ລະມື້ປະມານເທົ່າໃດ ແລະ ເລີ່ມຫລຸດກາລໍຣີທີ່ໄດ້ຮັບລົງ 200 ຈາກທີ່ຄຳນວນມາ. ຈາກນັ້ນກໍເຮັດຄວາມເຂົ້າໃຈເລື່ອງສານອາຫານ ໂດຍຄົນທີ່ຈະຫລຸດຄວາມຕຸ້ຍບໍ່ຈຳເປັນຕ້ອງງົດກິນຄາໂບໄຮເດຣດ ແລະ ໄຂມັນ ເພາະສານອາຫານເຫລົ່ານີ້ກໍມີຄວາມຈຳເປັນຕໍ່ຮ່າງກາຍຄືກັນ ພຽງແຕ່ຕ້ອງເລືອກກິນແບບທີ່ມີປະໂຫຍດແທນ ເຊັ່ນ : ຄາໂບໄຮເດຣດເຊີງຊ້ອນຈາກເຂົ້າເໝົ້າ, ເຂົ້າກໍ່າ, ເຂົ້າເບລ, ຖົ່ວແດງ, ມັນຝຣັ່ງ, ມັນດ້າງ, ເສັ້ນພາສຕ້າ ແລະ ໄຂມັນດີ ເຊັ່ນ : ໄຂມັນບໍ່ອີ່ມໂຕ, ໂອເມກ້າ 3,  ໂອເມກ້າ 6 ຈາກໄຂ່ໄກ່, ປາແຊວມັອນ, ໝາກອະໂວກາໂດ້ ແລະ ທັນຍາພືດຕ່າງໆ ສິ່ງສຳຄັນຢ່າລືມກິນໃຫ້ຄົບ 5 ໝວດນຳ.
2. ເຜົາຜານໄຂມັນທຸກພາກສ່ວນພ້ອມກັນ : ທ່ອງໃຫ້ຈື່ຂຶ້ນໃຈວ່າຄົນເຮົາບໍ່ສາມາດອອກກຳລັງກາຍເພື່ອຫລຸດໄຂມັນສະເພາະສ່ວນໄດ້, ການຫລິ້ນເຫວດຍົກນ້ຳໜັກ ຫລື ບໍລິຫານຕາມຈຸດຕ່າງໆເປັນພຽງການເສີມສ້າງກ້າມຊີ້ນໃຫ້ຮັດແໜ້ນຂຶ້ນເທົ່ານັ້ນ ບໍ່ໄດ້ຊ່ວຍໃຫ້ເຜົາຜານໄຂມັນແຕ່ຢ່າງໃດ ນັ້ນໝາຍຄວາມວ່າຖ້າທ່ານຢາກຫລຸດໄຂມັນ ກໍຕ້ອງບໍລິຫານຮ່າງກາຍທຸກພາກສ່ວນໄປພ້ອມໆກັນ ເພື່ອໃຫ້ຮ່າງກາຍເຜົາຜານພະລັງງານອອກໃຫ້ໝົດ ແລ້ວດຶງພະລັງງານສຳຮອງຈາກໄຂມັນມາໃຊ້ແທນ ເຊິ່ງໄຂມັນສ່ວນໃດຈະຫລຸດກ່ອນຂຶ້ນຢູ່ກັບຮູບຮ່າງ ແລະ ກຳມະພັນຂອງແຕ່ລະບຸກຄົນ. ການອອກກຳລັງກາຍແບບຄາດີໂອທີ່ແນະນຳ ແມ່ນ ການແລ່ນ, ລອຍນຳ້, ໂດດເຊືອກ, ການເຕັ້ນແອໂຣບິກ, ທ່າອອກກຳລັງກາຍ ໄດ້ແກ່ Burpee, Jumping Jack, Squat Jumps ແລະ Bear Crawls ໂດຍຕ້ອງຫລິ້ນໃຫ້ໄດ້ຢ່າງໜ້ອຍ 30 ນາທີຂຶ້ນໄປ ເພື່ອໃຫ້ລະບົບເຜົາຜານໄຂມັນເລີ່ມເຮັດວຽກ.
3. ເຄື່ອນໄຫວຮ່າງກາຍໝົດມື້ : ການອອກກຳລັງກາຍເປັນວິທີເຜົາຜານກາລໍຣີທີ່ດີ ແລະ ມີປະສິດທິພາບ, ແຕ່ບາງເທື່ອກໍອາດຈະບໍ່ພຽງພໍສຳລັບການຫລຸດໄຂມັນທີ່ພອກພູນຢູ່ທຸກພາກສ່ວນຂອງຮ່າງກາຍ ເຊິ່ງຮູບແບບການໃຊ້ຊີວິດປະຈຳວັນ ຫລື ກິດຈະວັດບາງຢ່າງກໍສາມາດຊ່ວຍຫລຸດນຳ້ໜັກໄດ້ ເຊັ່ນ : ການຍ່າງຫລິ້ນໃນສວນສາທາລະນະ, ຍ່າງເລາະຫ້າງສັບພະສິນຄ້າ, ລ້າງລົດ, ຈັດສວນ ລວມໄປເຖິງການເຮັດວຽກເຮືອນ ອັນໃດທີ່ເຮັດເອງໄດ້ກໍລອງເຮັດເບິ່ງ ຢ່າເມົາແຕ່ນັ່ງໆນອນໆ, ຫລິ້ນເກມ, ເບິ່ງໂທລະພາບ, ເຂ່ຍໂທລະສັບ ບໍ່ຍອມລຸກໄປໃສ ແບບນີ້ບໍ່ຊ່ວຍຫຍັງ ທັງຍັງເຮັດໃຫ້ໄຂມັນສະສົມຕາມຈຸດຕ່າງໆຕື່ມອີກ.
4. ຢ່າສ້າງກ້າມຊີ້ນກ່ອນຫລຸດໄຂມັນເດັດຂາດ : ຖ້າທ່ານຍັງມີປະລິມານໄຂມັນໃນຮ່າງກາຍ ຫລື Body Fat ເກີນ 18% (ສາມາດຄຳນວນໄດ້ຕາມເວັບໄຊສຸຂະພາບ) ຢ່າຮີບຮ້ອນອອກກຳລັງກາຍດ້ວຍທ່າສ້າງກ້າມຊີ້ນໜ້າທ້ອງເດັດຂາດ ເພາະນອກຈາກຈະເສຍເວລາລ້າແລ້ວ ຍັງສ່ຽງເກີດອາການບາດເຈັບຢູ່ຫລັງນຳອີກ. ທາງທີ່ດີຄວນຮີດໄຂມັນອອກດ້ວຍການຄາດີໂອດັ່ງທີ່ແນະນຳໄປກ່ອນໜ້ານັ້ນສາກ່ອນ ເມື່ອໄຂມັນໃນຮ່າງກາຍຫລຸດລົງເຫລືອ 18% ຫລື ຕໍ່າກ່ວາ ຈຶ່ງຄ່ອຍເລີ່ມປະສົມທ່າເນັ້ນກ້າມທ້ອງເຂົ້າໄປ ຈາກນັ້ນຈະປ່ຽນໄປສ້າງຊິກແພັກລ້ວນໆເລີຍກໍຍັງໄດ້ ທັງຍັງເຫັນຜົນໄວຫລາຍນຳອີກ.
5. ງົດງານປາຕີ້ສັງສັນ ແລະ ເຄື່ອງດື່ມອານກໍຮໍ : ເອີ້ນໄດ້ວ່າເປັນກິດຈະກຳທີ່ຄົນຫລຸດນຳ້ໜັກຕ້ອງຫລີກເວັ້ນໃຫ້ຫລາຍທີ່ສຸດເລີຍກໍເວົ້າໄດ້ ເພາະເຄື່ອງດື່ມອານກໍຮໍມີຜົນເສຍຕໍ່ຮ່າງກາຍຫລາຍ ທັງມີກາລໍຣີຫລາຍ, ລະບົບຍ່ອຍອາຫານອ່ອນແອລົງ, ບໍ່ສາມາດດູດຊຶມສານອາຫານທີ່ຈຳເປັນໄປໃຊ້ງານໄດ້, ຫລຸດລະດັບການຜະລິດຮໍໂມນເພດຊາຍ ສົ່ງຜົນໃຫ້ເຜົາຜານໄຂມັນໄດ້ບໍ່ເຕັມປະສິດທິພາບ. ນອກຈາກນີ້, ງານປາຕີ້ສັງສັນຍັງເຮັດໃຫ້ນອນເດິກ ເຊິ່ງເປັນສາເຫດຫລັກທີ່ເຮັດໃຫ້ຮ່າງກາຍອ່ອນເພຍ, ບໍ່ມີແຮງອອກກຳລັງກາຍ, ເກີດຄວາມເຄັ່ງຄຽດສະສົມ, ຮໍໂມນປັ່ນປ່ຽນ ແລະ ຫິວຕະຫລອດນຳອີກ ຖ້າເປັນໄປໄດ້ໃຫ້ງົດກິດຈະກຳເຫລົ່ານີ້ກ່ອນ, ແຕ່ຖ້າຫລີກເວັ້ນບໍ່ໄດ້ກໍພະຍາຍາມຫລຸດໃຫ້ໜ້ອຍທີ່ສຸດ.
6. ດື່ມນຳ້ບໍລິສຸດແທນນຳ້ຫວານ : ການດື່ມນຳ້ຫລາຍໆຈະຊ່ວຍໃຫ້ລະບົບຕ່າງໆຂອງຮ່າງກາຍເຮັດວຽກໄດ້ຢ່າງເຕັມປະສິດທິພາບ ລວມເຖິງລະບົບເຜົາຜານໄຂມັນນຳ, ແຕ່ວ່າຄົນສ່ວນຫລາຍມັກຕິດການດື່ມນຳ້ອັດລົມ, ຊາ, ກາເຟ ຫລື ນຳ້ຫວານແທນນຳ້ດື່ມບໍລິສຸດ ເພາະດື່ມງ່າຍ, ໄດ້ຄວາມສົດຊື່່ນ ໂດຍບໍ່ຄຳນຶງວ່າເຄື່ອງດື່ມເຫລົ່ານັ້ນມີປະລິມານນຳ້ຕານ ແລະ ກາລໍຣີສູງຫລາຍ ສົ່ງຜົນໃຫ້ເກີດໄຂມັນສະສົມເພີ່ມຂຶ້ນ ຍິ່ງໄປກ່ວານັ້ນ ພະລັງງານທີ່ໄດ້ຈາກນຳ້ຫວານຍັງມີຜົນຕໍ່ຄວາມຫິວນຳອີກ ເມື່ອກິນອາຫານເຂົ້າໄປຍິ່ງເຮັດໃຫ້ຮ່າງກາຍໄດ້ຮັບກາລໍຣີເພີ່ມຂຶ້ນເປັນທະວີຄູນ. ສະນັ້ນ, ປ່ຽນມາດື່ມນຳ້ບໍລິສຸດຕັ້ງແຕ່ຕອນນີ້ ກ່ອນຮອບແອວຂອງທ່ານຈະຂະຫຍາຍອອກຈົນນຸ່ງໂສ້ງໂຕເກົ່າບໍ່ໄດ້.