ມື້້ທີ 12 ແລ້ວລາວ ບໍ່ມີຜູ້ຕິດເຊື້ອໂຄວິດ-19 ເພີ່ມ

- Lpn 1News2 - ມື້້ທີ 12 ແລ້ວລາວ ບໍ່ມີຜູ້ຕິດເຊື້ອໂຄວິດ-19 ເພີ່ມ
- Untitled design - ມື້້ທີ 12 ແລ້ວລາວ ບໍ່ມີຜູ້ຕິດເຊື້ອໂຄວິດ-19 ເພີ່ມ

ທ່ານ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ໄດ້ຖະແຫລງຂ່າວຕໍ່ສື່ມວນຊົນໃນວັນທີ 24 ເມສານີ້ ວ່າ: ມາຮອດມື້ນີ້ເປັນມື້ທີ່ 12 ແລ້ວ, ທີ່ລາວເຮົາບໍມີຜູ້ຕິດເຊື້ອໂຄວິດ-19 ເພີ່ມອີກ, ນີ້ເປັນຄວາມພະຍາຍາມສູງໃນການສະກັດກັ້ນ ແລະ ຕ້ານການລະບາດຂອງພະຍາດດັ່ງກ່າວ, ໂດຍສະເພາະແມ່ນການຈັດຕັ້ງປະຕິບັດຄຳສັ່ງເລກທີ 06/ ນຍໄດ້ມີປະສິດທິຜົນສູງ, ຊຶ່ງປະຈຸບັນຍັງເຫຼືອມີຜູ້ຕິດເຊື້ອນອນຕິດຕາມ ປິ່ນປົວຢູ່ໂຮງໝໍທັງໝົດ 15 ຄົນ,ໃນນັ້ນຢູ່ ຢູໂຮງໝໍແຂວງຫຼວງພະບາງ ມີ 1 ຄົນ ເປັນເພດຊາຍ ແລະ ຢູ່ໂຮງໝໍມິດຕະພາບ ມີ 14 ຄົນ ທັງໝົດເຫັນວ່າ ມີອາການເບົາບາງດີຂຶ້ນ.

ທ່ານຮອງລັດຖະມົນຕີກະຊວງສາທາລະນະສຸກເນັ້ນວ່າ: ເຖິງຢ່າງໃດພວກເຮົາກໍຍັງຈະໄດ້ພ້ອມກັນສຸມໃສ່ສືບຕໍ່ເຝົ້າລະວັງ ແລະ ຄວບຄຸມການລະບາດຂອງພະຍາດດັ່ງກ່າວໃຫ້ເຂັ້ມງວດກ່ວາເກົ່າ, ໂດຍສະເພາະຕໍ່ຜູ້ທີ່ເດີນທາງ ຈາກຕ່າງປະເທດເຂົ້າມາລວມທັງແຮງງານລາວທີ່ມາຈາກປະເທດໄທ ຈະຕ້ອງໄດ້ສືບຕໍ່ ຈຳກັດບໍລິເວນ ພ້ອມຜູ້ສຳພັດໃກ້ຊິດກັບຜູ້ຕິດເຊື້ອໃຫ້ຖືກຕ້ອງກັບຫລັກການການແພດກຳນົດໄວ້ເປັນຢ່າງດີ ແລະ ຂໍຮຽກຮ້ອງໃຫ້ປະຊາຊົນບັນດາເຜົ່າ, ອົງການຈັດຕັ້ງທຸກພາກສ່ວນ ຈົ່ງໄດ້ເປັນເຈົ້າການຮ່ວມໄມ້ຮ່ວມມື ສືບຕໍ່ ຈັດຕັ້ງປະຕິບັດຄຳສັ່ງ ເລກທີ 06/ນຍ ແລະ ບັນດາຂໍ້ແນະນຳຕ່າງໆຢ່າງຖືກຕ້ອງ ແລະ ເຂັ້ມງວດ. ຖ້າວ່າບັນດາທ່ານ ຫຼື ຄົນໃນຄອບຄົວມີອາການຄ້າຍຄືໄຂ້ຫວັດ ຫຼື ອາການອື່ນໆຜິດປົກກະຕິ ຂໍໃຫ້ມາກວດຢູ່ໂຮງໝໍ ໂດຍບໍ່ເສຍຄ່າບໍລິການໃດໆ, ພ້ອມທັງເພື່ອຄວາມປອດໄພ.
ທ່ານຮອງລັດຖະມົນຕີໃຫ້ຮູ້ວ່າ: ສະພາບການລະບາດຂອງພະຍາດ COVID-19ຢູ່ໃນທົ່ວໂລກ ເຫັນວ່າມາຮອດເວລາ 6:00 ໂມງເຊົ້າ ຂອງວັນທີ 24 ເມສາ ນີ້, ທົ່ວໂລກມີລາຍງານການລະບາດ ທັງໝົດ 210 (ປະເທດ/ເຂດ). ມີການຢັ້ງຢືນ ຜູ້ຕິດເຊື້ອຫລາຍກ່ວາ 2,71 ລ້ານຄົນ (ໃຫມ່ມີ83,210ຄົນ, ມີຜູ້ເສຍຊິວິດ 190.397 (ໃຫມ່6.331 ຄົນ), ປີ່ນປົວຫາຍດີ 744.961 (ໃຫມ່27,741 ຄົນ).ຫມາຍວ່າມີປະມານ 33.3 % ຂອງຈໍານວນຜູ້ຕິດເຊື້ອໃໝ່ປະຈໍາວັນ.ໄດ້ປິ່ນປົວຫາຍດີ. ໃນປັດຈຸບັນມີບາງປະເທດ ຈຳນວນຜູ້ຕິດເຊື້ອມື້ດຽວ ມີເຖິງ 30.257 ຄົນ ແລະ ເສຍຊີວິດ 2.095 ຄົນ ຕໍ່ມື້.ສະແດງໃຫ້ເຫັນວ່າ: ອັດຕາຄວາມຮ້າຍແຮງຂອງມື້ນີ້ແມ່ນເພິ່ມຂຶ້ນເປັນ 7,01 % ຈາກມື້ວານນີ້ 6.98 %.ສະເພາະກຸ່ມປະເທດອາຊຽນ ຍັງມີບາງປະເທດທີ່ມີອັດຕາການຕິດເຊື້ອ ແລະ ເສຍຊີວິດສູງຢູ່ ຄືໃນວັນທີ 23 ເມສານີ້ມີສູງເຖິງ 1.037 ຄົນ ແລະ ເສຍຊີວິດໃນມື້ດຽວມີ 31 ຄົນ.
ພັກ ແລະ ລັດຖະບານໄດ້ເປັນຫ່ວງເປັນໄຍ ຕໍ່ການຄວບຄຸມ ແລະ ການແກ້ໄຂການ ລະບາດຢູ່ປະເທດເຮົາ ແລະ ໄດ້ວາງມາດຕະການ ແລະ ຂໍ້ແນະນຳຕ່າງໆ ອອກ ຊຶ່ງກໍ່ຊາບດີວ່າມີຜົນກະທົບຕໍ່ການດຳລົງຊີວິດປະຈໍາວັນຂອງປະຊາຊົນ ກໍ່ຄືການດໍາເນີນທຸລະກິດ ແຕ່ກໍ່ຂໍຮຽກຮ້ອງໃຫ້ບັນດາທ່ານມີຄວາມອົດທົນ ຜ່ານຜ່າວີກິດການນີ້ ແລະ ຂໍໃຫ້ບັນດາທ່ານຈົ່ງພ້ອມກັນປ້ອງກັນຕົນເອງ, ປ້ອງກັນ ຄອບຄົວ ແລະ ຜູ້ທີ່ຮັກແພງໃກ້ຊິດກັບບັນດາທ່ານຈາກການຕິດເຊື້ອພະຍາດ COVID-19 ຖືວ່າແມ່ນພັນທະ ແລະ ຄວາມຮັບຜິດຊອບຂອງບັນດາທ່ານ ແລະ ເປັນການປະກອບສ່ວນອັນສຳຄັນໃຫ້ແກ່ປະເທດຊາດ.

- Wave100S AD to Website 2020 0 - ມື້້ທີ 12 ແລ້ວລາວ ບໍ່ມີຜູ້ຕິດເຊື້ອໂຄວິດ-19 ເພີ່ມ
- WhatsApp Image 2020 05 27 at 5 - ມື້້ທີ 12 ແລ້ວລາວ ບໍ່ມີຜູ້ຕິດເຊື້ອໂຄວິດ-19 ເພີ່ມ
- WhatsApp Image 2020 05 27 at 5 - ມື້້ທີ 12 ແລ້ວລາວ ບໍ່ມີຜູ້ຕິດເຊື້ອໂຄວິດ-19 ເພີ່ມ
error: Alert: ເນື້ອຫາຂ່າວມີລິຂະສິດ !!