ກະຊວງການເງິນຕອບຂໍ້ຂ້ອງໃຈສັງຄົມຜ່ານສາຍດ່ວນ 1519

- advert banner 728 90 728x90 - ກະຊວງການເງິນຕອບຂໍ້ຂ້ອງໃຈສັງຄົມຜ່ານສາຍດ່ວນ 1519

ກະຊວງການເງິນໄດ້ຕອບຂໍ້ຂ້ອງໃຈຂອງສັງຄົມສະເໜີຜ່ານສາຍດ່ວນ 1519 ນັບແຕ່ກະຊວງດັ່ງກ່າວເປີດສາຍດ່ວນຂອງຕົນເປັນຕົ້ນມາ, ດັ່ງກໍລະນີປະຊາຊົນບ້ານຂົວຫລວງ, ເມືອງຈັນທະບູລີ, ນະຄອນຫລວງວຽງຈັນສະເໜີໃຫ້ອອກລະບຽບເພື່ອຄຸ້ມຄອງການເກັບປີ້ຝາກລົດໃນສະຖານທີ່ຕ່າງໆເພື່ອຫລີກລ້ຽງບໍ່ໃຫ້ເກີດການສວຍໂອກາດ ແລະ ທັງຮັບປະກັນດ້ານງົບປະມານໃຫ້ເຂົ້າລັດເຕັມເມັດເຕັມໜ່ວຍ, ຕໍ່ບັນຫາດັ່ງກ່າວກະຊວງການເງິນຊີ້ແຈງວ່າ: ການເກັບປີ້ຝາກລົດໃນສະຖານທີ່ຕ່າງໆແມ່ນພາກສ່ວນອື່ນເປັນຜູ້ຈັດເກັບ, ສ່ວນການສະເໜີໃຫ້ມີມາດຕະການຄຸ້ມຄອງບັນຫາດັ່ງກ່າວແມ່ນເປັນສິ່ງທີ່ດີແກ່ສັງຄົມກໍຄືສ່ວນລວມ ແລະ ກົມສ່ວຍສາອາກອນຈະປະສານສົມທົບກັບພາກສ່ວນກ່ຽວຂ້ອງເພື່ອຫາລືວິທີແກ້ໄຂຮ່ວມກັນ. ນອກນີ້ໄດ້ມີພະນັກງານທະຫານທ່ານໜຶ່ງຢູ່ບ້ານໜອງທາໃຕ້, ເມືອງຈັນທະບູລີ, ນະຄອນຫລວງວຽງຈັນ ສະເໜີໃຫ້ກວດຄືນກ່ຽວກັບການປະຕິບັດຮູບແບບອາກອນມີລາງວັນ, ຊຶ່ງຜູ້ກ່ຽວຖືກ 2 ລາງວັນເປັນຄໍາຮູບປະພັນ 2 ສະຫລຶງ ແລະ 1 ບາດໃນລະຫວ່າງເດືອນມິຖຸນາຫາກໍລະກົດ 2016 ຈາກການໄປໃຊ້ບໍລິການສ້ອມແປງລົດຢູ່ອູ່ສ້ອມແປງແຫ່ງໜຶ່ງເຂດບ້ານຊໍາເຄ້, ເມືອງໄຊເສດຖາ, ນະຄອນຫລວງວຽງຈັນ, ໂດຍໄດ້ຈ່າຍລົງທະບຽນປຈໍານວນ 1 ລ້ານກີບໃຫ້ພະນັກງານຮັບພິຊອບຢູ່ຫ້ອງການເຂດບ້ານນາຄໍາ, ເມືອງສີໂຄດຕະບອງ, ນະຄອນຫລວງວຽງຈັນ ແລະ ຕໍ່ມາໄດ້ຮັບຄໍາຕອບວ່າ: ກະຊວງການເງິນບໍ່ສາມາດມອບລາງວັນໃຫ້ໄດ້, ຍ້ອນອູ່ດັ່ງກ່າວບໍ່ໄດ້ເສຍອາກອນ, ຕໍ່ກໍລະນີນີ້ກະຊວງການເງິນຊີ້ແຈງວ່າ: ປັດຈຸບັນຕົນເອງ ໄດ້ແຕ່ງຕັ້ງຄະນະເພື່ອລົງກວດກາ ແລະ ປະເມີນຜົນການນໍາໃຊ້ໃບເກັບເງິນແບບມີລາງວັນຄືນໃໝ່ແລ້ວ ແລະ ຈະເຊີນຜູ້ຖືກລາງວັນມາໃຫ້ຂໍ້ມູນເພີ່ມເຕີມ. ສ່ວນປະຊາຊົນທ່ານໜຶ່ງຢູ່ບ້ານໂນນຫວາຍ, ເມືອງໄຊເສດຖາ, ນະຄອນຫລວງວຽງຈັນ ສະເໜີໃຫ້ກວດກາຄືນການເກັບອາກອນນໍາບັນດາຫ້າງຮ້ານ, ຊຶ່ງປະກົດວ່າໄດ້ມີການເສຍເພີ່ມອີກ 10 ພັນກີບສໍາລັບຄ່າໃບບິນ, ພ້ອມນັ້ນຍັງພົບປາກົດການພະນັກງານອາກອນຂຶ້ນຄ່າອາກອນຕາມລໍາພັງໃຈ ແລະ ເວົ້າຈາບໍ່ສຸພາບ, ບັນຫານີ້ໄດ້ຊີ້ແຈງວ່າ: ການເກັບ 10 ພັນກີບແມ່ນຄ່າແບບພີມໃບສັ່ງມອບ, ຄ່າສະແຕມອາກອນຕິດໃບສັ່ງມອບ, ຊຶ່ງຫວ່ງນີ້ເອົາເຂົ້າງົບປະມານລັດ, ສ່ວນຂຶ້ນຄ່າອາກອນໂດຍລໍາພັງອາດແມ່ນການກວດກາແບບໄລ່ລຽງບັນຊີປະຈໍາວັນ, ຖ້າມີການຊື້-ຂາຍເພີ່ມຫລາຍກວ່າຈໍານວນໃນສັນຍາກໍຈະຄິດໄລ່ອາກອນ ເພີ່ມຕາມມູນຄ່າການຊື້-ຂາຍຕົວຈິງ, ສໍາລັບການເວົ້າຈາບໍ່ສຸພາບຂອງພະນັກງານອາກອນແມ່ນຈະໄດ້ມີການອົບຮົມຕັກເຕືອນເພື່ອບໍ່ໃຫ້ມີປາກົດການລັກສະນະດັ່ງກ່າວເກີດຂຶ້ນ. ພ້ອມນີ້ກະຊວງການເງິນຍັງໄດ້ຕອບຂໍ້ຂ້ອງໃຈຂອງບໍລິສັດຈໍານວນໜຶ່ງກ່ຽວກັບການຊໍາລະໜີ້ຂອງໂຄງການລັດຖະບານຢູ່ແຂວງຕ່າງໆທີ່ຄ້າງຊໍາລະ, ໂດຍຊີ້ແຈງວ່າ: ປັດຈຸບັນລັດຖະບານໄດ້ມີແຜນໃນການຊໍາລະໜີ້ດັ່ງກ່າວແລ້ວ, ໂດຍຈະນໍາໃຊ້ບ້ວງເງິນ 400 ຕື້ກີບໃນໄລຍະ 3 ເດືອນຂ້າມຜ່ານ ປີ 2016. ສ່ວນກໍລະນີພະນັກງານພະແນກສຶກສາທິການ ແລະ ກິລາແຂວງວຽງຈັນສະເໜີວ່າຍັງບໍ່ທັນໄດ້ຮັບເງິນອຸດໜູນນໍ້າມັນນັບແຕ່ເດືອນຕຸລາ, ພະຈິກ, ທັນວາ 2016 ແລະ ເດືອນມັງກອນ, ກຸມພາ ແລະ ມີນາ 2017 ກະຊວງການເງິນຊີ້ແຈງວ່າ: ເງິນບໍລິຫານລວມທັງເງິນອຸດໜູນດັ່ງກ່າວຂອງງົບປະມານ 3 ເດືອນຂ້າມຜ່ານທ້າຍປີ 2016 ແມ່ນບໍ່ມີແຜນລາຍຈ່າຍອີກ, ເນື່ອງຈາກຂະແໜງສຶກສາທິການ ແລະ ກິລາບໍ່ໄດ້ຂຶ້ນແຜນງົບປະມານໄວ້.

- new3 - ກະຊວງການເງິນຕອບຂໍ້ຂ້ອງໃຈສັງຄົມຜ່ານສາຍດ່ວນ 1519

ນີ້ເປັນການຊີ້ແຈງຂໍ້ຂ້ອງໃຈຂອງສັງຄົມບາງສ່ວນເທົ່ານັ້ນຂອງກະຊວງການເງິນ ແລະ ຍັງຈະມີການຊີ້ແຈງກັນຕື່ມອີກໃນຫລາຍໆບັນຫາທີ່ສັງຄົມສົນໃຈໃນຂົງເຂດວຽກງານດັ່ງກ່າວ, ຊຶ່ງໜັງສືພີມລາວພັດທະນາຈະນໍາມາສະເໜີໃຫ້ສັງຄົມຮັບຊາບເປັນປະຈໍາຕື່ມອີກ.

- lattana 1 - ກະຊວງການເງິນຕອບຂໍ້ຂ້ອງໃຈສັງຄົມຜ່ານສາຍດ່ວນ 1519
error: Content is protected !!