ລະວັງ ! ລົມພາຍຸ​ກັບ​ໄຂ້ຍຸງ​ມາ​ແຮງ​ແຊງ​ໂຄ​ວິດ-19

ລະວັງ ! ລົມພາຍຸ​ກັບ​ໄຂ້ຍຸງ​ມາ​ແຮງ​ແຊງ​ໂຄ​ວິດ-19 - 778 - ລະວັງ ! ລົມພາຍຸ​ກັບ​ໄຂ້ຍຸງ​ມາ​ແຮງ​ແຊງ​ໂຄ​ວິດ-19
ລະວັງ ! ລົມພາຍຸ​ກັບ​ໄຂ້ຍຸງ​ມາ​ແຮງ​ແຊງ​ໂຄ​ວິດ-19 - AGL - ລະວັງ ! ລົມພາຍຸ​ກັບ​ໄຂ້ຍຸງ​ມາ​ແຮງ​ແຊງ​ໂຄ​ວິດ-19

ໂດຍ:  ທິດ​ກໍ່າ

​ໃນ​ສະພາບ​ທີ່​ທົ່ວ​ພັກ, ທົ່ວ​ກອງທັບ ​ແລະ ທົ່ວ​ປວງ​ຊົນ​ລາວ​ທັງ​ຊາດ​ພ້ອມ​ກັນ​ເຮັດ​ເສິກ​ສົງຄາມ​ຕ້ານ​ໂຄ​ວິດ-19 ​ໄພພິບັດ​ຕ່າງໆ​ທາງ​ທຳ​ມະ​ຊາດ, ພະຍາດ​ບາດ​ເຍົາ​ທີ່​ເຂົ້າມາ​ບຸກລຸກ​ຮຸກ​ຮານ​ຄວາມ​ສະຫງົບ​ສຸກ​ຂອງ​ບ້ານ​ເມືອງ​ໃນ​ຊ່ວງ​ຍາມ​ແລ້ງ​ຕໍ່​ໃສ່​ລະດູຝົນ​ນີ້ ກໍ​ແມ່ນ​ລົມພາຍຸ​ກັບ​ໄຂ້ຍຸງ​ໄດ້​ປາກົດ​ມີ​ໃຫ້​ເຫັນ​ເປັນ​ຈິງ ​ເຊັ່ນ​ໃນ​ວັນ​ທີ 7 ພຶດສະພາ 2020 ຜ່ານ​ມາ ​ໄດ້​ມີ​ລົມພາຍຸ​ພັດ​ຖະຫລົ່ມ​ຮຸນ​ແຮງ​ຢູ່​ເຂດ​ບ້ານ​ດົງ​ໂພ​ສີ, ທ່າ​ນາ​ແລ້ງ, ທ່າ​ເດື່ອ ​ເມືອງ​ຫາດ​ຊາຍ​ຟອງ ຈົນ​ເຮັດ​ໃຫ້​ເສົາ​ໄຟຟ້າ​ຫລັກ​ລົງ​ທັບ​ທາງ, ທັບ​ລົດ, ທາງ​ຫລາ​ຍຍ່ານ​ເປັນ​ອຳມະພາດ, ຕົ້ນ​ໄມ້​ໃບ​ຫຍ້າ​ກໍ​ຫັກ​ກົ່ນ, ຫລັງຄາ​ເຮືອນ​ຊານ, ອາຄານ​ສະຖານ​ທີ່​ບາງ​ບ່ອນ​ເພພັງ​ປິວ​ຊະຊາຍ​ໄປ​ຕາມ​ກະ​ແສ​ລົມ​ຢ່າງ​ໜ້າ​ອະ​ໜາດ. ນອກຈາກ​ນັ້ນ ຢູ່​ແຖວ​ເມືອງ​ສັງ​ທອງ​ກໍ​ເປັນ​ລັກສະນະ​ດຽວ​ກັນ, ມື້ດຽວ​ກັນ ​ເວລາ​ດຽວ​ກັນ ​ແລະ ທັງ​ສອງ​ແຫ່ງ​ນີ້​ແມ່ນ​ຢູ່​ກະ​ໂຕ​ນະຄອນຫລວງ​ວຽງ​ຈັນ​ເຮົາ​ນີ້​ເອງ. ສ່ວນ​ຢູ່​ຕ່າງ​ແຂວງ​ນັ້ນກໍ​ແມ່ນ​ເຂດ​ເມືອງ​ວຽງ​ໄຊ ​ແຂວງ​ຫົວພັນ ທາງ​ພາກ​ເໜືອ​ດ້ານ​ຕາ​ເວັນ​ອອກ​ຂອງ​ປະ​ເທດ​ເຮົາ. ກ່ຽວ​ກັບ​ໂຣຄາ​ພະຍາດ​ທີ່​ມາ​ຕາມ​ລະດູ​ການ​ນັ້ນ​ແມ່ນ​ໄຂ້ຍຸງ ຫລື ​ເອີ້ນ​ຢ່າງ​ໜຶ່ງ​ວ່າ: ​ໄຂ້​ເລືອດ​ອອກ. ​ຕາມ​ແຫ​ລ່ງຂ່າວ​ຈາກ​ສື່​ອອນ​ລາຍ​ວ່າ​ມີ​ຜູ້​ເສຍ​ຊີວິດ​ແລ້ວ 1 ຄົນ ​ແລະ ຫວ່າງ​ບໍ່​ດົນ​ມາ​ນີ້ ຄື​ວັນ​ທີ 6 ພຶດສະພາ 2020​ ຢູ່​ເມືອງ​ໄຊ​ເສດ​ຖາ ​ແຂວງ​ອັດ​ຕະປື ​ໄດ້​ມີ​ຜູ້​ຕິດ​ເຊື້ອ​ໄຂ້ຍຸງ​ໄປ​ແລ້ວ 90 ຄົນ, ​ແຕ່​ວ່າ​ໂຊກ​ດີ​ຍັງ​ບໍ່​ທັນ​ມີ​ຜູ້​ໃດ​ເສຍ​ຊີວິດ​ຍ້ອນ.

ນີ້​ຄື​ໄພ​ອັນຕະລາຍ​ຮ້າຍ​ກາດ​ຂອງ​ໄພ​ທຳ​ມະ​ຊາດ ​ແລະ ​ໂຣຄາ​ພະຍາດ​ທີ່​ມາ​ລົບ​ກວນ​ບຽດບຽນ​ຊີວິດ​ການ​ເປັນ​ຢູ່​ຂອງ​ປະຊາຊົນ​ບັນດາ​ເຜົ່າ​ໃນ​ຊ່ວງ​ລະ​ດູ​ຮ້ອນ​ຕໍ່​ໃສ່​ລະດູຝົນ. ຕໍ່​ໄພພິບັດ​ທີ່​ວ່າ​ມາ​ນີ້​ເກືອບ​ວ່າ​ເປັນ​ເກນ​ປົກກະຕິ​ໃນ​ແຕ່ລະ​ປີ ຕ່າງ​ແຕ່​ວ່າ​ປີ​ໜ້ອຍ​ປີ​ຫລາຍ, ປີ​ໂຊກ​ປີ​ຊວຍ. ​ແຕ່​ສຳລັບ​ປີ​ນີ້ ຖື​ວ່າ​ໃນ​ຂະນະ​ທີ່​ພວກ​ເຮົາ​ພວມ​ສຸມ​ໃສ່​ສົງຄາມ​ຕ້ານ​ໂຄ​ວິດ-19 ສິ່ງ​ບໍ່​ນຶກ​ຝັນ​ມັນ​ກໍ​ມາ​ແຊງ​ໜ້າບັ້ນຮົບ ​ເຮັດ​ໃຫ້​ຄົນ​ເຮົາ​ເຈັບ​ເປັນ, ​ເສຍ​ຊີວິດ, ​ເສຍ​ວັດຖຸ​ຊັບ​ສິນ​ຍ້ອນ​ໄພພິບັດ​ທີ່​ກ່າວ​ມາ​ນີ້​ຫລາຍ​ເຕີບ ມັນ​ກໍ​ເລີຍ​ເປັນ​ການ​ສວນ​ທາງ​ກັບ​ການ​ຕ້ານ​ໂຄ​ວິດ-19 ທີ່​ຍັງ​ບໍ່​ທັນ​ມີ​ໃຜ​ເສຍ​ຊີວິດ​ພໍ​ຄົນ​.

​ແນວ​ໃດ​ກໍ​ດີ, ຕາມ​ທິດ​ກໍ່າ​ວ່າ ​ເພື່ອ​ບໍ່​ໃຫ້​ປະຊາຊົນ​ບັນດ​າ​ເຜົ່າ​ມີ​ຜົນ​ກະທົບ​ຕໍ່​ໄພພິບັດ​ຕ່າງໆ​ທີ່​ຈະ​ຕາມ​ມາ​ຫລາຍ​ດ້ານ​ໄປ​ພ້ອມ​ກັນ​ເຊັ່ນ​ວ່າ: ທັງ​ຕ້ານ​ໂຄ​ວິດ, ທັງ​ຕ້ານ​ພາຍຸ ​ແລະ ທັງ​ຕ້ານ​ໄຂ້ຍຸງ​ລາຍ​ທີ່​ຈະ​ມາ​ທຳລາຍ​ຊີວິດ​ອິນ​ຊີ​ຂອງ​ພວກ​ເຮົາ​ທົ່ວ​ທັງ​ປະ​ເທດ​ກໍ​ຕ້ອງ​ໄດ້​ພ້ອມ​ກັນ​ຕ້ານ​ແບບ​ຄວບ​ຄູ່​ກັນ​ໄປ​ຢ່າງ​ເຂັ້ມ​ແຂງ. ສະ​ເພາະ​ບັ້ນຮົບ​ຕ້ານ​ໂຄ​ວິດ​ນັ້ນ ຖື​ວ່າ​ທາງ​ພັກ ​ແລະ ລັດຖະບານ​ເຮົາ​ກໍ​ມີ​ຍຸດ​ທະ​ສາດ ​ແລະ ມີ​ວາລະ​ແຕ່ລະ​ໄລຍະ​ໄປ​ຢູ່​ແລ້ວ ຂໍ​ແຕ່​ວ່າ​ພວກ​ເຮົາ​ພ້ອມ​ກັນ​ເປັນ​ເຈົ້າການ​ປະຕິບັດ​ຢ່າງ​ເຂັ້ມງວດ ​ແລະ ​ເດັດຂາດ​ກໍ​ຖື​ວ່າ​ຍົກ​ໂປ້​ແຖມ​ກ້ອຍ. ສ່ວນ​ໄພພິບັດ​ນັ້ນ ຂໍ​ແຕ່​ພວກ​ເຮົາ​ຕິດຕາມ​ສະພາບ​ການ​ປ່ຽນ​ແປງ​ຂອງ​ດິນ​ຟ້າ​ອາກາດ​ຈາກ​ກົມ​ອຸຕຸນິຍົມ​ອຸ​ທົກ​ກະສາ​ດຢ່າງ​ໃກ້ຊິດ, ​ເມື່ອ​ໄດ້​ຮັບ​ຮູ້​ແຫລ່ງຂ່າວ​ຄາວ​ເປັນ​ຢ່າງ​ດີ​ແລ້ວ​ຄວນ​ມ້ຽນ​ມັດ​ອັດ​ຮີ່, ຈັດ​ສັນ​ຄວາມ​ເປັນລະບົບ​ລະບຽບຂອງ​ເຮືອນ​ຊານ, ຊອກ​ຫາ​ບ່ອນ​ລົບ​ໄພ​ໃນ​ເວລາ​ພາຍຸ​ຈະ​ມາ​ເພື່ອ​ຄວາມ​ປອດ​ໄພ​ຊີວິດ​ອິນ​ຊີ​ຂອງ​ເຮົາ​ເອງ ​ໂດຍ​ຮອດ​ມື້ນັ້ນກໍ​ບໍ່​ຄວນ​ໄປ​ຫລິ້ນ​ໄປ​ທ່ຽວ​ທາງ​ໄກ, ​ໄປ​ເລາະ​ຫລິ້ນ, ​ເລາະ​ທ່ຽວ​ຊະຊາຍ ​ເພື່ອ​ຄວາມ​ປອດ​ໄພ​ຂອງ​ຊີວິດ ​ແລະ ຊັບ​ສິນ​ດັ່ງ​ທີ່​ເຫັນ​ໃນ​ແຫ​ລ່ງຂ່າວ​ຂີ່​ລົດ​ໄປດີໆ​ມີ​ພາຍຸ​ມາ​ ​ເສົາ​ໄຟຟ້າ​ຫັກ​ທັບ​ລົດ​ຢຸບ​ລົງ ຄົນ​ຢູ່​ໃນ​ລົດ​ພາກັນ​ເກືອບ​ຕາຍ ​ແລະ ອາດ​ຈະ​ມີ​ເຄາະ​ຮ້າຍ​ອື່ນໆ​ຕາມ​ມາ​ຫລາຍ​ສິ່ງ​ຫລາຍ​ຢ່າງ. ກ່ຽວ​ກັບ​ການ​ຕ້ານ ​ແລະ ຫລີກ​ເວັ້ນຈາກ​ໄພ​ອັນຕະລາຍ​ຈາກ​ພະຍາດ​ໄຂ້ຍຸງ​ນັ້ນ, ຖື​ວ່າ​ຂະ​ແໜງ​ການ​ກ່ຽວຂ້ອງ​ເພິ່ນ​ກໍ​ໂຄສະນາ​ມາ​ຕະຫລອດ, ວາງ​ຄຳ​ຂວັນ 5.ປ ​ໃຫ້​ພວ​ເຮົາ​ປະຕິບັດ. ນອ​ກນັ້ນ ກໍ​ໃຫ້​ນອນ​ໃນ​ມຸ້ງ, ອອກກຳລັງ​ກາຍ, ກິນ​ສະອາດ​ຢູ່​ສະອາດ, ດຳລົງ​ຊີວິດ​ຢ່າງ​ມີ​ແບບ​ແຜນ​ປະສົມ​ປະສານ​ກັບ​ການ​ປະຕິບັດ​ຂໍ້​ກຳນົດ​ກົດ​ລະບຽບ​ຕ່າງໆ​ໃນ​ການ​ຕ້ານ​ພະຍາດ ​ແລະ ​ໂລກລະບາດ​ຕາມ​ລະດູ​ການ ຫລື ກໍລະນີ​ສຸກ​ເສີນ. ສິ່ງ​ທີ່​ປະຕິບັດ​ອີກ​ຢ່າງ​ໜຶ່ງ ຖ້າ​ມີ​ໂອກາດ​ເຖິງ​ວັນ​ສິນ​ວັນ​ພະ, ຍາມ​ບຸນ​ຍາມ​ທານ​ກໍ​ເຂົ້າວັດ​ເຂົ້າວາ​ທຳບຸນ​​ໃຫ້​ຈິດ​ໃຈ​ສະຫງົບ, ມີ​ສະມາທິ, ຮູ້​ເຂົາ​ຮູ້​ເຮົາ, ຮູ້​ເພິ່ນ​ຮູ້​ໂຕ, ມີ​ເມດ​ຕາ​ແລ້ວ​ປັນຍາ​ກໍ​ຈະ​ເກີດ, ຄວາມສຸກ​ກາຍ​ສະບາຍ​ໃຈ​ກໍ​ຈະ​ມາ​ຢູ່​ນຳ​ພວກ​ເຮົາ​ຢ່າງ​ບໍ່​ນຶກ​ຝັນ. ຖ້າ​ເຮັດ​ໄດ້​ຄື​ດັ່ງ​ວ່າ ພະຍາດ​ບາດ​ເຍົາ, ​ໄພພິບັດ​ຕ່າງໆ​ທັງຫລາຍ ນັບ​ທັງ​ໂຄ​ວິດ-19 ກໍ​ຈະ​ໜີ​ຫ່າງ​ໄປ​ຢູ່​ແຖວ​ຕາ​ເວັນ​ຕົກ​ນົກ​ເຂົາ​ນອນ, ຄອນ​ເຂົາ​ຂຽວ, ຄວາມ​ສະຫງົບ​ສຸກ​ທຸກ​ຢ່າງ​ກໍ​ຈະ​ເຂົ້າມາ​ຫາ​ເຮົາ​ຍ້ອນ​ການ​ປະພຶດ ​ແລະ ປະຕິບັດ​ຈາກ​ເຮົາ​ເອງ​ເປັນ​ຜູ້​ສ້າງ​ມັນ​ຂຶ້ນມາ.

​ເຖິງ​ຢ່າງ​ໃດ​ກໍ​ດີ, ຕາມ​ທິດ​ກໍ່າ​ວ່າ ມາ​ຮອດ​ຍຸກ​ປັດຈຸບັນ ປະ​ເທດ​ຊາດ​ບ້ານ​ເມືອງ ​ແລະ ຄົນ​ລາວ​ເຮົາ​ໄດ້​ພົ້ນຈາກ​ແປວ​ໄຟ​ແຫ່ງ​ສົງຄາມ​ຢ່າງ​ຍາວ​ນານ, ຜ່ານ​ໄລຍະ​ຮຳບາດ​ແຜ​ສົງຄາມ, ​ໄລຍະ​ສ້າງສາ ​ແລະ ພັດທະນາ​ປະ​ເທດ​ຊາດ​ຈົນ​ມາ​ຮອດ​ປັດຈຸບັນ ພາຍ​ໃຕ້ການ​ນຳພາ​ຂອງ​ພັກ ​ແລະ ລັດຖະບານ ​ພວກ​ເຮົາ​ຄວນ​ພູມ​ໃຈ​ໃນ​ຄວາມ​ເປັນ​ລາວ ພ້ອມ​ກັນ​ສາມັກຄີ​ຕ້ານ​ໄພພິບັດ, ພະຍາດ​ໂຣຄາ, ພະຍາດ​ສໍ້​ລາດ​ບັງ​ຫລວງ ​ແລະ ພະຍາດ​ອື່ນໆ​ໃຫ້​ໜີ​ຈາກ​ແຜ່ນດິນ​ລາວ​ໃຫ້​ປອດ​ໃສ​ຮາບ​ກ້ຽງ​ເໝືອນ​ດັ່ງ​ໜ້າ​ກອງ​ໄຊ.

ລະວັງ ! ລົມພາຍຸ​ກັບ​ໄຂ້ຍຸງ​ມາ​ແຮງ​ແຊງ​ໂຄ​ວິດ-19 -    AD conten website - ລະວັງ ! ລົມພາຍຸ​ກັບ​ໄຂ້ຍຸງ​ມາ​ແຮງ​ແຊງ​ໂຄ​ວິດ-19
ລະວັງ ! ລົມພາຍຸ​ກັບ​ໄຂ້ຍຸງ​ມາ​ແຮງ​ແຊງ​ໂຄ​ວິດ-19 - lattana banner 1 - ລະວັງ ! ລົມພາຍຸ​ກັບ​ໄຂ້ຍຸງ​ມາ​ແຮງ​ແຊງ​ໂຄ​ວິດ-19
ລະວັງ ! ລົມພາຍຸ​ກັບ​ໄຂ້ຍຸງ​ມາ​ແຮງ​ແຊງ​ໂຄ​ວິດ-19 - lattana banner - ລະວັງ ! ລົມພາຍຸ​ກັບ​ໄຂ້ຍຸງ​ມາ​ແຮງ​ແຊງ​ໂຄ​ວິດ-19
error: Alert: ເນື້ອຫາຂ່າວມີລິຂະສິດ !!