ບົດຮຽນການສົ່ງອອກ ແລະ ນຳເຂົ້າແຮງງານຢູ່ບາງປະເທດ
ວິເສດ ສະແຫວງສຶກສາ
ເນື່ອງໃນໂອກາດວັນແຮງງານສາກົນ (International Labour Day) ເຊິ່ງຢູ່ບ້ານເຮົາ ແລະ ອີກຫລາຍປະເທດນິຍົມເອີ້ນວ່າ: ວັນກຳມະກອນສາກົນ 1 ພຶດສະພາ ຄົບຮອບ 134 ປີນີ້, ຜູ້ຂຽນໄດ້ສັນຫາມາເລົ່າກ່ຽວກັບຂ່າວໜ້າສົນໃຈທີ່ພົວພັນກັບແຮງງານ ກໍຄືຜູ້ອອກແຮງງານຢູ່ໃນບາງປະເທດ ເຊັ່ນຢູ່ຟີລິບປິນ ແລະ ອົດສະຕຣາລີ.
ຂໍເລີ່ມຈາກ ຟີລິບປິນ ເຊິ່ງເປັນປະເທດລະດັບຫົວແຖວຂອງໂລກທີ່ສົ່ງອອກແຮງງານໄປເຮັດວຽກຢູ່ຕ່າງປະເທດຈົນສາມາດສົ່ງເງິນຕາຕ່າງປະເທດກັບຄືນປະເທດໄດ້ເປັນກອບເປັນກຳອີ່ຫລີ ໂດຍສະເລ່ຍບໍ່ຫລຸດປີລະຫລາຍກວ່າ 25 ຕື້ໂດລາສະຫະລັດ (ສະຖິຕິເມື່ອປີ 2015). ແນວໃດກໍດີ, ຊາວຜູ້ອອກແຮງງານຟີລິບປິນໃນຕ່າງແດນເຫັນວ່າ ລັດຖະບານຄວນມີວິທີການທີ່ເປັນຮູບປະທຳ ເພື່ອສ້າງໂອກາດອຳນວຍຄວາມສະດວກໃຫ້ແຮງງານໃນການຊອກວຽກເຮັດຢູ່ຕ່າງປະເທດຫລາຍຂຶ້ນ ໂດຍແກ້ໄຂຂອດການໃຊ້ຈ່າຍທີ່ບໍ່ຈຳເປັນໃນການແລ່ນເອກະສານ ທີ່ເຫັນວ່າມີລາຄາສູງເກີນໄປ ຄືຄົນຟີລິບປິນແຕ່ລະຄົນທີ່ຕ້ອງການໄປອອກແຮງງານຢູ່ຕ່າງປະເທດນັ້ນ ຕ້ອງໄດ້ເສຍເງິນປະມານ 3.400 ໂດລາສະຫະລັດ ເພື່ອເປັນຄ່າໃຊ້ຈ່າຍໃຫ້ທາງການ ກໍຄືບໍລິສັດຈັດຫາວຽກເຊັ່ນ: ຈ່າຍຄ່າຂຶ້ນທະບຽນ ແລະ ໜັງສືເດີນທາງ. ດ້ວຍອັດຕາການໃຊ້ຈ່າຍດັ່ງກ່າວ, ໜ່ວຍງານຈັດຫາວຽກຂອງລັດຖະບານຟີລິບປິນສາມາດສ້າງລາຍຮັບໄດ້ເຖິງປີລະ 1.382 ລ້ານໂດລາສະຫະລັດ. ແຮງງານຟີລິບປິນຕ້ອງການໃຫ້ລັດຖະບານຕັດຮອນຂອດຕ່າງໆທີ່ບໍ່ຈຳເປັນລົງ ເພື່ອໃຫ້ລາຍຈ່າຍຫລຸດລົງ ເພາະວ່າຄ່າໃຊ້ຈ່າຍດັ່ງກ່າວນັ້ນມີຫລາຍຂອດຊ້ຳຊ້ອນກັບຄ່າໃຊ້ຈ່າຍທີ່ແຮງງານຕ້ອງໄດ້ຈ່າຍໃນບັນດາປະເທດປາຍທາງຢູ່ແລ້ວ. ສຳລັບຢູ່ປະເທດອົດສະຕຣາລີນັ້ນ, ທາງການໄດ້ໃຫ້ຮູ້ໃນວັນທີ 19 ມີນາ 2018 ກ່ຽວກັບນະໂຍບາຍດຶງດູດເອົາແຮງງານຕ່າງປະເທດລະດັບຫົວກະທິທີ່ມີຄວາມເກັ່ງກ້າສາມາດໃນຂົງເຂດເຕັກໂນໂລຊີຂັ້ນສູງເຂົ້າໄປເຮັດວຽກຢູ່ອົດສະຕຣາລີ ດ້ວຍການອອກວີຊາພິເສດໃຫ້ແຮງງານຫົວສະໝອງທີ່ຈະໄດ້ຮັບເງິນເດືອນສູງເຖິງ 180.000 ໂດລາສະຫະລັດຕໍ່ປີຕໍ່ຄົນ. ທາງການອະນຸຍາດໃຫ້ບໍລິສັດພາຍໃນປະເທດເປັນເຈົ້າການເລືອກສັນເອົາແຮງງານຊ່ຽວຊານລະດັບນີ້. ວີຊາປະເພດສອງຮອງລົງມານັ້ນແມ່ນເພື່ອດຶງດູດແຮງງານລະດັບຊ່ຽວຊານໃນຂະແໜງວິທະຍາສາດ, ເຕັກໂນໂລຊີເຕັກນິກ ແລະ ຄະນິດສາດ ເອີ້ນວ່າ: STEM. ວຽກສັນຫາແຮງງານຊ່ຽວຊານຂະແໜງນີ້ ທາງການມອບໃຫ້ບັນດາບໍລິສັດທີ່ເລີ່ມປະກອບການຮັບຜິດຊອບນຳເຂົ້າ. ຂ່າວບອກວ່າ: ບັນດາບໍລິສັດອົດສະຕຣາລີມີສິດນຳເຂົ້າແຮງງານຂັ້ນຫົວກະທິຕາມວີຊາປະເພດທີ 1 ນັ້ນ ຕ້ອງບໍ່ເກີນ 20 ຄົນຕໍ່ປີ, ສ່ວນບັນດາບໍລິສັດທີ່ເລີ່ມປະກອບການໃໝ່ນັ້ນ ສາມາດນຳເຂົ້າແຮງງານຊ່ຽວຊານຂະແໜງ STEM ບໍ່ເກີນ 5 ຄົນຕໍ່ປີ. ບັນດາບໍລິສັດທີ່ຈະສາມາດນຳເຂົ້າແຮງງານລະດັບສູງຈາກຕ່າງປະເທດຕາມລະບົບວີຊາຊະນິດໃໝ່ນີ້ ຕ້ອງມີລາຍຮັບຫລາຍກວ່າ 4 ລ້ານໂດລາສະຫະລັດຕໍ່ປີ.
