ໂຄ​ວິດ-19 ຍັງ​ຈະ​ຢູ່​ນຳ​ພວກ​ເຮົາ​ອີກ​ດົນ

ໂຄ​ວິດ-19 ຍັງ​ຈະ​ຢູ່​ນຳ​ພວກ​ເຮົາ​ອີກ​ດົນ - Untitled design - ໂຄ​ວິດ-19 ຍັງ​ຈະ​ຢູ່​ນຳ​ພວກ​ເຮົາ​ອີກ​ດົນ

ໂດຍ: ທິດ​ກໍ່າ

ອີງ​ຕາມ​ຂໍ້​ມູນ​ຈາກ​ອົງການ​ອະນາ​ໄມ​ໂລກ ​ໄດ້​ກ່າວ​ວ່າ: ການ​ແຜ່​ລະບາດ​ຂອງ​ໄວຣັສ​ໂຄ​ວິດ-19 ອາດ​ແກ່ຍາວ​​ໄປ​ເຖິງ 4 ຫລື 5 ປີ​ຈຶ່ງ​ຈະ​ສາມາດ​ຄວບ​ຄຸມ​ໄດ້. ການ​ພັດທະນາ​ວັກ​ແຊງ​ທີ່​ມີ​ປະສິດທິພາບ ​ແລະ ມາດ​ຕະການ ນັບ​ທັງ​ການ​ກັກ​ຕົວ​ຜູ້​ຕິດ​ເຊື້ອທີ່​ປະສົບ​ຄວາມ​ສຳ​ເລັດ​ຖື​ເປັນ​ປັດ​ໄຈ​ໜຶ່ງ​ຈະ​ຕັດສິນ​ວ່າ​ໄລຍະ​ເວລາ​ການ​ແຜ່​ລະບາດ​ຂອງ​ໄວຣັສ​ໂຄ​ວິດ-19 ນັ້ນຈະ​ຍາວ​ນານ​ພຽງ​ໃດ. ຂໍ້​ມູນ​ດັ່ງກ່າວ​ແມ່ນ​ໄດ້​ມາ​ຈາກ​ຫົວໜ້າ​ນັກວິທະຍາສາດ​ປະຈຳ​ອົງການ​ອະນາ​ໄມ​ໂລກ ​ແລະ ຄຳ​ເຕືອນ​ດັ່ງກ່າວ​ໄດ້​ມີ​ຂຶ້ນຫລັງ​ຈາກ​ທ່ານ ດຣ. ​ໄມ ​ໄຣອັນ ຜູ້ອຳນວຍການ​ສຸກ​ເສີນ​ດ້ານ​ສຸຂະພາບ​ສັງກັດ​ອົງການ​ອະນາ​ໄມ​ໂລກ ​ໄດ້​ຖະ​ແຫລ​ງ​ໃນ​ວັນ​ທີ 13 ພຶດສະພາ 2020 ທີ່​ຜ່ານ​ມາ ​ເຖິງ​ສະຖານະ​ການການ​ແຜ່​ລະບາດ​ຂອງ​ໂຄ​ວິດ-19.

​ເພາະສະນັ້ນ, ​ເຮົາ​ຈຶ່ງ​ສາມາດ​ເວົ້າ​ໄດ້​ວ່າ​ພະຍາດ​ໂຄ​ວິດ-19 ມັນ​ກໍ​ປຽບ​ເໝືອນ​ກັບ​ພະຍາດ​ຊະນິດ​ອື່ນໆ​ທີ່​ຂ້າມວນມະນຸດ ​ແລະ ສັດ​ເດຍລະສານ​ມາ​ແລ້ວ​ຫລາຍ​ຕໍ່​ຫລາຍ​​ເຊັ່ນ: ພະຍາດ​ເອດ​ສ໌, ຊາຣ໌, ອີ​ໂບລາ ​ແລະ ພະຍາດ​ຊະນິດ​ອື່ນໆ​ ທີ່​ໄດ້​ເກີດ​ມາ​ຄວບ​ຄູ່​ກັບ​ການ​ດຳລົງ​ຊີວິດ​ຂອງ​ມະນຸດ​ເຮົາ​ໃນ​ຫລາຍ​ທົດ​ສະ​ວັດ ກໍ​ຄື​ໃນ​ໄລຍະ​ປັດຈຸບັນ, ຕ່າງ​ແຕ່​ວ່າ​ສິ່ງ​ທີ່​ແຕກ​ຕ່າງ​ຂອງ​ພະຍາດ​ໂຄ​ວິດ-19 ນີ້​ພຽງ​ແຕ່​ມັນ​ເປັນ​ພະຍາດ​ທີ່​ເກີດ​ຂຶ້ນມາ​ໃໝ່, ຈາກ​ສິ່ງ​ໃໝ່ໆ​ທີ່​ມະນຸດ ຫລື ນັກວິທະຍາສາດ​ຍັງ​ບໍ່​ທັນ​ສາມາດ​ຄົ້ນຄວ້າ​ຢາ​ມາ​ປາບ​ປາມ ຫລື ປ້ອງ​ກັນ​ສະກັດ​ກັ້ນ​ໂດຍ​ກົງ​ໃຫ້ຫາ​ຍຂາດ​ທັນ​ໃນ​ເວລາ​ປັດຈຸບັນ​ທັນ​ດ່ວນ. ການຄົ້ນຄວ້າ​ຢາ​ແຕ່ລະ​ຂະໜານ​ສາມາດ​ເອົາ​ມາ​ປິ່ນປົວ ​ແລະ ປາບ​ພະຍາດ​ທີ່​ເກີດ​ຂຶ້ນ​ແຕ່​ລະ​ຊະນິດນັ້ນ ມັນ​ກໍ​ຕ້ອງ​ໄດ້​ໃຊ້​ເວລາ​ຫລາຍ​ປີກ​ວ່າ​ຈະ​ສຳ​ເລັດ​ໃນ​ແຕ່ລະ​ຂັ້ນຕອນ​ຢ່າງ​ເພິ່ງ​ພໍ​ໃຈ ​ແລະ ຮັບປະກັນ​ທາງ​ດ້ານ​ຄຸນ​ນະພາ​ບ. ຕົວຢ່າງ​ຢູ່​ໃນ​ປະ​ເທດ​ເຮົາ ຄື​ພະຍາດ​ໄຂ້ຍຸງ​ເຖິງ​ວ່າ​ມາ​ຮອດ​ປັດຈຸບັນ​ໄດ້​ມີ​ຢາ​ປົວ​ແລ້ວ ​ແຕ່​ກໍ​ໄດ້​ສັງຫານ​ຄົນ​ລາວ​ໃນ​ແຕ່ລະ​ປີ​ມີ​ຈຳນວນ​ບໍ່​ໜ້ອຍ.

​ເມື່ອ​ຕັ້ງ​ໂຈດ​ກັນ​ວ່າ: ພະຍາດ​ໂຄ​ວິດ-19 ມັນ​ເກີດ​ມາ​ຈາກ​ໃສ ? ຖ້າ​ຈະ​ຊອກ​ຫາ​ຄຳ​ຕອບ​ມັນ​ກໍ​ບໍ່​ນອກ​ເໜືອ​ຈາກ​ສາມ​ແຫ​ລ່ງ​ໃຫຍ່ໆ​ຕົ້ນຕໍ​ຄື: ຈາກ​ຄົນ, ຈາກ​ສັດ​ເດຍລະສານ ​ແລະ ຈາກ​ທຳ​ມະ​ຊາດ ​ແລະ ສິ່ງ​ແວດ​ລ້ອມ ​ເຊິ່ງລວມ​ໃນ​ສາມ​ປັດ​ໄຈ​ນີ້​ກໍ​ແມ່ນ​ມາ​ຈາກ​ມື​ຂອງ​ມະນຸດ​ເປັນ​ຜູ້​ທຳລາຍ​ໂລກ. ​ໃນ​ຂະ​ບວນວິດ​ທະ​ນາ​ການ​ຂອງ​ໂລກ ນັບ​ແຕ່​ອະດີດ​ເຖິງ​ປັດຈຸບັນ, ມະນຸດ​ເຮົາ​ມັກ​ສ້າງ​ສິ່ງ​ໃໝ່​ຂຶ້ນມາ ​ເພື່ອ​ຮັບ​ໃຊ້​ການ​ດຳລົງ​ຊີວິດ​ຕົນ​ເອງ, ສັງຄົມ ​ແລະ ປະ​ເທດ​ຊາດ​ຢ່າງ​ບໍ່​ຢຸດ​ຢັ້ງ. ຍິ່ງ​ໄປ​ກວ່າ​ນັ້ນ ຍັງ​ມີ​ການ​ແກ້ງ​ແຍ້​ງ​ແຂ່ງຂັນ​ກັນ ​ເພື່ອ​ເອົາ​ລັດ​ເອົາ​ປຽບ, ​ເພື່ອ​ຢູ່​ລອດ ​ແລະ ​ເພື່ອ​ຄວາມ​ຍິ່ງ​ໃຫຍ່​ຂອງ​ຊັ້ນຄົນ, ທັງ​ເປັນ​ການ​ປ້ອງ​ກັນ​ການ​ຮຸກ​ຮານ​ຈາກ​ໂລກ​ພາຍ​ນອກ​ທີ່​ຈະ​ເຂົ້າມາ​ຮຸກ​ຮານ. ຈາກ​ປັດ​ໄຈ​ດັ່ງກ່າວ ຈຶ່ງ​ກໍ່​ໃຫ້​ເກີດ​ມີ​ການ​ຜະລິດ​ວັດຖຸອຸປະກອນ​ທີ່​ນັບ​ມື້ທັນ​ສະ​ໄໝ​ແຕ່​ນ້ອຍ​ຫາ​ໃຫຍ່, ​ແຕ່​ຕໍ່າ​ຫາ​ສູງ ​ເພື່ອ​ຮັບ​ໃຊ້​ການ​ດຳລົງ​ຊີວິດ​ການ​ຍືນ​ຍົງ​ຄົງ​ຕົວ ​ແລະ ​ເພື່ອ​ຕອບ​ຕ້ານ​ຕອບ​ໂຕ້​ອີກ​ຝ່າຍ​ໜຶ່ງ​ທີ່​ຈະ​ມາຍາ​ດ​ແຍ່ງ​ຜົນ​ປະ​ໂຫຍ​ດ ຈົນ​ກໍ່​ໃຫ້​ເກີດ​ສົງຄາມ​ປະ​ຫັດ​ປະຫານ ​ແລະ ຄວາມ​ຂັດ​ແຍ່ງ​ກັນ​ໃນ​ໂລກ.

ອີງ​ໃສ່​ປັດ​ໄຈ ​ແລະ ​ເງື່ອນ​ໄຂ​ດັ່ງກ່າວ ຈຶ່ງ​ເຮັດ​ໃຫ້​ແຕ່ລະ​ປະ​ເທດ​ຕ້ອງ​ສຸມ​ໃສ່​ການ​ພັດທະນາ​ເສດຖະກິດ-ສັງຄົມ ​ເພື່ອ​ຄວາມ​ຍືນ​ຍົງ ​ແລະ ກ້າວໜ້າ​ຂອງ​ແຕ່ລະ​ປະ​ເທດ. ​ໃນ​ຍຸກ​ປັດຈຸບັນ ການ​ແກ້ງ​ແຍ້​​ງ​ແຂ່ງຂັນ​ກັນ​ທາງດ້ານ​ຜົນ​ປະ​ໂຫຍ​ດ ນັບ​ແຕ່​ສ່ວນ​ບຸກຄົນ​ໄປ​ຫາ​ລວມໝູ່, ທັງ​ມີ​ການ​ແບ່ງ​ແຍກ​ກຸ້ມ​ແກ້ງ ​ເພື່ອ​ຍາດ​ແຍ່ງ​ເອົາ​ກາລະ​ໂອກາດ ຜົນ​ປະ​ໂຫຍ​ດມາ​ໃຫ້​ຕົນ​ເອງ, ພວກ​ພ້ອງ ​ແລະ ປະ​ເທດ​ຊາດ​ນັ້ນ ຖື​ເປັນ​ກົດ​ເກນ​ອັດຕະວິ​ໄສ, ພາວະ​ວິ​ໄສ​ຂອງ​ຜູ້ນຳ​ໃນ​ປະ​ເທດ ​ແລະ ​ໃນ​ໂລກ. ສິ່ງ​ທີ່​ໜ້າ​ໜັກ​ໃຈ ​ແລະ ​ເປັນ​ຫ່ວງ​ໃນ​ການ​ກະທຳ​ຂອງ​ມວນ​ມະນຸດ​ໃນ​ໂລກ​ນີ້​ກໍ​ແມ່ນ​ພາກັນ​ທຳລາຍ​ທຳ​ມະ​ຊາດ ​ແລະ ສິ່ງ​ແວດ​ລ້ອມ ຈົນ​ກໍ່​ໃຫ້​ເກີດ​ການ​ປ່ຽນ​ແປງ​ຂອງ​ດິນ​ຟ້າ​ອາກາດ​ເຊັ່ນ: ​ເກີດ​ພາຍຸ, ​ແຜ່ນດິນ​ໄຫວ, ຮ້ອນ​ໂພດ, ໜາວ​ໂພດ, ​ເກີດ​ແລ້ງ, ​ເກີດ​ຖ້ວມ ​ເຮັດ​ໃຫ້​ສະພາບ​ດິນ​ຟ້າ​ອາກາດ​ບໍ່​ເປັນ​ໄປ​ຕາມ​ລະດູ​ການ. ນອກຈາກ​ນັ້ນ ກໍ​ເກີດ​ມີ​ພະຍາດ​ບາດ​ເຍົາ ທັງ​ອັນ​ເກົ່າ, ອັນ​ໃໝ່ ​ແລະ ມີ​ຂຶ້ນຕິກໆ ຈົນ​ມະນຸດ​ບໍ່​ສາມາດ​ປ້ອງ​ກັນ ​ແລະ ສະກັດ​ກັ້ນ​ໄດ້​ຢ່າງ​ທ່ວງທັນ ​ເພື່ອ​ຮັບ​ມື​ຕໍ່​ຄວາມ​ຍືນ​ຍົງ ​ແລະ ການ​ດຳລົງ​ຊີວິດ​ໃຫ້​ຕົນ​ເອງ ​ແລະ ສັງຄົມ.

ຫາກ​ຕັ້ງ​ໂຈດ​ກັນ​ວ່າ, ​ເພື່ອ​ປ້ອງ​ກັນ​ໄພພິບັດ​ຕ່າງໆ, ​ໂຣກລະບາດ, ​ໂຣຄາ​ພະຍາດ​ທີ່​ຈະ​ມາ​ຮຸກ​ຮານ​ຄວາມ​ສະຫງົບ​ສຸກ​ຂອງ​ບ້ານ​ເມືອງ​ ພວກ​ເຮົາ​ຕ້ອງ​ເຮັດ​ແນວ​ໃດ ? ຄຳ​ຕອບ​ໂຈດ​ກໍ​ຄື ຕ້ອງ​ພ້ອມ​ກັນ​ປົກ​ປັກ​ຮັກສາ​ທຳ​ມະ​ຊາດ ​ແລະ ສິ່ງ​ແວດ​ລ້ອມ​ໃຫ້​ຍືນ​ຍົງ​ຄົງ​ກະ​ພັນ, ທັງ​ໃກ້ຊິດ ​ແລະ ​ເປັນ​ມິດ​ກັບ​ທຳ​ມະ​ຊາດ, ທັງ​ປູກຝັງ​ຈິດ​ສຳນຶກ​ຂອງ​ຄົນ​ເຮົາ​ໃຫ້​ຢູ່​ໃນ​ກິ​ເຫລດອັນ​ເໝາະ​ສົມ. ​ໄປ​ຄຽງ​ຄູ່​ກັນນັ້ນ, ກໍ​ຕ້ອງ​ປັບ​ປ່ຽນ​ແບບ​ແຜນການ​ດຳລົງ​ຊີວິດ​ໃຫ້​ສອດຄ່ອງ​ກັບ​ກາລະ​ໂອກາດ​ຍຸກ​ສະ​ໄໝ ​ເພື່ອ​ຄວາມ​ຢູ່​ລອດ​ຕະຫລອດ​ໄປ. ດັ່ງ​ໂຄ​ວິດ-19 ອັນ​ເປັນ​ເຊື້ອພະຍາດ​ເກີດ​ມາ​ໃໝ່, ຊະນິດ​ໃໝ່ ​ໄດ້​ເຮັດ​ໃຫ້​ພວກ​ເຮົາ​ມີ​ປະສົບ​ປະການ, ວິວັດທະນາ​ການ​ໃນ​ການ​ດຳລົງ​ຊີວິດ, ກິນ​ສະອາດ, ຢູ່​ສະອາດ, ຮູ້​ແຍກ​ຕົນ​ເອງ, ​ແຍກ​ກຸ່ມ​ກ້ອນ, ໝັ່ນ​ລ້າງ​ມື​ດ້ວຍ​ເຈ​ວ, ການ​ໄປ​ມາ​ກໍ​ຕ້ອງ​ໄດ້​ໃສ່​ຜ້າ​ປິດ​ປາກ​ປິດ​ດັງ. ອັນ​ສຳຄັນ​ທີ່​ສຸດ​ແມ່ນ​ການ​ອອກກຳລັງ​ກາຍ ​ເພື່ອ​ສ້າງ​ຄວາມ​ຕ້ານທານ ​ແລະ ປ້ອງ​ກັນ​ໂຣກລະບາດ​ໂຄ​ວິດ-19 ​ເພາະ​ມັນ​ຍັງ​ຈະ​ຝັງ​ ຫລື ລອຍ​ນວນ​ຢູ່​ກັບ​ພວກ​ເຮົາ, ຂ້າ​ພວກ​ເຮົາ ​ແລະ ມັນ​ກໍ​ຈະ​ຢູ່​ນຳ​ພວກ​ເຮົາ​ຫລາຍ​ປີ ຈົນ​ກວ່າ​ນັກວິທະຍາສາດ​ຜະລິດ​ຢາ​ມາ​ປາບ ​ແລະ ປ້ອງ​ກັນ​ໃຫ້​ມັນ​ດັບ​ວາຍ​ຈາກ​ໂລກ​ມະນຸດ​ໂດຍ​ປະລິຍາຍ.

ສຳລັບ ສປປ ລາວ, ຄົນ​ລາວ​ພວກ​ເຮົາ​ໄດ້​ພາລະກິດ​ອັນ​ສຳຄັນ ຂໍ​ພຽງ​ແຕ່​ປະຕິບັດ​ບັນດາ​ມະຕິ, ຄຳ​ສັ່ງ​ຕ່າງໆ​ຂອງ​ການ​ນຳ ກໍ​ຄື​ຄະນະ​ສະ​ເພາະ​ກິດ​ກໍ​ເປັນ​ອັນວ່າ​ພວກ​ເຮົາ​ຈະ​ຫ່າງ​ໄກ​ກັບ​ໂຄ​ວິດ-19 ​ໄດ້​ຢ່າງ​ແນ່ນອນ.

ໂຄ​ວິດ-19 ຍັງ​ຈະ​ຢູ່​ນຳ​ພວກ​ເຮົາ​ອີກ​ດົນ - Wave100S AD to Website 2020 0 - ໂຄ​ວິດ-19 ຍັງ​ຈະ​ຢູ່​ນຳ​ພວກ​ເຮົາ​ອີກ​ດົນ

ໂຄ​ວິດ-19 ຍັງ​ຈະ​ຢູ່​ນຳ​ພວກ​ເຮົາ​ອີກ​ດົນ - WhatsApp Image 2020 05 27 at 5 - ໂຄ​ວິດ-19 ຍັງ​ຈະ​ຢູ່​ນຳ​ພວກ​ເຮົາ​ອີກ​ດົນ
ໂຄ​ວິດ-19 ຍັງ​ຈະ​ຢູ່​ນຳ​ພວກ​ເຮົາ​ອີກ​ດົນ - WhatsApp Image 2020 05 27 at 5 - ໂຄ​ວິດ-19 ຍັງ​ຈະ​ຢູ່​ນຳ​ພວກ​ເຮົາ​ອີກ​ດົນ
error: Alert: ເນື້ອຫາຂ່າວມີລິຂະສິດ !!