ວັນ​ທີ 1 ມິຖຸນາ ກັບ​ຄວາມ​ໝາຍ​ສອງ​ວັນ​ປະຫວັດສາດ

ວັນ​ທີ 1 ມິຖຸນາ ກັບ​ຄວາມ​ໝາຍ​ສອງ​ວັນ​ປະຫວັດສາດ - Untitled design - ວັນ​ທີ 1 ມິຖຸນາ ກັບ​ຄວາມ​ໝາຍ​ສອງ​ວັນ​ປະຫວັດສາດ

ໂດຍ: ທິດ​ກໍ່າ

ອີກ​ບໍ່ພໍ​ເທົ່າ​ໃດ​ວັນ​ກໍ​ຈະ​ເຖິງ​ວັນ​ປະຫວັດສາດ​ຂອງ​ຊາດ ​ແລະ ສາກົນ ຄື​ວັນ​ທີ 1 ມິຖຸນາ 2020. ​ໃນ​ຄວາມ​ໝາຍ​ສຳຄັນ​ຂອງ​ວັນ​ດັ່ງກ່າວ​ນີ້​ແມ່ນ​ເປັນ​ວັນ​ເດັກ​ສາກົນ ​ແລະ ວັນ​ປູກ​ຕົ້ນ​ໄມ້​ແຫ່ງ​ຊາດ. ​ໃນ​ທຸກໆ​ປີ ພໍ​ເຖິງ​ວັນ​ທີ 1 ມິຖຸນາ ​ເດັກນ້ອຍ​ໃນ​ທົ່ວ​ໂລກ ກໍ​ຄື​ເດັກນ້ອຍ​ລາວ ​ໃຜ​ກໍ​ມີ​ຄວາມ​ເບີກບານ​ມ່ວນ​ຊື່ນ​ທີ່​ຈະ​ໄດ້​ພາກັນ​ຕົບມື, ຮ້ອງ​ລຳ​ທຳ​​ເພງ, ຈະ​ໄດ້​ກິນ​ເຂົ້າຕົ້ມ​ເຂົ້າໜົມ, ​ໄດ້​ເຄື່ອນ​ໄຫວ​ກິດຈະກຳ, ​ໄປ​ທ່ຽວ​ທັດສະນະ​ສຶກສາ​ພາ​ເພີນ​ຕາມ​ສະຖານ​ທີ່​ສຳຄັນ​ຕ່າງໆ ອັນ​ເປັນ​ການ​ແບ່ງປັນ​ຄວາມ​ຮູ້​ຄວາມ​ສາມາດ, ຄວາມສຸກ​ສັນ​ຫັນ​ສາ​ທີ່​ຄູ-ອາຈານ ຫລື ຜູ້​ປົກຄອງ​​ໄດ້​ຈັດ​ຫາ​ໃຫ້​ຕາມ​ການ​ປ່ຽນ​ແປງ​ໄປ​ຕາມ​ຍຸກ​ຕາມ​ສະ​ໄໝ. ດັ່ງ​ພວກ​ເຮົາ​ຮູ້​ນຳ​ກັນ​ແລ້ວ​ວ່າ: ການສະ​ເຫລີ​ມສະຫລອງ​ວັນ​ເດັກ​ສາກົນ​ໄດ້​ມີ​ມາ​ນານ​ແລ້ວ. ສຳລັບ​ປະ​ເທດ​ຊາດ​ຂອງ​ພວກ​ເຮົາ​ແມ່ນ​ມີ​ມາ​ແຕ່​ສະ​ໄໝ​ເຮັດ​ການ​ຕໍ່ສູ້​ປົດ​ປ່ອຍ​ຊາດ​ຕອນ​ຢູ່​ປ່າ​ຢູ່​ດົງ, ຢູ່​ຖ້ຳຢູ່​ຮູ​ຮ່ອມ​ຫ້ວຍ​ພູ​ເຂົາ ຈົນ​ມາ​ຮອດ​ສະ​ໄໝ​ສະຖາປະນາ​ສາທາລະນະ​ລັດ ປະຊາທິປະ​ໄຕ ປະຊາຊົນ​ລາວ ກໍ​ມີ​ອາຍຸ​ໄດ້ 40 ກວ່າ​ປີ​ແລ້ວ. ການ​ໃຫ້​ສັດຕະຍາບັນ​ແກ່​ແມ່ຍິງ ​ແລະ ​ເດັກນ້ອຍ ​ເປັນ​ການ​ຍົກ​ຖານະ​ບົດບາດ​ສິດ​ທີ່​ອົງການ​ສະຫະ​ປະຊາ​ຊາດ​ໄດ້​ວາງ​ອອກ​ໃນ​ການ​ຕ້ານ​ຄວາມ​ຮຸນ​ແຮງ​ຕໍ່​ເດັກ ​ແລະ ​ແມ່ຍິງ​ຕາມ​ກົດ​ບັດ​ຂອງ​ສາກົນ ກໍ​ຄື​ອົງການ​ສະຫະ​ປະຊາ​ຊາດ​ໄດ້​ວາງ​ອອກ.

ສຳລັບ ສປປ ລາວ​ພວກ​ເຮົາ ​ໃນ​ທຸກໆ​ປີ ​ເມື່ອ​ເຖິງ​ວັນ​ເດັກ​ສາກົນ ນັບ​ແຕ່​ຂັ້ນທ້ອງ​ຖິ່ນ​ຂຶ້ນຮອດ​ສູນ​ກາງ ​ໄດ້​ໃຫ້​ຄວາມ​ສຳຄັນ​ເປັນ​ຢ່າງ​ຍິ່ງ ​ໂດຍ​ຈັດ​ໃຫ້​ມີ​ກິດຈະກຳ​ຕ່າງໆ​ໃຫ້​ເດັກ​ມີ​ການ​ເຄື່ອນ​ໄຫວ​ສະ​ເຫລີ​ມສະຫລອງ​ວັນ​ດັ່ງກ່າວ​ຢ່າງ​ເບີກບານ​ມ່ວນ​ຊື່ນ​ເຊັ່ນ: ຈັດ​ກິດຈະກຳ​ເລົ່າ​ມູນ​ເຊື້ອວັນ​ເດັກ​ສາກົນ, ສະ​ແດງ​ສິລະ​ປະ​ວັນນະຄະດີ​ຂອງ​ຫລານ​ນ້ອຍ, ນຳພາ​ໄປ​ທັດສະນະ​ສຶກສາ​ຕາມ​ອານຸສອນ​ສະຖານ​ຂອງ​ຜູ້ນຳ, ຕາມ​ຫໍ​ມູນ​ເຊື້ອ, ຕາມ​ສວນ​ອຸດທິຍານ ​ແລະ ສະຖານ​ທີ່​ທ່ອງ​ທ່ຽວ​ອື່ນໆ​ທີ່​ເໝາະ​ສົມ. ສະ​ເພາະ​ປີ​ນີ້ ການຈັດ​ພິທີ​ສະ​ເຫລີ​ມສະຫລອງ​ອາດ​ມີ​ຄວາມ​ຫຍຸ້ງຍາກ ​ແລະ ຈຳກັດ ​ເພາະ​ເປັນ​ຊ່ວງ​ໄລຍະ​ທີ່ຢູ່​ໃນ​ວາລະ​ຜ່ອນຜັນ​ໃນ​ການ​ເຮັດ​ສົງຄາມ​ຕ້ານ​ເຊື້ອ​ໄວຣັສສາຍ​ພັນ​ໃໝ່​ໂຄ​ວິດ-19.

​ແນວ​ໃດ​ກໍ​ຕາມ, ອີງ​ໃສ່​ສະພາບ​ການ​ທີ່​ກ່າວ​ມາ​ຂ້າງ​ເທິງ​ນັ້ນ ການ​ຈັດ​ກິດຈະກຳ​ເພື່ອ​ສະຫລອງ​ວັນ​ເດັກ​ໃນ​ປີ​ນີ້​ຈະ​ເຮັດ​ນ້ອຍ ຫລື ​ໃຫຍ່, ຈະ​ດ້ວຍ​ວິທີ​ການ, ຮູບ​ການ​ໃດ​ກໍ​ຕາມ ສິ່ງ​ສຳຄັນ​ແມ່ນ​ໃຫ້​ມີ​ເນື້ອ​ໃນ​ຮັບປະກັນ​ຄວາມ​ໝາຍ​ຕໍ່​ວັນ​ປະຫວັດສາດ​ດັ່ງກ່າວ ​ເພາະ​ເດັກ​ເຍົາວະ​ຊົນ​ຄື​ໜໍ່​ແໜງ​ຂອງ​ສັງຄົມ, ຄື​ຊັບ​ສິນ ​ແລະ ທຶນຮອນ​ອັນ​ປະ​ເສີດ​ຂອງ​ຊາດ.

ສ່ວນວ່າ​ການ​ປູກ​ຕົ້ນ​ໄມ້​ນັ້ນ ອີງ​ຕາມ​ການ​ແຫ​ລ່ງຂ່າວ​ຈາກ​ກົມ​ປ່າ​ໄມ້ ກະຊວງ​ກະສິກຳ-ປ່າ​ໄມ້ ​ໄດ້​ມີ​ແຜນ​ປູກ​ໄມ້​ໃນ​ປີ​ນີ້ ຈຳນວນ​ເນື້ອທີ່​ທັງ​ໝົດ 590 ​ເຮັກຕາ​ໃນ​ທົ່ວ​ປະ​ເທດ. ສະ​ເພາະ​ຢູ່​ທ້ອງ​ຖິ່ນ​ຕ່າງໆ​ກໍ​ມີ​ຫລາຍ​ເມືອງ​ຫລາຍ​ແຂວງ​ໄດ້​ກະກຽມ​ເບ້ຍ​ໄມ້​ເພື່ອ​ປູກ​ໃນ​ວັນ​ດັ່ງກ່າວ​ຈຳນວນ​ຫລາຍ​ໝື່ນ​ຫລາຍ​ແສນ​ເບ້ຍ. ການ​ປູກ​ຕົ້ນ​ໄມ້​ໃນ​ວັນ​ປູກ​ຕົ້ນ​ໄມ້​ແຫ່ງ​ຊາດ​ຖື​ເປັນ​ກິດຈະກຳ​ອັນ​ສໍາຄັນ​ໃຫຍ່​ຫລວງ​ສຳລັບ​ປະ​ເທດ​ເຮົາ. ຍ້ອນ​ວ່າ​ແຜນ​ຍຸດ​ທະ​ສາດ​ໃນ​ການ​ປູກ​ປ່າ​ໃນ​ປະ​ເທດ​ເຮົາ​ໃນ​ປີ 2020 ຕ້ອງສູ້​ຊົນ​ໃຫ້​ມີ​ປ່າ​ປົກ​ຫຸ້ມ 70% ຂອງ​ພື້ນທີ່​ໃນ​ທົ່ວ​ປະ​ເທດ, ​ແຕ່​ຜ່ານ​ການ​ປະຕິບັດ​ຕົວ​ຈິງ​ໄດ້​ພຽງ​ແຕ່ 60% ຂອງ​ພື້ນທີ່​ທັງ​ໝົດ​ທົ່ວ​ປະ​ເທດ. ກໍ​ເປັນ​ອັນວ່າ​ພວກ​ເຮົາ​ຕ້ອງ​ສືບ​ຕໍ່​ບຸກທະລຸ​ໃຫ້​ໄດ້​ຕາມ​ມະຕິ​ຄັ້ງທີ X ຂອງ​ພັກ ກໍ​ຄື​ແຜນ​ພັດທະນາ​ເສດຖະກິດ-ສັງຄົມ ຄັ້ງທີ VIII ຂອງ​ລັດຖະບານ​ໄດ້​ວາງ​ອອກ.

ວັນ​ທີ 1 ມິຖຸນາ ກັບ​ຄວາມ​ໝາຍ​ສອງ​ວັນ​ປະຫວັດສາດ - Wave100S AD to Website 2020 0 - ວັນ​ທີ 1 ມິຖຸນາ ກັບ​ຄວາມ​ໝາຍ​ສອງ​ວັນ​ປະຫວັດສາດ

ມາ​ຮອດ​ປີ 2020 ນີ້, ​ເຫັນ​ວ່າການ​ເຄື່ອນ​ໄຫວ​ຂະ​ບວນການ​ສ້າງສາ​ພັດທະນາ​ປະ​ເທດ​ຊາດ​ໃນ​ທຸກຂະ​ບວນການ, ທຸກຂະ​ແໜງ​ການ​ຂອງ​ພັກ ​ແລະ ລັດ​ພວກ​ເຮົາ​ພວມ​ຢູ່​ໃນ​ໄລຍະ​ທ້າຍ​ສະ​ໄໝ​ຂອງ​ການ​ຜັນ​ຂະຫຍາຍ​ມະຕິ​ຄັ້ງທີ X ຂອງ​ພັກ ​ແລະ ​ແຜນ​ພັດທະນາ​ເສດຖະກິດ-ສັງຄົມ​ແຫ່ງ​ລັດ ຄັ້ງທີ VIII ​ແລະ ຍັງພຽງ​ອີກ​ປີກ​ວ່າ ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຂອງ​ພັກ ຄັ້ງທີ XI ກໍ​ຈະ​ໄດ້​ໄຂ​ຂຶ້ນທ່າມກາງ​ຜົນສໍາ​ເລັດ​ໃນ​ຫລາຍ​ດ້ານ.

​ໃນ​ປີ 2020 ​ເຖິງ​ວ່າ​ພວກ​ເຮົາ​ມີ​ອຸປະສັກ​ຫລາຍ​ດ້ານ​ມາ​ກົດ​ໜ່ວງ​ທຳລາຍ​ການ​ຂະຫຍາຍຕົວ​ຂອງ​ລະບົບ​ເສດຖະກິດ-ສັງຄົມ​ຂອງ​ປະ​ເທດ ​ໂດຍ​ສະ​ເພາະ​ພະຍາດ​ໂຄ​ວິດ-19 ​ແຕ່​ພວກ​ເຮົາ​ກໍ​ສາມາດ​ຜ່ານ​ຜ່າ ​ແລະ ​ໄດ້​ຮັບ​ໄຊຊະນະ​ຢ່າງ​ໃຫຍ່​ຫລວງ​ໃນ​ການ​ຕ້ານ ​ແລະ ສະກັດ​ກັ້ນການ​ແຜ່​ລະບາດ​ຂອງ​ເຊື້ອພະຍາດ​ດັ່ງກ່າວ​​ໄດ້​ເປັນ​ຢ່າງ​ດີ ​ເປັນຕົ້ນຜູ້​ຕິດ​ເຊື້ອ​ໃນ​ຈຳນວນ​ພຽງ 19 ຄົນ ​ແລະ ບໍ່​ທັນ​ມີ​ບຸກຄົນ​ໃດ​ເສຍ​ຊີວິດ. ມາ​ຮອດ​ປັດຈຸບັນ ກໍ​ຖື​ວ່າ​ໄດ້​ປິ່ນປົວ​ໃຫ້ຫາ​ຍດີ​ໄປ​ແລ້ວ 16 ຄົນ ຍັງພຽງ 3 ຄົນ​ເທົ່າ​ນັ້ນ.

​ເຖິງ​ຢ່າງ​ໃດ​ກໍ​ດີ, ການ​ແຜ່​ລະບາດ​ຂອງ​ໂຄ​ວິດ-19 ມັນ​ໄດ້​ມະ​ຫັບ​ມະຫາຍ​ໄປ​ຈາກ​ເມືອງ​ລາວ, ຄົນ​ລາວ​ເຮົາ 40 ກວ່າ​ວັນ​ແລ້ວ. ປັດຈຸບັນ ພວກ​ເຮົາ​ຍັງ​ຢູ່​ຊ່ວງ​ໄລຍະ​ຜ່ອນຜັນ ​ແລະ ມີ​ຫລາຍ​ມາດ​ຕະການ​ໄດ້​ເປີດ​ກວ້າງ ​ໂດຍ​ອະນຸຍາດ​ໃຫ້​ທຸກຂະ​ແໜງ​ການ​ວຽກ​ງານ​ກັບ​ມາ​ດຳ​ເນີນ​ວຽກ​ງານ​ໃຫ້​​ເປັນ​ປົກກະຕິ​ຄື​ເກົ່າ. ກໍ​ຫວັງ​ວ່າ​ງານ​ສະ​ເຫລີ​ມສະຫລອງ​ວັນ​ເດັກ​ສາກົນ ​ແລະ ວັນ​ປູກ​ຕົ້ນ​ໄມ້​ແຫ່ງ​ຊາດ​ປີ​ນີ້​ຈະ​ດຳ​ເນີນ​ໄປ​ຢ່າງ​ມີ​ເນື້ອ​ໃນ ​ແລະ ມີ​ຜົນສໍາ​ເລັດ​ໄປ​ໂດຍ​ດີ.

ວັນ​ທີ 1 ມິຖຸນາ ກັບ​ຄວາມ​ໝາຍ​ສອງ​ວັນ​ປະຫວັດສາດ - WhatsApp Image 2020 05 27 at 5 - ວັນ​ທີ 1 ມິຖຸນາ ກັບ​ຄວາມ​ໝາຍ​ສອງ​ວັນ​ປະຫວັດສາດ
ວັນ​ທີ 1 ມິຖຸນາ ກັບ​ຄວາມ​ໝາຍ​ສອງ​ວັນ​ປະຫວັດສາດ - WhatsApp Image 2020 05 27 at 5 - ວັນ​ທີ 1 ມິຖຸນາ ກັບ​ຄວາມ​ໝາຍ​ສອງ​ວັນ​ປະຫວັດສາດ
error: Alert: ເນື້ອຫາຂ່າວມີລິຂະສິດ !!