​ເດັກ​ເຍົາວະ​ຊົນ​ຄື​ຊັບພະຍາກອນ​ອັນ​ປະ​ເສີດ​ຂອງ​ຊາດ

​ເດັກ​ເຍົາວະ​ຊົນ​ຄື​ຊັບພະຍາກອນ​ອັນ​ປະ​ເສີດ​ຂອງ​ຊາດ - 55 - ​ເດັກ​ເຍົາວະ​ຊົນ​ຄື​ຊັບພະຍາກອນ​ອັນ​ປະ​ເສີດ​ຂອງ​ຊາດ
​ເດັກ​ເຍົາວະ​ຊົນ​ຄື​ຊັບພະຍາກອນ​ອັນ​ປະ​ເສີດ​ຂອງ​ຊາດ - Untitled design - ​ເດັກ​ເຍົາວະ​ຊົນ​ຄື​ຊັບພະຍາກອນ​ອັນ​ປະ​ເສີດ​ຂອງ​ຊາດ

ໂດຍ: ທິດ​ກໍ່າ

​ເດັກນ້ອຍ​ໃນ​ວັນ​ນີ້ ຄື​ຜູ້​ໃຫຍ່​ໃນ​ວັນ​ໜ້າ ​ເຂົາ​ຈະ​ກາຍ​ເປັນ​ຊັບພະຍາກອນ​ອັນ​ປະ​ເສີດ​ຂອງຊາດ​ໃນ​ອະນາຄົດ ຍ້ອນ​ຄົນ​ເຮົາ​ເປັນ​ຜູ້​ສ້າງ​ປະຫວັດສາດ ​ແລະ ສາມາດ​ເຮັດ​ໄດ້​ທຸກ​ສິ່ງ​ທຸກ​ຢ່າງ ​ເພື່ອ​ດັດ​ແປງ​ທຳ​ມະ​ຊາດ, ຜະລິດ​ວັດຖຸ​ສິ່ງ​ຂອງ​ມາ​ຮັບ​ໃຊ້​ຕົນ​ເອງ ​ແລະ ປະ​ເທດ​ຊາດ ຈຶ່ງ​ຖື​ເອົາ​ການ​ສ້າງ​ຄົນ ກໍ​ຄື​ສ້າງ​ເດັກ​ເຍົາວະ​ຊົນ​ເປັນ​ຂໍ​ກຸນ​ແຈ ​ເພື່ອ​ສືບ​ທອດ​ພາລະກິດ​ຂອງ​ຊາດ​ໃນ​ວັນ​ນີ້ ​ແລະ ວັນ​ໜ້າ. ປະ​ເທດ​ຊາດ​ຂອງ​ພວກ​ເຮົາ​ຈະ​ຈະ​ເລີ​ນຮັ່ງມີ, ຮຸ່ງ​ເຮືອງ​ສີວິ​ໄລ​ໃນ​ອະນາຄົດ ກໍ​ຄື​ຕໍ່ໜ້າ​ຍາວ​ນານ​ກໍ​ເພາະ​ມີ​ຄົນ​ເປັນ​ຜູ້​ສ້າງສາ​ພັດທະນາ​ທຸກ​ສິ່ງ​ຢ່າງ​ຂຶ້ນມາ. ​ເພາະສະນັ້ນ ຈຶ່ງ​ສາມາດ​ເວົ້າ​ໄດ້​ວ່າ ກຳລັງ​ແຮງ​ອັນ​ມະຫາສານ​ ນັບ​ແຕ່​ນ້ອຍ​ໄປ​ຫາ​ໃຫຍ່, ນັບ​ແຕ່​ຕໍ່າ​ຫາ​ສູງ​ກໍ​ແມ່ນ​ຢູ່​ນຳ​ຄົນ​ກາຍ​ເປັນ​ແຫ​ລ່ງພະລັງ​ແຮງ​ສັງ​ລວມທີ່​ບົ່ມ​ຊ້ອນ​ຂອງ​ປະ​ເທດ​ຊາດ​ບ້ານ​ເມືອງ. ກົດ​ເກນ​ວິວັດທະນາ​ການ ​ແລະ ການ​ຂະຫຍາຍຕົວ​ຂອງ​ຄົນ​ເຮົາ​ຢູ່​ໃນ​ສັງຄົມ​ກໍ​​ແມ່ນ​ເລີ່​ມ​ແຕ່​ຢູ່​ທ້ອງ​ແມ່, ​ເມື່ອ​ເກີດ​ອອກ​ມາ ພໍ່​ແມ່​ໄດ້​ລ້ຽງ​ດູ​ປູ​ຈີ່​ໝົດ​ແກງ​ຫລາຍ​ໝໍ້ ໝົດ​ເຂົ້າຫລາຍ​ຕິບ, ​ເມື່ອ​ເຕີບ​ໃຫຍ່​ຂຶ້ນມາ​ກໍ​ມີ​ການ​ສຶກສາ​ຮໍ່າຮຽນ​ຈາກ​ຄູ-ອາຈານ ​ແລະ ສັງຄົມ. ຈາກ​ນັ້ນກໍ​ມີ​ວິຊາ​ອາຊີບ, ມີ​ຄອບຄົວ​ຂະຫຍາຍຕົວ​ໄປ​ຕາມ​ກົດ​ເກນ​ວັດຕະ​ຈັກ​ຂອງ​ວິຖີ​ຊີວິດ. ສິ່ງ​ສຳຄັນ​ທີ່​ແຕກ​ຕ່າງ​ໝູ່​ໃນ​ຊີວິດ​ຂອງ​ຄົນ​ເຮົາ​ມີ​ພຽງ​ແຕ່​ຖານະ​ຕຳ​ແໜ່​ງ, ວິຊາ​ຊີບ, ການ​ດຳລົງ​ຊີວິດ​ໃນ​ສັງຄົມ ​ແລະ ສະພາບ​ແວດ​ລ້ອມ​ອ້ອມ​ຕົວ, ຄວາມ​ຮູ້​ຄວາມ​ສາມາດ, ຄວາມ​ສະຫລາດ​ຫລັກ​ແຫລມ​ທີ່​ແຕກ​ຕ່າງ​ກັນ ​ເຊິ່ງສິ່ງ​ເຫລົ່າ​ນີ້​ເປັນ​ອັນ​ຕັດສິນ​ຄວາມ​ດີ​ຄວາມ​ຊົ່ວ​ຂອງ​ຄົນ​ຢູ່​ໃນ​ສັງຄົມ ​ແລະ ປະ​ເທດ​ຊາດ. ນີ້​ຄື​ຂະ​ບວນວິວັດທະນາ​ການຂອງ​ຄົນ​ໃນ​ສັງຄົມ​ໃນ​ແຕ່​ລະ​ຍຸກ​ແຕ່​ລະສະ​ໄໝ ບໍ່​ວ່າ​ຢູ່​ໃນ​ໂລກ ກໍ​ຄື​ຢູ່​ໃນ​ປະ​ເທດ​ເຮົາ​ກາຍ​ເປັນ​ວົງ​ຈອນ​ຊີວິດ​ໃນ​ຄະນະ​ຍາດ​ແຫ່ງ​ຊາດ​ທີ່ຢູ່​ຮ່ວມ​ກັນ​ຢ່າງ​ກົມກຽວ​ສະໜິດ​ແໜ້ນ.

ສຳລັບ​ປະ​ເທດ​ຊາດ​ຂອງ​ພວກ​ເຮົາ, ​ໃນ​ເງື່ອນ​ໄຂ​ທີ່​ບ້ານ​ເມືອງ​ພວມ​ພັດທະນາ​ໄປ​ຢ່າງ​ບໍ່​ຢຸດ​ຢັ້ງ, ຊ້ຳບໍ່​ນຳມີ​ພົນລະ​ເມືອງ​ໜ້ອຍ ການ​ສ້າງ​ຄົນ​ໃຫ້​ເປັນ​ຊັບພະຍາກອນ​ມະນຸດ​ທີ່​ແທ້​ຈິງ​ນັ້ນ ຍິ່ງ​ມີ​ຄວາມ​ສຳຄັນ ຍ້ອນ​ວ່າຄວາມ​ຮຽກຮ້ອງ​ຕ້ອງການ​ກຳລັງ​ແຮງ​ໃນ​ການ​ພັດທະນາ​ນັ້ນມີ​ສູງ, ທຸກ​ຂົງ​ເຂດ​ວຽກ​ງານ​ລ້ວນ​ແລ້ວ​ແຕ່​ຕ້ອງການ​ຜູ້​ມີ​ວິຊາ​ຄວາມ​ຮູ້​ເພື່ອ​ເຂົ້າ​ໄປ​ບໍລິຫານ​ວຽກ​ງານ​ໃຫ້​ເດີນ​ແມ່ນ​ແລ່ນ​ສະດວກ, ມີ​ຄົນ​ດີ​ສ້າງສາ​ບ້ານ​ເມືອງ​ກໍ​ໄປ​ດີ​ຕິກໆ, ມີ​ຄົນ​ຊົ່ວ​ປົກຄອງ​ບ້ານ​ເມືອງ​ກໍ​ຫລົ້ມ, ​ເສຍ​ເອກະລາດ ອະທິປະ​ໄຕ, ​ເສຍ​ພົນລະ​ເມືອງ ​ແລະ ​ເສຍ​ຊັບ​ໃນ​ດິນ ສິນ​ໃນ​ນ້ຳ ດັ່ງ​ທີ່​ເຄີຍ​ເຫັນ​ມາ​ໃນ​ຍຸກ​ປະຫວັດສາດ​ລາວ​ແຕ່​ລະ​ຍຸກ​ຈົນ​ມາ​ເຖິງ​ທຸກ​ວັນ​ນີ້.

ຍ້ອນ​ເຫັນ​ຄຸນຄ່າ​ຂອງ​ເດັກ​ເຍົາວະ​ຊົນ​ໃນ​ຍຸກ​ປັດຈຸບັນ, ພັກ ​ແລະ ລັດຖະບານ​ເຮົາ​ຈຶ່ງ​ເຫັນ​ຄວາມ​ສຳຄັນ​ຕໍ່​ການ​ສຶກສາ ​ເພື່ອ​ສ້າງ​ຄົນ​ໃຫ້​ເປັນ​ຄົນ ​ໂດຍ​ສະ​ເພາະ​ແມ່ນ​ສ້າງ​ເດັກ​ເຍົາວະ​ຊົນ​ທີ່​ເປັນ​ໜໍ່​ແໜງ​ຂອງ​ປະ​ເທດ​ຊາດ​ໃຫ້​ກາຍ​ເປັນ​ຊັບພະຍາກອນ​ທີ່​ແທ້​ຈິງ​ຂອງ​ຊາດ​ບ້ານ​ເມືອງ. ​ໃນ​ລະບົບ​ການ​ສ້າງ​ຄົນ​ໃນ​ຍຸກ​ປັດຈຸບັນ​ໄດ້​ອີງ​ໃສ່​ສາມ​ສະ​ຖາ​ບັນ​ຕົ້ນຕໍ​ຄື: ໜຶ່ງ​ແມ່ນ​ສະ​ຖາ​ບັນ​ຄອບຄົວ, ສອງ​ສະ​ຖາ​ບັນ​ການ​ສຶກສາ ​ແລະ ສາມ​ແມ່ນ​ສະ​ຖາ​ບັນ​ສັງຄົມ. ​ໃນ​ສາມ​ສະ​ຖາ​ບັນ​ທີ່​ກ່າວ​ມາ​ນີ້ ລ້ວນ​ແລ້ວ​ແຕ່​ມີ​ຜົນ​ກະທົບ​ຢ່າງ​ໃຫຍ່​ຫລວງ​ຕໍ່​ການ​ເຕີບ​ໃຫຍ່ ​ແລະ ຂະຫຍາຍຕົວ​ຂອງ​ເດັກນ້ອຍ​ເຍົາວະ​ຊົນ. ຍ້ອນ​ທີ່​ຕັ້ງພາລະ​ບົດບາດ, ຄວາມ​ໝາຍ, ຄວາມ​ສຳຄັນ​ຂອງ​ເດັກນ້ອຍ​ເຍົາວະ​ຊົນ​ໃນ​ຍຸກ​ປັດຈຸບັນ ກໍ​ຄື​ອະນາຄົດ ພັກ ​ແລະ ລັດຖະບານ​ຈຶ່ງ​ໄດ້​​ເອົາ​ໃຈ​ໃສ່​ສຶກສາ​ອົບຮົມ ​ແລະ ກໍ່ສ້າງ​ເດັກ​ເຍົາວະ​ຊົນ​ນັບ​ແຕ່​ຢູ່​ທ້ອງ​ແມ່, ​ເມື່ອ​ເກີດ​ອອກ​ມາ​ແລ້ວ ນອກຈາກ​ຄອບຄົວ​ພໍ່​ແມ່​ເບິ່ງ​ແຍງ ກໍ​ມີ​ໂຮງ​ລ້ຽງ​ເດັກ, ​ໂຮງຮຽນ​ອະນຸບານ, ປະຖົມ, ມັດທະຍົມ ​ແລະ ຮຽນ​ສູງ​ຂຶ້ນ​ໄປ​ເລື້ອຍໆ​ຈົນ​ມີ​ວິຊາ​ອາຊີບ ​ແລະ ປະກອບ​ເຂົ້າ​ເຮັດ​ວຽກ​ຕາມ​ຄວາມ​ຮູ້​ຄວາມ​ສາມາດ.

​ເດັກ​ເຍົາວະ​ຊົນ​ຄື​ຊັບພະຍາກອນ​ອັນ​ປະ​ເສີດ​ຂອງ​ຊາດ - Wave100S AD to Website 2020 0 - ​ເດັກ​ເຍົາວະ​ຊົນ​ຄື​ຊັບພະຍາກອນ​ອັນ​ປະ​ເສີດ​ຂອງ​ຊາດ

​ໃນ​ຄວາມ​ເປັນ​ຈິງ​ແລ້ວ, ນັບ​ແຕ່​ປະ​ເທດ​ຊາດ​ຂອງ​ພວກ​ເຮົາ​ໄດ້​ມີ​ການ​ປ່ຽນ​ແປງ​ໃໝ່, ປັບປຸງ​ລະບົບ​ການ​ສຶກສາ​ເຊື່ອມ​ໂຍງ​ເຂົ້າກັບ​ສາກົນ​ເທື່ອ​ລະ​ກ້າວ ​ໄດ້​ເຮັດ​ໃຫ້ການ​ສ້າງ​ຄົນ ກໍ​ຄື​ລະບົບ​ການ​ສຶກສາ​ຢູ່​ບ້ານ​ເຮົາ​ມີ​ຄຸນ​ນະພາ​ບດີ​ຂຶ້ນ​ເລື້ອຍໆ. ສິ່ງ​ທີ່​ສະ​ແດງ​ອອກ​ໃນ​ຫລາຍ​ສິບ​ປີຜ່ານມາ ກໍ​ສາມາດ​ໄປ​ແຂ່ງຂັນ​ໃນ​ແຕ່​ລະ​ສາຂາ​ວິ​ຊາ​ໃນ​ລະດັບ​ພາກພື້ນ ​ແລະ ສາກົນ​ໄດ້​ເປັນ​ຢ່າງ​ດີ. ມີ​ລາງວັນ​ຫລາຍ​ລະດັບ, ຫລາຍ​ປະ​ເພດ ​ແລະ ຫລາຍ​ຂະ​ແໜງ​ວິຊາ​ອາຊີບ​ທີ່​ນັກຮຽນ-ນັກ​ສຶກສາລາ​ວສາມາດ​ຍາດ​ໄດ້​ຄະ​ແນນ​ດີ, ຍາດ​ເອົາ​ລາງວັນ​ຫລາຍ​ປະ​ເພດ​ມາ​ໃຫ້​ຕົນ​ເອງ ​ແລະ ​ໃບ​ໜ້າ​ໃບ​ຕາ​ຂອງ​ປະ​ເທດ​ຊາດ.

​ເຖິງ​ຢ່າງ​ໃດ​ກໍ​ດີ, ​ໃນ​ພາລະກິດ​ສ້າງສາ​ພັດທະນາ​ປະ​ເທດ​ຊາດ ​ແລະ ພາລະກິດ​ສ້າງ​ຊັບພະຍາກອນ​ມະນຸດພວກ​ເຮົາ​ໃນ​ປັດຈຸບັນ​ນີ້ ຍັງ​ມີ​ຂໍ້​ສະດວກ ​ແລະ ຫຍຸ້ງຍາກ​ຫລາຍ​ດ້ານ ​ເປັນຕົ້ນສະພາບ​ແວດ​ລ້ອມ​ຂອງ​ໂລກ​ມີ​ການ​ປ່ຽ​ນ​ແປງ​ໄປ​ຢ່າງ​ໄວວາ ​ເຊິ່ງບາງ​ຢ່າງ​ຈົນ​ແລ່ນນຳ​ບໍ່​ທັນ, ສິ່ງ​ສຳຄັນ​ອີກ​ຢ່າງ​ໜຶ່ງ​ກໍ​ແມ່ນ​ໄພ​ທຳ​ມະ​ຊາດ, ​ໂຣກລະບາດ, ພະຍາດ​ບາດ​ເຍົາ​ມາ​ກະທົບ ​ເຊິ່ງ​ໃນ​ໄລຍະ​ນີ້​ກໍ​ແມ່ນ​ໂຣກ​ໂຄ​ວິດ-19 ມາ​ກົດ​ໜ່ວງ​ທຳລາຍ​ການ​ສຶກສາ​ຮໍ່າຮຽນ​ຂອງ​ລູກ​ຫລານ. ອີກ​ປະການ​ໜຶ່ງ​ກໍ​ຄື​ຜົນ​ກະທົບ​ຈາກ​ສັງຄົມ​ເປື່ອຍ​ເຍື່ອຍ ​ເປັນຕົ້ນຢາ​ເສບ​ຕິດ, ​ໂສ​ເພນີ, ​ແມ່ຈ້າງ​ນາງ​ເລງ, ກິນ​ຢາ​ບ້າ​ຄ້າ​ຢາ​ເມົາ, ລັກ​ເລັກ​ຂະ​ໂມ​ຍນ້ອຍ, ປຸ້ນ​ຈີ້​ຂ້າ​ເຈົ້າ​ເອົາ​ຂອງ. ສິ່ງ​ເຫລົ່າ​ນີ້​ລ້ວນ​ແລ້ວ​ແຕ່​ເປັນ​ໄພພິບັດ​ໃນ​ຍຸກ​ໃໝ່​ໄດ້​ເຂົ້າມາ​ທຳລາຍ​ອະນາຄົດ​ຂອງ​​ເດັກ. ​ເພາະສະນັ້ນ ມັນ​ຈຶ່ງ​ກາຍ​ເປັນ​ພາລະກິດ​ອັນ​ຍິ່ງ​ໃຫຍ່​ໃນ​ການ​ສ້າງ​ເດັກ​ໃຫ້​ເປັນ​ຄົນ​ດີ​ໃນ​ຍຸກ​ໂລກາ​ພິວັດ. ຖ້າ​ພວກ​ເຮົາ​ບໍ່​ພ້ອມ​ກັນ​ຄິດ, ບໍ່​ພາກັນ​ແກ້ ການ​ສ້າງ​ເດັກ​ເຍົາວະ​ຊົນ​ໃຫ້​ກາຍ​ເປັນ​ຊັບພະຍາກອນ​ມະນຸດ​ອັນ​ປະ​ເສີດ​ຂອງ​ຊາດ​ຈະ​ບໍ່​ໄດ້​ຮັບ​ຜົນ​ເທົ່າ​ທີ່​ຄວນ ​ເພາະ​ເດັກ​ດີ​ພາກັນ​ສ້າງ​ຊາດ ​ເດັກ​ໄຮ້​ຄວາມ​ສະຫລາດ​ພາ​ຊາດ​ຈິບຫາຍ.

​ເດັກ​ເຍົາວະ​ຊົນ​ຄື​ຊັບພະຍາກອນ​ອັນ​ປະ​ເສີດ​ຂອງ​ຊາດ - WhatsApp Image 2020 05 27 at 5 - ​ເດັກ​ເຍົາວະ​ຊົນ​ຄື​ຊັບພະຍາກອນ​ອັນ​ປະ​ເສີດ​ຂອງ​ຊາດ
​ເດັກ​ເຍົາວະ​ຊົນ​ຄື​ຊັບພະຍາກອນ​ອັນ​ປະ​ເສີດ​ຂອງ​ຊາດ - WhatsApp Image 2020 05 27 at 5 - ​ເດັກ​ເຍົາວະ​ຊົນ​ຄື​ຊັບພະຍາກອນ​ອັນ​ປະ​ເສີດ​ຂອງ​ຊາດ
error: Alert: ເນື້ອຫາຂ່າວມີລິຂະສິດ !!