ລົດຖີບມາແຮງແຊງລົດເກ໋ງ

- advert banner 728 90 728x90 - ລົດຖີບມາແຮງແຊງລົດເກ໋ງ

- 1358567391 - ລົດຖີບມາແຮງແຊງລົດເກ໋ງ

​ໃນ​ຊຸມ​ປີ​ຫລັງ​ໆ​ມາ​ນີ້, ຫລາຍ​ຕົວ​ເມືອງ​ໃຫຍ່​ໃນ​ທົ່ວ​ໂລກ​ໄດ້​ປະສົບ​ກັບ​ພາວະ​ອາກາດ​ເປັນ​ພິດ ​ແລະ ລົດ​ລົ້ນຖະໜົນ, ຄົນ​ຂາດ​ອາກາດ​ຫາຍ​ໃຈ​ທີ່​ສະອາດ. ດັ່ງນັ້ນ ຈຶ່ງ​ໄດ້​ພາກັນ “ພິກ​ແຜ່ນດິນ ປີ້ນ​ແຜ່ນ​ຟ້າ” ​ເພື່ອ​ຊອກທາງ​ອອກ​ຫລາຍ​ຮູບ​ຫລາຍ​ສີ​ເຊັ່ນ: ຈຳກັດ​ຈຳນວນ​ລົດ​ໃຫຍ່, ປະຕິບັດ​ມາດ​ຕະການ​ແລ່ນ​ລົດ​ແບບ​ບາ​ມື້ຕາມ​ເລກ​ທະບຽນ​ຄີກ-ຄູ່, ຫ້າມ​ລົດ​ເກົ່າ​ແລ່ນ​ຕາມ​ຖະໜົນ​ໃຈກາງ​ເມືອງ, ​ເກັບ​ພາສີ​ລົດ​ຕິດ ​ແລະ ອື່ນໆ ​ແຕ່​ໂດຍ​ສັງ​ລວມ​ແລ້ວ ວິທີ​ການ​ແກ້​ໄຂ​ທີ່​ພວມ​ມາ​ແຮງ​ແຊງ​ໜ້າ ກໍ​ຄື​ແກ້​ດ້ວຍ​ການ​ຫັນ​ໄປ​ໃຊ້​ລົດຖີບ ພາຫະນະ​ທີ່​ແຮກສ່ຽວ​ກັບ​ທຳ​ມະ​ຊາດ​ໄດ້​ດີ​ເປັນອັນ​ດັບ​ເລີດ ​ເພາະ​ບໍ່​ໄດ້​ສ້າງ​ມົນ​ລະ​ພິດ. ນອກ​ນັ້ນ ຍັງ​ໃຫ້​ກ້າມ​ຂາ​ຜູ້​ໃຊ້​ແຮງ​ຖີບ​ມັນ​ອີກ. ​ເລື່ອງ​ນີ້​ພິສູດ​ໄດ້​ຢູ່​ປະ​ເທດ​ຊູ​ແອດ ບ່ອນ​ທີ່​ກວ່າ 50% ຂອງ​ພົນລະ​ເມືອງ​ໃຊ້​ລົດຖີບ​ເປັນ​ພາຫະນະ​ຄູ່​ຊີບ. ​ແຕ່​ປານ​ນັ້ນທາງ​ການ​ຂອງ​ປະ​ເທດ​ນີ້​ຍັງ​ສືບ​ຕໍ່​ປຸກລະດົມ​ໃຫ້​ມີ​ຄົນ​ຂີ່​ລົດຖີບ​ຫລາຍ​ຂຶ້ນ ​ເຊັ່ນ​ນະ​ໂຍບາຍ​ຢາຍ​ລົດຖີບ​ໃຫ້​ກັນ​ໄປ​ຂີ່​ລ້າໆ​ເປັນ​ເວລາ 6 ​ເດືອນ ​ເພື່ອ​ໃຫ້​ເປັນນິ​ໄສ. ຈາກ​ນັ້ນ ກໍຂາຍ​ລົດຖີບ​ຄັນ​ດັ່ງກ່າວ​ໃນ​ລາຄາ​ສຸດ​ຖືກ​ໃຫ້​ຜູ້​ໃຊ້​ມັນ. ຢູ່​ປະ​ເທດ​ອັງກິດ ຫວ່າງ​ບໍ່​ເຫິງ​ມາ​ນີ້​ ທາງ​ການ​ກໍ​ໄດ້​ເປີດ​ບັ້ນສົ່ງ​ເສີມ​ໃຫ້​ຄົນ​ສ້າງ​ນິ​ໄສ​ມັກ​ຍ່າງ ​ແລະ ຂີ່​ລົດຖີບ​ແທນ​ລົດ​ໃຫຍ່-ລົດ​ທີ່​ໃຊ້​ພະລັງງານ​ ​ໂດຍ​ຄາດ​ຫວັງ​ໄວ້​ວ່າ ບັ້ນສົ່ງ​ເສີມ​ດັ່ງກ່າວ​ຈະ​ເຮັດ​ໃຫ້​ຄົນ​ຕິດ​ຍ່າງ ​ແລະ ຕິດ​ຂີ່​ລົດຖີບ​ພາຍ​ໃນ​ປີ 2040 ​ເວລາ​ເດີນທາງ​ໄປ​ສະຖານ​ທີ່​ທີ່ຢູ່​ບໍ່​ໄກ​ເກີນ​ຄວນ. ບັ້ນສ້າງ​ນິ​ໄສ​ມັກ​ຍ່າງ ​ແລະ ຂີ່​ລົດຖີບ, ທາງ​ການ​ອັງກິດ​ມີ​ແຜນ​ຈັດ​ສັນ​ງົບປະມານສະໜັບສະໜູນ​ຢ່າງ​ຄັກ​ແນ່ ຄື​ມີ​ສູງ​ເຖິງ 70,7 ລ້ານ​ໂດ​ລາ​ສະຫະລັດ. ສະ​ເພາະ​ແຕ່​ເພື່ອ​ສົ່ງ​ເສີມ​ໃຫ້​ເດັກນ້ອຍ​ຈຳນວນ 1,3 ລ້ານ​ຄົນ​ຂີ່​ລົດຖີບ​ໄປ​ໂຮງຮຽນ ​ແລະ ອີກ 280 ລ້ານ​ໂດ​ລາ​ສຳລັບ​ພັດທະນາ​ພື້ນຖານ​ໂຄງ​ລ່າງ ​ເຊັ່ນ​ຖະໜົນ​ຫົນທາງ​ສະ​ເພາະ​ສຳລັບ​ລົດຖີບ ​ແລະ ຄົນ​ຍ່າງ. ຢູ່​ປະ​ເທດ​ນິວຊີ​ແລນ, ລະບົບ​ການ​ສົ່ງ​ເສີມ​ໃຫ້​ຄົນ​ຂີ່​ລົດຖີບ​ໄດ້​ຈັດ​ທົດ​ລອງ​ກັນ​ຢູ່​ສອງ​ນະຄອນ​ໃຫຍ່ໆ ​ເຊັ່ນ​ອອກ​ແລນ (Anckland) ​ແລະ ​ໄຄຼ​ເຈີດ (Christchurch) ​ເພື່ອ​ເຮັດ​ໃຫ້​ລົດຖີບ​ເປັນ​ພາຫະນະ​ທາງ​ເລືອກ​ປະຈຳ​ວັນ​ຂອງ​ຊາວ​ເມືອງ. ນິວຊີ​ແລນ​ຂຶ້ນງົບປະມານ​ເຖິງ 333 ລ້ານ​ໂດ​ລາ​ນິວຊີ​ແລນ (​ເທົ່າ​ກັບ 230,72 ລ້ານ​ໂດ​ລາ​ສະຫະລັດ) ​ເພື່ອ​ພັດທະນາ​ການ​ໂດຍສານ​ດ້ວຍ​ລົດຖີບ ​ແລະ ​ໂຄງ​ລ່າງ​ທີ່​ຈຳ​ເປັນ. ໜັງສືພິມ ​ເດິ​ເນ​ເຊິ​ນ (The Nation) ສະບັບ​ວັນ​ທີ 24 ​ເດືອນ​ເມສາ​ປີ​ນີ້ ​ໄດ້​ສະ​ເໜີ​ບົດ​ຍາວ​ຍືດກ່ຽວ​ກັບ​ຄວາມ​ຕ້ອງການ​ຫັນ​ມາ​ໃຊ້​ລົດຖີບ​ຢູ່ ສປ ຈີນ ​ເພາະ​ປະ​ເທດ​ນີ້ ຄັ້ງໜຶ່ງ (​ໃນ​ຊຸມ​ປີ 1980) ​ໄດ້​ຮັບ​ນາມມະຍົດ​ວ່າ​ເປັນ “ອານາຈັກ​ລົດຖີບ” ​ແຕ່​ຕໍ່​ມາ​ຈຳນວນ​ລົດຖີບ​ກໍ​ໄດ້​ຫລຸດ​ໜ້ອຍ​ຖອຍ​ລົງ​ຈົນ​ເກືອບ​ກ້ຽງ​ຖະໜົນ ຍ້ອນ​ຖືກ​ຄຸກ​ຄາມ​ດ້ວຍ​ລົດ​ໃຫຍ່. ​ໃນ​ຊຸມ​ປີ 1980, ຊາວ​ນະຄອນຫລວງ​ປັກ​ກິ່ງ​ກວ່າ 60% ຂີ່​ລົດຖີບ​ໄປ​ເຮັດ​ວຽກ. ​ໃນ​ປີ 2000, ຜູ້​ໃຊ້​ລົດຖີບ​ຍັງ​ເຫລືອ​ພຽງ 40%, ​ໃນ​ປີ 2015 ຫລຸດ​ລົງ​ຕື່ມ​ເປັນ 10%. ​ແນວ​ໃດ​ກໍ​ດີ ນັບ​ແຕ່​ປີ 2016 ​ເປັນຕົ້ນມາ, ຂະ​ບວນຫັນ​ໄປ​ໃຊ້​ລົດຖີບ​ກໍ​ເລີ່​ມຄຶກຄັກ​ຂຶ້ນ​ໃນ​ນະຄອນຫລວງ​ປັກ​ກິ່ງ ​ໂດຍ​ໄດ້​ມີ​ບໍລິສັດ​ບໍລິການ​ລົດຖີບ​ຈຳນວນ 30 ຫົວໜ່ວຍປະກອບ​ການ​ແລ້ວ. ນອກຈາກ​ນັ້ນ ທາງ​ການ​ກໍ​ມີ​ນະ​ໂຍບາຍ​ພິ​ເສດ​ເພື່ອ​ສົ່ງ​ເສີມ​ການ​ຂີ່​ລົດຖີບ ​ເຊັ່ນ​ໃນ​ປັກ​ກິ່ງ​ໃຜ​ຊື້ລົດຖີບ​ແຕ່​ນີ້​ຫາ​ເດືອນ​ພະຈິກ​ປີ​ນີ້ ຈະ​ໄດ້​ເງິນ​ຖົມ​ຂຸມ​ຈາກ​ລັດ 10% ຕາມ​ລາຄາ​ຂາຍຍ່ອຍ. ການ​ສົ່ງ​ເສີມ​ການ​ໃຊ້​ລົດຖີບ​ຢູ່​ນະຄອນຫລວງ​ປັກ​ກິ່ງ​ແມ່ນ​ເພື່ອ​ຫລຸດຜ່ອນ​ມົນ​ລະ​ພິດ​ທາງ​ອາກາດ ​ແລະ ສະພາບ​ແອ​ອັດຕາ​ມ​ເສັ້ນທາງ. ທາງ​ການ​ເຊື່ອ​ວ່າ ດ້ວຍ​ນະ​ໂຍບາຍ​ສົ່ງ​ເສີມ​ດັ່ງກ່າວ, ພາຍ​ໃນ​ປີ 2020 ຈະ​ມີ​ຄົນ​ໃຊ້​ລົດຖີບ​ໃນ​ນະຄອນຫລວງ​ແຫ່ງ​ນີ້​ເຖິງ 18%. ສະຫລຸບ​ແລ້ວ ລົດຖີບ​ຈະ​ເປັນ​ທາງ​ເລືອກ​ທີ່​ສຳຄັນ​ສຳລັບ​ການ​ສັນຈອນ​ຂອງ​ຍຸກ​ໃໝ່​ໃນ​ຕໍ່ໜ້າ.

- 1 1 - ລົດຖີບມາແຮງແຊງລົດເກ໋ງ
- lattana 1 - ລົດຖີບມາແຮງແຊງລົດເກ໋ງ

ໂດຍ: ວິເສດ ສະແຫວງສຶກສາ

error: Content is protected !!