ຮ່ວມ​ໃຈ​ກັນ​ປູກ​ປ່າ​ເພື່ອ​ພັດທະນາ​ແບບ​ຍືນ​ຍົງ

ຮ່ວມ​ໃຈ​ກັນ​ປູກ​ປ່າ​ເພື່ອ​ພັດທະນາ​ແບບ​ຍືນ​ຍົງ - 89888 - ຮ່ວມ​ໃຈ​ກັນ​ປູກ​ປ່າ​ເພື່ອ​ພັດທະນາ​ແບບ​ຍືນ​ຍົງ
ຮ່ວມ​ໃຈ​ກັນ​ປູກ​ປ່າ​ເພື່ອ​ພັດທະນາ​ແບບ​ຍືນ​ຍົງ - AGL banner - ຮ່ວມ​ໃຈ​ກັນ​ປູກ​ປ່າ​ເພື່ອ​ພັດທະນາ​ແບບ​ຍືນ​ຍົງ

ໂດຍ: ທິດ​ກໍ່າ

 

ຢູ່​ໃນ​ມະຕິ​ຄັ້ງທີ X ຂອງ​ພັກ ມີ​ບາງ​ຕອນ​ໄດ້​ກ່າວ​ວ່າ: “ສ້າງ​ເສດຖະກິດ​ແຫ່ງ​ຊາດ​ໄປ​ຕາມ​ທິດ​ພັດທະນາ​ແບບ​ຍືນ​ຍົງ, ພັດທະນາ​ຂະ​ແໜງ​ອຸດສາຫະກຳ​ທີ່​ເປັນ​ທ່າ​ແຮງ​ໄດ້​ປຽບ​ຕາມ​ທິດ​ຈຸດ​ສຸມ, ມີ​ປະສິດທິ​ຜົນ, ​ເປັນ​ມິດ​ກັບ​ສິ່ງ​ແວດ​ລ້ອມ ​ແລະ ຍືນ​ຍົງ”. ​ເພາະສະນັ້ນ ​ເຮົາ​ເຫັນ​ວ່າ​ປ່າ​ໄມ້​ຍັງ​ເປັນ​ສ່ວນ​ໜຶ່ງ​ທີ່​ສຳຄັນ​ທີ່​ສຸດ​ໃນ​ການ​ໃຫ້​ຄວາມ​ຍືນ​ຍົງ ​ໂດຍ​ສະ​ເພາະ​ແຫ​ລ່ງນ້ຳ, ​ແຫ​ລ່ງພະລັງງານ, ທຳ​ມະ​ຊາດ ​ແລະ ສິ່ງ​ແວດ​ລ້ອມ ນັບ​ທັງ​ສະພາບ​ດິນ​ຟ້າ​ອາກາດ, ຄວາມ​ສົມ​ດູ​ນທີ່​ສົດ​ໃສ, ​ໄຮ້​ມົນ​ລະ​ພິດ ​ແລະ ສະອາດ​ສີຂຽວ. ​ໃນ​ແຜນ​ພັດທະນາ​ເສດຖະກິດ-ສັງຄົມ​ແຫ່ງ​ລັດ ຄັ້ງທີ VIII ກໍ​ໄດ້​ລະບຸ​ຢ່າງ​ຈະ​ແຈ້ງວ່າ: ມາ​ຮອດ​ປີ 2020 ຄື​ປີ​ນີ້​ເອງ ຕ້ອງ​ພາກັນ​ປູກ​ປ່າ, ປົກ​ປັກ​ຮັກສາ​ປ່າ​ໃຫ້​ມີ​ພື້ນທີ່​ສີຂຽວ​ກວມ 70% ຂອງ​ພື້ນທີ່​ໃນ​ທົ່ວ​ປະ​ເທດ. ​ແຕ່​ວ່າ​ເມື່ອ​ບໍ່​ດົນ​ມາ​ນີ້, ທາງ​ຫົວໜ້າ​ກົມ​ປ່າ​ໄມ້ ກໍ​ໄດ້​ອອກ​ມາ​ຊີ້​ແຈງ​ຢ່າງ​ຊັດ​ເຈນ​ວ່າ: ພວກ​ເຮົາ​ໄດ້​ພຽງ 60% ​ເທົ່າ​ນັ້ນ. ​ເມື່ອ​ເປັນ​ດັ່ງ​ວ່າ​ນີ້ ພາລະກິດ​ການ​ປູກ​ປ່າ, ຮັກສາ​ປ່າ​ໃຫ້​ເປັນ​ໄປ​ຕາມ​ຄາດໝາຍ​ຂອງ​ພັກ ​ແລະ ລັດຖະບານ​ໄດ້​ວາງ​ອອກ​ນັ້ນ ຈະ​ຕ້ອງ​ໄດ້​ສູ້​ຊົນ​ດຳ​ເນີນ​ໄປ​ຕິກໆ. ຍັງ​ບໍ່​ພຽງ​ແຕ່​ວ່າ​ຕ້ອງ​ເຮັດ​ໃຫ້​ໄດ້​ຕາມ​ຄາດໝາຍ, ​ແຕ່​ພວກ​ເຮົາ​ຍັງ​ຕ້ອງ​ສືບ​ຕໍ່​ປະຕິບັດ​ໃຫ້​ໄດ້​ລື່ນຄາດໝາຍ ຫລື ຈະ​ຕ້ອງ​ປູກ​ໄມ້​ໄປ​ເລື້ອຍໆ ​ເພາະວ່າ​ເທົ່າ​ທີ່​ສັງ​ເກດ​ເຫັນ​ໃນ​ຫລາຍ​ປີຜ່ານມາ ການ​ທຳລາຍ​ປ່າ​ໄມ້​ຫລາຍ​ກວ່າ​ການ​ປູກ. ຈາກສາ​ເຫດ​ທີ່​ກ່າວ​ມາ​ນີ້ ມັນ​ກໍ​ມີ​ຫລາຍ​ປັດ​ໄຈ ​ແລະ ​ເງື່ອນ​ໄຂ​ເຊັ່ນ: ຍ້ອນ​ມີ​ການ​ພັດທະນາ​ສ້າງສາ​ບ້ານ​ເມືອງ, ​ໂຄງການ​ໃຫຍ່ໆ​ທີ່​ເຫັນ​ຢ່າງ​ປະຈັກ​ຕາ​ໃນ​ປັດຈຸບັນ ກໍ​ຄື​ໂຄງການ​ກໍ່ສ້າງ​ເຂື່ອນ​ໄຟຟ້າ​ນ້ຳຕົກ, ​ໂຄງການ​ສ້າງ​ເສດຖະກິດ​ພິ​ເສດ ​ແລະ ​ເສດຖະກິດ​ສະ​ເພາະ, ​ໂຄງການ​ຂຸດ​ຄົ້ນບໍ່​ແຮ່, ​ໂຄງການ​ສ້າງ​ຖະໜົນ​ຫົນທາງ, ສ້າງ​ຕຶກ​ອາຄານ, ສະຖານ​ທີ່, ສຳນັກງານ​ອົງການ​ເພື່ອ​ເປັນ​ພື້ນຖານ​ໃຫ້​ແກ່​ການຂະຫຍາຍຕົວ​ທາງ​ດ້ານ​ເສດຖະກິດ-ສັງຄົມ​ຂອງ​ປະ​ເທດ. ບັນດາ​ໂຄງການ​ເຫລົ່າ​ນີ້ ກໍ​ນັບ​ແຕ່​ຂັ້ນສູນ​ກາງ​ລົງ​ຮອດ​ທ້ອງ​ຖິ່ນ​ເຂດ​ແຂວງ, ​ໄປ​ຮອດ​ຂັ້ນ​ເມືອງ ​ເພາະ​ໃຜ​ກໍ​ມີ​ການ​ຍາດ​ແຍ່ງ​ເອົາ​ການ​ພັດທະນາ​ໃຫ້​ທ້ອງ​ຖິ່ນ​ຂອງ​ຕົນ ​ເຊິ່ງບາງ​ຢ່າງ​ຈົນ​ມີ​ຜົນ​ກະທົບ​ຮອດ​ສະພາບ​ດິນ​ຟ້າ​ອາກາດ, ປ່າ​ໄມ້, ສິ່ງ​ແວດ​ລ້ອມ ​ແລະ ຊີວະ​ນາໆ​ພັນ.

ຍ້ອນ​ມີ​ການ​ສ້າງສາ​ພັດທະນາ ​ແລະ ຍາດ​ຊີງ​ກັນ​ທາງ​ດ້ານ​ຜົນ​ປະ​ໂຫຍ​ດ ບໍ່​ວ່າ​ສ່ວນ​ບຸກຄົນ, ລວມໝູ່​ຢູ່​ໃນ​ແຕ່ລະ​ທ້ອງ​ຖິ່ນ​ພາກັນ​ຊື້ ​ແລະ ຈັບຈອງ​ເອົາ​ດິນ​ມາ​ເປັນ​ຂອງ​ຕົນ​ເອງ​ແລ້ວ​ກໍ​ສວຍ​ໂອກາດ​ຂາຍ​ໃຫ້​ນາຍທຶນ ຈົນ​ເຮັດ​ໃຫ້​ປ່າ​ໄມ້​ກຸດ​ຫ້ຽນ​ໄປ​ແຕ່ລະ​ປີ​ຢ່າງ​ມະຫາສານ. ທິດ​ກໍ່າ​ຂໍ​ໂທດ ​ເທົ່າ​ທີ່​ໄດ້​ເຫັນ ​ແລະ ​ໄດ້​ຍິນ​ຂ່າວ​ຊ່າ​ລື​ຈາກ​ປະຊາຊົນ​ບາງ​ບ້ານ, ບາງ​ທ້ອງ​ຖິ່ນ​ຂາຍ​ຮອດ​ດິນ​ລວມຂອງ​ບ້ານ ນັບ​ທັງ​ດິນ​ຈັບຈອງ​ຂອງ​ຕົນ​ເອງ​ກໍ​ຂາຍ​ໝົດ​ຈົນ​ບໍ່​ມີ​ດິນ​ເຮັດ​ປ່າຊ້າ​ມ້ຽນ​ຄົນ​ຕາຍ ສຸດ​ທ້າຍ​ມາ​ກໍ​ພາກັນ​ຫາມ​ໄປ​ຈູດ​ຢູ່​ວັດ, ​ເອົ​າ​ໄປ​ເອົາ​ມາ ວັດ​ກາຍ​ເປັນ​ປ່າຊ້າ ຫລື ​ເປັນ​ບ່ອນ​ຝັງ​ສົບ ​ແລະ ຈູດ​ຄົນ​ຕາຍ. ນີ້​ຄື​ຄວາມ​ຈິງ​ຍ້ອນ​ຄວາມ​ຢາກ, ຄວາມ​ກະຫາຍ​ໃນ​ຍຸກ​ປ່ຽນ​ແປງ​ໃໝ່​ຢູ່​ໃນ​ຫລາຍ​ທ້ອງ​ຖິ່ນ​ຊົນນະບົດ, ຍິ່ງ​ໄປ​ກວ່າ​ນັ້ນ ບາງ​ບ້ານ​ນາຍບ້ານ​ລັກຂາ​ຍດິນ​ລວມຈົນ​ມີ​ເລື່ອງ​ມີ​ລາວ​ກັບ​ປະຊາຊົນ​ເວົ້າຄວາມ​ກັນ​ຍັງ​ບໍ່​ທັນ​ແລ້ວ.

​ໃນ​ບັນດາ​ໂຄງການ, ກິດຈະການ​ຕ່າງໆ​ທີ່​ກ່າວ​ມາ​ນີ້ ສ່ວນ​ໃຫຍ່​ກໍ​ແມ່ນ​ໄດ້​ບຸກ​ເບີກ​ປ່າ, ບຸກ​ເບີກ​ທີ່​ດິນ​ບ່ອນ​ເໝາະ​ສົມ ບາງ​ບ່ອນ​ກໍ​ເປັນ​ປ່າຕຶບ​ດົກໜາ, ມີ​ໄມ້​ຂະ​ຍຸງ, ​ໄມ້ຍາງ, ​ໄມ້​ໃຫຍ່​ຊະນິດ​ຕ່າງໆ ​ເພິ່ນ​ຍິ່ງ​ເບັດ​ໄປ​ໃສ່, ບາງ​ບ່ອນ​ໄມ້​ກໍ​ໝົດ, ດິນ​ກໍ​ກ້ຽງ​ເອີ​ດ​ເຕີ​ດ ​ແຕ່​ໂຄງການ​ຍັງ​ມະຍຸ​ມະ​ຍະ​ບໍ່​ແລ້ວ​ຕາມ​ການ​ຕົກລົງ ​ແລະ ຍັງ​ມີ​ຫລາຍ​ບ່ອນ​ຫລາຍ​ໂຄງການ​ຍັງບໍ່​ແລ້ວ​ຖິ້ມພຸ້ນ​ຖິ້ມພີ້​ຈົນ​ໄດ້​ຮ້ອງ​ຟ້ອງ​ກັນ​ຂຶ້ນສານ. ນີ້​ຄື​ສ່ວນ​ໜຶ່ງ​ໃນ​ຫລາຍ​ສາ​ເຫດ​ທີ່​ເຮັດ​ໃຫ້​ພວກ​ເຮົາ​ປູກ​ປ່າ​ບໍ່​ເປັນ​ໄປ​ຕາມ​ຄາດໝາຍ.

ຮ່ວມ​ໃຈ​ກັນ​ປູກ​ປ່າ​ເພື່ອ​ພັດທະນາ​ແບບ​ຍືນ​ຍົງ - Wave100S AD to Website 2020 0 - ຮ່ວມ​ໃຈ​ກັນ​ປູກ​ປ່າ​ເພື່ອ​ພັດທະນາ​ແບບ​ຍືນ​ຍົງ

​ແນວ​ໃດ​ກໍ​ຕາມ, ​ເມື່ອ​ຫລິ່ງ​ເຫັນ​ອະນາຄົດ​ແລ້ວ ການ​ປູກ​ຕົ້ນ​ໄມ້​ໃຫ້​ເປັນ​ປ່າ, ປົກ​ຫຸ້ມ​ໄປ​ດ້ວຍ​ສີຂຽວ ຍັງ​ເປັນ​ພາລະກິດ​ອັນ​ໃຫຍ່​ຫລວງ​ສຳລັບ​ພວກ​ເຮົາ​ທຸກ​ຄົນ. ອັນ​ສຳຄັນ​ທີ່​ສຸດ​ແມ່ນ​ປະຕິບັດ​ໃຫ້​ໄດ້​ຕາມ​ແຜນ​ພັດທະນາ​ເສດຖະກິດ-ສັງຄົມ ກໍ​ຄື​ແຜນ​ພັດທະນາ​ປ່າ​ໄມ້​ທີ່​ພັກ ​ແລະ ລັດຖະບານ​ວາງ​ອອກ​ແຕ່ລະ​ໄລຍະ​ໃຫ້​ມີ​ຜົນ​ສຳ​ເລັດ. ຖື​ວ່າການ​ປູກ​ປ່າ ຫລື​ວ່າ ປູກ​ຕົ້ນ​ໄມ້​ເປັນ​ການ​ສ້າງ​ແນວ​ຄິດ​ຮັກ​ຊາດ ​ແລະ ພັດທະນາ, ​ເປັນ​ພັນທະ​ຂອງ​ໝົດ​ທຸກ​ຄົນ​ທີ່​ຕ້ອງ​ໄດ້​ປະກອບສ່ວນ​ດ້ວຍ​ວິທີ​ການ, ຫລາຍ​ຮູບ​ການ ​ເປັນຕົ້ນ​ໃນ​ຄອບຄົວ​ໜຶ່ງ​ທີ່​ມີ​ດິນ​ປຸກ​ສ້າງ ຫລື ດິນ​ສວນ​ກໍ​ຕ້ອງ​ໄດ້​ລະດົມ​ກັນ​ປູກ​ຕົ້ນ​ໄມ້​ໃຫ້​ໝາກ, ​ໄມ້​ປະດັບ​ ຫລື ​ໄມ້​ອຸດສາຫະກຳ​ໃນ​ດິນ​ຂອງ​ຕົນ​ຢ່າງ​ເໝາະ​ສົມ. ສໍາລັບ​ຢູ່​ສະຖານ​ທີ່​ສາທາລະນະ​ນັ້ນ ກໍ​ຕ້ອງ​ເປັນ​ເຈົ້າການ​ປູກ​ໄມ້​ປະດັບ​ໃຫ້​ຫລາຍ ​ເພື່ອ​ຄວາມ​ສວຍ​ງາມ ​ແລະ ສີຂຽວ​ຢ່າງ​ຕະການ​ຕາ ​ແລະ ມີ​ຊີວິດ​ຊີວາ.

​ເຖິງ​ຢ່າງ​ໃດ​ກໍ​ດີ, ​ໃນ​ໂອກາດ​ວັນ​ປູກ​ຕົ້ນ​ໄມ້​ແຫ່ງ​ຊາດ​ປີ​ນີ້ ​ເຮົາ​ບໍ່​ຄວນ​ປູກ​ສະ​ເພາະ​ແຕ່​ມື້ວັນ​ທີ 1 ມິຖຸນາ​ແຕ່​ມື້ດຽວ ​ເຮົາ​ຍັງ​ສາມາດ​ປູກ​ຕໍ່ໆ​ໄປ​ຈົນ​ຮອດ​ກາງ​ເດືອນ ຫລື ທ້າຍ​ເດືອນ​ມິຖຸນາ​ກໍ​ສາມາດ​ປູກ​ໄດ້ ຂໍ​ພຽງ​ແຕ່​ວ່າ​ຂະຫຍັນ ຫລື ບໍ່. ມາຮອດ​ປັດຈຸບັນ​ນີ້​ມາ​ເບິ່ງ​ພາບ​ລວມຂອງ​ຄວາມ​ງາມ​ໃນ​ຕົວ​ເມືອງ ​ໂດຍ​ສະ​ເພາະ​ຢູ່​ນະຄອນຫລວງ​ວຽງ​ຈັນ ​ເຮົາ​ກໍ​ໄດ້​ເຫັນ​ພາບ​ປະຈັກ​ຕາ​ນັບ​ມື້ສວຍ​ງາມ​ອາບ​ເອ້​ດ້ວຍ​ຕົ້ນ​ໄມ້​ປະດັບ​ສີຂຽວ ​ເມື່ອ​ເຖິງ​ຍາມ​ລະດູ​ການ​ມາ​ມີດ​ອກ​ໄມ້​ນາໆ​ຊະນິດ​ສີ​ບານ​ເຮືອງ​ເຮື່ອ​ເພີ່ມ​ສີສັນ​ນະຄອນຫລວງ​ຕາມ​ແຜນ​ຂອງ 6 ສ ທີ່​ໄດ້​ວາງ​ອອກ. ຂໍ​ຊົມ​ເຊີຍ​ເປັນ​ຢ່າງ​ຍິ່ງ.

ຮ່ວມ​ໃຈ​ກັນ​ປູກ​ປ່າ​ເພື່ອ​ພັດທະນາ​ແບບ​ຍືນ​ຍົງ - WhatsApp Image 2020 05 27 at 5 - ຮ່ວມ​ໃຈ​ກັນ​ປູກ​ປ່າ​ເພື່ອ​ພັດທະນາ​ແບບ​ຍືນ​ຍົງ
ຮ່ວມ​ໃຈ​ກັນ​ປູກ​ປ່າ​ເພື່ອ​ພັດທະນາ​ແບບ​ຍືນ​ຍົງ - WhatsApp Image 2020 05 27 at 5 - ຮ່ວມ​ໃຈ​ກັນ​ປູກ​ປ່າ​ເພື່ອ​ພັດທະນາ​ແບບ​ຍືນ​ຍົງ
ຮ່ວມ​ໃຈ​ກັນ​ປູກ​ປ່າ​ເພື່ອ​ພັດທະນາ​ແບບ​ຍືນ​ຍົງ - WhatsApp Image 2020 05 27 at 5 - ຮ່ວມ​ໃຈ​ກັນ​ປູກ​ປ່າ​ເພື່ອ​ພັດທະນາ​ແບບ​ຍືນ​ຍົງ
ຮ່ວມ​ໃຈ​ກັນ​ປູກ​ປ່າ​ເພື່ອ​ພັດທະນາ​ແບບ​ຍືນ​ຍົງ - WhatsApp Image 2020 05 27 at 5 - ຮ່ວມ​ໃຈ​ກັນ​ປູກ​ປ່າ​ເພື່ອ​ພັດທະນາ​ແບບ​ຍືນ​ຍົງ
error: Alert: Content is protected !!