ເລື່ອງຫວຍເລື່ອງເລກ ເຫັນແລ້ວ ບໍ່ງາມຕາ
ທີ່ຈິງບໍ່ຢາກຂຽນເລື່ອງນີ້ ເພາະວ່າເປັນເລື່ອງຊຳເຮື້ອ ແລະ ເວົ້າກັນຍາກໃນສັງຄົມ… ແຕ່ເພື່ອນຜູ້ອ່ານກໍຕັ້ງບັນຫາເຂົ້າມາ ແລະ ຮຽກຮ້ອງໃຫ້ຂຽນເຕືອນແດ່ ເພາະເຫັນວ່າໂຈ່ງແຈ້ງໂພດ ໃກ້ມື້ຫວຍຊິອອກ ໂດຍສະເພາະແມ່ນຫວຍຕ່າງປະເທດ (ໄທ) ໂພສຂາຍກັນເຕັມໜ້າເຟສບຸກ ວ່າຊັ້ນ ! ເບິ່ງແລ້ວເຫັນແລ້ວມັນຄືວ່າ: ບໍ່ງາມຕາປານໃດ ?
ຕາມຮູ້ ພວກມັກສ່ຽງໂຊກເຂົາວ່າ ມື້ໜຶ່ງມີຫວຍຕ່າງປະເທດທີ່ຄົນລາວມັກຫຼິ້ນ ມັກແທງ ມີຫຼາຍແທ້ໃດ໋ ເລີ່ມແຕ່ 16 ໂມງ (ຫວຍຈີນ) 17 ໂມງ 17 ໂມງເຄິ່ງ 19 ໂມງ 30 (ຫວຍຫວຽດ) ແລະ 20 ໂມງ (ຫວຍຈີນ) ຍັງມີອີກຫວຍມາເລ…ຫວຍໄທ ແນ່ນອນເຈົ້າມືບໍ່ແມ່ນລັດ… ລັດບໍ່ໄດ້ຫຍັງນຳເຂົາດອກ… ມີແຕ່ອະນຸຍາດໃຫ້ເຂົາເຮັດເປັນກຸ່ມ… ເປັນສະມາຄົມ ຈຶ່ງຈະໄດ້ເງິນ.
ຜ່ານມາກໍມີການເຕືອນ ແລະ ລົງໂທດຢູ່ ເພາະມັນເຮັດໃຫ້ຫວຍພັດທະນາຂາຍບໍ່ຄ່ອຍດີ ຄັນເວົ້າຕາມພາສາການຕະຫຼາດກໍແມ່ນເສຍລູກຄ້າ.
ເວົ້າເລື່ອງການຂາຍຫວຍເຖື່ອນນີ້ ກໍມີລະບຽບວາງອອກຢູ່ ເປັນຕົ້ນແມ່ນແຈ້ງການເລກທີ 1244/ຫສນຍ-ກລຂ ລົງວັນທີ 17 ສິງຫາ 2017 ແລະ ຕໍ່ມາກໍມີແຈ້ງການເລກທີ 1971/ຫສນຍ-ກລຂ ລົງວັນທີ 13 ທັນວາ 2017 ແລະ ຫຼ້າສຸດແມ່ນແຈ້ງການຂອງກົມຕຳຫຼວດເສດຖະກິດ ເລກທີ 701/302 ລົງວັນທີ 27/03/2020 ການຫຼິ້ນຫວຍນີ້ແມ່ນການຫຼິ້ນການພະນັນເນີ ! ສະນັ້ນ ຈຶ່ງຢາກໃຫ້ມີຂອບເຂດ ມີເພດານ ໃຫ້ຖືວ່າເປັນການສ່ຽງໂຊກ.
ໃນທາງກົດໝາຍ ຫາກວ່າຫຼິ້ນຫວຍເຖື່ອນ ການພະນັນເຖື່ອນ ທີ່ບໍ່ແມ່ນທາງການເພິ່ນອະນຸມັດນັ້ນ ຖືວ່າຜິດກົດໝາຍ ໂດຍສະເພາະກົດໝາຍອາຍາແລ້ວ ທັງຜູ້ຫຼິ້ນ ແລະ ຜູ້ເປັນເຈົ້າມື ລ້ວນແຕ່ຜິດຄືກັນ ໃນທາງສາສະໜາ ເປັນຕົ້ນແມ່ນພຸດທະສາສະໜາ ຖືວ່າເປັນອະບາຍຍະມຸກ ເປັນກິເລດທີ່ຊົ່ວຮ້າຍທີ່ສຸດ ເປັນເສັ້ນທາງນຳໄປສູ່ການເສື່ອມເສຍ ກ້າວໄປເຖິງເຮັດໃຫ້ເກີດເປັນທຸກ ຢ້ານແທ້ໆນັ້ນແມ່ນຢ້ານຜີການພະນັນເຂົ້າສິງ ແລ້ວຕົກເປັນທາດຂອງມັນລະແມ່ນຊອກທາງອອກຍາກ.
ໂດຍ: ແນວລາວ
ຫນັງສືພິມວຽງຈັນໃຫມ່
