‘ຈີນ’ ເປີດນ່ານຟ້າໃຫ້ສາຍການບິນຕ່າງປະເທດ ເຂົ້າປະເທດແບບຈຳກັດ ເລີ່ມ 8 ມິຖຸນາ
“ຈີນ” ເປີດນ່ານຟ້າໃຫ້ “ສາຍການບິນຕ່າງປະເທດ” ເຂົ້າປະເທດແບບຈຳກັດຖ້ຽວບິນ ເລີ່ມ 8 ມິຖຸນາ ຫລັງ “ອາເມລິກາ” ສັ່ງຫ້າມຖ້ຽວບິນເຂົ້າປະເທດ.
ສຳນັກການບິນພົນລະເຮືອນແຫ່ງປະເທດຈີນ (CAAC) ອອກຖະແຫລງການໃນວັນທີ 4 ມິຖຸນາວ່າ: ຈີນອະນຸຍາດໃຫ້ສາຍການບິນຕ່າງປະເທດສາມາດບິນເຂົ້າສູ່ນ່ານຟ້າຂອງຈີນໄດ້ຫລາຍຂຶ້ນ ໂດຍຖະແຫລງການດັ່ງກ່າວມີຂຶ້ນບໍ່ດົນ ຫລັງຈາກອາເມລິກາສັ່ງຫ້າມສາຍການບິນຂອງຈີນເດີນທາງເຂົ້າອາເມລິການັບແຕ່ກາງເດືອນມິຖຸນາເປັນຕົ້ນໄປ.
ຖະແຫລງການຂອງ CAAC ລະບຸວ່າ: ສາຍການບິນຕ່າງປະເທດ ເຊິ່ງປັດຈຸບັນໄດ້ຖືກສັ່ງຫ້າມບໍ່ໃຫ້ເດີນທາງເຂົ້າ-ອອກຈາກຈີນນັ້ນ ຈະໄດ້ຮັບອະນຸຍາດໃຫ້ເປີດບໍລິການຖ້ຽວບິນໄປເມືອງຂອງຈີນໄດ້ອາທິດລະຄັ້ງ ໂດຍຈະເລີ່ມແຕ່ວັນທີ 8 ມິຖຸນາເປັນຕົ້ນໄປ.
ມີລາຍງານວ່າ: ປະທານາທິບໍດີ ໂດນັລ ທຣຳ ໄດ້ສັ່ງຫ້າມສາຍການບິນຂອງຈີນເດີນທາງເຂົ້າອາເມລິການັບແຕ່ວັນທີ 16 ມິຖຸນາເປັນຕົ້ນໄປ ເພື່ອກົດດັນໃຫ້ຈີນເປີດທາງໃຫ້ສາຍການບິນຂອງອາເມລິກາເດີນທາງໄປຈີນ.
ທັງນີ້ ສາຍການບິນເດລຕາ ແອລາຍ ແລະ ຢູໄນເຕັດ ແອລາຍ ຂອງອາເມລິກາ ຕ່າງກໍຮຽກຮ້ອງໃຫ້ຈີນເປີດເສັ້ນທາງບິນໃນເດືອນມິຖຸນານີ້. ຂະນະທີ່ ສາຍການບິນຂອງຈີນຍັງສາມາດເດີນທາງໄປອາເມລິກາໄດ້ໃນໄລຍະເກີດການແຜ່ລະບາດຂອງໂຄວິດ-19.
ເຖິງຢ່າງໃດກໍຕາມ, ການປະກາດຂອງລັດຖະບານອາເມລິກາ ຖືເປັນການຕອບໂຕ້ຈີນຕໍ່ກໍລະນີທີ່ຈີນປະຕິເສດຈະປະຕິບັດຕາມຂໍ້ຕົກລົງສະບັບປັດຈຸບັນກ່ຽວກັບຖ້ຽວບິນຂອງທັງສອງປະເທດ.
