ຊົມເຊີຍພາລະກິດຕ້ານໂຄວິດ-19 ຂອງແພດຫມໍລາວ

ຊົມເຊີຍພາລະກິດຕ້ານໂຄວິດ-19 ຂອງແພດຫມໍລາວ - a0c0631e 9b83 4fdb 8b82 9108e4288186 - ຊົມເຊີຍພາລະກິດຕ້ານໂຄວິດ-19 ຂອງແພດຫມໍລາວ
ຊົມເຊີຍພາລະກິດຕ້ານໂຄວິດ-19 ຂອງແພດຫມໍລາວ - Untitled design - ຊົມເຊີຍພາລະກິດຕ້ານໂຄວິດ-19 ຂອງແພດຫມໍລາວ

ໂດຍ: ທິດກໍ່າ

ມາຮອດມື້ນີ້ ກໍຖືໄດ້ວ່າເກືອບ 3 ເດືອນແລ້ວທີ່ປະເທດເຮົາບໍ່ມີຜູ້ຕິດເຊື້ອໄວຣັສສາຍພັນໃຫມ່ໂຄວິດ-19. ນີ້ກໍຫມາຍຄວາມວ່າສະຖິຕິຍັງຄົງເຫມືອນເດີມ ຄືບໍ່ມີຜູ້ຕິດເຊື້ອເພີ່ມຂຶ້ນອີກ. ຈາກຕົວເລກນັບແຕ່ມີການລະບາດຈົນມາຮອດຕົ້ນເດືອນເມສາ 2020 ກໍມີພຽງ 19 ຄົນທີ່ມີຜູ້ຕິດເຊື້ອ ແລະ ມາຮອດປັດຈຸບັນກໍມີຜູ້ປິ່ນປົວໃຫ້ຫາຍດີແລ້ວ 19 ຄົນ. ນີ້ຄືສິ່ງທີ່ໄດ້ເຫັນນິຕິໃຫມ່ ແລະ ຜົນງານອັນໂດດເດັ່ນຂອງວົງການແພດຫມໍລາວໃນຍຸກພັດທະນາທີ່ກ້າວໄກ.

ຈາກໄຊຊະນະ ແລະ ຜົນງານທີ່ຊີ້ບອກໃຫ້ເຫັນກໍຄືບໍ່ທັນມີຜູ້ໃດເສຍຊີວິດ ແລະ ບັນດາແພດຫມໍເອງທີ່ປິ່ນປົວໂດຍກົງກໍບໍ່ມີຜູ້ໃດຕິດເຊື້ອ ແລະ ເສຍຊີວິດຍ້ອນຕິດເຊື້ອໂຄວິດ-19 ຈາກຄົນເຈັບ. ອັນສາເຫດທີ່ເຮັດໃຫ້ປະເທດເຮົາບໍ່ມີຜູ້ຕິດເຊື້ອຢ່າງຫລວງຫລາຍພາຍມາກແບບລາມພະລາມຈົວ ແລະ ຜູ້ທີ່ຕິດເຊື້ອໄປແລ້ວບໍ່ມີຜູ້ໃດເສຍຊີວິດນັ້ນ ມັນກໍຂຶ້ນກັບຫລາຍປັດໄຈ ແລະ ຫລາຍເງື່ອນໄຂ ເປັນຕົ້ນພວກເຮົາຖືເອົາການປ້ອງກັນສະກັດເປັນແຖວຫນ້າຕົ້ນຕໍ, ເອົາການປິ່ນປົວເປັນບັນຫາສຳຄັນ. ໃນມາດຕະການສອງຢ່າງນີ້ ພວກເຮົາຖືວ່າເປັນບັ້ນຮົບຫນຶ່ງທີ່ຕໍ່ສູ້ກັບສັດຕູທີ່ມາບຸກລຸກຮຸກຮານ, ເປັນສັດຕູທີ່ບໍ່ມີຕົວຕົນ,ໄຮ້ກິ່ນ, ໄຮ້ສຽງ ແລະ ຖືເປັນສັດຕູຕົວອັນຕະລາຍຮ້າຍກາດທີ່ຈະມາປະຫັດປະຫານຊີວິດອິນຊີຂອງປະຊາຊົນລາວບັນດາເຜົ່າ. ອັນສຳຄັນ ກ່ອນອື່ນຫມົດໃນວຽກງານປ້ອງກັນສະກັດກັ້ນນັ້ນ, ພວກເຮົາທັງຫມົດໄດ້ພ້ອມກັນປະຕິບັດຄຳສັ່ງເລກທີ 06/ນຍ ຂອງທ່ານນາຍົກລັດຖະມົນຕີ, ຄຳສັ່ງເລກທີ 07 ຂອງກົມການເມືອງສູນກາງພັກ ແລະ ປະຕິບັດຕາມຫລັກການຕ່າງໆໃນການປ້ອງກັນສະກັດກັ່ນທີ່ຄະນະສະເພາະກິດແຫ່ງຊາດໄດ້ວາງອອກຢ່າງເຂັ້ມງວດສົມຄວນ ຈຶ່ງເຮັດໃຫ້ຫມາກຜົນທີ່ອອກມາເປັນຫນ້າເພິ່ງພໍໃຈ.

ເວົ້າເຖິງການປິ່ນປົວຜູ້ຕິດເຊື້ອໂດຍກົງນັ້ນ, ເຖິງວ່າບ້ານເຮົາເປັນປະເທດນ້ອຍຍັງດ້ອຍພັດທະນາໃນໂລກ, ຄວາມທັນສະໄຫມສີວິໄລທຸກຢ່າງບໍ່ຄືກັບປະເທດອື່ນທີ່ເພິ່ນມີຄວາມຈະເລີນແລ້ວ ເປັນຕົນທາງດ້ານບຸກຄະລາກອນ, ເຄື່ອງມືຮັບໃຊ້ ແລະ ເຕັກໂນໂລຊີບໍ່ທັບພຽບພ້ອມທຸກຢ່າງ, ຊ້ຳບໍ່ຫນຳ ເຊື້ອພະຍາດໂຄວິດ-19 ເປັນພະຍາດທີ່ເກີດມາໃຫມ່ ບໍ່ທັນມີຢາຂະຫນານໃດມາປິ່ນປົວໃຫ້ຫາຍດີທັນເວລາໂດຍກົງ, ແຕ່ແພດຫມໍລາວດໍມີຄວາມມານະພະຍາຍາມໃຊ້ທຸກຄວາມສາມາດເທົ່າທີ່ມີ ທັງປະສົບປະການເພື່ອກູ້ເອົາຊີວິດອິນຊີຜູ້ຕິດເຊື້ອດ້ວຍຄວາມຮຫບຜິດຊອບສູງ ຈຶ່ງເຮັດໃຫ້ຜູ້ຕິດເຊື້ອທັງຫມົດບໍ່ມີໃຜເສຍຊີວິດຍ້ອນ. ນີ້ລະຄືຜົນງານ ແລະ ໄຊຊະນະອັນໃຫຍ່ຫລວງຂອງວົງການແພດຫມໍລາວທີ່ທຸກຄົນຕ້ອງຍອມຮັບ.

ເມື່ອເວົ້າມາຮອດຈຸດນີ້ ກໍຄິດຫວນຄືນເຖີງນັກຂ່າວໄທ ຊ່ອງວັນ ໄດ້ວິຈານໃສ່ຮ້າຍປ້າຍສີວ່າ: ແພດຫມໍລາວບໍ່ມີປະສົບປະການ, ເຄື່ອງກວດກໍບໍ່ມີ, ໂຮງຫມໍໃຫຍ່ໆຢູ່ລາວບໍ່ສໍ່າໂຮງຫມໍຊຸມຊົນຢູ່ໄທ, ເວົ້າແບບດູຖູກ, ຢຽບຫຍາມ, ໃສ່ຮ້າຍປ້າຍສີປະເທດລາວ ກໍຄືວົງການແພດຫມໍລາວ ຈົນເຮັດໃຫ້ວົງການສື່ ແລະ ວົງການແພດລາວ ຕະຫລອດຮອດຄົນລາວທົ່ວປະເທດຍອມຮັບບໍ່ໄດ້. ມາຮອດມື້ນີ້ ຈຶ່ງຮູ້ຄວາມຈິງວ່າສັດຈະທຳມັນກໍໄດ້ພິສິດໃຫ້ເຫັນແລ້ວ. ການວິໄສທັດບັນຫາແບບຂົ່ມເພິ່ນຍໍໂຕກ້າວກ່າຍເຖິງປະເທດອື່ນແບບບໍ່ມີຄວາມຈິງເກີນກວ່າເຫດນັ້ນມັນປຽບເຫມືອນຄົນຕາບອດແຈ້ງທີ່ຫລິ່ງເຫັນພໍມົວໆວ່າການກຳຕົດມັນດີກວ່າກຳຂີ້.

ແນວໃດກໍຕາມ, ສັດຈະທຳແຫ່ງຄວາມຈິງມັນກໍໄດ້ພິສູດໃຫ້ເຫັນແລ້ວວ່າ: ລາວເຮົາຊະນະກັບບັ້ນຮົບຕ້ານການຮຸກຮານຈາກໂຄວິດ-19 ມັນປຽບເຫມືອນໄຊຊະນະໃນບັ້ນຮົບຜາຖີ່, ບັ້ນຮົບນ້ຳບາກ, ບັ້ນຮົບສາລາພູຄູນ, ບັ້ນຮົບລາມເຊີນ 719 ແລະ ບັ້ນຮົບອື່ນໆໃນສະໄຫມຕໍ່ສູ້ກູ້ຊາດ. ຈົນມາຮອດປີ 1975 ກໍປາບສັດຕູໄດ້ຢ່າງຮາບຄາບ, ສາມາດປົດປ່ອຍປະທດຊາດອອກຈາກການຍຶດຄອງຂອງສັດຕູ ປະກາດເປັນ ປະເທດສາທາລະນະລັດ ປະຊາທິປະໄຕ ປະຊາຊົນລາວ ຢ່າງສົມບູນແບບ.

ຊົມເຊີຍພາລະກິດຕ້ານໂຄວິດ-19 ຂອງແພດຫມໍລາວ - Wave100S AD to Website 2020 0 - ຊົມເຊີຍພາລະກິດຕ້ານໂຄວິດ-19 ຂອງແພດຫມໍລາວ

ຈາກໄຊຊະນະອັນໃຫຍ່ຫລວງນີ້ ແມ່ນຜົນງານຊິ້ນໃຫຍ່ໆຂອງວົງການແພດຫມໍລາວທີ່ພວມກ້າວໄປຫນ້າຢ່າງບໍ່ຢຸດຢັ້ງ ແລະ ເຊື່ອຫມັ້ນວ່າ: ໃນອະນາຄັດຕໍ່ຫນ້າ ພາຍໃຕ້ການນຳພາຂອງພັກ ແລະ ລັດຖະບານເຮົາ ກໍຄືຄວາມເອົາໃຈໃສ່ບັນຫາສຸຂະພາບພະລານາໄມຕາມແນວທາງໃນຍຸກການປ່ຽນແປງໃຫມ່ຈະມີການປຫບປະງຍົກລະທີ່ດີກວ່ານີ້ ທັງມີຜົນງານອັນໂດດເດັ່ນຍິ່ງໃຫຍ່ໃນການພັດທະນາວຽກງານສຶກສາ-ສາທາໃຫ້ກ້າວໄປຕາມຍຸກຕາມສະໄຫມ.

ເຖິງຢ່າງໃດກໍດີ, ເພື່ອບໍ່ໃຫ້ເຊື້ອພະຍາດໂຄວິດ-19 ໂຄ້ງມາຄືນທຳລາຍຊີວິດອິນຊີຂອງປະຊາຊົນລາວບັນດາເຜົ່າ ພາລະກິດຂອງແພດຫມໍລາວເຮົາຍັງຈະຕ້ອງໄດ້ບຸກບືນຕົວສູ້ຊົນຍາດເອົາໄຊຊະນະຄັ້ງໃຫມ່ໃຫ້ຝັງໃຈຂອງປວງຊົນລາວທັງຊາດ.

ຊົມເຊີຍພາລະກິດຕ້ານໂຄວິດ-19 ຂອງແພດຫມໍລາວ ຢ່າງສຸດໃຈ.

ຊົມເຊີຍພາລະກິດຕ້ານໂຄວິດ-19 ຂອງແພດຫມໍລາວ - WhatsApp Image 2020 05 27 at 5 - ຊົມເຊີຍພາລະກິດຕ້ານໂຄວິດ-19 ຂອງແພດຫມໍລາວ
ຊົມເຊີຍພາລະກິດຕ້ານໂຄວິດ-19 ຂອງແພດຫມໍລາວ - WhatsApp Image 2020 05 27 at 5 - ຊົມເຊີຍພາລະກິດຕ້ານໂຄວິດ-19 ຂອງແພດຫມໍລາວ
  • 1095 Posts
  • 0 Comments
iLike/LPN/20
error: Alert: ເນື້ອຫາຂ່າວມີລິຂະສິດ !!