ຊ່ວງ​ລະດູຝົນ​ໃຫ້​ສູ້​ຊົນ​ການ​ປູກ​ກັບ​ການ​ລ້ຽງ

ຊ່ວງ​ລະດູຝົນ​ໃຫ້​ສູ້​ຊົນ​ການ​ປູກ​ກັບ​ການ​ລ້ຽງ - 598 - ຊ່ວງ​ລະດູຝົນ​ໃຫ້​ສູ້​ຊົນ​ການ​ປູກ​ກັບ​ການ​ລ້ຽງ
ຊ່ວງ​ລະດູຝົນ​ໃຫ້​ສູ້​ຊົນ​ການ​ປູກ​ກັບ​ການ​ລ້ຽງ - Untitled design - ຊ່ວງ​ລະດູຝົນ​ໃຫ້​ສູ້​ຊົນ​ການ​ປູກ​ກັບ​ການ​ລ້ຽງ

ໂດຍ: ທິດ​ກໍ່າ

ຈາກ​ລະດູ​ແລ້ງ​ຕໍ່​ໃສ່​ລະດູຝົນ​ປີ​ນີ້ ປາກົດ​ເຫັນ​ຝົນຕົກ​ແຕ່​ຫົວປີ, ທ້າຍ​ແລ້ງ​ຕົ້ນຝົນ​ເຂົ້າມາ​ເບິ່ງ​ອັນ​ໃດ​ກໍ​ຄື​ວ່າ​ຊຸ່ມ​ເຢັນສົດ​ຊື່ນ​ໄປ​ໝົດ, ຫັນ​ໃຈ​ກໍ​ໂລ່ງ, ອາກາດ​ກໍ​ສົດ. ພໍ​ແຕ່​ຝົນຕົກ​ໂຮຍ​ຮຳ​ລົງ​ມາ​ຫລາຍ​ຫ່າ ​ເບິ່ງ​ຕົ້ນ​ໄມ້​ໃບ​ຫຍ້າ, ພືດ​ພັນ​ທັນ​ຍາ​ຫານ​ທີ່​ຫິວ​ຫອດ​ນ້ຳ, ​ແຫ້ງ​ກະ​ແດ້ງ​ມາ​ແຕ່​ຊ່ວງ​ຍາມ​ແລ້ງ​ມັນ​ກໍ​ເລີ່​ມຂຽວງາມ, ​ແຕກ​ໜໍ່​ຈໍ່​ແນວ​ໃຫ້​ເຫັນ​ຢ່າງ​ປະຈັກ​ຕາ.

​ໂດຍ​ປົກກະຕິ​ແລ້ວ, ຕາມ​ວິຖີ​ຊີວິດ​ຂອງ​ຊາວ​ຊົນນະບົດ​ລາວ​ເຮົາ ​ນັບ​ແຕ່​ເປີງ​ປູ່ຍ່າຕານາຍ, ພໍ່​ແມ່​ເຄີຍ​ລ້ຽງ​ເຮົາ​ມາ​ພາ​ເຮົາ​ໃຫຍ່​ພໍ​ເຖິງ​ຍາມ​ຝົນຕົກ​ໃໝ່​ກໍ​ພາກັນ​ໄປ​ຫາ​ແຍ່​ໄຂ່​ມົດ​ແດງ​ມາ​ແກງ​ໃສ່​ປາ​ຄໍ່​ໃຫຍ່, ​ເວລາ​ຝົນຕົກ​ແຮງໆ​ນ້ຳ​ເຕັມ​ທົ່ງ​ຫົ້ງຕາມ​ບວກ​ໜອງ​ຄອງ​ບຶງ​ກໍ​ພາກັນ​ໄປ​ຈັບ​ກົບ, ຈັບ​ອຶ່ງ​ມາຕົ້ມ​ໃຫຍ່​ຍອດ​ຜັກຕິ້ວ, ຜັກກະ​ໂດນ ຫລືບໍ່ ກໍ​ໄປ​ເກັບຜັກຫັກ​ໜໍ່​ທີ່​ພວມ​ປົ່ງ​ຍອດ​ຂຽວງາມ​ມາ​ແກງ​ໃສ່​ປາກົດ​ໂທນ​ຖື​ວ່າ​ເປັນ​ອາຫານ​ສຸດ​ຍອດ ​ແລະ ຄົງ​ຄວາມສຸກ​ຂອງ​ຄົນ​ລາວ​ເຮົາ​ທີ່​ເປັນ​ຊາວ​ໄຮ່​ຊາວນາ​ມາ​ແຕ່​ຕົ້ນກຳ​ເນີ​ດ.

ພໍ​ຕົກ​ມາສະ​ໄໝ​ນີ້, ສັງຄົມ ​ແລະ ທຳ​ມະ​ຊາດ​ທຸກ​ຢ່າງ​ມັນ​ກໍ​ຄ່ອຍໆ​ປ່ຽນ​ໄປ​ຕາມ​ວັດຕະ​ຈັກ​ຂອງ​ໂລກ. ​ເວົ້າ​ເຖິງ​ການ​ເຮັດ​ນາ​ກໍ​ບໍ່​ໄດ້​ຍ່າງ​ຕາມ​ກົ້ນຄວາຍ​ອີກ​ແລ້ວ ​ເພາະ​ມີ​ລົດ​ໄຖ​ນາ, ຄາດ​ນາ, ການ​ຜະລິດ​ໂດຍ​ລວມສ່ວນ​ໃຫຍ່​ກໍ​ນຳ​ໃຊ້​ອຸປະກອນ​ທີ່​ທັນ​ສະ​ໄໝ ທັງ​ແລ້ວ​ໄວ​ທັນ​ໃຈ. ການ​ປູກ​ການ​ລ້ຽງ ຖ້າ​ຢາກ​ໃຫ້​ມັນ​ງອກ​ງາມ, ​ໃຫຍ່​ໄວ​ກໍ​ຕ້ອງ​ໃຊ້​ສານ​ກະ​ຕຸ້ນ, ​ໃຊ້​ຝຸ່ນວິທະຍາສາດ, ສານ​ເຄມີ​ເຂົ້າ​ໃນ​ການ​ຜະລິດ. ຍິ່ງ​ໄປ​ກວ່າ​ນັ້ນ ນັບ​ແຕ່​ການ​ປູກ​ການ​ລ້ຽງ​ບາງ​ຢ່າງ​ກໍ​ໄດ້​ນຳ​ໃຊ້​ສານ​ກະ​ຕຸ້ນ ​ແລະ ສານ​ເຄມີ​ເພື່ອ​ບັງຄັບ​ໃຫ້​ສັດ ຫລື ພືດ​ໃຫຍ່​ໄວ.

ຊ່ວງ​ລະດູຝົນ​ໃຫ້​ສູ້​ຊົນ​ການ​ປູກ​ກັບ​ການ​ລ້ຽງ - Wave100S AD to Website 2020 0 - ຊ່ວງ​ລະດູຝົນ​ໃຫ້​ສູ້​ຊົນ​ການ​ປູກ​ກັບ​ການ​ລ້ຽງ

​ແນວ​ໃດ​ກໍ​ຕາມ, ມັນ​ກໍ​ມີ​ຂໍ້​ດີ​ຂໍ້​ເສຍ​ຕາມ​ມາ​ເຊັ່ນ​ວ່າ: ຂໍ້​ດີ​ນັ້ນ​ເປັນ​ການ​ກະ​ຕຸ້ນ​ໃຫ້​ຜົນລະປູກ​ເຮົາ​ເຕີບ​ໃຫຍ່​ຂຽວງາມ ​ແລະ ​ເຕີບ​ໃຫຍ່​ໄວ. ສ່ວນວ່າ​ປະ​ເພດ​ການ​ລ້ຽງ​ສັດ​ປະ​ເພດ​ຕ່າງໆ​ນັ້ນກໍ​ຕ້ອງ​ໃຊ້​ຫົວອາຫານ, ​ໃຊ້​ສານ​ກະ​ຕຸ້ນ​ບາງ​ຢ່າງ​ເພື່ອ​ໃຫ້​ສັດ​ທີ່​ເຮົາ​ລ້ຽງ​ໃຫຍ່​ໄວ, ​ໄດ້​ຈຳໜ່າຍ​​ໄວ​ທັນຕາ​ມກຳນົດ. ​ແຕ່​ວ່າ​ຂໍ້​ເສຍ​ນັ້ນ ມັນ​ກໍ​ມີ​ຫລາຍ​ຢ່າງ​ເຊັ່ນ​ວ່າ: ຢູ່​ໃນ​ພືດ​ຜັກ​ມັນ​ພັດ​ມີ​ສານ​ເຄມີ​ເຈືອ​ປົນ​ເປັນ​ອັນຕະລາຍ​ຕໍ່​ສຸຂະພາບ. ​ແນ່ນອນ​ຖ້າ​ຄົນ​ເຮົາ​ນຳ​ເອົາ​ໄປ​ກິນ​ມັນ​ຈະ​ມີ​ຜົນ​ຂ້າງຄຽງ​ ມີ​ພະຍາດ​ສາລະພັດ​ຢ່າງ​ຕາມ​ມາ. ສະ​ເພາະ​ການ​ລ້ຽງສັດ​ນັ້ນກໍ​ຍິ່ງ​ອັນຕະລາຍ​ເໝືອນ​ກັນ. ສະ​ໄໝ​ນີ້​ສັດ​ເກືອບ​ທຸກ​ປະ​ເພດ​ທີ່​ວາງ​ຂາຍ​ຢູ່​ຕະຫລາດ​ຍິ່ງ​ມີ​ຄວາມ​ສ່ຽງ​ສູງ​ໃນ​ການ​ບໍລິ​ໂພ​ກ ​ເພາະ​ມີ​ການ​ລັກລອບ​ນຳ​ໃຊ້​ສານ​ເຄມີ​ສີດ​ໃສ່​ຕົວ​ສັດ​ເພື່ອ​ປ້ອງ​ກັນ​ການ​ບູດ​ເນົ່າ ​ແລະ ​ໃຫ້​ມັນ​ຕຸ້ຍ​ພີ​ເຫັນ​ແລ້ວ​ມັນ​ເປັນຕາ​ກຢາ. ​ໃນ​ສະພາບ​ປັດຈຸບັນ ການ​ຊອກ​ຢູ່​ຫາ​ກິນ​ຕາມ​ທຳ​ມະ​ຊາດ, ຫ້ວຍນ້ຳລຳ​ເຊ​ມີ​ຫລາຍ​ທ້ອງ​ຖິ່ນ​ເອົາລະ​ເບີດ​ໄປ​ຈູດ, ​ເອົາ​ໝໍ້​ໄຟ​ໄປ​ຊອດ​ເອົາ​ປາ ສຸດ​ທ້າຍ​ປາມັນ​ກໍ​ດັບ. ນີ້​ລະ​ຄື​ຄວາມ​ອັນຕະລາຍ​ຮ້າຍ​ກາດ​ກັບ​ເຄື່ອງມື​ທັນ​ສະ​ໄໝ​ທີ່​ເຮົາ​ຍັງ​ຝືນ​ໃຊ້​ກັບ​ການ​ຜະລິດ ​ແລະ ການ​ທຳ​ມາ​ຫາ​ກິນ​ແບບ​ຈິບຫາຍ​ວາຍ​ວອດ.

ຈາກ​ສາ​ເຫດ​ທີ່​ໄດ້​ກ່າວ​ມາ​ຂ້າງ​ເທິງ​ນັ້ນ, ທາງ​ພັກ ​ແລະ ລັດຖະບານ​ເຮົາ​ຈຶ່ງ​ເຫັນ​ຄວາມ​ເປັນ​ອັນຕະລາຍ ​ແລະ ຜົນ​ກະທົບ​ທີ່​ຈະ​ຕາມ​ມາ​ຢ່າງ​ໃຫຍ່​ຫລວງ​ຕໍ່​ຊີວິດ​ຂອງ​ຄົນ ນັບ​ທັງ​ສັດສາ​ວາ​ສິ່ງ, ພືດ​ຜັກ​ທັນ​ຍາ​ຫານ​ຕ່າງໆ ຈຶ່ງ​ໃຫ້​ພາກັນ​ຫລີກ​ລ່ຽງ ​ແລະ ຊອກ​ຫາ​ທາງ​ອອກ​ດ້ວຍ​ການ​ຜະລິດ​ທີ່​ຕິດ​ພັນ​ກັບ​ທຳ​ມະ​ຊາດ ​ແລະ ສິ່ງ​ແວດ​ລ້ອມ. ​ໃນ​ມະຕິ​ຄັ້ງທີ X ຂອງ​ພັກ ບາງ​ຕອນ​ໄດ້​ເວົ້າວ່າ: “… ພັດທະນາ​ກະສິກຳ​ສະອາດ​ຕິດ​ພັນ​ກັບ​ການ​ປຸງ​ແຕ່ງ, ສ້າງ​ໃຫ້​ເປັນ​ການ​ພັດທະນາ​ແບບ​ຍືນ​ຍົງ, ຮັບປະກັນ​ມາດ​ຕະຖານ​ສະອາດ, ປອດ​ໄພ, ​ໄຮ້​ສານພິດ ​ແລະ ສ້າງ​ມູນ​ຄ່າ​ເພີ່ມ​ໃຫ້​ຜົນ​ຜະລິດ, ສ້າງ​ຄວາມ​ໝັ້ນຄົງ​ດ້ານ​ສະບຽງ​ອາຫານ, ຊຸກຍູ້​ສົ່ງ​ເສີມ​ການ​ຜະລິດ​ແບບ​ຄອບຄົວ, ​ແບບ​ຟາ​ມ, ​ແບບ​ການ​ຮ່ວມ​ມື, ​ແບບ​ສະຫະກອນ”. ທັງ​ໝົດ​ທີ່​ກ່າວ​ມາ​ນີ້​ເປົ້າໝາຍ​ແມ່ນ​ສ້າງ​ເສດຖະກິດ​ການ​ຜະລິດ​ແບບ​ຍືນ​ຍົງ.

​ເພາະສະນັ້ນ ຈຶ່ງ​ເຫັນ​ໄດ້​ວ່າການ​ສົ່ງ​ເສີມ ​ແລະ ການ​ສູ້​ຊົນ​ໃນ​ການ​ປູກ​ການ​ລ້ຽງ​ໃນ​ຊ່ວງ​ລະດູຝົນ​ນີ້​ເປັນ​ເງື່ອນ​ໄຂ​ທີ່​ດີ ​ເພື່ອ​ສົ່ງ​ເສີມ ​ແລະ ຊຸກຍູ້​ການ​ຜະລິດ ​ໂດຍ​ສະ​ເພາະ​ແມ່ນ​ປູກ​ເຂົ້າ, ຖົ່ວດິນ, ສາລີ, ມັນ​ດ້າງ, ພືດ​ຜັກ​ຊະນິດ​ຕ່າງໆ, ປູກ​ໄມ້​ໃຫ້​ໝາກ, ​ໄມ້​ອຸດສາຫະກຳ​ທີ່​ເປັນ​ທ່າ​ແຮງ​ໃຫ້​ເສດຖະກິດ​ຂອງ​ຊາດ. ສ່ວນ​ການ​ລ້ຽງ​ນັ້ນກໍ​ຍິ່ງ​ເໝາະ​ສົມ ​ເພາະ​ລະດູຝົນ​ຈະ​ມີ​ຕົ້ນ​ໄມ້​ໃບ​ຫຍ້າ​ງອກ​ງາມ ອັນ​ເປັນ​ອາຫານ​ສັດ​ນ້ອຍ​ໃຫຍ່​ທີ່​ອຸດົມສົມບູນ. ສະ​ໄໝ​ນີ້ ​ເວົ້າ​ເຖິງ​ການ​ປູກ​ກາ​ນລ້ຽງ ບໍ່​ວ່າ​ຂະໜາດ​ນ້ອຍ, ຂະໜາດ​ກາງ ຖ້າ​​ເຮົາ​ດຸ​ໝັ່ນ​ຂະ​ຫຍັນ​ພຽນ​ກໍ​ທັງ​ໄດ້​ກິນ ​ແລະ ​ໄດ້​ຂາຍ ​ເພາະ​ຄົນ​ກໍ​ເພີ່ມ​ຂຶ້ນ, ການ​ບໍລິ​ໂພ​ກ​ເພີ່ມ​ຂຶ້ນ ​ແລະ ຄວາມ​ຕ້ອງການ​ກໍ​ເພີ່ມ​ຂຶ້ນ. ອີກ​ບໍ່​ດົນ ​ໂຄງການ​ສ້າງ​ທາງ​ລົດ​ໄຟ​ຄວາມ​ໄວ​ສູງ ລາວ-ຈີນ ຈະ​ສຳ​ເລັດ​ຕາມ​ຄວາມ​ຕ້ອງການ. ​ເມື່ອ​ເປັນ​ເຊັ່ນ​ນີ້ ຄວາມ​ຕ້ອງການ​ປາກ​ທ້ອງ​ກໍ​ຍິ່ງ​ເພີ່ມ​ຂຶ້ນ, ຄົນ​ກໍ​ເພີ່ມ​ຂຶ້ນ ຖ້າ​ເຮົາ​ມີ​ແຜນການ​ປູກ​ການ​ລ້ຽງ​ແຕ່​ດຽວ​ນີ້​ເປັນຕົ້ນ​ໄປ ອະນາຄົດ​ຕໍ່ໜ້າ​ອັນ​ໃກ້ໆ​ນີ້​ອາດ​ເປັນ​ນາທີ​ທອງ​ສຳລັບ​ພວກ​ເຮົາ​ກໍ​ເປັນ​ໄດ້.

ຊ່ວງ​ລະດູຝົນ​ໃຫ້​ສູ້​ຊົນ​ການ​ປູກ​ກັບ​ການ​ລ້ຽງ - WhatsApp Image 2020 05 27 at 5 - ຊ່ວງ​ລະດູຝົນ​ໃຫ້​ສູ້​ຊົນ​ການ​ປູກ​ກັບ​ການ​ລ້ຽງ
ຊ່ວງ​ລະດູຝົນ​ໃຫ້​ສູ້​ຊົນ​ການ​ປູກ​ກັບ​ການ​ລ້ຽງ - WhatsApp Image 2020 05 27 at 5 - ຊ່ວງ​ລະດູຝົນ​ໃຫ້​ສູ້​ຊົນ​ການ​ປູກ​ກັບ​ການ​ລ້ຽງ
  • 1095 Posts
  • 0 Comments
iLike/LPN/20
error: Alert: ເນື້ອຫາຂ່າວມີລິຂະສິດ !!