ສົ່ງເສີມການຮ່ວມມືສາກົນ ໃນການຕໍ່ສູ້ກັບສິ່ງທ້າທາຍອັນດຽວກັນ (ໂຄວິດ-19)

ສົ່ງເສີມການຮ່ວມມືສາກົນ ໃນການຕໍ່ສູ້ກັບສິ່ງທ້າທາຍອັນດຽວກັນ (ໂຄວິດ-19) - Time fo an Adventure 22 - ສົ່ງເສີມການຮ່ວມມືສາກົນ ໃນການຕໍ່ສູ້ກັບສິ່ງທ້າທາຍອັນດຽວກັນ (ໂຄວິດ-19)
ສົ່ງເສີມການຮ່ວມມືສາກົນ ໃນການຕໍ່ສູ້ກັບສິ່ງທ້າທາຍອັນດຽວກັນ (ໂຄວິດ-19) - AGL banner - ສົ່ງເສີມການຮ່ວມມືສາກົນ ໃນການຕໍ່ສູ້ກັບສິ່ງທ້າທາຍອັນດຽວກັນ (ໂຄວິດ-19)

ໂດຍ:ໂຄງການຄົ້ນຄວ້າຮ່ວມ ລາວ-ຈີນ

ສະຖາບັນການຕ່າງປະເທດ, ກະຊວງການຕ່າງປະເທດ

ທ່າມກາງກະແສການແຜ່ລະບາດຂອງເຊື້ອພະຍາດອັກເສບປອດສາຍພັນໃໝ່ ຫຼື ໂຄວິດ-19 ທີ່ເມືອງອູ່ຫັ້ນ, ແຂວງຫຸເປີ່ຍຂອງ ສປ ຈີນ ເຊິ່ງເປັນສະຖານທີ່ທໍາອິດທີ່ພົບຜູ້ຕິດເຊື້ອພະຍາດດັ່ງກ່າວ. ພາຍຫຼັງທີ່ມີການກວດພົບຜູ້ຕິດເຊື້ອ ໃນວັນທີ 30 ທັນວາ 2019, ອົງການອະນາໄມໂລກ ໄດ້ນໍາເອົາຕົວຢ່າງຂອງເຊື້ອພະຍາດໄປວິເຄາະບົ່ງມະຕິໃຫ້ຊັດເຈນ ແລະ ວັນທີ 02 ມັງກອນ 2020, ອົງການອະນາໄມໂລກ ໄດ້ແຈ້ງເຕືອນຜ່ານສື່ອອນລາຍ, ຈາກນັ້ນບໍ່ດົນກອງປະຊຸມຫົກຂົງເຂດຂອງອົງການອະນາໄມໂລກ ໄດ້ໄຂຂຶ້ນ ໃນວັນທີ 12 ມັງກອນ 2020 ທີ່ປະເທດສະວິດເຊີແລນ, ປະ ກາດໃຫ້ທົ່ວໂລກຮັບຮູ້ເຖິງເຊື້ອພະຍາດດັ່ງກ່າວ ແລະ ເຝົ້າຕິດຕາມເຫດການ. ມາເຖິງວັນທີ 11 ກຸມພາ 2020, ອົງການອະນາໄມໂລກ ໄດ້ຕົກລົງຮັບຮອງຊື່ເອີ້ນຂອງເຊື້ອໄວຣັດຢ່າງເປັນທາງການວ່າ: COVID-19 (Corona Virus Disease 2019) ຍິ່ງເປັນການເນັ້ນຢໍ້າໃຫ້ເຫັນວ່າ, ພະຍາດໂຄວິດ-19 ໄດ້ກາຍມາເປັນໄພຄຸກຄາມອັນຮ້າຍແຮງຕໍ່ຊີວິດການເປັນຢູ່ຂອງມວນມະນຸດໂລກ ຢ່າງບໍ່ເຄີຍມີມາກ່ອນ, ທັງສົ່ງຜົນກະທົບທາງດ້ານການເມືອງ-ຄວາມໝັ້ນຄົງ, ເສດ ຖະກິດ-ການຄ້າ, ວັດທະນະທໍາ-ສັງຄົມ ແລະ ບໍ່ສາມາດກໍານົດເວລາແນ່ນອນໃນການຄວບຄຸມຢັບຢັ້ງ ແລະ ຮັກສາໃຫ້ ຫາຍຂາດໄດ້. ຕໍ່ສະພາບການດັ່ງກ່າວ ໄດ້ມີຫຼາຍຄໍາຖາມຖືກຕັ້ງເປັນປະເດັນຂຶ້ນມາວ່າ ພວກເຮົາ ຄວນສືບຫາແຫຼ່ງທີ່ມາຂອງພະຍາດກ່ອນທີ່ພວກເຮົາຈະຊອກຫາວິທີແກ້ໄຂ ຫຼື ຊອກຫາທີ່ມາ ເພື່ອການຢັບຢັ້ງການເກີດການລະບາດຂອງພະ ຍາດອີກຄັ້ງໃໝ່ໃນອະນາຄົດ?. ປະຈຸບັນທຸກຝ່າຍ ກໍາລັງເອົາໃຈໃສ່ໃນການຄົ້ນຄວ້າວິໄຈບົນພື້ນຖານຫຼັກການວິທະຍາ ສາດ ແລະ ມີການຮ່ວມມືທີ່ໂປ່ງໃສ ເພາະເຊື້ອພະຍາດດັ່ງກ່າວ ບໍ່ໄດ້ເປັນຂອງປະເທດໃດໜຶ່ງສ້າງຂຶ້ນມາ, ແຕ່ແມ່ນສັດຕູຂອງມວນມະນຸດທີ່ຕ້ອງຮ່ວມກັນຕໍ່ສູ້ກັບມັນ, ສິ່ງທີ່ຈໍາເປັນ ແລະ ຮີບດ່ວນ ແມ່ນການຄວບຄຸມເຊື້ອພະຍາດບໍ່ໃຫ້ເກີດການແຜ່ລາມໄປຫຼາຍກວ່າເກົ່າ ແລະ ຮັກສາລະດັບການສູນເສຍໃຫ້ໜ້ອຍທີ່ສຸດ ເຊິ່ງມັນຮຽກຮ້ອງໃຫ້ມີເຄື່ອງມືທີ່ຈຳ ເປັນຄື: ຢາປິ່ນປົວ, ເຄື່ອງກວດຈັບເຊື້ອ ແລະ ການປະຕິບັດມາດຕະການສະກັດກັ້ນຢ່າງເຂັ້ມງວດ (ປ້ອງກັນ, ກັກບໍລິ ເວນ, ກວດຫາເຊື້ອພະຍາດ, ປິ່ນປົວ ແລະ ຕິດຕາມເປັນຕົ້ນ). ອີກດ້ານໜຶ່ງ, ມັນຮຽກຮ້ອງໃຫ້ທຸກໆຄົນ, ທຸກໆພາກ ສ່ວນ ແລະ ທຸກໆປະເທດໃນໂລກ ຮ່ວມມືເປັນຈິດໜຶ່ງໃຈດຽວກັນ ເພື່ອຈະເອົາຊະນະກັບເຊື້ອພະຍາດສາຍພັນໃໝ່ນີ້ໄດ້ຢ່າງເດັດຂາດ.

 

ການແຜ່ລະບາດຂອງພະຍາດໂຄວິດ-19 ມາເຖິງປະຈຸບັນ ໄດ້ນັບມື້ເພີ່ມສູງຂຶ້ນຢູ່ຫຼາຍປະເທດໃນໂລກ ເຊິ່ງທຸກໆປະເທດ ຍັງຈະຕ້ອງສືບຕໍ່ປະຕິບັດມາດຕະການຄວບຄຸມພາຍໃນຢ່າງເຂັ້ມງວດ, ໃນນີ້ລວມທັງການປິດປະຕູເຂົ້າອອກໃນທຸກຊ່ອງທາງເປັນການຊົ່ວຄາວ. ສຳລັບ ສປປ ລາວ ເຊິ່ງເປັນໜຶ່ງໃນປະເທດທີ່ໄດ້ຮັບຜົນກະທົບຈາກການແຜ່ລະບາດຂອງເຊື້ອພະຍາດໂຄວິດ-19 ເຊັ່ນດຽວກັບຫຼາຍປະເທດໃນທົ່ວໂລກ ແລະ ເພື່ອຮັບມືກັບສະພາບການດັ່ງກ່າວ ລັດຖະບານລາວ ໂດຍຍຶດໝັ້ນແນວທາງນະໂຍບາຍການຕ່າງປະເທດ: “ສັນຕິພາບ, ເອກະລາດ, ມິດຕະພາບ ແລະ ການຮ່ວມມື” ໄດ້ອອກມາດຕະການຢ່າງມີໄຫວພິບ ໃນການແກ້ໄຂ ແລະ ຮັບມືກັບການແຜ່ລະບາດຂອງເຊື້ອພະຍາດດັ່ງ ກ່າວ. ນອກຈາກນັ້ນ, ສປປ ລາວ ຍັງເຄົາລົບພາລະບົດບາດຂອງອົງການອະນາໄມໂລກ (WHO), ໃຫ້ຄວາມຮ່ວມມື ແລະ ເຮັດວຽກຢ່າງໃກ້ຊິດກັບ ອົງການອະນາໄມໂລກ ແລະ ອົງການຈັດຕັ້ງພາກພື້ນ (ອາຊຽນ) ກໍຄືສາກົນ ດ້ວຍການຮ່ວມມື, ຊ່ວຍເຫຼືອເຊິ່ງກັນແລະກັນ, ມີການແລກປ່ຽນຂໍ້ມູນຂ່າວສານ, ແລກປ່ຽນບົດຮຽນກັບບັນດາປະເທດອາຊຽນດ້ວຍກັນ ແລະ ບັນ ດາຄູ່ຮ່ວມມືອື່ນໆຂອງອາຊຽນ ທັງນີ້ກໍເພື່ອກຽມຄວາມພ້ອມໃນການຮັບມືກັບພະຍາດດັ່ງກ່າວ.

 

ສົ່ງເສີມການຮ່ວມມືສາກົນ ໃນການຕໍ່ສູ້ກັບສິ່ງທ້າທາຍອັນດຽວກັນ (ໂຄວິດ-19) - Wave100S AD to Website 2020 0 - ສົ່ງເສີມການຮ່ວມມືສາກົນ ໃນການຕໍ່ສູ້ກັບສິ່ງທ້າທາຍອັນດຽວກັນ (ໂຄວິດ-19)

ໃນວັນທີ 20 ກຸມພາ 2020, ບັນດາລັດຖະມົນຕີການຕ່າງປະເທດຂອງອາຊຽນ ແລະ ຈີນ ໄດ້ພົບປະກັນທີ່ນະຄອນຫຼວງວຽງຈັນ ແລະ ໄຂກອງປະຊຸມສະໄໝພິເສດ (Special ASEAN-China Foreign Ministers’ Meeting on Coronavirus Disease) ເພື່ອປຶກສາຫາລື ກ່ຽວກັບ ບັນຫາເຊື້ອພະຍາດອັກເສບປອດສາຍພັນໃໝ່, ອາຊຽນ ແລະ ຈີນ ໄດ້ເອກະພາບໃນດ້ານການວາງມາດຕະການການສະກັດກັ້ນພະຍາດ, ແບ່ງປັນຂໍ້ມູນຂ່າວສານທີ່ຖືກ ຕ້ອງຊັດເຈນ ແລະ ຍົກລະດັບການຮ່ວມມືພາຍໃນພາກພື້ນ ແລະ ຕໍ່ກັບຄູ່ຮ່ວມມືພາຍນອກ ເພື່ອຮັບຮູ້ສະພາບການປ່ຽນແປງຕ່າງໆຂອງພາກພື້ນ ແລະ ຂອງໂລກ. ພ້ອມທັງຫຼຸດຜ່ອນສິ່ງກີດຂວາງລະບົບຕ່ອງໂສ້ການສະໜອງສິນຄ້າ ແລະ ວັດຖຸອຸປະກອນທາງການແພດອີກດ້ວຍ. ນອກຈາກນີ້, ອາຊຽນ ແລະ ຈີນ ຍັງຍຶດໝັ້ນໃນການຮ່ວມມືກັນ, ເມື່ອລົງເຮືອລໍາດຽວກັນແລ້ວ ຈະຕ້ອງສ້າງເສດຖະກິດພາກພື້ນໃຫ້ເຂັ້ມແຂງຮ່ວມກັນ, ພ້ອມກັນພັດທະນາເຕັກນິກວິທະຍາ ສາດ ເພື່ອຄົ້ນຄວ້າໂຕຢາຮັກສາໂຣກພະຍາດ ແລະ ວັກຊີນປ້ອງກັນ. ກອງປະຊຸມຄັ້ງນີ້ ໄດ້ຮັບຜົນສຳເລັດເປັນທີ່ໜ້າເພິ່ງພໍໃຈ ເຊິ່ງສະແດງໃຫ້ເຫັນວ່າ ການຮ່ວມມືພາກພື້ນ ຖືເປັນພື້ນຖານຄວາມສາມັກຄີ, ເປັນນໍ້າໜຶ່ງໃຈດຽວ ແລະ ມີຄວາມໝາຍອັນໃຫຍ່ຫຼວງໃນໄລຍະຕໍ່ສູ້ກັບເຊື້ອພະຍາດໂຄວິດ-19 ແລະ ໄດ້ຮັກສາການແລກປ່ຽນຂໍ້ມູນຂ່າວສານຮ່ວມກັນມາໂດຍຕະ ຫຼອດ. ພິເສດ, ກໍາປູເຈຍ ໃນນາມເປັນປະເທດປະສານງານວຽກສາທາລະນະສຸກອາຊຽນ ປະຈໍາປີ 2020 ໄດ້ມີການປະສານສົມທົບກັບປະເທດສະມາຊິກອາຊຽນ ລວມທັງ ສປປ ລາວ ເພື່ອຈັດກອງປະຊຸມລັດຖະມົນຕີສາທາລະ ນະສຸກອາຊຽນ ກ່ຽວກັບ ໂຣກພະຍາດໂຄວິດ-19 ຂຶ້ນຫຼາຍຄັ້ງ ແລະ ໄດ້ເຮັດວຽກຮ່ວມກັນ ພາຍໃຕ້ບັນດາກົນໄກການຮ່ວມມືທີ່ອາຊຽນເປັນຜູ້ນໍາພາ ຢູ່ລະດັບພາກພື້ນ ແລະ ສາກົນ.

ເພື່ອສະກັດກັ້ນການແຜ່ລະບາດຂອງພະຍາດໂຄວິດ-19, ອົງການອະນາໄມໂລກ (WHO) ຮ່ວມກັບອົງການສາກົນອື່ນໆ ໄດ້ເຮັດວຽກຢ່າງໜັກ ພາຍໃຕ້ແຮງກົດດັນຂອງສັງຄົມ ໃນການເຄື່ອນໄຫວຊຸກຍູ້ທຸກພາກສ່ວນຂອງແຕ່ລະປະເທດທົ່ວໂລກ ເພື່ອເຜີຍແຜ່ຂໍ້ມູນຂ່າວສານ ກ່ຽວກັບ ມາດຕະການສະກັດກັ້ນ ແລະ ຝຶກອົບຮົມໜ່ວຍງານຊ່ຽວຊານ ຫຼາຍກວ່າ 2 ລ້ານແຫ່ງ ໃຫ້ເຝົ້າຕິດຕາມສະພາບການແຜ່ລະບາດຂອງເຊື້ອພະຍາດຢ່າງໃກ້ຊິດ, ພ້ອມທັງໄດ້ຄົ້ນຄວ້າ ແລະ ທົດລອງພັດທະນາຢາປົວພະຍາດຕະຫຼອດມາ. ນອກຈາກນັ້ນ, ໄດ້ມີການຈັດກອງປະຊຸມສາກົນຂຶ້ນຫຼາຍຄັ້ງ ເພື່ອປຶກສາຫາລື, ແລກປ່ຽນຄໍາຄິດເຫັນ ພ້ອມທັງຊອກຫາວິທີສະກັດກັ້ນ ແລະ ແກ້ໄຂຮ່ວມກັນ, ເຊິ່ງຫຼ້າສຸດໃນວັນທີ 18-19 ພຶດສະພາ 2020, ກອງປະຊຸມອະນາໄມໂລກ ຄັ້ງທີ 73 ໄດ້ຮັບຮອງຫຼາຍເອກະສານ ແລະ ໄດ້ມີການຕົກລົງທີ່ສຳຄັນຄື: 1. ທົ່ວໂລກຕ້ອງເພີ່ມທະວີວຽກງານທາງດ້ານສາທາລະນະສຸກໃຫ້ມີຄຸນນະພາບ ຮັບປະກັນໃນການປ້ອງກັນເຊື້ອພະຍາດເປັນຫຼັກ; 2. ຕ້ອງນໍາໃຊ້ເງື່ອນໄຂການພົວພັນສາກົນຕ່າງໆໃຫ້ເກີດມີຜົນປະໂຫຍດທີ່ສຸດ ລວມເຖິງການພັດທະນາເສດຖະກິດ-ການຄ້າ ໃນຊ່ວງໄລຍະທີ່ເໝາະສົມ; 3. ວັກຊີນໃນການຮັກສາເຊື້ອພະຍາດຕ້ອງຈັດເຂົ້າໃນຖັນແຖວຜະລິດຕະພັນສາທາລະນະສຸກສ່ວນລວມຂອງໂລກ; ແລະ 4. ຕ້ອງຊຸກຍູ້ໃຫ້ມີການຮ່ວມມືກັນ ລະຫວ່າງ ພາກ ສ່ວນລັດຖະບານ ແລະ ເອກະຊົນ ໃນການຄົ້ນຄວ້າ ແລະ ພັດທະນາຢາປິ່ນປົວ, ບວກກັບໃຫ້ມີການຮ່ວມມືພາຍໃນພາກພື້ນ ແລະ ອົງການອະນາໄມໂລກ ໃນການແບ່ງປັນຂໍ້ມູນຂ່າວສານທີ່ຈໍາເປັນ ແລະ ກ່ຽວຂ້ອງກັບພະຍາດໂຄວິດ-19. ສືບເນື່ອງມາຈາກການຕົກລົງໃນກອງປະຊຸມດັ່ງກ່າວນັ້ນ, ມາເຖິງວັນທີ 27 ພຶດສະພາ 2020 ທີ່ຜ່ານມາ, WHO ໄດ້ປະກາດສ້າງຕັ້ງກອງທຶນອະນາໄມໂລກ (World Health Organization Fundation) ຢ່າງເປັນທາງການ, ເພື່ອສ້າງໃຫ້ເປັນເງິນທຶນສຸກເສີນໃນການຕໍ່ສູ້ກັບສິ່ງທ້າທາຍທາງດ້ານສາທາລະນະສຸກຂອງໂລກ ເຊິ່ງໝາກຜົນໃນຄັ້ງນີ້ໄດ້ກາຍ ເປັນບາດກ້າວທີ່ມີຄວາມໝາຍທາງປະຫວັດສາດຂອງ WHO ແລະ ພາກສ່ວນກ່ຽວຂ້ອງອື່ນໆ ທີ່ໄດ້ທຸ້ມເທກໍາລັງແຮງ ເປັນເວລາກວ່າ 2 ປີ. ອີງຕາມຖະແຫຼງການຂອງອົງການອະນາໄມໂລກ ມາເຖິງປະຈຸບັນ, ການແຜ່ລະບາດຂອງເຊື້ອພະຍາດ ໂຄວິດ-19 ຍັງຢູ່ໃນລະດັບທີ່ເປັນໄລຍະອັນຕະລາຍ, ບໍ່ວ່າຈະດ້ວຍເຫດຜົນໃດກໍ່ຕາມ ທົ່ວໂລກບໍ່ຄວນປະໝາດ ເພາະອາການຂອງເຊື້ອປອດອັກເສບນີ້ມີໂອກາດຈະກັບມາໄດ້ທຸກເວລາ.

ສະນັ້ນ, ໃນສະພາບການປະເຊີນໜ້າກັບຄວາມຫຍຸ້ງຍາກໃນການດໍາລົງຊີວິດຂອງມວນມະນຸດໂລກ, ການຟື້ນຟູສະພາບເສດຖະກິດໂລກ, ສະພາບການຕ່າງໆຂອງພາກພື້ນ ແລະ ສາກົນ ໃນຊ່ວງໂຄວິດ-19 ນີ້, ສິ່ງສໍາຄັນທີ່ສຸດ ທີ່ພວກເຮົາຈະຕ້ອງເຮັດ ກໍຄື ການສົ່ງເສີມຄວາມສາມັກຄີ ແລະ ເສີມຂະຫຍາຍການຮ່ວມມືສາກົນໃນທຸກຮູບແບບໃຫ້ເຂັ້ມແຂງຂຶ້ນຕື່ມ ແລະ ເຮັດໃຫ້ເປັນຮູບປະທໍາ ທີ່ໄຮ້ພົມແດນ, ເພື່ອຮັບປະກັນການປະເຊີນໜ້າກັບສິ່ງທ້າທາຍອື່ນໆທີ່ອາດຈະເກີດຂຶ້ນໃນອະນາຄົດຮ່ວມກັນ.

ສົ່ງເສີມການຮ່ວມມືສາກົນ ໃນການຕໍ່ສູ້ກັບສິ່ງທ້າທາຍອັນດຽວກັນ (ໂຄວິດ-19) - lattana banner - ສົ່ງເສີມການຮ່ວມມືສາກົນ ໃນການຕໍ່ສູ້ກັບສິ່ງທ້າທາຍອັນດຽວກັນ (ໂຄວິດ-19)
ສົ່ງເສີມການຮ່ວມມືສາກົນ ໃນການຕໍ່ສູ້ກັບສິ່ງທ້າທາຍອັນດຽວກັນ (ໂຄວິດ-19) - lattana banner 1 - ສົ່ງເສີມການຮ່ວມມືສາກົນ ໃນການຕໍ່ສູ້ກັບສິ່ງທ້າທາຍອັນດຽວກັນ (ໂຄວິດ-19)
ສົ່ງເສີມການຮ່ວມມືສາກົນ ໃນການຕໍ່ສູ້ກັບສິ່ງທ້າທາຍອັນດຽວກັນ (ໂຄວິດ-19) -    AD conten website - ສົ່ງເສີມການຮ່ວມມືສາກົນ ໃນການຕໍ່ສູ້ກັບສິ່ງທ້າທາຍອັນດຽວກັນ (ໂຄວິດ-19)
error: Alert: ເນື້ອຫາຂ່າວມີລິຂະສິດ !!