ລາວຫາລືແກ້ໄຂບັນຫາການຄ້າມະນຸດ

- advert banner 728 90 728x90 - ລາວຫາລືແກ້ໄຂບັນຫາການຄ້າມະນຸດ

ເມື່ອທ້າຍອາທິດຜ່ານມານີ້, ຄະນະກຳມະການຕ້ານການຄ້າມະນຸດລະດັບຊາດໄດ້ສະຫລຸບວຽກງານສະກັດກັ້ນ ແລະ ຕ້ານການຄ້າມະນຸດ 6 ເດືອນຕົ້ນປີ ແລະ ຫາລືແຜນການແກ້ໄຂສະພາບການຄ້າມະນຸດໃນຕໍ່ໜ້າ, ໂດຍການເປັນປະທານຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ປະທານຄະນະກຳມະການຕ້ານການຄ້າມະນຸດລະດັບຊາດ.

- new3 - ລາວຫາລືແກ້ໄຂບັນຫາການຄ້າມະນຸດ

ທ່ານພັນເອກ ເພັງສະຫວັນ ທິບພະວົງໄຊ ຮອງຫົວໜ້າກົມໃຫຍ່ຕຳຫລວດ ກະຊວງປ້ອງກັນຄວາມສະຫງົບ, ຫົວໜ້າກອງເລຂາຄະນະກຳມະການຕ້ານການຄ້າມະນຸດລະດັບຊາດ ລາຍງານໃຫ້ຮູ້ວ່າ: ໃນໄລຍະຜ່ານມາ, ລາວເຮົາໄດ້ເອົາໃຈໃສ່ຢາງຕັ້ງໜ້າໃນການຜັນຂະຫຍາຍແຜນງານແຫ່ງຊາດໄປຄຽງຄູ່ການປະຕິບັດສົນທິສັນຍາສາກົນຕ່າງໆທີ່ໄດ້ເຂົ້າເປັນພາຄີເພື່ອຕ້ານ ແລະ ສະກັດກັ້ນການຄ້າມະນຸດ ເປັນຕົ້ນ: ການດຳເນີນຄະດີຕໍ່ຜູ້ກະທຳຜິດ, ການປົກປ້ອງ ແລະ ຊ່ວຍເຫລືອຜູ້ຖືກເຄາະຮ້າຍຈາກການຄ້າມະນຸດ. ພ້ອມທັງເອົາໃຈໃສ່ສືບສວນ-ສວນສວນຂັ້ນພື້ນຖານ, ຂຶ້ນບັນຊີ, ຄັດຈ້ອນເປົ້າໝາຍພື້ນທີ່, ເສັ້ນທາງທີ່ມັກເກີດມີການຄ້າມະນຸດເພື່ອຕິດຕາມກວດກາ ແລະ ດຳເນີນຄະດີຕໍ່ຜູ້ກະທຳຜິດ, ຊຶ່ງນັບແຕ່ເດືອນມັງກອນຮອດເດືອນມິຖຸນາປີນີ້ມີຄະດີກ່ຽວກັບການຄ້າມະນຸດເກີດຂຶ້ນ 13 ກໍລະນີ, ມີຜູ້ຖືກຫາ 20 ກວ່າຄົນ (ຍິງ 9 ຄົນ), ມີຜູ້ຖືກເຄາະຮ້າຍເປັນຍິງຈໍານວນ 16 ຄົນ ແລະ ມີ 6 ຄົນອາຍຸຕໍ່າກວ່າ 18 ປີ.

ໃນໂອກາດນີ້, ທ່ານຮອງນາຍົກລັດຖະມົນຕີ, ໄດ້ໃຫ້ທິດຊີ້ນໍາໃນການແກ້ ບັນຫາດັ່ງກ່າວໃຫ້ມີປະສິດທິຜົນໃນຕໍ່ໜ້າ, ໂດຍເນັ້ນໃຫ້ສືບຕໍ່ຈັດຕັ້ງປະຕິບັດແຜນວຽກ 6 ເດືອນທ້າຍປີທີ່ໄດ້ຕົກລົງເປັນເອກະພາບຢູ່ກອງປະຊຸມຄັ້ງນີ້ໄປຜັນຂະຫຍາຍດ້ວຍຄວາມຮັບພິຊອບສູງ ເພື່ອໃຫ້ຮັບປະກັນຄວາມເປັນລະບຽບຮຽບຮ້ອຍໃນສັງຄົມ, ເອົາໃຈໃສ່ວຽກງານປົກປ້ອງຊ່ວຍເຫລືອຜູ້ຖືກເຄາະຮ້າຍຈາກການຄ້າມະນຸດທີ່ຖືກສົ່ງກັບຈາກຕ່າງປະເທດ ເພື່ອສຳພາດຟື້ນຟູສຸຂະພາບ, ຈິດໃຈ ແລະ ສົ່ງກັບຄືນສູ່ພູມລຳເນົາກໍຄືຄອບຄົວຢ່າງປອດໄພ. ສ່ວນຜູ້ກະທໍາຜິດກໍຕ້ອງຖືກດໍາເນີນຄະດີຕາມລະບຽບກົດໝາຍຢ່າງເຂັ້ມງວດ.

- lattana 1 - ລາວຫາລືແກ້ໄຂບັນຫາການຄ້າມະນຸດ
error: Content is protected !!