ສະພາບແອອັດເຂດຕະຫລາດໂນນຄໍ້ໄດ້ຮັບການແກ້ໄຂແລ້ວ

- advert banner 728 90 728x90 - ສະພາບແອອັດເຂດຕະຫລາດໂນນຄໍ້ໄດ້ຮັບການແກ້ໄຂແລ້ວ

ສະພາບຄວາມແອອັດສັບສົນທີ່ເກີດຈາກການຄ້າຂາຍ ແລະ ຈອດລົດຊະຊາຍໃນເຂດຕະຫລາດໂນນຄໍ້, ເມືອງໄຊເສດຖາ, ນະຄອນຫລວງວຽງຈັນ ແມ່ນ ໄດ້ຮັບການແກ້ໄຂໃຫ້ມີຄວາມສະຫງົບໂດຍພື້ນຖານແລ້ວ, ພາຍຫລັງທ່ານຮອງເຈົ້າເມືອງໄຊເສດຖາ, ພ້ອມພາກສ່ວນກ່ຽວຂ້ອງໄດ້ລົງແກ້ໄຂຈັດສັນຄວາມເປັນລະບຽບຮຽບຮ້ອຍເຂດຕະຫລາດດັ່ງກ່າວເມື່ອອາທິດຜ່ານມາ.

ທ່ານຮອງເຈົ້າເມືອງ ໃຫ້ຮູ້ວ່າ: ຕະຫລາດແຫ່ງນີ້, ສ້າງຂຶ້ນເພື່ອຮອງຮັບຊາວຄ້າຂາຍຈາກຕະຫລາດທາດຫລວງ ແລະ ຫລຸດຜ່ອນສະພາບລົດຕິດອັ່ງອໍຢູ່ເຂດສົ້ນຂົວໃກ້ຕະຫລາດທາດຫລວງຊົ່ວຄາວ, ແຕ່ປັດຈຸບັນເຫັນວ່າໄດ້ມີສະພາບການຄ້າຂາຍ ແລະ ຈອດລົດຊະຊາຍຕາມແຄມທາງໃນບໍລິເວນດັ່ງກ່າວ, ອັນໄດ້ເຮັດໃຫ້ການສັນຈອນໄປມາແອອັດສັບສົນ, ໂດຍສະເພາະໃນຕອນເຊົ້າ ແລະ ຕອນແລງ, ດັ່ງນັ້ນຈຶ່ງໄດ້ແນະນໍາໃຫ້ເຈົ້າຂອງຕະຫລາດເອົາໃຈໃສ່ການເປີດ-ປິດຕະຫລາດໃຫ້ກົງໂມງເວລາ ແລະ ຫຍັບຮົ້ວກັ້ນອອກຈາກແຄມທາງເພື່ອຂະຫຍາຍພື້ນທີ່ຈອດລົດ ແລະ ບໍ່ໃຫ້ຊາວຄ້າຂາຍນຳເອົາສີນຄ້າຕ່າງໆມາວາງຂາຍຢູ່ແຄມທາງໂດຍເດັດຂາດ.

ທ່ານນາງ ແສງແກ້ວ ວົງພະຈັນ ເຈົ້າຂອງຕະຫລາດດັ່ງກ່າວ ໃຫ້ຮູ້ວ່າ: ເມື່ອກ່ອນຕະຫລາດຂອງຕົນມີຊາວຄ້າຂາຍພຽງຮ້ອຍກວ່າຫ້ອງ, ແຕ່ປັດຈຸບັນເພີ່ມຂຶ້ນເກືອບ 500 ຫ້ອງ, ຈຶ່ງເຮັດໃຫ້ເກີດຄວາມແອອັດ ແລະ ລົດຂອງຜູ້ທີ່ມາຊື້ສີນຄ້າໃນແຕ່ລະວັນກໍມີຫລາຍ, ອັນເປັນຕົ້ນເຫດກໍໃຫ້ເກີດສະພາບແອອັດສັບສົນດັ່ງກ່າວ ແລະ ຕໍ່ໜ້ານີ້ຈະໄດ້ສ້າງອາຄານຕະຫລາດໃຫ້ມີມາດຕະຖານຂື້ນຕື່ມອີກເພື່ອຮອງຮັບຊາວຄ້າຂາຍ ແລະ ຜູ້ມາໃຊ້ບໍລິການໃຫ້ມີຄວາມສະດວກ ແລະ ຈະຂະຫຍາຍລານຈອດລົດໃຫ້ກວ້າງກວ່າເກົ່າ ເພື່ອສາມາດແກ້ໄຂສະພາບແອອັດດັ່ງກ່າວໃຫ້ໝົດໄປ.

- Tiger Head 728x90 - ສະພາບແອອັດເຂດຕະຫລາດໂນນຄໍ້ໄດ້ຮັບການແກ້ໄຂແລ້ວ
- 1 1 - ສະພາບແອອັດເຂດຕະຫລາດໂນນຄໍ້ໄດ້ຮັບການແກ້ໄຂແລ້ວ

 

error: Content is protected !!