ຫລັງ​ໂຄ​ວິດ​ຕ້ອງ​ເລັ່ງຟື້ນຟູ​ເສດຖະກິດ​ໃຫ້​ເຂັ້ມ​ແຂງ

ຫລັງ​ໂຄ​ວິດ​ຕ້ອງ​ເລັ່ງຟື້ນຟູ​ເສດຖະກິດ​ໃຫ້​ເຂັ້ມ​ແຂງ - 888999 - ຫລັງ​ໂຄ​ວິດ​ຕ້ອງ​ເລັ່ງຟື້ນຟູ​ເສດຖະກິດ​ໃຫ້​ເຂັ້ມ​ແຂງ
ຫລັງ​ໂຄ​ວິດ​ຕ້ອງ​ເລັ່ງຟື້ນຟູ​ເສດຖະກິດ​ໃຫ້​ເຂັ້ມ​ແຂງ - AGL banner - ຫລັງ​ໂຄ​ວິດ​ຕ້ອງ​ເລັ່ງຟື້ນຟູ​ເສດຖະກິດ​ໃຫ້​ເຂັ້ມ​ແຂງ

ໂດຍ:ທິດ​ກໍ່າ

 

ມາ​ຮອດ​ປັດຈຸບັນ, ພາລະກິດ​ໃນ​ການ​ປິ່ນປົວ​ຜູ້​ຕິດ​ເຊື້ອ​ໂຄ​ວິດ-19 ຈຳນວນ 1 ຄົນ​ສຸດ​ທ້າຍ​ກໍ​ໄດ້​ຫາຍ​ດີ​ເປັນ​ທີ່​ຮຽບຮ້ອຍ ​ແລະ ອອກ​ໂຮງໝໍ​ໃນ​ວັນ​ທີ 9 ມິຖຸນາ 2020 ນີ້​ເອງ. ສະຫລຸບ​ແລ້ວ ​ໃນ​ຈຳນວນ​ຜູ້​ຕິດ​ເຊື້ອທັງ​ໝົດ 19 ຄົນ​ແມ່ນ​ໄດ້​ຮັບ​ການ​ປິ່ນປົວ​ໃຫ້ຫາ​ຍດີ​ໄປ​ໝົດ​ແລ້ວ ​ໂດຍ​ບໍ່​ມີ​ຜູ້​ໃດ​ເສຍ​ຊີວິດ. ຫລ້າ​ສຸດ​ໃນ​ວັນ​ທີ 10 ມິຖຸນາ 2020, ທ່ານ​ນາຍົກລັດຖະມົນຕີ ທອງ​ລຸນ ສີ​ສຸ​ລິດ ພ້ອມ​ດ້ວຍ​ຄະນະ​ສະ​ເພາະ​ກິດ ​ເພື່ອ​ປ້ອງ​ກັນ, ຄວບ​ຄຸມ ​ແລະ ​ແກ້​ໄຂ​ການລະບາດ​ຂອງ​ພະຍາດ COVID-19 ​ໄດ້​ຖະ​ແຫລ​ງກ່ຽວ​ກັບ​​ສະພາບ​ການ​ສະກັດ​ກັ້ນ ​ແລະ ຕ້ານ​ການ​ແຜ່​ລະບາດ​ຂອງ​ພະຍາດ COVID-19 ​ຢູ່ ສປປ ລາວ ​ເຊິ່ງ​ເນື້ອ​ໃນ​ຖະ​ແຫລ​ງການ​ນັ້ນມີ​ເຖິງ 10 ຂໍ້ດ້ວຍ​ກັນ​ຄື: ອັນ​ທີ​ໜຶ່ງ​ແມ່ນ​ໄດ້​ເວົ້າ​ເຖິງ​ການ​ທີ່​ປະ​ເທດ​ເຮົາ​ໄດ້​ປອດ​ຈາກ​ໂຄ​ວິດ​ເປັນ​ບາດກ້າວ​ໜຶ່ງ​ທີ່​ສຳຄັນ​ຍິ່ງ ​ແຕ່​ກໍ​ຖື​ວ່າ​ເປັນ​ໄຊຊະນະ ​ແລະ ຜົນສຳ​ເລັດ​ໃນ​ເບື້ອງຕົ້ນ​ເທົ່າ​ນັ້ນ. ອັນ​ທີ​ສອງ​ ​ໃນ​ປັດຈຸບັນ ​ແລະ ຕໍ່ໜ້າ​ພວກ​ເຮົາ​ຍັງ​ຢູ່​ນຳ​ສະພາບ​ການ​ທີ່​ທ້າ​ທາຍ, ຫລໍ່​ແຫລມ​ຫລາຍ​ດ້ານ​ທີ່​ບໍ່​ອາດ​ປະໝາດ, ລະ​ເຫລີງ ​ແລະ ​ເຜີ​ຕົວ​ເປັນອັນຂາດ. ສາມ ພວກ​ເຮົາ​ຕ້ອງ​ພ້ອມ​ກັນ​ມີ​ສະຕິ​ລະວັງ​ຕົວ​ໃຫ້​ສູງ​ກວ່າ​ເກົ່າ, ສືບ​ຕໍ່​ປະຕິບັດ​ຄຳ​ສັ່ງ, ຄຳ​ແນະນຳ, ​ແຈ້ງ​ການ​ທີ່​ອອກ​ໄປ​ແລ້ວ​ໃຫ້​ເຂັ້ມງວດ. ອັນ​ທີ​ສີ່ ລັດຖະບານ​ຈະ​ຕິດຕາມ, ປະ​ເມີນ​ສະຖານະ​ການ​ທຸກ​ໄລຍະ ​ເພື່ອ​ມີ​ການ​ປັບປຸງ​ປ່ຽນ​ແປງ​ໄປ​ຕາມ​ສະພາບ​ການ​ຢ່າງ​ສົມ​ເຫດ​ສົມ​ຜົນ ​ເພື່ອ​ສ້າງ​ໂອກາດ​ໃຫ້​ປະຊາຊົນ ​ແລະ ຜູ້​ປະກອບ​ການ​ໄດ້​ດຳລົງ​ຊີວິດ, ທຳ​ມາ​ຫາ​ກິນ ​ແລະ ດຳ​ເນີນ​ກິດຈະການ​ຢ່າງ​ເປັນ​ປົກກະຕິ ​​ໄວ​ເທົ່າ​ທີ່​ຈະ​ໄວ​ໄດ້. ຫ້າ ພວກ​ເຮົາ​ຕ້ອງ​ໄດ້​ຕັດສິນ​ໃຈ​ປ້ອງ​ກັນ, ຄວບ​ຄຸມ​ດ້ວຍ​ທຸກ​ກຳລັງ​ແຮງ ​ແລະ ດ້ວຍ​ມາດ​ຕະການ​ທີ່​ເໝາະ​ສົມ ​ເພື່ອ​ບໍ່​ໃຫ້​ພະຍາດ​ດັ່ງກ່າວ​ກັບ​ຄືນ​ມາ​ລະບາດ​ອີກ​ຮອບ​ສອງ ຫລື ຮອບ​ຕໍ່​ໆ​ໄປ. ຫົກ ​ໃນ​ເວລາ​ດຽວ​ກັນ​ນີ້ ພະຍາດ​ຕາມ​ລະດູ​ການ​ກໍ​ລະບາດ ​ເປັນຕົ້ນ​ໄຂ້​ເລືອດ​ອອກ​ກໍ​ເປັນພາລະກິດ​ອັນ​ສຳຄັນ​ທີ່​ຕ້ອງ​ໄດ້​ຊ່ວຍ​ກັນ​ປ້ອງ​ກັນ ​ແລະ ​ແກ້​ໄຂ. ​ເຈັດ ​ໃນ​ໂອກາດ​ນີ້ ຮຽກຮ້ອງ​ມາ​ຍັງ​ປະຊາຊົນ​ລາວ​ທຸກ​ທົ່ວ​ໜ້າ​ທົ່ວ​ປະ​ເທດ ຈົ່ງ​ສິບ​ຕໍ່​ຕິດຕາມ​ສະພາບ​ການ​ຢ່າງ​ໃກ້ຊິດ, ມີ​ສະຕິ​ລະວັງ​ຕົວຢ່າງ​ສູງ, ປະຕິບັດ​ໃຫ້​ຖືກຕ້ອງ​ຕາມ​ຂໍ້​ກຳນົດ, ຂໍ້​ແນະນຳ​ທີ່​ທາງ​ການວາງ​ອອກ ​ແລະ ຈະ​ວາງ​ອອກ​ຢ່າງ​ເຄັ່ງ​ຂັດ​ຕໍ່​ໄປ. ​ແປ​ດ ຢ່າ​ພາກັນ​ລະ​ເຫລີງ​ ທັງ​ໃຫ້​ເອົາ​ໂອກາດ​ນີ້​ໃຫ້​ແຕ່ລະຄົນ, ​ແຕ່​ລະ​ຄອບຄົວ, ​ແຕ່​ລະກາ​ນຈັດຕັ້ງ​ແຕ່​ເທິງ​ລົງ​ລຸ່ມ​ຕ້ອງ​ໄດ້​ປັບ​ວິຖີ​ຊີວິດ ຫລື ​ເວົ້າຢ່າງ​ໜຶ່ງ​ວ່າ: ການ​ດຳລົງ​ຊີວິດ​ແບບ​ໃໝ່​ທີ່​ມີ​ສະຕິ​ລະວັງ​ຕົວ​ສູງ​ກວ່າ, ກ້າວໜ້າ​ທັນ​ສະ​ໄໝ, ສີວິ​ໄລ, ປະຢັດ​ມັດທະຍັດ ​ແລະ ມີ​ລະບຽບ​ວິ​ໄນ​ກວ່າ​ເກົ່າ. ອັນ​ທີ່​ເກົ້າ ບໍ່​ໃຫ້​ພະຍາດ​ໂຄ​ວິດ-19 ກັບ​ມາສູ່​ສັງຄົມ​​ເຮົາ​ຮອບ​ສອງ​ອີກ ​ແລະ ທັງ​ຖື​ເອົາ​ໂອກາດ​ນີ້​ປັບປຸງ​ແກ້​ໄຂ​ຂໍ້ຄົງຄ້າງ​ໃນ​ການ​ປະຕິບັດ​ໜ້າ​ທີ່​ວຽກ​ງານ, ການ​ດຳ​ເນີນ​ທຸລະ​ກິດ, ການ​ດຳລົງ​ຊີວິດ​ທີ່​ເຮັດ​ໃຫ້​ຊີວິດ​ການ​ເປັນ​ຢູ່​ຂອງ​ແຕ່​ລະ​ຄອບຄົວ ​ແລະ ​ແຕ່ລະຄົນ​ໃຫ້​ດີ​ຂຶ້ນ. ອັນ​ທີ​ສິບສຸດ​ທ້າຍ ​ເພື່ອ​ເອົາ​ປະ​ເທດ​ຊາດ​ຂອງ​ພວກ​ເຮົາ​ປັບ​ຕົວ​ເຂົ້າກັບ​ສະພາບ​ການ​ໃໝ່​ຂອງ​ໂລກ ​ແລະ ພາກພື້ນ ​ແລະ ​ເພື່ອ​ແກ້​ໄຂ​ຄວາມ​ຫຍຸ້ງຍາກ​ຕ່າງໆ​ໃຫ້​ຄ່ອຍໆ​ຕົກ​ໄປ, ນຳ​ເອົາ​ປະ​ເທດ​ຊາດ​ຂອງ​ພວກ​ເຮົາ​ກ້າວ​ໄປ​ໜ້າ​ຢ່າງ​ບໍ່​ຢຸດ​ຢັ້ງ. ນີ້​ຄື 10 ໜ້າ​ທີ່ ຫລື​ວ່າ ສິບ​ວຽກ​ທີ່​ເຮົາ​ຈະ​ຕ້ອງ​ໄດ້​ພ້ອມ​ກັນ​ເຮັດ​ໃຫ້​ເຫັນ​ຢ່າງ​ປະຈັກ​ຕາ​ຢູ່​ໃນ​ເງື່ອນ​ໄຂ​ໃໝ່, ສະພາບ​ການ​ໃໝ່​ຂອງ​ໂລກ, ພາກ​ພື້ນ ກໍ​ຄື​ຢູ່​ປະ​ເທດ​ເຮົາ​ຍ້ອນ​ໂຄ​ວິດ-19 ມາ​ດັດສົມ​ວິຖີ​ຊີວິດ​ຂອງ​ຄົນ​ເຮົາ​ໃນ​ຍຸກ​ນີ້​ໃຫ້​ຍືນ​ຍົງ​ຄົງ​ກະ​ພັນ​ໄປ​ຄຽງ​ຄຸ່ກັບ​ໂລກ.

​​ແນວ​ໃດ​ກໍ​ຕາມ, ສິ່ງ​ທີ່​ຈະ​ເຮັດ​ໃຫ້​ເຮົາ​ຢູ່​ໄດ້, ມີ​ກິນ, ມີ​ຢູ່, ກ້າວ​ໄປ​ເຖິງ​ການ​ຟື້ນຟູ​ເສດຖະກິດ​ໃຫ້​ກັບ​ມາ​ເໝືອນ​ເດີມ ຫລື ​ເຂັ້ມ​ແຂງ​ຂຶ້ນ​ເລື້ອຍໆ ທາງ​ອອກ​ກໍ​ຄື​ຕ້ອງ​ເລັ່ງບຸກທະລຸ​ສ້າງ​ເສດຖະກິດ​ຂອງ​ປະ​ເທດ​​ໃຫ້​ນັບ​ມື້ອຸດົມສົມບູນ ​ແລະ ​ເຂັ້ມ​ແຂງກ້າວ​ໄປ​ຢ່າງ​ບໍ່​ຢຸດ​ຢັ້ງ. ຈຸດ​ໜັກ​ແມ່ນ​ສຸມ​ໃສ່​ການ​ຜະລິດ​ກະສິກຳ, ອຸດສາຫະກຳ ​ແລະ ການ​ບໍລິການ​ຢູ່​ພາຍ​ໃນ​ປະ​ເທດ​ໃຫ້​ເຟື່ອງຟູ​ຫລວງຫລາຍ ທັງ​ໂລ່ງ​ລ່ຽນ, ຈໍລະ​ຈອນ​ແຈກ​ຢາຍ​ແລກປ່ຽນ​ສິນຄ້າ​ລະຫວ່າງ​ຂະ​ແໜງ​ການ​ຜະລິດ​ດ້ວຍ​ກັນ​ໃຫ້​ອຸດົມສົມບູນ ​ແລະ ນັບ​ມື້​ເຕີບ​ໃຫຍ່​ສົມທົບ​ກັບ​ປະຕິບັດ​ຄຳ​ສັ່ງ, ຄຳ​ແນະນຳ​ຈາກ​ພັກ ​ແລະ ລັດຖະບານ ກໍ​ຄື​ຂັ້ນ​ເທິງ​ວາງ​ອອກ​ກໍ​ເປັນ​ອັນວ່າ​ໂຄ​ວິດ-19 ມັນ​ກໍ​ຈະ​ໜີຫ່າງ​ຈາກ​ພວກ​ເຮົາ​ແນ່ນອນ.

​ເຖິງ​ຢ່າງ​ໃດ​ກໍ​ດີ, ຈາກ​ໄຊຊະນະ ​ແລະ ຜົນສຳ​ເລັດ​ໃນ​ການ​ເຮັດ​ສົງຄາມ​ກັບ​ສັດຕູ​ທີ່​ບໍ່​ມີ​ຕົນ, ມີ​ໂຕ​ຄັ້ງນີ້ ພວກ​ເຮົາ​ໄດ້​ຮັບ​ຮູ້​ການ​ປ່ຽນ​ແປງ​ຂອງ​ໂລກ, ວິວັດທະນາ​ການ​ຂອງ​ສັງຄົມ​ໃນ​ຍຸກ​ໂລກາ​ພິວັດ​ຢ່າງ​ເຕັມຕົວ, ຄົນ​ລາວ, ຊາດ​ລາວ​ເຮົາ​ຈະ​ຕ້ອງ​ໄດ້​ປັບ​ປ່ຽນ​ວິຖີ​ຊີວິດ​ ທັງ​ສຳ​ເລັດ​ພາລະກິດ​ຫລາຍ​ຢ່າງ ​ເພື່ອ​ຈະ​ຊະນະ​ສັດຕູ​ທັງ​ມີ​ຕົນ​ມີ​ໂຕ ​ແລະ ບໍ່​ມີ​ຕົນ​ມີ​ໂຕ. ​ໃນ​ອະນາຄົດ​ຕໍ່ໜ້າ ຈາກ​ໂຄ​ວິດ-19 ມັນ​ອາດ​ຈະ​ຍັງ​ມີ​ໂຣກລະບາດ​ຊະນິດ​ໃໝ່​ເກີດ​ຂຶ້ນມາ​ອີກ. ຕາມ​ທິດ​ກໍ່າ​ວ່າ: ​ເມື່ອ​ຄົນ​ເຮົາ​ຍັງ​ມີ​ຄວາມ​ໂກດ, ຄວາມ​ໂລບ, ຄວາມ​ຫລົງ​ບໍ່ຊິ້ນສຸດ, ຍັງ​ພາກັນ​ທຳລາຍ​ໂລກ, ທຳລາຍ​ທຳ​ມະ​ຊາດ ​ແລະ ສັງຄົມ​ມີ​ມື້​ໃດ​ມື້ໜຶ່ງ​ຜົນ​ຂອງ​ການ​ກະທຳ​ກໍ​ຈະ​ຢ້ອນ​ກັບ​ມາສະ​ໜອງ​ດັ່ງ​ເຮົາ​ເຫັນ​ຢູ່​ທຸກ​ວັນ​ນີ້.

ຫລັງ​ໂຄ​ວິດ​ຕ້ອງ​ເລັ່ງຟື້ນຟູ​ເສດຖະກິດ​ໃຫ້​ເຂັ້ມ​ແຂງ -    AD conten website - ຫລັງ​ໂຄ​ວິດ​ຕ້ອງ​ເລັ່ງຟື້ນຟູ​ເສດຖະກິດ​ໃຫ້​ເຂັ້ມ​ແຂງ
ຫລັງ​ໂຄ​ວິດ​ຕ້ອງ​ເລັ່ງຟື້ນຟູ​ເສດຖະກິດ​ໃຫ້​ເຂັ້ມ​ແຂງ - lattana banner 1 - ຫລັງ​ໂຄ​ວິດ​ຕ້ອງ​ເລັ່ງຟື້ນຟູ​ເສດຖະກິດ​ໃຫ້​ເຂັ້ມ​ແຂງ
ຫລັງ​ໂຄ​ວິດ​ຕ້ອງ​ເລັ່ງຟື້ນຟູ​ເສດຖະກິດ​ໃຫ້​ເຂັ້ມ​ແຂງ - lattana banner - ຫລັງ​ໂຄ​ວິດ​ຕ້ອງ​ເລັ່ງຟື້ນຟູ​ເສດຖະກິດ​ໃຫ້​ເຂັ້ມ​ແຂງ
error: Alert: ເນື້ອຫາຂ່າວມີລິຂະສິດ !!