ລັດຖະມົນຕີກະຊວງແຜນການ ແລະ ການລົງທຶນ ຊີ້ແຈງຕໍ່ຄຳຊັກຖາມຂອງສະມາຊິກສະພາແຫ່ງຊາດ
ໃນຕອນເຊົ້າຂອງວັນທີ 25 ມິຖຸນາ 2020, ທ່ານ ສອນໄຊ ສີພັນດອນ ຮອງນາຍົກລັດ ຖະມົນຕີ, ລັດຖະມົນຕີກະຊວງແຜນການ ແລະ ການລົງທຶນ ໄດ້ໃຫ້ກຽດຂຶ້ນຊີ້ແຈງຕໍ່ຄຳຊັກຖາມຂອງສະມາຊິກສະພາແຫ່ງຊາດ(ສສຊ) ໃນກອງປະຊຸມສະໄໝສາມັນ ເທື່ອທີ 9 ຂອງສະພາແຫ່ງຊາດ ຊຸດທີ VIII ກ່ຽວກັບນະໂຍບາຍ, ວິທີການ ແລະ ມາດຕະການຊຸກຍູ້ ແລະ ສົົ່ງເສີມການລົງທຶນ ເພືີ່ອຮັບປະກັນເຮັດໃຫ້ການເຕີບໂຕຂອງເສດຖະກິດແຫ່ງຊາດ ສາມາດສືບຕໍ່ຂະຫຍາຍ ຕົວຢ່າງຕໍ່ເນື່ອງ. ພາຍໃຕ້ການເປັນປະທານຂອງທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ.
ທ່ານ ສອນໄຊ ສີພັນດອນ ໃຫ້ຮູ້ວ່າ: ສະພາແຫ່ງຊາດໄດ້ຮັບຮອງເອົາແຜນດັດແກ້ຕົວເລກມະຫາພາກ ໃນໄລຍະ 4 ປີ (2017-2020) ຂອງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII (2016-2020) ຕາມມະຕິ 014/ສພຊ, ລົງວັນທີ 24/11/2016. ເຊິ່ງຄາດໝາຍລວມຍອດຜະລິດຕະພັນພາຍໃນ (GDP) ຂະຫຍາຍຕົວໃນລະດັບ ສະເລ່ຍ 7,2% ໃນນັ້ນ: ປີ 2017 ເທົ່າກັບ 7%, ປີ 2018 ເທົ່າກັບ 7%, ປີ 2019 ເທົ່າກັບ 7,3% ແລະ ປີ 2020 ເທົ່າກັບ 7,5%, ຄາດຄະເນຄວາມຕ້ອງການທຶນ ເພື່ອການພັດທະນາ ທັງໝົດ 173.329 ຕື້ກີບ ຫລື 21,4 ຕື້ໂດລາສະຫະລັດ ກວມເອົາ 29% ຂອງ GDP ໃນນີ້: ການລົງທຶນຂອງລັດກວມປະມານ 12-15% ຂອງການລົງທຶນລວມທັງໝົດ, ແຫລ່ງທຶນຈາກການຊ່ວຍເຫລືອທາງການເພື່ອການພັດທະນາ ກວມປະມານ 15-24%, ການລົງທຶນຂອງເອກະຊົນພາຍໃນ ແລະ ຕ່າງປະເທດ ກວມປະມານ 40-49% ແລະ ການລົງທຶນຈາກລະບົບເງິນຕາ ກວມປະມານ 21-23% ຂອງທຶນລວມທັງໝົດ. ຜ່ານການຈັດຕັ້ງປະຕິບັດຕົວຈິງຄາດວ່າ GDP ຈະຂະ ຫຍາຍຕົວ ໂດຍສະເລ່ຍໃນລະດັບ 5,9% ຫລຸດແຜນການທີ່ວາງໄວ້ 1,3% (ແຜນການ 7,2%) ແລະ ການສະໜອງທຶນເພື່ອການພັດທະນາໃນໄລຍະ 4 ປີ ກໍຈະບໍ່ສາມາດບັນລຸໄດ້ຕາມແຜນທີ່ວາງໄວ້.
ລັດຖະບານໄດ້ເອົາໃຈໃສ່ຂົນຂວາຍ, ດຶງດູດ ແລະ ຄຸ້ມຄອງການຈັດຕັ້ງປະຕິບັດ 4 ແຫລ່ງທຶນເພື່ອການພັດທະນາໃຫ້ມີປະສິດພາບສູງຂຶ້ນ ດ້ວຍການກໍານົດນະໂຍບາຍ, ນິຕິກໍາ ແລະ ມາດຕະການຕ່າງໆ ໂດຍສະເພາະ ປັບປຸງ, ສ້າງກົດໝາຍ ແລະ ນິຕິກໍາລຸ່ມກົດໝາຍຈໍານວນໜຶ່ງ ເປັນຕົົ້ນ: ກົດໝາຍວ່າດ້ວຍການລົງທຶນຂອງລັດ, ຄຳແນະນຳ, ດໍາລັດ, ຂໍ້ຕົກລົງຕ່າງໆ ເພື່ອເຮັດໃຫ້ການເຕີບໂຕຂອງເສດຖະກິດແຫ່ງຊາດ ສືບຕໍ່ຂະຫຍາຍຕົວຕໍ່ເນື່ອງຕາມທິດທີ່ຍືນຍົງ. ພ້ອມກັນນີ້, ໄດ້ເອົາໃຈໃສ່ປະຕິບັດຕາມຂັ້ນຕອນທີ່ກໍານົດໄວ້ໃນກົດໝາຍ ວ່າດ້ວຍການລົງທຶນຂອງລັດ ແລະ ຄໍາເເນະນໍາຈັດຕັ້ງປະຕິບັດກົດໝາຍດັ່ງກ່າວຢ່າງເຄັ່ງຄັດ ຊຶ່ງທຸກໂຄງການຕ້ອງຜ່ານການປະເມີນ, ເດັດຂາດບໍ່ຮັບເອົາໂຄງການທີ່ບໍ່ມີຜົນການປະເມີນ ຫລື ຜົນການປະເມີນໃນລະດັບຕໍ່າເຂົ້າແຜນ. ໄດ້ຕິດຕາມ, ກວດກາ ແລະ ຊຸກຍູ້ໂຄງການລົງທຶນຂອງລັດ ທີ່ສະພາແຫ່ງຊາດ ແລະ ສະພາທ້ອງຖິ່ນໄດ້ຮັບຮອງແລ້ວໃຫ້ສາມາດຈັດຕັ້ງປະຕິບັດໄດ້ຕາມແຜນ ເພື່ອຮັບປະກັນໃຫ້ວຽກຈຸດສຸມ ຂອງລັດຖະບານ ແລະ ທ້ອງຖິ່ນ ກໍຄືບັນດາຄາດໝາຍທີ່ສະພາໄດ້ຮັບຮອງແລ້ວໃຫ້ບັນລຸຜົນ.
ນອກນີ້, ລັດຖະບານ ຍັງໄດ້ເອົາໃຈໃສ່ແກ້ໄຂໜີ້ສິນໂຄງການລົງທຶນຂອງລັດ ຢ່າງເປັນລະບົບ, ສະເພາະໃນ ປີ 2020 ສະພາແຫ່ງຊາດອະນຸມັດ ແຜນການລົງທຶນຂອງລັດຈໍານວນ 2.600 ຕື້ກີບ (ທຶນສົມທົບທາງລົດໄຟລາວ-ຈີນ ຈໍານວນ 400 ຕື້ກີບ) ຊຶ່ງໄດ້ຈັດສັນຊໍາລະໜີ້ສິນ ທັງໝົດ 539,57 ຕື້ກີບ. ໃນ 5 ເດືອນຜ່ານມາ ສາມາດປະຕິບັດໄດ້ 2.384 ໂຄງການ, ມູນຄ່າ 1.044 ຕື້ກີບ (40,14% ຂອງແຜນການ).
