​ເງິນ​ກີບ​ເຟີ້​ຍ້ອນ​ພວກ​ເຮົາ​ພາກັນ​ເຜີ

​ເງິນ​ກີບ​ເຟີ້​ຍ້ອນ​ພວກ​ເຮົາ​ພາກັນ​ເຜີ - 999 - ​ເງິນ​ກີບ​ເຟີ້​ຍ້ອນ​ພວກ​ເຮົາ​ພາກັນ​ເຜີ
​ເງິນ​ກີບ​ເຟີ້​ຍ້ອນ​ພວກ​ເຮົາ​ພາກັນ​ເຜີ - AGL banner - ​ເງິນ​ກີບ​ເຟີ້​ຍ້ອນ​ພວກ​ເຮົາ​ພາກັນ​ເຜີ

ໂດຍ: ທິດ​ກໍ່າ

​ເວົ້າ​ເລື່ອງ​ຄຸນຄ່າ​ຂອງ​ເງິນ​ກີບ​ລາວ​ເຮົາ ​ເທົ່າ​ທີ່​ໄດ້​ຕິດຕາມ​ມາ​ຫລາຍ​ສິບ​ປີ​ເຫັນ​ວ່າ​ນັບ​ມື້ອ່ອນ​ຄ່າ​ລົງ​ຕິກໆ ​ໂດຍ​ສະ​ເພາະ​ແມ່ນ​ເລີ່​ມ​ແຕ່​ຊຸມ​ປີ 2000 ​ເປັນຕົ້ນມາ ​ແລະ ຈາກ​ນີ້​ໄປ​ຫາ​ອະນາຄົດ​ອັນ​ຍາວ​ນານ ​ເຮົາ​ຍັງ​ບໍ່​ທັນ​ຮູ້​ວ່າ​ອີກ​ຈັກ​ເດືອນ​ຈັກ​ປີ​ເງິນ​ກີບ​ລາວ​ຈຶ່ງ​ຈະ​ເລີ່​ມ​ແຂງ​ຄ່າ​ຂຶ້ນຕາມ​ຄວາມ​ມຸ້ງ​ມາດ​ປາດ​ຖະໜາ​ຂອງ​ຄົນ​ໃນ​ຊາດ, ຊ້ຳບໍ່​ໜຳ ​ໃນ​ເງື່ອນ​ໄຂ​ທີ່​ເສດຖະກິດ​ຂອງ​ໂລກ ​ແລະ ພາກພື້ນພວມ​ເຕີບ​ໃຫຍ່​ປ່ຽນ​ແປງ​ໄປ​ ທຸກໆ​ປະ​ເທດ​ໃຜ​ກໍ​ມີ​ການ​ແກ້ງ​ແຍ່ງ​ແຂ່ງຂັນ​ກັນ​ສ້າງສາ​ພັດທະນາ​ປະ​ເທດ​ຊາດ ​ເພື່ອ​ໃຫ້​ເສດຖະກິດ​ຂອງ​ປະ​ເທດ​ຕົນ​ນັບ​ມື້​ເຂັ້ມ​ແຂງ​ຂຶ້ນ​ເລື້ອຍໆ. ອີກ​ປະການ​ໜຶ່ງ​ໃນ​ຍຸກ​ໂລກາ​ພິວັດ ບໍ່​ວ່າ​ເສດຖະກິດ ​ແລະ ສັງຄົມ​ມັນ​ກໍ​ຍ່ອມ​ປັບ​ຕົວ ​ແລະ ມີ​ການ​ພັດທະນາ​ໄປ​ຕາມ​ກົດ​ເກນ ​ເພື່ອ​ຄວາມ​ຢູ່​ລອດ ​ແລະ ຄວາມ​ຍິ່ງ​ໃຫຍ່​ຂະຫຍາຍຕົວ​ຂອງ​ແຕ່ລະ​ປະ​ເທດ. ​ເພາະສະນັ້ນ ປະ​ເທດ​ໃດ​ມີ​ການ​ພັດທະນາ​ຫລາຍ​ກວ່າ​ກໍ​ຍິ່ງ​ໄດ້​ປຽບ​​ໃນ​ດ້ານ​ເສດຖະກິດ, ການ​ເງິນ, ​ເງິນຕາ ນັບ​ທັງ​ເຕັກ​ໂນ​ໂລ​ຊີ ​ເພື່ອ​ຕໍ່ສູ້​ກັບ​ສິ່ງ​ທ້າ​ທາຍ ​ແລະ ​ໄພພິບັດ​ຕ່າງໆ​ທີ່​ອາດ​ຈະ​ເກີດ​ຂຶ້ນ​ໃນ​ໂລກ ​ເຊິ່ງບໍ່ຕ່າງ​ຫຍັງ​ກັບ​ໂຄ​ວິດ-19 ​ໄດ້​ມາ​ທຳລາຍ​ເຜົາ​ຜານ​ຊີວິດ​ອິນ​ຊີ​ຂອງ​ມວນ​ມະນຸດ. ຍັງ​ບໍ່​ພຽງ​ແຕ່​ເທົ່າ​ນັ້ນ ມັນ​ຍັງ​ສັ່ງສອນ​ໃຫ້​ບົດຮຽນ ​ແລະ ປັບ​ປ່ຽນ​ແບບ​ແຜນການ​ດຳລົງ​ຊີວິດ​ຂອງ​ມວນ​ມະນຸດ​ອີກ​ດ້ວຍ.

ສຳລັບ​ປະ​ເທດ​ລາວ​ໃນ​ເງື່ອນ​ໄຂ​ທີ່​ຍັງ​ເປັນ​ປະ​ເທດ​ທຸກ​ຍາກ ​ແລະ ດ້ອຍ​ພັດທະນາ, ຫລ້າ​ຫລັງ​ມາ​ຢ່າງ​ຍາວ​ນານ, ​ເສດຖະກິດ​ການ​ເງິນ, ​ເງິນຕາ​ບໍ່​ທັນ​ເຂັ້ມ​ແຂງ ກໍ​ຍິ່ງ​ໄດ້​ຮັບ​ຜົນ​ກະທົບ​ຊ້ຳຕື່ມ​ໄປ​ເລື້ອຍໆ ​ເຊິ່ງໜຶ່ງ​ໃນ​ບັນຫາ​ທີ່​ກ່າວ​ມາ​ນີ້​ກໍ​ຄື​ຄຸນຄ່າ​ຂອງ​ເງິນ​ກີບ​ນັບ​ມື້ຕົກ​ຕໍ່າ ​ແລະ ​ເຟີ້​ຢ່າງ​ໜ້າ​ເປັນ​ຫ່ວງ ​ແລະ ວິຕົກ​ດັ່ງ​ທີ່​ເຫັນ​ໃນ​ສະພາບ​ປັດຈຸບັນ. ​ໃນ​ໂອກາດ​ກອງ​ປະຊຸມ​ສະ​ໄໝ​ສາມັນ​ເທື່ອ​ທີ 9 ຂອງ​ສະພາ​ແຫ່ງ​ຊາດ ຊຸດ​ທີ VIII ຄື​ໃນ​ວັນ​ທີ 27 ມິຖຸນາ​ຜ່ານ​ມາ, ທ່ານ ສອນ​ໄຊ ສິດ​ພະ​ໄຊ ຜູ້​ວ່າການ​ທະນາຄານ​ແຫ່ງ ສປປ ລາວ ​ໄດ້​ຊີ້​ແຈງ​ກ່ຽວ​ກັບ​ສະພາບ​ເງິນຕາ​ຕ່າງປະ​ເທດ, ອັດຕາ​ແລກປ່ຽນ-​ອັດຕາ​ເງິນ​ເຟີ້ ​ແລະ ມາດ​ຕະການ​ແກ້​ໄຂ ນັບ​ແຕ່​ປີ 2018 ​ເປັນຕົ້ນມາ ​ແມ່ນ​ປະສົບ​ບັນຫາ​ສິ່ງ​ທ້າ​ທາຍ​ຢ່າງ​ຫລວງຫລາຍ ​ໂດຍ​ສະ​ເພາະ​ໃນ​ໄລຍະ​ທີ່​ຄ່າ​ເງິນ​ໂດ​ລາ ​ແລະ ຄ່າ​ເງິນ​ບາດ​ແຂງ​ໂຕ​ຢ່າງ​ຕໍ່​ເນື່ອງ​ໃນ​ຕະຫລາດ​ສາກົນ. ​ໃນ​ຂະນະ​ທີ່​ພື້ນຖານ​ເສດຖະກິດ​ຂອງ ສປປ ລາວ​ເຮົາ ຍັງ​ອາ​ໄສ​ການ​ນຳ​ເຂົ້າສິນຄ້າ ​ແລະ ​ການ​ບໍລິການ​ຈາກ​ຕ່າງປະ​ເທດ, ພັນທະ​ໃນ​ການ​ຊຳລະ​ໜີ້​ສິນ​ຕໍ່​ຕ່າງປະ​ເທດ​ກໍ​ສືບ​ຕໍ່​ເພີ່ມ​ຂຶ້ນ ​ແລະ ບັນດາ​ລາຍ​ຮັບ​ທີ່​ເປັນ​ເງິນຕາ​ພັດ​ຫລຸດ​ລົງ. ນອກຈາກ​ນັ້ນ ກະ​ແສ​ເງິນ​ຊ່ວຍ​ເຫລືອ​ລ້າ, ​ເງິນ​ລົງທຶນ​ຈາກ​ຕ່າງປະ​ເທດ​ກໍ​ໄດ້​ຮັບ​ຜົນ​ກະທົບ​ຈາກ​ເສດຖະກິດ​ໂລກ ​ເຊິ່ງ​ໃນ​ປີ 2019 ມີ​ພຽງ 755 ລ້ານ​ໂດ​ລາ ຫລຸດ​ລົງ​ເກືອບ 44% ​ເມື່ອ​ທຽບ​ໃສ່​ປີ 2018 ​ແມ່ນ​ປະມານ 1,3 ພັນ​ລ້ານ​ໂດ​ລາ ​ແລະ ຫລຸດ​ລົງ 55% ​ເມື່ອ​ທຽບ​ໃສ່​ປີ 2017 ປະມານ 1,7 ພັນ​ລ້ານ​ໂດ​ລາ. ​ເພາະສະນັ້ນຈຶ່ງ​ເປັນ​ເຫດ​ໃຫ້​ຄຸນຄ່າ​ຂອງ​ເງິນ​ກີບ​ລາວ​ຕົກ​ຕໍ່າ ​ແລະ ກໍ​ເຟີ້​ໄປ​ເລື້ອຍໆ​ ຈົນ​ມາ​ຮອດ​ປັດຈຸບັນ​ເຫັນ​ວ່າ​ເປັນ​ໜ້າ​ວິຕົກ ​ແລະ ຍັງ​ບໍ່​ຮູ້​ວ່າ​ໂອກາດ​ໃດ​ສະພາບ​ດັ່ງກ່າວ​ຈະ​ຫລຸດ​ພົ້ນອອກ​ຈາກ​ຊາຕາກຳ​ອັນ​ບໍ່​ເພິ່ງ​ປາດ​ຖະໜາ​ເຫລົ່າ​ນີ້​ໄດ້. ​ເມື່ອ​ຕັ້ງ​ໂຈດ​ກັນ​ວ່າ, ​ເປັນ​ຫຍັງ​​ເງິນ​ກີບ​ລາວ​ຈຶ່ງ​ນັບ​ມື້​ເຟີ້ ຫລື ອ່ອນ​ຄ່າ​ລົງ​ຕິກໆ ? ຄໍາ​ຕອບ​ສ່ວນ​ໃຫຍ່​ກໍ​ແມ່ນ​ໄດ້​ເວົ້າມາ​ຂ້າງ​ເທິງ​ນັ້ນ​ແລ້ວ, ​ແຕ່​ກໍ​ຍັງ​ມີ​ຫລາຍ​ປັດ​ໄຈ ​ແລະ ຫລາຍ​ເງື່ອນ​ໄຂ​ທີ່​ພວກ​ເຮົາ​ຈະ​ຕ້ອງ​ພ້ອມ​ກັນ​ຄິດ ​ແລະ ຊອກ​ຫາ​ທາງ​ອອກ​ໃຫ້​ສອດຄ່ອງກັບ​ຍຸກ​ສະ​ໄໝ.

​ແຕ່​ແນວ​ໃດ​ກໍ​ດີ, ຕາມ​ທິດ​ກໍ່າ​ວ່າ, ສາ​ເຫດ ​ແລະ ປັດ​ໄຈ​ທີ່​ພາ​ໃຫ້​ເງິນ​ກີບ​ລາວ​ເຟີ້​ນັ້ນ​ແມ່ນ​ຍ້ອນ​ພວກ​ເຮົາ​ພາກັນ​ເຜີ ​ໂດຍ​ບໍ່​ເຫັນ​ຄຸນຄ່າ​ປະລະ​ເງິນ​ກີບ​ມາ​ຫລາຍ​ສິບ​ປີ​ແລ້ວ ​ເປັນຕົ້ນພາກັນ​ຫັນ​ໄປ​ນິຍົມ​ໃຊ້​ເງິນ​ໂດ​ລາ, ​ເງິນ​ບາດ, ​ເຫີ​ນຫ່າງ​ຈາກ​ການ​ຜະລິດ​ສິນຄ້າ​ທີ່​ຫລາກ​ຫລາຍ ຍ້ອນ​ການ​ສົ່ງ​ເສີມ​ການ​ຜະລິດ​ຂະໜາດ​ນ້ອຍ-ຂະໜາດ​ກາງ​ບໍ່​ແຂງ​ແຮງ​ຈົນ​ບໍ່​ສາມາດ​ເປັນ​ພື້ນຖານ​ໃຫ້​ເສດຖະກິດ​ຂອງ​ຊາດ, ອາ​ໄສ​ແຕ່​ພາກ​ອຸດສາຫະກຳ​ທັນ​ສະ​ໄໝ​ເປັນ​ທີ່​ຕັ້ງສຸດ​ທ້າຍ​ມາ​ພາກ​ອຸດສາຫະກຳ​ສ່ວນ​ໜຶ່ງ​ບໍ່​ສາມາດ​ສົ່ງ​ເສີມ​ໃຫ້​ພື້ນຖານ​ເສດຖະກິດ​ລາວ​ໄດ້​ຟື້ນຕົວຢ່າງ​ແຂງ​ແຮງ. ຕົວຢ່າງ​ເລື່ອງ​ໄຟຟ້າ, ບໍ່​​ແຮ່, ອຸດສາຫະກຳ​ໄມ້, ທີ່​ດິນ, ການ​ເຊົ່າ, ການ​ຊຳ​ປະທານ, ອະສັງຫາລິມະ​ຊັບ​ທີ່​ເຄີຍ​ເປັນ​ສ່ວນ​ໜຶ່ງ​ຄ້ຳຈູ​ນປະ​ເທດ​ຊາດ​ບ້ານ​ເມືອງ​ໃນ​ຜ່ານ​ມາ​ກໍ​ນັບ​ມື້ກຸດ​ຫ້ຽນ, ມະ​ຫັບ​ມະຫາຍ​ໄປ​ເກືອບ​ໝົດ​ແລ້ວ. ອັນ​ສາ​ເຫດ​ກໍ​ຍ້ອນ​ວ່າ​ມີ​ການ​ສໍ້​ລາດ​ບັງ​ຫລວງ​ໃນ​ຖັນ​ແຖວ​ເຈົ້າພະນັກງານ​ເກີນ​ຂອບ​ເຂດ ນັບ​​ແຕ່​ເທິງ​ລົງ​ລຸ່ມພາກັນ​ເຫີ່​ໄປ​ຄ້າຂາຍ​ແບບ​ຜິດ​ກົດໝາຍ, ຢາ​ເສບ​ຕິດ, ຄ້າຂາຍ​ເຖື່ອນ, ລັກລອບ​ໜີພາສີ ​ແລະ ຫັນ​ໄປ​ໃຊ້​ເງິນຕາ​ຕ່າງປະ​ເທດ​ບໍ່​ໃຫ້​ຄວາມ​ສຳຄັນ​ຕໍ່​ເງິນ​ກີບ​ລາວ ຈຶ່ງ​ເຮັດ​​ໃຫ້​ບົດບາດ​ຂອງ​ເງິນ​ກີບ​ນັບ​ມື້ຕົກ​ຕໍ່າ. ອີກ​ປະການ​ໜຶ່ງ ບັນຫາ​ການ​ຄຸ້ມ​ຄອງ​ເງິນຕາ​ໃນ​ການ​ບໍລິການ​ຄ້າຂາຍ​ພາຍ​ໃນ​ກໍ​ບໍ່​ທັນ​ເຂັ້ມ​ແຂງ​ເດັດຂາດ, ມີ​ຫລາຍ​ທຸລະ​ກິດ​ບໍລິການ​ພາກັນ​ນຳ​ໃຊ້​ເງິນຕາ​ຕ່າງປະ​ເທດ​ເປັນ​ທີ່​ຕັ້ງ​ໂດຍ​ບໍ່​ຫົວຊາ​ນຳ​ເງິນ​ກີບ​ລາວ​ແຕ່​ປະການ​ໃດ.

​ເງິນ​ກີບ​ເຟີ້​ຍ້ອນ​ພວກ​ເຮົາ​ພາກັນ​ເຜີ - Wave100S AD to Website 2020 0 - ​ເງິນ​ກີບ​ເຟີ້​ຍ້ອນ​ພວກ​ເຮົາ​ພາກັນ​ເຜີ

​ເຖິງ​ຢ່າງ​ໃດ​ກໍ​ດີ, ຕາມ​ເຮົາ​ວ່າ, ທຸກ​ສິ່ງ​ທຸກ​ຢ່າງ ຖ້າ​ຢາກ​ໃຫ້​ເງິນ​ກີບ​ລາວ​ມີ​ຄຸນຄ່າ​ແຂງ​ຕົວ​ທຽບ​ຖານ​ກັບ​ສະກຸນ​ເງິນ​ອື່ນ ທາງ​ອອກ​ຄື​ຄົນ​ລາວ​ຕ້ອງ​ເປັນ​ເຈົ້າ ​ເຊິ່ງສະ​ແດງ​ອອກ​ຄື: ສະຕິ​ເປັນ​ເຈົ້າຂອງ​ປະ​ເທດ​ຊາດ, ​ເປັນ​ເຈົ້າການ​ຜະລິດ​ສິນຄ້າ​ເພື່ອ​ສົ່ງ​ອອກ​ໃຫ້​ຫລາຍໆ​ຈຶ່ງ​ຈະ​ສາມາດ​ຢູ່​ລອດ. ​ໃນ​ຜ່ານ​ມາ ​ແນວທາງ​ຂອງ​ຜູ້ນຳ ກໍ​ຄື​ພັກ ​ແລະ ລັດຖະບານ​ໄດ້​ວາງ​ອອກ​ສ້າງ​ເສດຖະກິດ​ກຸ້ມ​ຕົນ​ເອງ, ​ເພິ່ງ​ຕົນ​ເອງ ​ແລະ ​ເຂັ້ມ​ແຂງ​ດ້ວຍ​ຕົນ​ເອງ ສຸດ​ທ້າຍ​ມາ​ເຮົາ​ປະ​ຫັນ​ໄປ​ເອົາ​ຂອງ​ໝູ່​ນຳ​ໃຊ້​ຂອງ​ໝູ່, ລ້ຽງສັດ​ປູກຝັງ​ສົ່ງ​ເສີມ​ສິນຄ້າ​ພາກ​ກະສິກຳ ສຸດ​ທ້າຍ​ມາ​ໄປ​ຊື້​ເອົາ​ຂອງ​ໄທ​ເຂົ້າມາ​ຂາຍ​ພໍ​ໄດ້​ກຸ້ມ​ປາກ, ທັງ​ຂ້າ​ຄົນ​ລາວ​ດ້ວຍ​ກັນ. ນີ້​ລະ​ຄື​ຕົ້ນ​ເຫດ​ຂອງ​ເງິນ​ກີບ​ລາວ​ເຟີ້ ​ແລະ ຍິ່ງ​ຈະ​ເຟີ້​ຖ້າ​ພວກ​ເຮົາ​ພາກັນ​ເຜີ !.

​ເງິນ​ກີບ​ເຟີ້​ຍ້ອນ​ພວກ​ເຮົາ​ພາກັນ​ເຜີ -    AD conten website - ​ເງິນ​ກີບ​ເຟີ້​ຍ້ອນ​ພວກ​ເຮົາ​ພາກັນ​ເຜີ
​ເງິນ​ກີບ​ເຟີ້​ຍ້ອນ​ພວກ​ເຮົາ​ພາກັນ​ເຜີ - lattana banner 1 - ​ເງິນ​ກີບ​ເຟີ້​ຍ້ອນ​ພວກ​ເຮົາ​ພາກັນ​ເຜີ
​ເງິນ​ກີບ​ເຟີ້​ຍ້ອນ​ພວກ​ເຮົາ​ພາກັນ​ເຜີ - lattana banner - ​ເງິນ​ກີບ​ເຟີ້​ຍ້ອນ​ພວກ​ເຮົາ​ພາກັນ​ເຜີ
error: Alert: ເນື້ອຫາຂ່າວມີລິຂະສິດ !!