ຄອບຄົວມົນທາ ລົງທຶນ 200 ກວ່າລ້ານສ້າງສະໜາມກະຕໍ້ຄຳສະຫວາດ ຫວັງສົ່ງເສີມນັກກິລາກ້າວສູ່ທີມຊາດ..!
ຄອບຄົວ ມົນທາ ຍອມລົງທຶນສ່ວນຕົວເຖິງ 200 ກວ່າລ້ານກີບ ເພື່ອກໍ່ສ້າງສະໜາມກິລາກະຕໍ້ໃນຮ່ົມ ຈຳນວນ 2 ຂອດ ເພື່ອເປີດໂອກາດໃຫ້ນ້ອງນ້ອຍເຍົາວະຊົນລາວ ກໍຄື ລູກຫຼານພໍ່ແມ່ປະຊາຊົນຊາວ ນະຄອນຫຼວງວຽງຈັນ ໄດ້ໃຊ້ເວລາຫວ່າງໃຫ້ເປັນປະໂຫຍດຕ້ານປະກົດການຫຍໍ້ທໍ້ຕ່າງໆທີ່ເກີດຂຶ້ນໃນສັງຄົມປັດຈຸບັນ ໂດຍສະເພາະແມ່ນບັນຫາຢາເສບຕິດ ແລະ ເອົາໃຈໃສ່ເຂົ້າໃນການພັດທະນາກິລາກະຕໍ້ໃຫ້ຕົນເອງ ເພື່ອກ້າວສູ່ທີມຊາດໃນອະນາຄົດ.
ຕາມການເປີດໃຈຂອງທ່ານ ມະນີທອງ ມົນທາ ເຈົ້າຂອງສະໜາມກິລາກະຕໍ້ ຄຳສະຫວາດ ເມື່ອທ້າຍອາທິດຜ່ານມາ ແຈ້ງໃຫ້ຮູ້ວ່າ: ເຫດຜົນທີ່ສ້າງ 2 ສະໜາມກິລາກະຕໍ້ ຂຶ້ນມາໃນຄັ້ງນີ້ ກໍຍ້ອນວ່າ ທີ່ຜ່ານມາລູກສາວ ແລະ ໝູ່ຂອງລູກສາວມັກຮັກໃນການຫຼິ້ນກິລາປະເພດນີ້ ເປັນຊີວິດຈິດໃຈ ແລະ ກໍເຫັນແວວພອນສະຫວັນ ແລະ ພອນສະແຫວງ ຂອງເຂົາເຈົ້າດີຫຼາຍ ກໍເລີຍປືກສາຄອບຄົວ ກໍຄື ພັນລະຍາ ເພື່ອຈະນຳໃຊ້ທຶນ ຈຳນວນ 200 ກວ່າລ້ານກີບ ກໍ່ສ້າງສະ ໜາມຂຶ້ນມາໃໝ່ ແລະ ການລົງມືກໍ່ສ້າງກໍເລີ່ມມາແຕ່ຕົ້ນປີ 2020 ພໍດີກົງກັບສະພາບບ້ານເມືອງ ກຳລັງພົບກັບບັນຫາການຕ້ານເຊື້ອພະຍາດສາຍພັນໃໝ່ ໂຄວິດ-19 ທີ່ແຜ່ລະບາດຢ່າງໜັກໃນທົ່ວໂລກ ແລະ ລາວເຮົາ ກໍໄດ້ຮັບຜົນກະທົບ ຈຶ່ງໄດ້ຢຸດການກໍ່ສ້າງຊົວຄາວ ຈົນມາຮອດເດືອນມີນາ ກໍສືບຕໍ່ ແລະ ສາມາດກໍ່ສ້າງສະໜາມດັ່ງກ່າວສຳເລັດບັນລຸເປົ້າ ໝາຍຕາມແຜນທີ່ວາງໄວ້
ທ່ານ ມະນີທອງ ມົນທາ ບອກຕື່ມອີກວ່າ: ແນ່ນອນ ສະໜາມກິລາກະຕໍ້ ຄຳສະຫວາດ ໃນຕໍ່ໜ້າຍັງມີແຜນຈະສືບຕໍ່ຮ່ວມມືກັບຫຼາຍພາກສ່ວນເປັນຕົ້ນແມ່ນບັນດາສະໂມສອນ, ເມືອງກ່ຽວຂ້ອງ, ໂຮງຮຽນ ແລະ ອົງການຈັດຕັ້ງນະຄອນຫຼວງ ຕະຫຼອດຮອດສະຫະພັນກິລາກະຕໍ້ແຫ່ງຊາດລາວ ເພື່ອຈະຈັດການແຂ່ງຂັນລາຍການຕ່າງໆໃຫ້ມີກິດຈະກຳຫຼາຍຂຶ້ນຕໍ່ເນື່ອງ ໂດຍສະເພາະລາຍການໃນຮຸ່ນເຍົາວະຊົນ ສົ່ງເສີມໃຫ້ເຂົາເຈົ້າມີການພັດທະນາ ແລະ ເພື່ອຄວາມໄຝ່ຝັນຢາກຈະກ້າວຂຶ້ນຮັບໃຊ້ທີມຊາດໃນອະນາຄົດໃຫ້ສົມຫວັງ.
ຂ່າວຈາກ: ສົງການ ພັນແພງດີ (ໜັງສືິພິມສຶກສາ-ກິລາ)