ເປັນຫຍັງໃຊ້ລີງຂຶ້ນເກັບໝາກພ້າວ ຈຶ່ງເປັນເລື່ອງໃຫຍ່ໃນອັງກິດ

ເປັນຫຍັງໃຊ້ລີງຂຶ້ນເກັບໝາກພ້າວ ຈຶ່ງເປັນເລື່ອງໃຫຍ່ໃນອັງກິດ - 74 2 - ເປັນຫຍັງໃຊ້ລີງຂຶ້ນເກັບໝາກພ້າວ ຈຶ່ງເປັນເລື່ອງໃຫຍ່ໃນອັງກິດ
ເປັນຫຍັງໃຊ້ລີງຂຶ້ນເກັບໝາກພ້າວ ຈຶ່ງເປັນເລື່ອງໃຫຍ່ໃນອັງກິດ - AGL banner - ເປັນຫຍັງໃຊ້ລີງຂຶ້ນເກັບໝາກພ້າວ ຈຶ່ງເປັນເລື່ອງໃຫຍ່ໃນອັງກິດ

     ການ​ໂຈະການຈຳໜ່າຍ​ຜະລິດ​ຕະພັນ​ໝາກພ້າວ​ຈາກ​ໄທ​ຂອງ​ເຄືອ​ຂ່າຍ​ຂາຍ​ສົ່ງ​ຊັ້ນນຳ​ໃນ​ສະຫະຣາຊະ​ອານາຈັກ ຫລັງ​ຂໍ້​ກ່າວ​ຫາ​ເລື່ອງ​ການ “ທໍລະມານ​ລີງ” ​ໃນ​ອຸດສາຫະກຳ​ໝາກພ້າວ​ໄທ ຄື​ຕົວຢ່າງ​ຫລ້າ​ສຸດ​ທີ່​ສະທ້ອນ​ຄວາມ​ຕື່ນ​ຕົວ​ຂອງ​ປະຊາຊົນ​ໃນ​ສະຫະຣາຊະ​ອານາຈັກ ​ແລະ ປະ​ເທດ​ຕາ​ເວັນ​ຕົກ​ອື່ນໆ ​ໃນ​ເລື່ອງ​ສະຫວັດ​ດິພາບ​ສັດ, ສະພາບ​ແວດລ້ອມ ​ແລະ ສິດທິ​ມະນຸດ.

ຄົນ​ອັງກິດຕື່ນ​ຕົວ​ກັນ​ຫລາຍ​ໃນ​ເລື່ອງ​ບັນຫາ​ສະພາບ​ໂລກ​ຮ້ອນ ​ເຮັດ​ແນວ​ໃດ​ຈະ​ຫລຸດ​ການ​ທຳລາຍ​ສິ່ງ​ແວດ​ລ້ອມ, ຫລຸດ​ການ​ປ່ອຍກາກ​ບອນ​ອອກ​ສູ່​ຊັ້ນບັນຍາກາດ, ຫລຸດ​ຂີ້​ເຫຍື້ອ, ຫລຸດ​ການ​ໃຊ້​ປລາສະຕິກ, ຫລຸດ​ການ​ບຽດບຽນ​ສັດ ​ໂດຍ​ບໍ່​ຈຳ​ເປັນ.

ຄົນ​ລຸ້ນ​ໃໝ່​ຈຳນວນ​ຫລາຍ​ເລືອກ​ຫັນ​ມາ​ບໍລິ​ໂພ​ກອາຫານ​ຈາກ​ພືດ, ງົດ​ຊີ້ນ​ສັດ ​ແລະ ຜະລິດ​ຕະພັນ​ນົມ​ຈາກ​ສັດ​ເດັດຂາດ ຫລື ​ເອີ້ນ​ວ່າ: “ຊາວ​ວີ​ແກນ” ​ເພາະ​ເບິ່ງ​ວ່າ: ການ​ລ້ຽງສັດ​ໃຫຍ່​ເພື່ອ​ບໍລິ​ໂພ​ກຊີ້ນ ​ແລະ ນົມ​ເປັນ​ການ​ທຳລາຍ​ຊັ້ນບັນຍາກາດ​ໂລກ ບວກ​ກັບ​ເຫດຜົນ​ທາງ​ສຸຂະພາບ ​ແລະ ສິນລະ​ທຳ.

ສ່ວນ​ກຸ່ມ​ຄົນ​ທີ່​ຍັງ​ບໍລິ​ໂພ​ກຊີ້ນ​ສັດ​ຢູ່ ກໍ​ຄຳນຶງ​ເຖິງ​ສະຫວັດ​ດິພາບ​ຂອງ​ສັດ ນັບ​ແຕ່​ການ​ລ້ຽງ​ໄປ​ຈົນ​ເຖິງ​ຂັ້ນຕອນ​ການ​ຂ້າ, ຄວາມ​ຍືນ​ຍົງ​ຕໍ່​ສະພາບ​ແວດ​ລ້ອມ ລວມທັງ​ສະຫວັດ​ດິພາບ ​ແລະ ສະຫວັດ​ດີກ​ານຂອງ​ຄົນ​ທີ່ຢູ່​ໃນ​ຂະ​ບວນການ​ຜະລິດ​ທັງ​ໝົດ ນັບ​ແຕ່​ລູກ​ເຮືອ​ປະມົງ, ກຳມະກອນ​ແກະ​ກຸ້ງ ​ໄປ​ຈົນ​ເຖິງ​ພະນັກງານ​ຂອງ​ບໍລິສັດ​ຕ້ອງ​ໄດ້​ຮັບ​ການ​ເບິ່ງ​ແຍງ​ຕາມ​ກົດໝາຍ.

ກະທິ, ນ້ຳໝາກພ້າວ​ສົດ ​ແລະ ນ້ຳມັນ​ໝາກພ້າວ ຖື​ເປັນອາຫານ​ທີ່​ໄດ້​ຮັບ​ຄວາມ​ນິຍົມ​ໃນ​ຜູ້​ບໍ່​ບໍລິ​ໂພ​ກຊີ້ນ​ສັດ​ເດັດຂາດ ຫລື ຊາວ​ວີ​ແກນ ​ແລະ ຜູ້​ຮັກ​ສຸຂະພາບ ​ເຊິ່ງ​ເປັນ​ຜະລິດ​ຕະພັນ​ຈາກ​ພືດ​ທີ່​ມີ​ຄຸນຄ່າ​ທາງ​ອາຫານ ​ແລະ ​ໃຊ້​ເປັນ​ຜະລິດ​ຕະພັນ​ທົດ​ແທນ​ນົມ​ໃນ​ບາງ​ໂອກາດ.

​ເມື່ອ​ອາຫານ​ທີ່​ຖືກ​ເບິ່ງ​ວ່າ: “ສະອາດ” ບໍ່​ບຽດບຽນ​ຊີວິດ​ສັດ ມາ​ຖືກ​ກ່າວ​ຫາ​ວ່າ: “ທໍລະມານ​ສັດ” ຈຶ່ງ​ກາຍ​ເປັນ​ຂ່າວ​ໃຫຍ່​ຂຶ້ນມາ.

ທັນທີ​ທີ່​ກຸ່ມ​ປົກ​ປ້ອງ​ສະຫວັດ​ດິພາບ​ສັດ “ພີຕາ” ອອກ​ມາ​ກ່າວ​ຫາ​ອຸດສາຫະກຳ​ໝາກພ້າວ​ຂອງ​ໄທ ​ໃນ​ວັນ​ທີ 3 ກໍລະກົດ ​ແລະ ຮຽກຮ້ອງ​ໃຫ້​ຊຸບ​ເປີ​ມາ​ເກັດ​ອັງກິດ​ຍົກ​ເລີກ​ຂາຍ​ສິນຄ້າ​ຜະລິດ​ຕະພັນ​ແປ​ຮູບ​ຈາກ​ໝາກພ້າວ​ນຳ​ເຂົ້າຈາກ​ໄທ ​ໂດຍ​ມີ​ການ​ລະບຸ​ຊື່​ຂອງ​ຍີ່​ຫໍ້​ສິນຄ້າ​ຂອງ​ນ້ຳໝາກພ້າວ ​ແລະ ນ້ຳມັນ​ໝາກພ້າວ.

ຣອຍ​ເຕີ​ລາຍ​ງານ​ອີກ​ວ່າ: ວອລມາ​ຣ໌ທ ຍັກ​ໃຫຍ່​ຂາຍ​ສົ່ງ​ຂອງ​ອາ​ເມ​ລິ​ກາ ​ເຊິ່ງ​ເປັນ​ເຈົ້າຂອງ​ຊຸບ​ເປີ​ມາ​ເກັດ​ແອ​ສດາ (Asda) ຜູ້​ຄອງ​ສ່ວນ​ແບ່ງ​ຕະຫລາດ​ອັນ​ດັບ 3 ​ໃນ​ສະຫະຣາຊະ​ອານາຈັກ ​ໄດ້​ນຳ​ເອົາ​ຜະລິດ​ຕະພັນ​ຍີ່​ຫໍ້​ອາ​ລອຍ​ດີ ​ແລະ ຊາວ​ເກາະ ອອກ​ຈາກ​ການ​ຂາຍ​ຊົ່ວຄາວ​ໃນ​ລະຫວ່າງ​ການ​ສອບ​ສວນ​ກໍລະນີ​ດັ່ງກ່າວ.

ກ່ອນ​ທີ່​ໄທ​ກາຍ​ເປັນ “ຈຳ​ເລີຍ” ​ເລື່ອງ​ລີ​ງ​ເກັບ​ໝາກພ້າວ, ອຸດສາຫະກຳ​ປາມ​ນ້ຳມັນ​ຢູ່​ອິນ​ໂດ​ເນ​ເຊຍ​ກໍ​ເປັນ “ຜູ້​ຮ້າຍ” ​ໃນ​ສາຍຕາ​ນັກ​ອະນຸລັກ.

ນ້ຳມັນປາ​ມ ​ເປັນ​ສິນຄ້າ​ທີ່​ຄົນ​ອັງກິດ​ເບິ່ງ​ດ້ວຍ​ສາຍຕາ​ບໍ່​ດີ ​ແລະ ຕ້ອງ​ລະມັດລະວັງ​ຕໍ່​ຂະ​ບວນການ​ຜະລິດ​ຂອງ​ຜະລິດ​ຕະພັນ​ນີ້ ​ເນື່ອງ​ຈາກ​ຂ່າວ​ລົບ​ຫລາຍ​ເລື່ອງ. ມີ​ການ​ວິ​ໄຈ​ລະບຸ​ວ່າ: ຂະ​ບວນການ​ຜະລິດ​ນ້ຳມັນປາ​ມມີ​ສ່ວນ​ໃນ​ການ​ທຳລາຍ​ປ່າ. ຈາກ​ສະຖິຕິ​ພົບ​ວ່າ: ​ເນື້ອທີ່​ປ່າ​ເຊື່ອມ​ໂຊມ​ລະຫວ່າງ​ປີ 1990-2008 ​ເກີດ​ຈາກ​ການ​ລຸກ​ບຸກ, ​ໂຄ້ນ, ຈູ​ດປ່າ ​ເພື່ອ​ປູກ​ປາມ​ນ້ຳມັນ, ທຳລາຍ​ພັນ​ໄມ້, ທີ່ຢູ່​ອາ​ໄສ​ຂອງ​ສັດປ່າ​ເຊັ່ນ: ອຸ​ລັງ​ອຸ​ຕັງ, ​ແຮດ, ຊ້າງ, ​ເສືອ ​ແລະ ​ເຮັດ​ໃຫ້​ປ່າ​ສູນ​ເສຍ​ຄວາມ​ຫລາກ​ຫລາຍ​ທາງ​ຊີວະ​ພາບ.

ເປັນຫຍັງໃຊ້ລີງຂຶ້ນເກັບໝາກພ້າວ ຈຶ່ງເປັນເລື່ອງໃຫຍ່ໃນອັງກິດ - Wave100S AD to Website 2020 0 - ເປັນຫຍັງໃຊ້ລີງຂຶ້ນເກັບໝາກພ້າວ ຈຶ່ງເປັນເລື່ອງໃຫຍ່ໃນອັງກິດ

ທະນາຄານ​ກາງຂອງ​ອັງກິດ​ເຄີຍ​ຄິດ​ຈະ​ໃຊ້​ນ້ຳມັນປາ​ມມາ​ເປັນ​ສ່ວນ​ໜຶ່ງ​ຂອງ​ການ​ພິມ​ທະນະ​ບັດ 20 ປອນ ຊະນິດ​ໃໝ່​ແທນ​ໄຂມັນ​ຈາກ​ສັດ​ທີ່​ຖືກ​ກຸ່ມ​ສາສະໜາ​ຕໍ່ຕ້ານ, ​ແຕ່​ຕ້ອງ​ປ່ຽນ​ໃຈ​ເມື່ອ​ມີ​ຄຳ​ແນະນຳ​ຈາກ​ການ​ວິ​ໄຈ​ທີ່​ລະບຸວ່າ: “ການ​ຈູດ​ປ່າ​ເພື່ອ​ປັບ​ເນື້ອທີ່​ປູກ​ປາມ​ນ້ຳມັນ​ໄດ້​ປ່ອຍ​ກາກ​ບອນ​ໄດ​ອອກ​ໄຊ​ອອກ​ມາ​ໃນ​ລະດັບ​ສູງ​ໃນ​ຊັ້ນບັນຍາກາດ ​ເຊິ່ງ​ເປັນ​ຜົນ​ເສຍ​ຕໍ່​ການ​ປ່ຽນ​ແປງ​ຂອງ​ສະພາບ​ອາກາດ”.

ບັນຫາ​ໝອກ​ຄວັນ​ຄັ້ງ​ໃຫຍ່​ຢູ່​ສິງກະ​ໂປ​ໃນ​ເດືອນ​ມິຖຸນາ 2013 ​ເຊື່ອ​ວ່າ​ມາ​ຈາກ​ໝອກ​ຄວັນ​ຂອງ​ການ​ຈູດ​ປ່າ​ຄັ້ງ​ໃຫຍ່​ຢູ່​ອິນ​ໂດ​ເນ​ເຊຍ ​ເພື່ອ​ການ​ປູກ​ປາມ​ນ້ຳມັນ. ​ເຖິງ​ວ່າ​ເປັນ​ຜູ້​ຮ້າຍ ນັກ​ອະນຸລັກ​ນິຍົມ​ຍັງ​ຍອມຮັບ​ວ່າ: ປາມ​ນ້ຳມັນ​ມີ​ປະ​ໂຫຍດຕໍ່​ມະນຸດ​ຫລາຍ, ​ໃຊ້​ເປັນ​ສ່ວນ​ປະກອບ​ໃນ​ສິນຄ້າ​ຫລວງຫລາຍ ນັບ​ແຕ່​ເຂົ້າໜົມ ​ໄປ​ຈົນ​ເຖິງ​ເຄື່ອງ​ສຳອາງ, ​ເປັນ​ພືດ​ທີ່​ບໍ່​ຕ້ອງ​ໃສ່​ປຸ໋ຍ​ເຄມີ ຫລື ຢາຂ້າ​ແມງ​ໄມ້​ຫລາຍ, ​ເປັນ​ກິດຈະການ​ທີ່​ສ້າງ​ວຽກ​ໃຫ້​ຄົນ​ນັບ​ລ້ານ.

ຈາກ​ຄຸນ​ປະ​ໂຫຍ​ດຫລວງຫລາຍ ຜູ້​ຜະລິດ​ສິນຄ້າ ​ແລະ ຮ້ານ​ຂາຍ​ສົ່ງ​ໃນ​ສະຫະຣາຊະ​ອານາຈັກ​ຈຶ່ງ​ເລືອກ​ຈະ​ກວດ​ສອບ​ຂະ​ບວນການນັບ​ແຕ່​ຕົ້ນທາງ​ວ່າ​ນ້ຳມັນປາ​ມທີ່​ຊື້ມານັ້ນສ້າງ​ຜົນ​ກະທົບ​ຕໍ່​ສິ່ງ​ແວດ​ລ້ອມ ຫລື ບໍ່, ​ແຕ່​ຍັງ​ມີ​ຄຳ​ຖາມ​ວ່າ: ກວດ​ສອບ​ໄດ້​ຫລາຍ​ຊໍ່າ​ໃດ.

ພີຕາ​ລະບຸ​ໃນ​ເອກະສານ​ຖະ​ແຫລ​ງຂ່າວ​ທີ່​ສົ່ງ​ເຖິງ​ສື່​ໄທ​ວ່າ: ພີຕາ​ສຳ​ຫລວດ​ພົບ​ລີງ​ທີ່​ຖືກ​ກັກ​ຂັງ ​ແລະ ບັງຄັບ​ໃຫ້​ຂຶ້ນ​ເກັບ​ໝາກພ້າວ​ຈາກ​ຕົ້ນປະມານ 50 ​ແຫ່ງ.

ທີ​ມງານ​ຂອງ​ພີຕາ​ໄດ້​ຖ່າຍຮູບ​ລີງ​ນ້ອຍ​ທີ່​ຖືກ​ລ່າມ​ດ້ວຍ​ໂສ້​ເສັ້ນສັ້ນ ​ແລະ ຖືກ​ບັງຄັບ​ໃຫ້​ແລ່ນ​ເປັນ​ວົງມົນ ຖືກ​ຈັບ​ໃສ່​ກົງ​​ແຄບ​ທີ່​ວາງ​ຕາກ​ຝົນ ​ແລະ ບັງຄັບ​ຂຶ້ນຕົ້ນ​ໄມ້​ໃນ​ລະດູ​ເກັບ​ກ່ຽວ​ໝາກພ້າວ ​ເພື່ອ​ຫລຸດ​ແຮງ​ງານ​ຄົນ.

ພີຕາ​ເລີ່​ມສືບສວນ​ຂໍ້​ມູນ​ຄວາມ​ຈິງ ​ແລະ ​ໄປ​ທ່ຽວ​ຊົມ​ໂຮງຮຽນ​ຝຶກ​ຫັດ​ລີງ 4 ​ແຫ່ງ ​ແລະ ການ​ແຂ່ງຂັນ​ລີງ​ເກັບ​ໝາກພ້າວ​ອີກ 1 ​ແຫ່ງ ​ເຊິ່ງລູກ​ລີງ​ຈະ​ຖືກ​ພາ​ກຈາກ​ແມ່​ແຕ່​ຍັງ​ນ້ອຍ ​ແລະ ຖືກ​ບັງຄັບ​ໃຫ້​ເກັບ​ໝາກພ້າວ​ຈາກ​ຕົ້ນ​ເພື່ອ​ອຸດສາຫະກຳ​ໝາກພ້າວ​ສົ່ງ​ອອກ​ໄປ​ທົ່ວ​ໂລກ. ພີຕາ​ສັງ​ເກດ​ວ່າລີງ​ເຫລົ່ານັ້ນສະ​ແດງ​ພຶດຕິ​ກຳ​ການ​ເຮັດ​ຊ້ຳໆ ​ເຊິ່ງສະ​ແດງ​ວ່າ​ມັນ​ກຳລັງ​ມີ​ຄວາມ​ຄຽດ.

ລີງ​ທີ່​ຖືກ​ລ່າມ​ໄວ້​ໂຕ​ໜຶ່ງ​ຄຽດ​ຈົນ​ກັດ​ຫາງ​ຕົນ​ເອງ, ສ່ວນ​ອີກ​ໂຕ​ໜຶ່ງ​ຮ້ອງ​ໂຮ​ແບບ​ຄວບ​ຄຸມ​ອາລົມ​ບໍ່​ໄດ້​ຂະນະ​ທີ່​ມັນ​ພະຍາຍາມ​ແລ່ນ​ໜີ​ການ​ຝຶກ​ອັນ​ໂຫດຮ້າຍ ​ແລະ ອີກ​ໂຕ​ໜຶ່ງ​ຢູ່​ໃນ​ກົງ​ຊັ່ນ​ກົງຊ້ຳ​ແລ້ວ​ຊ້ຳອີກ​ດ້ວຍ​ຄວາມສິ້ນຫວັງ​ທີ່​ຈະ​ໜີ​ໄປ​ໃຫ້​ພົ້ນຈາກ​ກົງ​ນີ້. ລີງ​ເຫລົ່ານັ້ນຍັງຖືກ​ລ່າ​ມ​ໄວ້​ກັບ​ຢາງ​ຕີນລົດ​ເກົ່າ ​ໃກ້​ຖັງ​ຂີ້​ເຫຍື້ອ.

ເປັນຫຍັງໃຊ້ລີງຂຶ້ນເກັບໝາກພ້າວ ຈຶ່ງເປັນເລື່ອງໃຫຍ່ໃນອັງກິດ - WhatsApp Image 2020 05 27 at 5 - ເປັນຫຍັງໃຊ້ລີງຂຶ້ນເກັບໝາກພ້າວ ຈຶ່ງເປັນເລື່ອງໃຫຍ່ໃນອັງກິດ
ເປັນຫຍັງໃຊ້ລີງຂຶ້ນເກັບໝາກພ້າວ ຈຶ່ງເປັນເລື່ອງໃຫຍ່ໃນອັງກິດ - WhatsApp Image 2020 05 27 at 5 - ເປັນຫຍັງໃຊ້ລີງຂຶ້ນເກັບໝາກພ້າວ ຈຶ່ງເປັນເລື່ອງໃຫຍ່ໃນອັງກິດ
ເປັນຫຍັງໃຊ້ລີງຂຶ້ນເກັບໝາກພ້າວ ຈຶ່ງເປັນເລື່ອງໃຫຍ່ໃນອັງກິດ - WhatsApp Image 2020 05 27 at 5 - ເປັນຫຍັງໃຊ້ລີງຂຶ້ນເກັບໝາກພ້າວ ຈຶ່ງເປັນເລື່ອງໃຫຍ່ໃນອັງກິດ
ເປັນຫຍັງໃຊ້ລີງຂຶ້ນເກັບໝາກພ້າວ ຈຶ່ງເປັນເລື່ອງໃຫຍ່ໃນອັງກິດ - WhatsApp Image 2020 05 27 at 5 - ເປັນຫຍັງໃຊ້ລີງຂຶ້ນເກັບໝາກພ້າວ ຈຶ່ງເປັນເລື່ອງໃຫຍ່ໃນອັງກິດ
error: Alert: Content is protected !!