ຊ່ວງ​ຍາມ​ຝົນ​ຢ່າ​ເຫລີ​ງ​ໃຈ​​ໄພພິບັດ​ຈະ​ມາ​ຂົ່ມຂູ່​ອາ​ລະວາ​ດ

ຊ່ວງ​ຍາມ​ຝົນ​ຢ່າ​ເຫລີ​ງ​ໃຈ​​ໄພພິບັດ​ຈະ​ມາ​ຂົ່ມຂູ່​ອາ​ລະວາ​ດ - 666 1 - ຊ່ວງ​ຍາມ​ຝົນ​ຢ່າ​ເຫລີ​ງ​ໃຈ​​ໄພພິບັດ​ຈະ​ມາ​ຂົ່ມຂູ່​ອາ​ລະວາ​ດ
ຊ່ວງ​ຍາມ​ຝົນ​ຢ່າ​ເຫລີ​ງ​ໃຈ​​ໄພພິບັດ​ຈະ​ມາ​ຂົ່ມຂູ່​ອາ​ລະວາ​ດ - Untitled design - ຊ່ວງ​ຍາມ​ຝົນ​ຢ່າ​ເຫລີ​ງ​ໃຈ​​ໄພພິບັດ​ຈະ​ມາ​ຂົ່ມຂູ່​ອາ​ລະວາ​ດ

ໂດຍ: ທິດ​ກໍ່າ

ຂ່າວ​ຄາວ​ກ່ຽວ​ກັບ​ໄພພິບັດ​ໃນ​ຊ່ວງ​ກ້າວ​ເຂົ້າຕົ້ນລະດູຝົນ​ປາກົດ​ວ່າມີ​ຫລາຍ​ເຫດການ​ໄດ້​ເກີດ​ຂຶ້ນ ​ເປັນຕົ້ນ​ເລື່ອງ​ການ​ປ່ຽນ​ແປງ​ສະພາບ​ດິນ​ຟ້າ​ອາກາດ, ​ເລື່ອງ​ພາຍຸ, ​ເລື່ອງ​ຝົນຕົກ ນັບ​ທັງ​ພະຍາດ​ບາດ​ເຍົາ​ທີ່​ພວມ​ປາກົດ​ຕົວ​ຕາມ​ລະດູ​ການ, ​ໄຂ້ຍຸງ​ກໍ​ຍັງ​ສືບ​ຕໍ່​ລະບາດ​ໄປ​ເປັນ​ບໍລິ​ເວນ​ກວ້າງ. ມາ​ຮອດ​ປັດຈຸບັນ​ຮູ້​ວ່າ​ມີ​ຜູ້​ຕິດ​ເຊື້ອສະ​ສົມ​ໄຂ້ຍຸງ​ລາຍ 2.000 ກວ່າ​ຄົນ​ໃນ​ທົ່ວ​ປະ​ເທດ ​ແລະ ມີ​ຜູ້​ເສຍ​ຊີວິດ​ໄປ​ແລ້ວ​ຢ່າງ​ໜ້ອຍ 7 ຄົນ. ປາກົດການ​ເລື່ອງ​ເກົ່າ​ແຕ່​ເປັນ​ເຫດ​ທີ່​ເກີດ​ຂຶ້ນ​ໃໝ່​ຄື​ໃນ​ມື້ວັນ​ທີ 2 ກໍລະກົດ 2020 ຜ່ານ​ມາ ພັດ​ວ່າ​ເກີດ​ມີ​ແຜ່ນດິນ​ໄຫວ​ຢູ່ 2 ບ່ອນ​ຄື: ຈຸດ​ທີ​ໜຶ່ງ​ແມ່ນ​ຢູ່​ເຂດ​ບ້ານ​ແກ້ງ​ນ້ອຍ ​ເມືອງ​ລ້ອງ​ຊານ ​ແຂວງ​ໄຊ​ສົມບູນ ມີ​ຄວາມ​ແຮງ​ສັ່ນ​ສະ​ເທືອ​ນ 2,6 ຣິກ​ເຕີ ​ເກີດ​ຂຶ້ນ​ໃນ​ເວລາ 18 ​ໂມງ 04 ນາທີ. ​ໃນ​ຈຸດ​ທີ່​ວ່າ​ນີ້​ແມ່ນ​ຫ່າງ​ຈາກ​ເທດສະບານ​ເມືອງ​ລ້ອງ​ຊານ​ພຽງ 32 ກິ​ໂລ​ແມັດ. ສ່ວນ​ຈຸດ​ທີ​ສອງ​ແມ່ນ​ຢູ່​ເຂດ​ບ້ານ​ປາກ​ລອງ ​ເມືອງ​ໄຊ​ສະຖານ ​ແຂວງ​ໄຊ​ຍະ​ບູລີ ມີ​ຄວາມ​ແຮງ​ສັ່ນ​ສະ​ເທືອ​ນ 3,1 ຣິກ​ເຕີ ​ເກີດ​ຂຶ້ນ​ໃນ​ເວລາ 18 ​ໂມງ 51 ນາທີ ​ເຊິ່ງ​ເປັນ​ເວລາ​ໄລ່​ເລ່ຍກັນ​ກັບ​ຢູ່​ແຂວງ​ໄຊ​ສົມບູນ. ຕໍ່​ມາ​ອີກ​ບໍ່ພໍ​ເທົ່າ​ໃດ​ວັນ ຄື​​ໃນ​ວັນ​ທີ 4 ກໍລະກົດ ພັດ​ມີ​ເຫດການ​ແຜ່ນດິນ​ໄຫວ​ອີກ​ຢູ່​ເຂດ​ບ້ານ​ສີ​ສາຍທອງ ​ເມືອງ​ໄຊ​ສະຖານ ​ແຂວງ​ໄຊ​ຍະ​ບູລີ ມີ​ຄວາມ​ແຮງ​ສັ່ນ​ສະ​ເທືອ​ນ 3,1 ຣິກ​ເຕີ, ​ແຕ່​ວ່າ​ໃນ 3 ​ເຫດການ​ແຜ່ນດິນ​ໄຫວ​ຄັ້ງນີ້ ​ໂຊກ​ດີ​ຍັງ​ບໍ່​ມີ​ຂ່າວ​ຄາວ​ການ​ເສຍ​ຫາຍ​ແຕ່​ປະການ​ໃດ.

ສ່ວນວ່າ​ການ​ແຜ່​ລະບາດ​ຂອງ​ເຊື້ອ​ໄວຣັສ​ໂຄ​ວິດ-19 ນັ້ນ, ​ເຖິງ​ວ່າ​ມາ​ຮອດ​ປັດຈຸບັນ​ຢູ່​ລາວ​ເຮົາ​ຍັງ​ບໍ່​ທັນ​ມີ​ຄົນ​ໃດ​ຕິດ​ເຊື້ອຄືນ​ຕື່ມ, ​ແຕ່​ວ່າ​ໃນ​ປະ​ເທດ​ອ້ອມ​ຂ້າງ ​ແລະ ພາກພື້ນ ນັບ​ທັງຫລາຍ​ປະ​ເທດ​ໃນ​ທົ່ວ​ໂລກ​ຍັງ​ສືບ​ຕໍ່​ມີ​ຜູ້​ຕິດ​ຄືນ ​ແລະ ຂະຫຍາຍ​ໄປ​ເປັນ​ບໍລິ​ເວນ​ກວ້າງ. ຫລ້າ​ສຸດ​ໃນ​ວັນ​ທີ 1 ກໍລະກົດ 2020 ຜ່ານ​ມາ ທີ່​ສະຫະລັດ​ອາ​ເມ​ລິ​ກາ​ໄດ້​ທຸບ​ສະຖິຕິ​ພຽງ​ມື້ດຽວ​ມີ​ຜູ້​ຕິດ​ເຊື້ອ​ໂຄ​ວິດ-19 ຫລາຍ​ກວ່າ 5 ໝື່ນ​ຄົນ.

​ແນວ​ໃດ​ກໍ​ຕາມ, ​ເຖິງ​ວ່າ​ຢູ່​ປະ​ເທດ​ເຮົາ​ບໍ່​ມີ​ຜູ້​ຕິດ​ເຊື້ອ​ໂຄ​ວິດ ​ແຕ່​ເພື່ອ​ຄວາມ​ປອດ​ໄພ​ແກ່​ປວງ​ຊົນ​ລາວ​ທັງ​ຊາດ ທາງ​ຂັ້ນ​ເທິງ ກໍ​ຄື​ພັກ ​ແລະ ລັດຖະບານ​ເຮົາ​ຍັງ​ສືບ​ຕໍ່​ປິດ​ຊາຍ​ແດນ​ທົ່ວ​ທຸກ​ພາກ​ຂອງ​ປະ​ເທດ ນັບ​ທັງ​ດ່ານ​ສາກົນ ​ແລະ ດ່ານ​ປະ​ເພນີ ກໍ​ຂໍ​ໃຫ້​ບັ້ນຮົບ​ຕ້ານ​ໂຄ​ວິດ-19 ຈົ່ງ​ດຳ​ເນີນ​ໄປ​ຕາມ​ສະພາບ​ຄວາມ​ເປັນ​ຈິງ ​ແລະ ຂໍ​ໃຫ້​ເຊື້ອພະຍາດ​ດດັ່ງກ່າວ​ຈົ່ງ​ໜີ​ຫ່າງ ​ແລະ ມະ​ຫັບ​ມະຫາຍ​ໄປ​ຈາກ​ເມືອງ​ລາວ​ຄົນ​ລາວ​ທີ່​ມີ​ພົນລະ​ເມືອງ​ພຽງ 7 ລ້ານ​ຄົນ. ສ່ວນວ່າ​ໄພພິບັດ​ທີ່​ຈະ​ມາ​ທາງ​ທຳ​ມະ​ຊາດ ​ເປັນຕົ້ນພາຍຸ​ຝົນຕົກ​ໜັກ​ອັນ​ຈະ​ພາ​ໃຫ້​ເກີດ​ນ້ຳຖ້ວມ, ນ້ຳປ່າ​ໄຫລ​ຫລາກ, ​ໃນ​ຫລາຍ​ວັນ​ຫລາຍ​ຄືນ​ນັ້ນກໍ​ຂໍ​ຢ່າ​ມີ​ມາ​ໃຫ້​ເຫັນ ​ເພາະ​ໃນ​ສອງ​ສາມ​ປີ​ກ່ອນ ລາວ​ເຮົາ​ເຄີຍ​ປະສົບ​ພົບ​ພໍ້​ມາ​ແລ້ວ. ດ້ານ​ໜຶ່ງ​ກໍ​ຂໍ​ຊົມ​ເຊີຍ​ທາງ​ກົມ​ອຸຕຸນິຍົມ ​ແລະ ອຸ​ທົກ​ກະສາ​ດທີ່​ໄດ້​ແຈ້ງ​ສະພາບ​ການ​ປ່ຽນ​ແປງ​ດິນ​ຟ້າ​ອາກາດ​ຢ່າງ​ລຽນຕິດ ບໍ່​ວ່າ​ຍາມ​ແລ້ງ ຫລື ຍາມ​ຝົນ ​ໂດຍ​ສະ​ເພາະ​ຊ່ວງ​ລະດູຝົນ ນັບ​ແຕ່​ເດືອນ​ມິຖຸນາ​ໄປ​ຫາ​ເດືອນ​ຕຸລາ​ຍິ່ງ​ເພີ່ມ​ທະວີ​ໃຫ້​ຄວາມ​ສຳຄັນ​ເປັນ​ພິ​ເສດ, ​ເພາະ​ຖ້າ​ເກີດ​ໄພ​ອັນຕະລາຍ​ຈາກ​ໄພພິບັດ​ນ້ຳຖ້ວມ​ມັນ​ມີ​ຄວາມ​ສ່ຽງ​ສູງ​ສຳລັບ​ບ້ານ​ເຮົາ​ໃນ​ສະພາບ​ປັດຈຸບັນ ຍ້ອນ​ວ່າ​ສະພາບ​ການ​ປ່ຽນ​ແປງ​ຂອງ​ປະ​ເທດ​ເກີດ​ມີ​ເຂື່ອນ​ນັບ​ມື້ນັບ​ຫລາຍ​ໃນ​ທົ່ວ​ປະ​ເທດ. ສະ​ເພາະ​ສາຍ​ນ້ຳງື່ມ​ເອງ​ກໍ​ເລີ່​ມ​ແຕ່ງື່ມໜຶ່ງ​ຈົນ​ຮອດ​ງື່ມຫ້າ, ຖ້າ​ເກີດ​ອໍລະ​ຫົນ​ໄພພິບັດ​ມາ ຜູ້​ຢູ່​ລຸ່ມ​ເຂື່ອນ​ໜີ​ບໍ່​ທັນ​ກໍ​ເປັນ​ອັນວ່າ​ພາກັນ​ຕາຍ​ໄຫລ​ນ້ຳ​ເໝືອນ​ດັ່ງ​ເຊ​ປຽນ-​ເຊ​ນ້ຳນ້ອຍ​ແຕກ​ໃນ​ປີ 2017 ຢູ່​ເມືອງ​ສະໜາມ​ໄຊ ​ແຂວງ​ອັດ​ຕະປື.

ຊ່ວງ​ຍາມ​ຝົນ​ຢ່າ​ເຫລີ​ງ​ໃຈ​​ໄພພິບັດ​ຈະ​ມາ​ຂົ່ມຂູ່​ອາ​ລະວາ​ດ - Wave100S AD to Website 2020 0 - ຊ່ວງ​ຍາມ​ຝົນ​ຢ່າ​ເຫລີ​ງ​ໃຈ​​ໄພພິບັດ​ຈະ​ມາ​ຂົ່ມຂູ່​ອາ​ລະວາ​ດ

​ເມື່ອ​ຕັ້ງ​ໂຈດ​ກັນ​ວ່າ, ​ເພື່ອ​ຫລີກ​ລ່ຽງ​ໄພພິບັດ​ທີ່​ຈະ​ມາ​ຂົ່ມຂູ່​ອາ​ລະວາ​ດຕ້ອງ​ເຮັດ​ແນວ​ໃດ ? ຄຳ​ຕອບ​ໂຈດ​ກໍ​ຄື​ທາງ​ທີ່​ດີ​ຕ້ອງ​ມີ​ສະຕິ​ເປັນ​ເຈົ້າຕົນ​ເອງ​ໃນ​ການ​ຕິດຕາມ​ຂໍ້​ມູນ​ຂ່າວສານ​ຢ່າງ​ໃກ້ຊິດ, ຢ່າ​ພາກັນ​ລະ​ເຫລີງ​ຢ່າງ​ເດັດຂາດ ​ເພາະ​ສະພາບ​ການ​ປ່ຽນ​ແປງ​ດິນ​ຟ້າ​ອາກາດ​ຄື​ທຸກ​ມື້ນີ້​ມັນ​ຄາດ​ເດົາ​ໄດ້​ຍາກ. ມີ​ແຕ່​ຕິດຕາມ​ຂໍ້​ມູນ​ຂ່າວສານ​ຈາກ​ຂະ​ແໜງ​ການ​ທີ່​ກ່ຽວຂ້ອງ​ເທົ່າ​ນັ້ນຈຶ່ງ​ສາມາດ​ຮູ້​ໄດ້​ວ່າ​ຝົນ​ຈະ​ຕົກ ຫລື ບໍ່​ຕົກ, ຕົກ​ຢູ່​ເຂດ​ໃດ, ພາກ​ໃດ ຫລື ພາຍຸ​ຈະ​ມາ​ມື້​ໃດ, ວັນ​ໃດ, ຕົກ​ຫລາຍ​ຕົກ​ໜ້ອຍ. ສະ​ເພາະ​ຢູ່​ປະ​ເທດ​ທີ່​ເພິ່ນ​ຈະ​ເລີ​ນກ້າວໜ້າ​ທາງ​ດ້ານ​ເຕັກ​ໂນ​ໂລ​ຊີ ​ເພິ່ນ​ສາມາດ​ບອກ​ໄດ້​ລ່ວງ​ໜ້າ​ຢ່າງ​ແມ້ນ​ຢ້ຳ ​ເປັນຕົ້ນພາຍຸ​ໃຫຍ່​ຈະ​ມາ​ເພິ່ນ​ກໍ​ຮູ້, ຈະ​ເກີດ​ແຜ່ນດິນ​ໄຫວ​ເພິ່ນ​ກໍ​ຮູ້, ຈະ​ເກີດ​ຄື້ນສຶນາ​ມິ​ມາ​ເພິ່ນ​ກໍ​ຮູ້, ຈະ​ເກີດ​ມີ​ພະຍາດ​ບາດ​ເຍົາ​ໄປ​ຕາມ​ລະດູ​ການ​ເພິ່ນ​ກໍ​ມີ​ວິທີ​ປ້ອງ​ກັນ​ໄວ້​ລ່ວງ​ໜ້າ ​ໂດຍ​ໃຫ້​ປະຊາຊົນ​ຫລົບ​ຫລີກ ຫລື​ວ່າ ຫາ​ວິທີ​ຕໍ່ສູ້​ກັບ​ມັນ. ສ່ວນ​ຢູ່​ປະ​ເທດ​ເຮົາ​ທີ່​ຍັງ​ອ່ອນ​ນ້ອຍ​ດ້ອຍ​ພັດທະນາ​ມີ​ບາງ​ຢ່າງ​ຄວາມ​ຕາຍ​ຈະ​ມາ​ເຖິງ​ເຮົາ​ຍັງ​ບໍ່​ຮູ້ ​ເປັນຕົ້ນ​ແຜ່ນດິນ​ໄຫວ​ມັນ​ເກີດ​ແລ້ວ​ຈຶ່ງ​ຮູ້, ຝົນຕົກ​ລິນ​ໜັກ​ເປັນ​ສີ່​ຫ້າມື້ຍັງ​ພາກັນ​ໄປ​ຊອກ​ຫາ​ຢູ່​ຫາ​ກິນ​ຕາມ​ປ່າ​ຕາມ​ດົງ, ຕາມ​ແມ່ນ້ຳລຳ​ເຊ ຫລື ພາກັນ​ນັ່ງ​ກິນ​ນັ່ງ​ດື່ມ​ຊຸມ​ແຊວ ບາດ​ເຫດ​ເກີດ​ຂຶ້ນນ້ຳຫລຸ​ລັ່ງ​ເທ​ມາ​ໃນ​ພິບ​ຕາ​ດຽວ​ໜີ​ບໍ່​ທັນ​ກໍ​ເປັນ​ອັນວ່າ​ສັງ​ເວີຍ​ຊີວິດ​ໄປ​ຍ້ອນ​ນໍ້າ.

​ເຖິງ​ຢ່າງ​ໃດ​ກໍ​ດີ, ມາ​ຮອດ​ຍຸກ​ປັດຈຸບັນ​ນີ້ ປະ​ເທດ​ເຮົາ​ກໍ​ພວມ​ສາ​ສ້າງ​ພັດທະນາ​ໃຫ້​ປະ​ເທດ​ຊາດ​ກ້າວໜ້າ​ໄປ​ຄື​ໝູ່ ມີ​ຫລາຍ​ອັນ​ຫລາຍ​ຢ່າງ​ພວກ​ເຮົາ​ກໍ​ເລີ່​ມ​ເຮັດ​ໄດ້ ​ແລະ ມີ​ອັນ​ປ່ຽນ​ແປງ​ໄປ​ຢ່າງ​ຫລາຍ​ອັນ​ຫລາຍ​ຢ່າງ ​ເປັນຕົ້ນ​ໃນ​ເລື່ອງ​ອຸຕຸນິຍົມ ​ແລະ ອຸ​ທົກ​ກະສາ​ດດຽວ​ນີ້​ຮູ້ສຶກ​ວ່າ​ແມ້ນ​ຢ້ຳກວ່າ​ເກົ່າ​ໃນ​ເລື່ອງ​ຟ້າ​ຝົນ ​ແລະ ມີ​ແຈ້ງ​ການ​ຢ່າງ​ລຽນຕິດ, ສາມາດ​ຮູ້​ຮອດ​ຊື່​ພາຍຸ, ຈະ​ຕົກ​ໜ້ອຍ​ຕົກ​ຫລາຍ, ຕົກ​ຢູ່​ພື້ນທີ່​ໃດ​ກໍ​ຖື​ວ່າ​ໄດ້​ຊ່ວຍ​ໃຫ້​ຮູ້ລ່ວງ​ໜ້າ​ຢ່າງ​​ໃຫຍ່​ຫລວງ​ໃນ​ການ​ຕິດຕາມ​ສະພາບ​ດິນ​ຟ້າ​ອາກາດ. ຖ້າ​ສົມທຽບ​ໃສ່​ສາມ​ສີ່​ສິບ​ປີ​ຫລັງ​ກໍ​ຖື​ວ່າ​ໄດ້​ພັດທະນາ​ຂຶ້ນຫລາຍ. ​ແຕ່​ກ່ອນ​ເວົ້າ​ເລື່ອງ​ຟ້າ​ຝົນ​ຈະ​ຕົກ​ມື້​ເພັງ​ດັນ​ໄປ​ຕົກ​ມື້​ແຮມ, ວ່າ​ຈະ​ຕົກ​ຢູ່​ແຖວ​ວຽງ​ຈັນ​ດັນ​ໄປ​ຕົກ​ຢູ່​ສະຫວັນ​ນະ​ເຂດ, ວ່າມື້ອື່ນ​ອາກາດ​ຈະ​ໜາວ​ຫລາຍ​ພັດ​ມີ​ຕາ​ເວັນ​ເຕັມ​ດວງ​ຮ້ອນ​ອົບ​ເອົ້າ. ນີ້​ລະ​ຄື​ສິ່ງ​ທີ່​ແນ່ນອນ​ຂອງ​ຄວາມ​ບໍ່​ແນ່ນອນ​ ຈຶ່ງ​ຢ່າ​ພາກັນ​ເຫລີງ​ໃຈ​ຢ້ານ​ໄພ​ອັນຕະລາຍ​ຈະ​ມາ​ຢຽບ​ມ້າມ​ໃນ​ເວລາ​ນອນ​ພວມ​ຫລັບ​ຍາມ​ທ່ຽງ​ຄືນ.

ຊ່ວງ​ຍາມ​ຝົນ​ຢ່າ​ເຫລີ​ງ​ໃຈ​​ໄພພິບັດ​ຈະ​ມາ​ຂົ່ມຂູ່​ອາ​ລະວາ​ດ - WhatsApp Image 2020 05 27 at 5 - ຊ່ວງ​ຍາມ​ຝົນ​ຢ່າ​ເຫລີ​ງ​ໃຈ​​ໄພພິບັດ​ຈະ​ມາ​ຂົ່ມຂູ່​ອາ​ລະວາ​ດ
ຊ່ວງ​ຍາມ​ຝົນ​ຢ່າ​ເຫລີ​ງ​ໃຈ​​ໄພພິບັດ​ຈະ​ມາ​ຂົ່ມຂູ່​ອາ​ລະວາ​ດ - WhatsApp Image 2020 05 27 at 5 - ຊ່ວງ​ຍາມ​ຝົນ​ຢ່າ​ເຫລີ​ງ​ໃຈ​​ໄພພິບັດ​ຈະ​ມາ​ຂົ່ມຂູ່​ອາ​ລະວາ​ດ
error: Alert: ເນື້ອຫາຂ່າວມີລິຂະສິດ !!