ການກໍ່ສ້າງສະຖານີວິທະຍຸ-ໂທລະພາບໄຊສົມບູນ ສໍາເລັດແລ້ວ 50%

ວັນທີ 7 ກໍລະກົດນີ້, ທ່ານ ສະຫວັນຄອນ ຣາຊະມຸນຕີ ຮອງລັດຖະມົນຕີກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ພ້ອມຄະນະ ໄດ້ເຄື່ອນໄຫວຕິດຕາມ ແລະ ຊຸກຍູ້ໂຄງການກໍ່ສ້າງສະຖານີວິທະຍຸ-ໂທລະພາບແຂວງໄຊສົມບູນ ​ແລະ ​ໄດ້​ຮັບ​ລາຍ​ງານ​ຈາກທ່ານ ຮວ່າງ ແຄັງ ແທງ ຮອງຫົວໜ້າຜູ້ຊີ້ນຳພາກສະໜາມ ຕາງໜ້າບໍລິສັດ ຮ່ວມມືເສດຖະກິດ ໂກເອກໂກ ຈຳກັດຜູ້ດຽວ ທີ່ເປັນບໍລິສັດຮັບເໝົາກໍ່ສ້າງສະຖານີ​ດັ່ງກ່າວວ່າ: ໂຄງການກໍ່ສ້າງມາ​ຮອດ​ປັດຈຸບັນ​ສຳ​ເລັດ​ແລ້ວ 50% ຂອງ​ໜ້າ​ວຽກ​ທັງ​ໝົດ​ເຊັ່ນ: ອາຄານຫ້ອງການສອງຊັ້ນ, ເຮືອນຕິດຕັ້ງເຄື່ອງຈ່າຍສັນຍານ, ຫໍພັກພະນັກງານເຕັກນິກ, ເຮືອນຕິດຕັ້ງຈັກດູດນໍ້າ, ອ່າງນໍ້າໃຕ້ດິນ, ເຈາະນໍ້າບາດານ, ອ່າງກັ່ນຕອງນໍ້າ, ລະບົບດັບເພີງ, ໄຟຟ້າ ແລະ ເສົາອັງແຕນ ສູງ 75 ແມັດ, ພາຍຫລັງລົງມືກໍ່ສ້າງມາແຕ່ເດືອນກຸມພາຜ່ານ​ມາ, ຄາດ​ວ່າ​ຈະ​ໃຫ້​ສຳ​ເລັດ​ພາຍ​ໃນໄລຍະເວລາ 23 ເດືອນ ​ໃນມູນຄ່າການ​ຊ່ວຍ​ເຫລືອທັງໝົດ 118 ຕື້ກວ່າດົງຫວຽດນາມ, ໃນນັ້ນ ມີທຶນສົມທົບຂອງລັດຖະບານລາວ 1,8 ຕື້ກີບ ​ເພື່ອ​ແນ​ໃສ່​ພັດທະນາ​ວຽກ​ງານ​ສື່​ມວນ​ຊົນ​ຂອງ​ແຂວງ​ໄຊ​ສົມບູນ​ໃຫ້​ມີ​ຄວາມ​ເຂັ້ມ​ແຂງ.